Ia haere tamau tatou i mua ma te haapao maite â i te hoê â reni
1 E aroha taa ê mau to te aposetolo Paulo no te amuiraa no Philipi ta ˈna i faaineine. Ua haamauruuru oia ia ˈna no te tauturu i te pae materia î i te here ta ˈna i horoa e ua faahiti o ˈna ia ˈna ei hiˈoraa.—Kor. 2, 8:1-6.
2 Na te hoê here hohonu i turai ia Paulo ia papai i te mau taata no Philipi. Te taiohia nei i roto i te Buka tauturu, mau api 1176, 1177 e: “I te roaraa o ta ˈna rata, te faaitoito nei o ˈna i to Philipi ia tamau i roto i ta ratou eˈa faahiahia roa, ia imi i te hoê ite maitai roa ˈˈe, ia tapea maite i te parau o te ora, ia haapaari faahou i to ratou faaroo e to ratou tiaturiraa o no te haamauruururaa no a muri aˈe.” Ua farii popou ratou i taua mau parau ra e ua haapaari i te taairaa here o tei tahoê ia ratou i te aposetolo. E auraa taa ê mau to te mau parau a Paulo no tatou i teie mahana, ma te horoa mai ia tatou ra te hoê tumu papu no te feruri maite i nia i te aˈoraa ta ˈna e horoa maira, i roto iho â râ i te Philipi 3:15-17.
3 E mea faufaa te hoê huru feruriraa paari: I to Paulo papairaa i to Philipi (3:15), e taata aravihi oia e rave rahi matahiti. Ua ite oia e te haere ra ratou i mua i te pae varua, ma te faahiti ia ratou mai te mau kerisetiano paari e huru feruriraa maitai to ratou. A faaite noa ˈi to ratou huru feruriraa i te haehaa e te aau mehara mai to Iesu, e riro noa ratou ei ‘feia hapa ore, e te ino ore, ei tamarii na te Atua aore e faainoraa i te tapea maite i te parau ora’. (Phil. 2:15, 16.) Ia taio anaˈe tatou i te mau parau a Paulo, e tia ia tatou ia feruri e te parau maira oia ia tatou. Te hinaaro uˈana nei tatou i te hoê â huru feruriraa mai to Iesu, e e faaite i te hoê aau mehara haehaa no ta tatou mau haamaitairaa taa ê. Te pure nei tatou ma te tuutuu ore ia Iehova ia tauturu mai o ˈna ia tatou i roto i taua tuhaa ra e te tahi atu.—Phil. 4:6, 7.
4 Mai ta te Philipi 3:16 e faaite ra, e tia ia tatou paatoa ia haere i mua. Te “haereraa i mua” o te “ohiparaa ia tupu i te rahi”. Te anaanatae ra te feia e hinaaro ra e haere i mua i te mau manaˈo apî, i te mau ohipa i itehia aore ra i te mau raveraa apî. Ua hinaaro o Paulo ia taa i te mau taata no Philipi eita te kerisetianoraa e faaea noa i taua noa faito ra e e tia râ i te feia o te titau ra i te reira ia haere tamau i mua. E tia ia ratou ia faaite i to ratou hinaaro e haere i mua ma te hiˈopoa ia ratou iho, ma te farii i to ratou mau paruparu e ma te imi i te rave hau atu aore ra ia haamaitai i te huru o te mau ohipa ta ratou i rave. I teie mahana, te tamau noa ra te faanahonahoraa a Iehova i nia i te fenua nei i te haere maine i mua, ma te faarahi atu â i te tuhaa o ta ˈna ohipa e to ˈna maramarama no te Parau a te Atua. E tia ia tatou ia haere i te hoê taahiraa e o ˈna, ma te haafaufaa i te mau mea ta ˈna e horoa mai ia tatou ra e ma te apiti taatoa i roto i ta ˈna ohipa.
5 Te titau ra te haereraa i mua i te aˈoraa e te tapearaa i te hoê â reni: Te parau faahou ra o Paulo ma te aˈo i to ˈna mau taeae e ia ‘haere tamau i mua ma te haapao maite â hoi i te hoê â reni’. (Phil. 3:16.) Te titau ra te aˈoraa ia ˈna iho ia vaiiho noa tatou i te mau taata e te mau ohipa i to ratou iho mau parahiraa e ia faaite tatou i te hoê huru maitai. Ua faaea noa te mau kerisetiano no Philipi i to ratou parahiraa, ma te tapiri noa i te faanahonahoraa a Iehova e to ratou mau taeae. Na te ture o te here i aratai i to ratou oraraa (Ioane 15:17; Phil. 2:1, 2). Ua faaitoito o Paulo ia ratou ‘ia au to ratou haerea i te parau apî maitai’. (Phil. 1:27.) E mea faufaa atoa te nahonaho e te hoê huru au no te mau kerisetiano i teie mahana.
