E haafaufaa rahi tatou i te Haapiiraa o te taviniraa teotaratia
1 Te faaineine ra te Haapiiraa o te taviniraa teotaratia ia tatou i roto i te ‘aravihi no te haapiiraa’ ia faaite tatou i te mau parau mau bibilia ma te puai i to tatou mau taata-tupu (Tim. 2, 4:2). I te hebedoma tataitahi atoa, te noaa ra ia tatou te mau haamaramaramaraa faufaa roa no nia i te mau tumu parau bibilia e rave rahi. Nafea ia haafaufaa rahi roa i te aˈoraa ta teie haapiiraa e horoa nei?
2 E faaroo maite tatou i te mau omuaraa parau a te tiaau o te haapiiraa o te huti ra i te ara-maite-raa i nia i te mau manaˈo anaanatae ta tatou e ite i te roaraa o te putuputuraa. E feruri tatou i nia i te mau uiraa ta ˈna e faahiti e i te ravea ia faaohipa i te mau pahonoraa e horoahia i roto i ta tatou taviniraa.
3 E ere te oreroraa parau haapiiraa i te hoê noa hiˈo-faahou-raa poto o te mau tumu parau. Te haamatara ra te reira i te vahi faufaa o te mau manaˈo i tuatapapahia e te mau haamaitairaa ta te taata tataitahi e huti mai. Mai te peu e e faaineine tatou na mua roa, e faaroo maite tatou i te mau manaˈo matamua e e pahono atu i te hiˈo-faahou-raa i muri mai.
4 Mai te peu e te taio tamau ra tatou i te tuhaa Bibilia tei faanahohia i te hebedoma tataitahi, e taa hau atu â ia tatou i te vahi faufaa o te Parau a te Atua. Ma te rave i te mau maimiraa hau, e ite tatou e rave rahi mau tuhaa iti apî e te anaanatae o te faarahi i to tatou maramarama no te parau mau. E ere te mau vahi anaanatae o te Bibilia i te faahiti-faahou-raa i te tuhaa i taiohia. I muri aˈe i te haapotoraa i te manaˈo taatoa, e haapapu te taeae orero i te mau tuhaa faufaa roa e e faaite oia e nafea te reira e ohipa ˈi i nia i to tatou oraraa e ta tatou haamoriraa. Ia faaroo maite tatou no te ite ia faaohipa maitai aˈe i te aˈoraa bibilia.—Sal. 119:105.
5 Mai te peu e e horoahia mai na outou i te hoê tumu parau, e nota tatou i te tapao e ohipa. E taio maitai faahou tatou i te mau manaˈo o te Buka no te Haapiiraa o te tuatapapa ra i te aravihi o te oreroraa e e tutava ïa tatou i te faaohipa i te reira. Ia maiti anaˈe tatou i te mau manaˈo o te tumu parau, e haafaufaa tatou i te manaˈo e tano no te pororaa.—sg mau api 7-9.
6 Mai te peu e e tuahine outou e e horoahia mai te tumu parau n° 3 aore ra 4, a tutava i te maiti i te hoê huru tupuraa tano no te vauvau i te tumu parau. E nehenehe te taata e patoi mai i te mau mea ta outou e parau ra; a tamata i te faaite e nafea ia tauturu i te taata ia feruri i nia i te mau faaueraa tumu matamua bibilia (sg mau api 11-13). E ite ïa te feia i putuputu mai e nafea ia haapaiuma i te mau patoiraa i roto i te taviniraa. A faaineine ia outou na mua roa, e a faahiti faahou i te tumu parau na mua ˈˈe e te tuahine i faataahia. Aita e faufaa ia rave faahou ia haamata anaˈe te putuputuraa.
7 Te faaitoitohia ra te feia haapii e tumu parau ta ratou ia parahi i mua roa. Eita ïa e mǎuˈa te taime e e nehenehe te tiaau o te haapiiraa e horoa te mau aˈoraa no ratou iho. E faufaahia te taatoaraa o te mau manaˈo maitatai e te papu ta ˈna e horoa ra na roto i te Buka no te Haapiiraa. Aita oia e apee ra i te huru i te pae o te oreroraa e anihia i nia i te api iti Aˈoraa no te oreroraa; e maiti oia i te hoê tapao e titau ra e ia aˈohia oia no te haere atu â i mua.
8 No teie mau mea i faahitihia, te vai nei ïa ia tatou i te mau tumu maitatai no te faaineine i te Haapiiraa o te taviniraa teotaratia e no te tae mai i te hebedoma tataitahi. Te noaa nei ia tatou i te haapiiraa no te riro ei feia paari e te aravihi i roto i te taviniraa.—Mas. 1:5.