E faaohipa maitai anaˈe i Te Pare Tiairaa e te A ara mai na!
1 Ua riro Te Pare Tiairaa e te A ara mai na! ei mau vea faufaa roa ˈˈe e te titau-roa ˈˈe-hia e taiohia i teie mahana. No teihea tumu? No te mea maoti te mau parau mau pae varua e vai ra i roto, e nehenehe e noaa mai i te mau taata te ora mure ore i roto i te oaoa. Teie râ, e rave rahi o te ore e ite mau ra i to ratou mau hinaaro i te pae varua, aore ra o tei ore i ite e ihea roa ratou e fariu ai no te haamâha i te reira. Tei ia tatou nei te haamaitairaa taa ê e pee i te hiˈoraa o te aposetolo Paulo na roto i te tautururaa ia ratou ia araara to ratou mata i te pae varua. — Mat. 5:3; Ohi. 26:18.
2 Ia papu to tatou feruriraa e ia faaineine maitai tatou: Te vai ra iho â i roto i ta tatou tuhaa fenua te mau “mamoe” o tei ineine i te farii i te parau mau. No te aratai i te tahi ia taio i te mau vea, peneiaˈe e navai ia faaitoito noa ˈtu tatou ia ratou ma te maitai. Ia papu ïa to tatou feruriraa e ia putapû ta tatou parau ia faaite anaˈe tatou i Te Pare Tiairaa e te A ara mai na! Ia vai noa te mau vea i pihai iho i to tatou rima e ia faaohipa tatou i te mau huru tupuraa atoa no te pûpû atu, noa ˈtu e ua manaˈo tatou i te omuaraa e faaite i te tahi atu mau buka.
3 Na te aha e tauturu ia tatou ia opere i te mau vea ma te aravihi atu â? A tahi, e tia na mua e ia ite papu tatou i to ratou faufaaraa. E tia ia ite maitai tatou i te mau tumu parau o te mau vea o ta tatou e faaite ra, ia nehenehe hoi tatou e pûpû atu ma te tiaturi aˈe e te aau tae. Ia tapea tatou i te reira i roto i to tatou feruriraa i ta tatou taioraa matamua. Ia oioi noa tatou i te maiti i te mau manaˈo o ta tatou e haamatara i roto i te taviniraa. E aniani anaˈe: “O vai te mau taata o te anaanatae roa i teie tumu parau? Te hoê vahine e faaea i te fare, te hoê taurearea aore ra te hoê taata tapihoo? E faaara anei teie manaˈo i te anaanatae o te hoê taurearea haere haapiiraa, te hoê taata faaipoipohia, te hoê taata o te tapitapi ra no te natura?” Ia aravihi tatou, e tia ia tatou ia faaau atu i te mau vea no te mea ua taio tatou e ua huti mai tatou i te faufaa i ta ratou mau tumu parau tano mau.
4 E faaohipa maitai anaˈe i te mau numera tahito: Eiaha ia moehia e e tapea noa Te Pare Tiairaa e te A ara mai na! i to ratou faufaa, noa ˈtu e eita tatou e opere pauroa i roto i te avaˈe aore ra na avaˈe e piti i muri aˈe i te taio mahana o to ratou matararaa mai. Eita te poroi e vai ra i roto e erehia i to ˈna faufaa ia mairi anaˈe te taime; eiaha ïa tatou e haamarirau i te pûpû i te mau numera tahito mai te peu e mea maitai noâ. Ia vaiiho tatou e ia pue noa aore ra ia ore roa tatou e faaohipa, te faaite ra ïa tatou e te faaiti nei tatou i te faufaa o teie mau mauhaa taoˈa rahi. Te vai ra i roto i te vea tataitahi te mau parau mau e mana to ratou no te haamahora e no te haamâha i te hiaai i te pae varua. Maoti i te tuu i te hiti te mau numera tahito e a haamoe atu ai, e ere anei e mea maitai aˈe ia tutava tatou i te horoa ˈtu i te mau taata farii maitai aore ra ia vaiiho atu i te hoê vahi ite-ore-hia mai e te taata mai te peu e aita e taata i te fare?
5 Ua tauturu te vea A ara mai na! e rave rahi mau taata o tei ore i anaanatae i te haamataraa i te mau uiraa pae varua, ia ite i to ratou mau hinaaro i roto i teie tuhaa. Ua riro Te Pare Tiairaa ei mauhaa numera hoê i te pae no te horoaraa i te maa pae varua i te nunaa o Iehova. E tuea maitai teie nau vea e te hauti nei raua i te hoê tuhaa faufaa roa i roto i te pororaa i te parau apî maitai.
6 Mai te peu e e faaohipa tatou i te mau ravea atoa no te pûpû i te mau vea, e nehenehe tatou e papu e e haamâha ratou i te mau hinaaro pae varua o te mau “mamoe”. Te hinaaro nei tatou e faaite noa i te feruriraa papu, e faaineine maitai ia tatou e e apiti tamau i roto i te taviniraa. Tatou o te poro nei i te parau apî maitai, ia faaohipa maitai tatou pauroa i te mau vea Te Pare Tiairaa e te A ara mai na! ma te tamau, e tia ˈi.