Ia haamata tatou i te mau haapiiraa bibilia e te buka ra E ora e a muri noa ˈtu
1 E tia i te here no te taata-tupu ia turai ia tatou ia hoˈi oioi noa e farerei faahou i te feia tei poia e tei poiha i te parau mau no te tauturu ia ratou (Mat. 5:6). E tia ia tatou ia tapao i te hoê noa ˈˈe huru anaanatae o ta tatou e ite ra e ia atuatu i te reira mai te peu e eita tatou e hinaaro ia pohe te reira. No te manuïa, e tia ia tatou paatoa ia faaineine.
2 Ta tatou fa o te haamataraa ïa i te mau haapiiraa bibilia (Mat. 28:20). Te parauhia ra i roto i te mau buka matamua o te buka ra E ora e a muri noa ˈtu ei omuaraa e: “Te tano ra teie buka haapiiraa i te taatoaraa, te mau taurearea aore ra te feia paari, noa ˈtu to ratou faito ite.” No reira, te faaohie nei te huru o taua buka ra i te aratairaa o te haapiiraa e e nehenehe atoa te feia apî e apiti atoa mai i roto i teie ohipa. E manuïa tatou i te haamata i te mau haapiiraa bibilia mai te peu e e rave tatou i te mau hoˈi-faahou-raa e farerei aravihi.
3 Nafea ia haamata i te mau haapiiraa? I roto i ta tatou hoˈi-faahou-raa e farerei, e mea maitai, i roto i te rahiraa o te tupuraa, e haamata i te aparauraa i nia i te hoê manaˈo, aore ra i te hoê uiraa, o ta tatou i tauaparau na i to tatou farereiraa matamua. Ua paraparau na paha tatou no nia i te huru o te feia pohe e ua faahiti i teie uiraa e: “Eaha te tiaturiraa no te feia herehia e tatou tei pohe?” E faataa tatou e ere te tia-faahou-raa i te hoê tiaturiraa e aita e niu, te faatia ra te Bibilia e rave rahi mau tia-faahou-raa o tei tupu aˈena. E hiˈo tatou i te mau hohoˈa i te mau api 167-9. E i muri iho e tauaparau tatou i nia i te mau paratarapha 1 e te 2, i te api 166. Mai te peu e te anaanatae ra te taata, e ani tatou ia ˈna e hoˈi faahou mai tatou no te faahaere â te aparauraa i mua.
4 Ua tauaparau paha tatou i te hoê metua tane aore ra i te hoê metua vahine o tei haapeapeahia e te mau fifi e maraa noa ra no te faaamuraa i te mau tamarii. E nehenehe tatou e parau na roto i ta tatou mau parau e:
◼ “Te hinaaro nei te mau metua atoa e horoa na ta ratou mau tamarii i te mea maitai aˈe. Te vai ra te mau aˈoraa i roto i te Bibilia ia nehenehe te mau metua e tauturu i ta ratou mau tamarii ia ora ma te oaoa, te hoê oraraa te vai ra te hoê tumu. No reira, te faaitoito rahi nei matou i te mau utuafare fetii ia tuatapapa amui ratou i te Bibilia. [A huti i te ara-maite-raa i nia i te paratarapha 23, api 246.] E fanaˈo ïa te taatoaraa o te utuafare i te mau haamaitairaa mure ore na roto i te ite tei noaahia mai.” E taio tatou i te Ioane 17:3. E faataa tatou i te taata e ua ineine tatou i te hoˈi faahou mai no te faaite i to ˈna utuafare nafea ia haamata i te hoê haapiiraa.
5 Mai te peu e e taurearea aore ra e taata poro apî tatou e mai te peu e, i te taime matamua, ua tauaparau poto noa tatou no nia i te tiaturiraa o te Paradaiso, e nehenehe tatou e hohora i te buka i te api 3 e parau ohie noa ˈtu ei hiˈoraa e:
◼ “Te tǎpǔ ra te Bibilia e e nehenehe te feia o te rave ra i te hinaaro o te Atua e ora i roto i te hoê ao mai teie te huru i reira e vai ai te oaoa e te hau. Te faaite ra teie buka eaha te tia ia tatou ia rave no te fanaˈo i teie mau haamaitairaa.” E faataa poto noa tatou nafea ia arataihia te hoê haapiiraa e e horoa ˈtu tatou i te hoê faahiˈoraa.
6 Ei mau pǐpǐ na Iesu, e tia ia tatou ia tauturu i to tatou taata-tupu (Roma 10:14). Mai te peu e ua vaiiho tatou i te hoê buka, aore ra ua paraparau maitai paha tatou e te hoê taata, e hopoia ta tatou i te atuatu i to ˈna anaanatae (Mat. 9:37, 38). Mai te peu e e amo maitai tatou i taua ohipa ra, e fanaˈo paatoa tatou i te mau haamaitairaa.—Tim. 1, 4:16.