E faaohipa anaˈe i te mau vea iti ma te aravihi i te avaˈe tiurai
1 I te mea e te hinaaro nei oia e faaoioi i te ohipa faariroraa i te taata ei pǐpǐ, te faatupu rahi nei te faanahonahoraa i te mau huru papai taa ê atoa. I roto te vai ra te mau vea iti o te vauvau ra i te mau tumu parau taa maitai, mai te opuaraa a te Atua no nia i te fenua, te Toru Tahi, te iˈoa o te Atua, te Basileia e to te Atua faatiaraa i te ino. Nafea tatou ia faaohipa i te mau vea iti ma te aravihi no te tauturu i te mau taata o ta tatou tuhaa fenua?
2 Te faataa ra te vea iti Te haapao mau ra anei te Atua ia tatou? ma te au maite e te feruriraa e ua fatata roa mai te hoê ao apî aita e mauiui faahou. Nafea ia faaite i teie vea iti? Te vai ra i roto i te buka Haaferuriraa te mau manaˈo tauturu i te upoo parau ra “Mauiui,” o te haamata i te api 374; aore ra mea au aˈe na outou te omuaraa parau o te tumu parau “Tia-ore-raa/Mauiuiraa” i te api 7 o te vea iti Aparauraa bibilia.
3 E nehenehe outou e parau e:
◼ “Aita anei oe i aniani aˈena e: Te tâuˈa ra anei te Atua i te tia-ore-raa e te mau mauiui e faateimaha nei i te mau taata?” A vaiiho i te taata ia pahono mai. A taio i te Salamo 72:12-14. A tatara ˈtu i muri iho i te vea iti Te haapao mau ra anei te Atua ia tatou? i te api 22 e a tauaparau no nia i te mau upoo parau iti i papai-meumeu-hia o te tuhaa 10, e tae noa ˈtu te hohoˈa api 23. Mai te peu e e patoi te taata i te vea iti, no te aha e ore ai e pûpû atu i te hoê api parau iti, ei hiˈoraa Te tamǎrûraa no te feia e taiâ ra aore ra Te hoê oraraa hau i roto i te hoê ao apî?
4 I to tatou nei tau, te titau nei te taata i te hoê faatereraa maitai. E rave rahi teie e aniani nei mai te peu e e tahoê anei te faatereraa a te taata i teie nei ao. E itehia te mau haamaramaramaraa tano roa i raro aˈe i te upoo parau “Faatereraa”, mai te api 172 o te buka Haaferuriraa.
5 E nehenehe outou e ui i teie uiraa:
◼ “E nehenehe anei ta te mau taata e haamau i te hoê faatereraa o te aratai mau ia ratou ia ite i te oaoaraa tamau?” A vaiiho i te taata ia pahono, e i muri iho a parau atu e: “Eaha ta te aamu o te taata e haapapu ra i roto i teie tuhaa?” A rave i te Ieremia 10:23, aore ra a tatara i te buka Haaferuriraa i te api 172 e a taio i te mau irava e te mau tatararaa e tano. I muri iho, a tatara i te vea iti Faatereraa i te mau api 24 e 25, e a tuatapapa i te mau hohoˈa e tae noa ˈtu i te mau irava. A faataa nafea te faatereraa a te Atua e tahoê ai i te mau nunaa i nia i te fenua atoa nei. Mai te peu e eita te taata e farii i te vea iti, e nehenehe outou e pûpû atu i te vea iti E ora anei teie nei ao?
6 Mai te peu e te mehameha nei te taata i te taparahiraa taata i to ratou vahi, e nehenehe te omuaraa parau i muri nei e faaara i to ratou anaanatae.
7 E nehenehe outou e parau e:
◼ “E rave rahi mau taata o te aniani nei e no te aha te Atua e faatia ˈi i te ino mai te peu e e Atua here oia. Ua ui ê na anei oe i teie uiraa?” A vaiiho i te taata ia pahono, e i muri iho, a parau atu e: “A hiˈo na i te Maseli 19:3, te faaite ra teie irava e eita e tia ia faahapa i te Atua no te mau mea iino ta te mau taata e rave nei.” I muri aˈe i to outou taioraa i teie irava, a huti i te ara-maite-raa o te taata ta outou e paraparau ra i te api 15 o te vea iti “Inaha, te faaapî nei au i te mau mea atoa nei” e a taio i te paratarapha 27. E aratai paha te reira ia outou ia tauaparau no nia i te mau paratarapha i muri mai.
8 Tatou paatoa, e nehenehe tatou e faaohipa i te mau vea iti no te haapii atu i te parau apî maitai i te mau taata e au i te mau mamoe. E nehenehe tatou e tauturu i te mau huru taata atoa ia apiti mai i roto i te faanahonahoraa a te Atua. E haamaitairaa taa ê na tatou te apitiraa i roto i te pororaa na roto i te faaohiparaa ma te aravihi i te mau vea, o tei tano maitai i to tatou nei tau.