E imi tatou ma te itoito ia haamata i te mau haapiiraa bibilia
1 Te ite-rahi-hia ra e te poto nei te taime no teie nei ao ino (Tim. 2, 3:1-5). Eaha ïa te auraa? E te fifi nei te mau ora. Teie râ, tei te mana o to tatou rima ia tauturu i te tahi mau taata ia ora mai (Mas. 3:27). No reira, e tia ia tatou ia imi ma te itoito ia haamata e ia aratai i te mau haapiiraa bibilia.
2 Te horoa nei te opereraa o ta tatou mau buka bibilia i te mau faahopearaa faahiahia roa. Tera râ, te hinaaro nei te mau taata ia tauturuhia ratou iho maoti i te hoê haapiiraa tamau o te Bibilia i te fare. Nafea ia haamaramarama ia ratou i te reira?
3 E faahiti tatou i te mau uiraa o te haaputapû i te rahiraa o ratou. Ei hiˈoraa, no te aha tatou e ite ai i te toparaa o te mau faufaa? No te aha te oraraa utuafare e aueue noa ˈi? No te aha te ino e te taparahiraa taata e riro ai ei haamǎtaˈuraa rahi? No te aha te hoê Atua aroha e faatia noa ˈi i te mau huru tupuraa i teie nei mahana? e rave rahi atu â. Ia ineine tatou i te ite i te mau tumu parau e te mau tupuraa o te anaanatae i te feia o ta tatou tuhaa fenua. E faaite tatou ia ratou i te mau pahonoraa tano ta te Bibilia e horoa ra. E faataa tatou ia ratou e e haapii te mau buka ta tatou e faaite ra no nia i ta te Bibilia e parau ra no taua mau tumu parau ra e no te tahi atu mau uiraa faufaa no tatou nei.
4 E mea faufaa ia haamata i te hoê aparauraa mau. E imi tatou eaha te mau tumu parau o te haapeapea ra i te taata e faaroo ra ia tatou e ta ˈna mau pu anaanatae, e e faahaere atu ai i ta tatou aparauraa i reira. E huti tatou i to ˈna ara-maite-raa i nia i te hoê manaˈo o te hoê buka, o te hoê vea iti, o te hoê vea aore ra o te hoê api parau iti o te faataa ra i te ravea a te Bibilia no te mau fifi o te taata. Na mua ˈˈe e faarue atu ai, e faahiti tatou i te hoê aore ra e piti uiraa, ia au i to tatou manaˈo, o te faaanaanatae ia ˈna no te tere i mua mai. I te taime o taua tere ra, e faahaamanaˈo tatou ia ˈna i taua mau uiraa ra, e i muri iho, e faaohipa tatou i te mau buka no te tauturu ia ˈna ia ite i te mau pahonoraa ta te Bibilia e horoa ra.
5 E nehenehe te mau taata e taui i to ratou huru oraraa mai te peu e e haamata e e aratai tamau tatou i te hoê haapiiraa bibilia e o ratou. E tia ia tatou ia faaite i te hoê anaanatae rotahi no te mau manaˈo o te mau taata ta tatou e farerei ra i te roaraa o ta tatou pororaa aore ra i roto i te pororaa faanaho-ore-hia e te amuiraa. E tia ia faaineine-maitai-hia no te faaara maine i to ratou anaanatae. E titau-atoa-hia te faaoromai no te tamau i te hoˈi faahou e farerei ia ratou e tae noa ˈtu i te taime e amu tamau noa ˈi ratou i te pae varua. E tia ia tatou ia faaite i te hoê anaanatae rotahi. To tatou hinaaro rahi o te tautururaa ïa ia ratou ia ora mai i te haamouraa o te piri roa. E tia ia riro tamau te ohipa o te mau haapiiraa bibilia ei tumu parau o ta tatou mau pure tuutuu ore. — Tes. 1, 5:17.
6 E faaitoito hau atu â te iteraa e fatata e hoê mirioni taata o tei bapetizo ia ratou i te roaraa o na matahiti e toru tei mairi (Mat. 28:19, 20). Te aratai nei tatou te tahi tau maha mirioni e te afa haapiiraa bibilia i te avaˈe tataitahi, o te haapapu ra e te tapitapi nei tatou no te ora o vetahi ê. E o outou? Te tutava ra anei outou ma te itoito ia apiti atu i te ohipa o te mau haapiiraa bibilia i te fare o te taata? E tapea mai tatou i roto i te feruriraa e ua niuhia to tatou ora e to vetahi ê i nia i to tatou taiva ore i roto i taua tuhaa ra. — Ezek. 3:17-19.