6 Te auraa e ‘haere i te hoê a reni’ oia hoi te ohiparaa i roto i te hoê â manaˈo, ia au i te hoê huru haerea haamau-maitai-hia. O te faatupuraa ïa i te mau ohipa mai tei matauhia. E nehenehe te ‘haereraa i te hoê â reni’ e riro mai ei mea maitai no tatou, no te mea eita tatou e haamarirau e e feruri no te rave i te mau faaotiraa no nia i te mau mea ta tatou e rave—ua haamau aˈena tatou i te hoê aratairaa o ta tatou e apee nei ei peu.
7 Te haereraa na roto i te hoê huru teotaratia ma te aˈo i roto i te hoê â reni o te auraroraa ïa tatou i te mau peu maitatai, faufaa, e tuea ra i te hinaaro o te Atua—e te fa no te faaitoito ia tatou, e no te tauturu ia vetahi ê, e no te rave hau atu â i roto i te taviniraa a Iehova mai te peu e e nehenehe. Ia tapea i taua mau fa ra, e mea faufaa ia haamau e ia tapea i taua noâ reni ra mai te haapiiraa tataitahi, te haere-tamau-raa i te mau putuputuraa e te apitiraa i roto i te ohipa pororaa.
8 Te tahi mau tuhaa faufaa: Te hoê o ratou oia hoi te ‘ite mau e te hoê ite tia ra’. (Phil. 1:9.) E faarahi te haapiiraa tataitahi i to tatou faaroo, e haapaari i to tatou aau mehara no te parau mau e e turai ia tatou i te mau ohipa maitatai. Teie râ, e mea fifi no vetahi ia noaa mai te mau peu maitatai i te pae no te haapiiraa. O te ereraa te taime te hoê o te mau tumu matamua.
9 E mau faufaa mau te mau haamaitairaa o te hoê taioraa bibilia i te mau mahana atoa. E mea “maitai” ta ˈna haapiiraa no te mau taata atoa (Tim. 2, 3:16, 17). Nafea e ite ai i te taime i roto i ta tatou mau ohipa matauhia i te mau mahana atoa no te haapii i te Bibilia? Te na reira nei vetahi na roto i te tia-oioi-raa i te mau poipoi atoa, e mea araara maitai to ratou feruriraa. Mea hau aˈe na vetahi e taio tau minuti noa hou a taoto ai i te po. Te faanaho nei te mau vahine i te fare i te tahi taime i te avatea na mua ˈˈe te tahi atu mau melo o te utuafare e hoˈi mai te ohipa aore ra te haapiiraa. Hau atu i te hoê taioraa tamau o te Bibilia, te faaô nei vetahi i te taioraa o te buka Feia poro i roto i ta ratou mau haapiiraa o te hebedoma matauhia.
10 Ia mau maitai te mau peu apî, e nehenehe te mea tahito e hoˈi mai. I mutaa ihora, ua matau na paha tatou i te rave i te mau ohipa i te piti o te parahiraa i roto i te mau taime vata. E ere i te mea ohie ia taui i teie huru raveraa. Aita e taata e faahepo mai ia tatou i te mau peu i te pae haapiiraa; aita atoa ta tatou e ohipa e faahoˈi no te mea ta tatou e rave ra i roto i taua tuhaa ra. E mea maitatai roa ta tatou mau peu i te pae haapiiraa ia haafaahiahia anaˈe tatou i te “mau mea i hau i te maitai ra” e mai te peu e te hinaaro nei tatou e faaherehere “i te taime” ia faufaahia.—Phil. 1:10; Eph. 5:16.
11 E tiaraa faufaa roa to te mau putuputuraa kerisetiano i roto i to tatou mau haereraa i mua i te pae varua, no te mea e horoa mai te reira i te haapiiraa e te faaitoitoraa o ta tatou e hinaaro nei. No reira, ua riro te haereraa i te mau putuputuraa ei tuhaa ê atu faufaa no te faaite i te aˈo e ia haere i te hoê â reni. Ua haapapu o Paulo i to ˈna faufaaraa. E ere te haereraa i te mau putuputuraa i te hoê maitiraa tataitahi.—Heb. 10:24, 25.
