Te mau putuputuraa aravihi no te pororaa
1 I roto i te Luka 10:1-11, te faahitihia ra te hoê putuputuraa ta Iesu i faatupu e 70 pǐpǐ apî no te tauturu ia ratou ia faaineine no te pororaa. Ua horoa oia na ratou i te mau faaueraa papu no nia i te huru faanahoraa, te faaiteraa i te poroi e te faarururaa i te mau tupuraa fifi. E nehenehe tatou e huti mai i te haapiiraa na roto i teie aamu.
2 Ua haere paatoa mai na pǐpǐ e 70 i te putuputuraa ta Iesu i faanaho e o ratou. E pau te taime i te putuputuraa no te taviniraa ia matau anaˈe vetahi i te tae mai i muri aˈe i te hora. E tia ïa ia faanaho faahou i te mau pereoo e ia opere faahou i te tuhaa fenua, o te faataere pinepine nei i te taatoaraa. E nehenehe tatou e rave i ta tatou tuhaa ia tae mai i te hora tano e ia tae oioi tatou i roto i te tuhaa fenua.
3 Ua pûpû o Iesu i te hoê tauaparauraa papu i te pǔpǔ ra, oia hoi “te basileia o te Atua”. (Luka 10:9.) Ua titauhia ia tatou ia poro i te hoê â poroi, e mea au roa na tatou ia noaa mai te mau manaˈo faufaa no nia i ta tatou huru paraparauraa. E nehenehe te taeae aratai e faaohipa i te buka Haaferuriraa, o te horoa ra tau ahuru omuaraa parau taa ê e te tahi mau irava tano o te nehenehe e faaohipahia i roto e rave rahi huru tupuraa. E tauturu te tuatapaparaa o te hoê aore ra e piti faaiteraa ia tatou ia ite eaha te parau, ia papu maitai tatou ia tauaparau e te mau taata.
4 Aita noa o Iesu i faataa i ta ˈna mau pǐpǐ eaha te tia ia rave, ua faaite atoa râ oia ia ratou nafea ia paraparau (Luka 10:5, 6). Te vai ra te mau faahiˈoraa i roto i te porotarama o te putuputuraa o te taviniraa no te faaite ia tatou e nafea ia paraparau ma te aravihi. E nehenehe te taeae aratai e rave faahou i te mau manaˈo o te putuputuraa hopea e e horoa i te tahi mau manaˈo i nia i te huru faaohiparaa i te reira i roto i te pororaa i taua mahana ra. E tauturu te hoê faahiˈoraa poto faaineinehia na roto i te hoê faaiteraa bibilia ohie no te tahoê mai i to tatou mau manaˈo e no te hohora ˈtu.
5 Ua horoa atoa Iesu i te mau faaueraa i ta ˈna mau pǐpǐ no nia i to ratou haerea (Luka 10:7, 8). E nehenehe atoa te taeae aratai e horoa mai na tatou i te tahi mau faaueraa tano ia ore tatou e rave i te hoê ohipa o te faafariu ê ia tatou i ta tatou ohipa. E huti paha oia i to tatou ara-maite-raa i nia i te mau haaputuputuraa i te mau poro aroâ aore ra te haamâuˈaraa i te taime no te aro e te feia patoi. E faahaamanaˈo paha oia ia tatou i te faufaaraa ia tapaopao ma te papu i te mau fare aore ra ia ore e haama i te ani atu i te hoê tino moni no ta tatou mau buka. E tia paha ia faahaamanaˈo i te mau metua ia haapao maitai i ta ratou mau tamarii.
6 Ua apee na pǐpǐ e 70 i te mau faaueraa a Iesu e i muri iho ua ‘hoˈi mai ratou ma te oaoa’. (Luka 10:17.) Mai te peu e te faaohipa nei tatou i te mau aratairaa horoahia mai i te mau putuputuraa no te pororaa, e ite atoa tatou i te oaoa rahi i roto i te pororaa i te poroi o te Basileia.—Ohipa 13:48, 49, 52.