Na roto i te mau hoˈi-faahou-raa e farerei, e faaara anaˈe i te anaanatae no te Bibilia
1 Ia poro anaˈe tatou, te farerei nei tatou i te tahi taime i te mau taata o te faaite i te tahi anaanatae no te parau apî maitai, tera râ mea rahi roa ta ratou ohipa no te paraparau i taua taime ra. Te tamata ra anei tatou i te haere faahou e hiˈo ia ratou no te faaite atu i te poroi o te Basileia? Aore ra peneiaˈe e faatupu tatou i te hoê aparauraa anaanatae e te hoê taata o te ore e farii i te buka. Te hoˈi ra anei tatou e paraparau atu ia ˈna i te parau mau?
2 Mea faufaa roa ia poro hohonu i ta tatou tuhaa fenua e ia apee i te anaanatae atoa e itehia mai. Te hoˈi noa ra anei tatou e hiˈo i te feia anaˈe o tei farii i te hoê buka aore ra i te mau vea? Mai te peu e mai te reira te huru, e riro ïa tatou i te haapao ore i te tahi mau taata farii maitai. Eita hoi e tia ia tatou ia haava e eita e tia i te hoê taata ia fanaˈo i te tahi atu mau faaitoitoraa pae varua no te mea noa e aita oia i farii i te hoê buka (hiˈo Roma 14:4). I muri aˈe i to tatou tere, peneiaˈe e feruri te taata o ta tatou i paraparau i te mea o ta tatou i faaite atu, aore ra e taa ia ˈna te mau tutavaraa o ta tatou i rave no te farerei ia ˈna. E farii maitai aˈe paha o ˈna ia hoˈi atu tatou.
3 Ia hoˈi anaˈe outou e hiˈo i te hoê taata ohipa roa i te taime matamua ra, e nehenehe outou e parau atu e:
◼ “Te oaoa nei au i te farerei-faahou-raa ia oe. I te taime i mairi aˈenei, aita to oe e taime no te paraparau. Te ite nei au e mea rahi roa ta oe ohipa, no reira, e haapoto noa ˈtu vau. Eita e ore e te tapitapi nei oe no to oe oraora-maitai-raa e tae noa ˈtu to te feia o ta oe e here nei. Ua ite anei oe e ua tǎpǔ te Atua e faaore i te mau maˈi atoa? E ere anei i te mea oaoa? [A vaiiho i te taata ia pahono mai.] A hiˈo na eaha ta te paratarapha 4 o teie vea iti oia hoi ‘Inaha, te faaapî nei au i te mau mea atoa nei’ e faaite ra.” Mai te peu e e taime to outou, a taio i te paratarapha, e i muri iho a tuatapapa i te hoê o te mau irava i faahitihia ei faahororaa i raro i te api 4 o te faaite ra eaha te mau huru tupuraa o te itehia i roto i te ao apî. Mai te peu e e farii mai te taata o ta outou e paraparau ra, peneiaˈe e nehenehe outou e haamata i te hoê haapiiraa bibilia.
4 Ia farerei faahou outou i te hoê taata o tei farii i te hoê api parau iti, e nehenehe outou e parau ei hiˈoraa e:
◼ “I te taime i mairi aˈenei i to tâua farereiraa, ua farii oe i teie api parau iti oia hoi O vai mau na te faatere o te ao nei? E mea fifi anei no oe ia farii e o Satani te faatere mau o te ao nei? [A vaiiho i te taata ia pahono mai.] A hiˈo na i te paratarapha matamua o te api 6.” A taio atu, e i muri iho, a ani e: “No te aha o Satani e imi ai i te haavare ia tatou?” Ia oti anaˈe te taata i te pahono, a hiˈopoa e o ˈna i te paratarapha maha o te api 3. E nehenehe outou i muri iho e tuatapapa hohonu i te api parau iti, aore ra e faaô mai i te vea iti Te haapao mau ra anei te Atua ia tatou? e e tauaparau no nia i te paratarapha 8, api 13.
5 E mau tumu maitatai to tatou no te faaite i te aau tae e no te apee i te huru anaanatae atoa, noa ˈtu e mea iti roa, o ta tatou e farerei i roto i ta tatou taviniraa. Mea faufaa e ia haapeapea tatou no vetahi ê, e ia turaihia tatou ia tauturu ia ratou ia ite i te parau mau. Te horoa maira te faanahonahoraa a Iehova i te mau buka e te faataa ra oia i te mau pûpûraa o te tauturu ia tatou ia haaputapû i te feruriraa o vetahi ê no nia i to ratou mau hinaaro i te pae varua. — Mat. 5:3.
6 Mai te peu e ua faatupu tatou i te hoê tauaparauraa au mau e te hoê taata, noa ˈtu e mea iti roa te anaanatae o ta ˈna i faaite, eiaha tatou e mairi i te hoˈi atu e faaara faahou i teie anaanatae. E haamata tatou i te hoê haapiiraa bibilia i te fare o te taata e e tuu tatou i te taata ta tatou e paraparau ra i nia i te eˈa o te aratai i te ora. Te faaitoitohia nei tatou paatoa ia tamau noâ i te rave maite i teie ohipa faaoraraa. — Tim. 1, 4:8.