12 Nafea ia aˈo ia tatou iho ia haamau anaˈe tatou i ta tatou porotarama no te taviniraa o te hebedoma? Te faanaho nei vetahi i te mau taime taa ê no ta ratou iho mau ohipa, e te tamata nei ratou i te faaô i te mau putuputuraa i te mau taime vata, e tia râ ia tauihia te huru raveraa. E tia ia tuuhia te mau putuputuraa o te hebedoma na mua e ia faanaho i te tahi atu mau ohipa na pihai iho mai.
13 No te haere tamau i te mau putuputuraa, e mea faufaa ia haamau te utuafare fetii i te hoê porotarama maitai e te hoê turu maitai. I te mau mahana o te hebedoma, e mea î ta tatou porotarama e te ere nei tatou i te taime. E tia ïa, mai te peu e e nehenehe, ia oti oioi te maa no taua po ra ia nehenehe te utuafare e tamaa, e faaineine e ia tae i te putuputuraa hou a haamata ˈi. No te na reiraraa, e nehenehe te mau melo o te utuafare e rave amui na roto i te mau ravea e rave rau.
14 E mea faufaa te hoê apitiraa tamau i roto i te pororaa mai te peu e te hinaaro nei tatou e haere i mua ma te aˈo i roto i te hoê â reni. Te ite maitai ra tatou tataitahi i ta ˈna hopoia rahi ia poro i te poroi o te Basileia. Na te reira e faariro ia tatou ei mau Ite no Iehova (Isa. 43:10). I te mea hoi o te ohipa ru e te mau faufaa roa ˈˈe te reira i teie mahana, eita e nehenehe e faariro i te reira mai te hoê tuhaa o te ravehia na muri aˈe i roto i ta tatou porotarama. Ua horoa o Paulo i teie aˈoraa e: “E teie nei, e na ô tatou ia ˈna ra i te pûpû i te tusia ra i te haamaitai i te Atua, eiaha e tuutuu, oia hoi ta te vaha nei, i te haamaitairaa i to ˈna ra iˈoa.”—Heb. 13:15.
15 Ia faanaho tatou i ta tatou ohipa o te hebedoma, e tia ia tatou ia faaherehere i te taime no te pororaa. Te faanaho ra paha te amuiraa i te mau putuputuraa no te taviniraa e rave rahi taime i te hebedoma e e tia noa ia tatou ia faaoti e teihea ta tatou e turu. E mea maitai ia tamata i te apiti i roto i te tuhaa tataitahi o te taviniraa, mai te opereraa i te mau vea aore ra te tahi atu mau buka i tera e tera fare, ia rave i te mau hoˈi-faahou-raa e farerei e ia faatere i te mau haapiiraa bibilia. E nehenehe atoa tatou e faaite na roto i te hoê huru faanaho-ore-hia ma te rave mai i te mau buka na muri iho ia tatou e ma te tamoemoe i te mau taime no te haamata i te mau aparauraa. I te mea hoi i roto i te rahiraa o te taime te haere nei tatou e poro e o vetahi ê, e nehenehe tatou e aniani e eaha ta ratou porotarama no te faanaho na muri ia ratou.
16 E tia ia tatou ia tapea i te peu ra e poro noa ˈtu te tâuˈa-ore-raa. Te ite ra tatou e mea iti te mau taata e farii i te poroi (Mat. 13:15; 24:9). Ua horoahia te hopoia ra ia Ezekiela ia poro i te feia ‘orure hau, tâhitohito e te aau etaeta’. Ua tǎpǔ o Iehova e tauturu oia ia Ezekiela ma te faariro i to ˈna ‘rae paari aˈe i to ratou mau rae’, oia hoi “mai te semira etaeta rahi to ˈna i to te ofai”. (Ezek. 2:3, 4; 3:7-9.) Te titau ra ïa te haere-tamau-raa i roto i te taviniraa i te faaoromai.
17 Te mau hiˈoraa maitatai ia apeehia: Ia horoa te hoê taata i te hiˈoraa, te poro rahi nei te rahiraa o tatou. Ua horoa o Paulo e to ˈna mau hoa i te hiˈoraa maitai e ua faaitoito te aposetolo ia vetahi ê ia apee ia ˈna (Phil. 3:17). Ua haere oia na roto i te hoê â reni ma te haapao i te mau tuhaa atoa no te atuatu i te hoê huru pae varua puai.
18 I teie mahana atoa, te haamaitaihia ra tatou, no te mea te vai ra ta tatou mau hiˈoraa maitatai. I roto i te Hebera 13:7, ua horoa o Paulo i teie aˈoraa e: “E haamanaˈo i to outou mau aratai (...) e pee atu i to ratou faaroo, ma te manaˈo maite i te hopea o ta ratou parau.” O Iesu iho â ïa to tatou Hiˈoraa, e nehenehe râ tatou e apee i te faaroo o te feia e aratai ra ia tatou. Mai ia Paulo, e tia i te mau matahiapo ia ite i te faufaaraa ia horoa i te mau hiˈoraa maitatai. Noa ˈtu e e nehenehe to ratou huru oraraa tataitahi e taui, e tia râ ia ratou ia faaite e feia aˈo noa ratou e te haere ra ratou na roto i te hoê â reni ma te tuu noa i te mau faufaa o te Basileia i te parahiraa matamua. A rave noa ˈi ratou i ta ratou mau hopoia i te pae o te ohipa e o te utuafare, e tia i te mau matahiapo ia rave i te mau peu maitatai no te haapiiraa tataitahi e te haereraa i te mau putuputuraa, e ia horoa i te hiˈoraa i roto i te pororaa. Mai te peu e te faaite ra te mau matahiapo e mau taata ‘aˈo maitai ratou i to ratou iho utuafare’, e faaitoitohia te mau melo o te amuiraa ia tamau i te haere ma te aˈo i roto i te hoê â reni.—Tim. 1, 3:4, 5.
19 Te mau fa no te matahiti taviniraa apî: E taime maitai te haamataraa o te hoê matahiti taviniraa no te feruri i nia i ta tatou huru haereraa i roto i te hoê â reni. Eaha ta te hoê hiˈopoaraa o ta tatou taviniraa i te matahiti i mairi e haapapu ra? Ua tapea anei tatou, e ua haamaitai atoa anei i ta tatou faito taviniraa? Peneiaˈe ua faahohonu atu â tatou i ta tatou haapiiraa tataitahi. Ua tamau paha tatou i te haere i te mau putuputuraa e ua faarahi i ta tatou pororaa ma te riro mai ei mau pionie tauturu. E nehenehe paha tatou e faahiti i te tahi mau ohipa taa ê i to tatou faaiteraa i to tatou hamani maitai i nia i te tahi atu mau melo o te amuiraa aore ra o to tatou utuafare fetii. Mai te peu e te reira iho â, e nehenehe tatou e oaoa i te haereraa na roto i te hoê huru e auhia e te Atua, e mau tumu maitatai ta tatou no te ‘faarahi atu â i te na reira’.—Tes. 1, 4:1.
20 Eaha ïa mai te peu e ua maumau rii na ta tatou iho mau peu tataitahi? Ua maˈihia na anei tatou i te pae varua? Ua haafifihia na anei ta tatou mau haereraa i mua no te tahi tumu? E na roto i te hoê pure ia Iehova e maitaihia ˈi (Phil. 4:6, 13). A faaite i to outou mau hinaaro i te tahi atu mau melo o te utuafare; a ani ia ratou ia tauturu mai ia outou ia rave i te mau faanahoraa apî no te mau peu maitatai roa ˈˈe. Mai te peu e e fifi to outou, a ani i te tauturu i te mau matahiapo. Mai te peu e e tutava maite tatou e te farii ra tatou i te aratairaa a Iehova, e papu ia tatou e eita tatou e “toaruaru e te hotu ore”.—Petero 2, 1:5-8.
21 E horoa mai te haereraa e te aˈo na roto i te hoê â reni i te mau haamaitairaa ia hoonahia ta tatou mau tutavaraa. Ma te faaoti i te haere i mua e te aˈo i roto i te hoê â reni, “eiaha ia toaruaru i te ohipa; ia mahanahana te aau, i te taviniraa [ia Iehova] ra”. (Roma 12:11.)—E ite outou i te hoê tuatapaparaa hau atu â o teie tumu parau i roto i Te Pare Tiairaa no te 1 no me 1985, mau api 13-17 (farani).