Uiraa 1: Mea faufaa anei to ˈu oraraa?

UA HINAARO noa Rosalind, tei paari i Beretane, e faarahi atu â i to ˈna ite e e tauturu i te taata. Ua noaa ia ˈna ta ˈna parau tuite e te hoê ohipa faahiahia e tauturu ai oia i te taata aita e nohoraa, o tei paruparu i te pae tino e o te fifi ra i te haapii. E ohipa maitai ta ˈna e e oraraa fanaˈo atoa. Te na ô nei râ oia: “Ehia matahiti to ˈu uiuiraa, ‘No te aha tatou i hamanihia ˈi?’ e ‘No te aha tatou e ora ˈi?’”

No te aha teie uiraa?

E ere te taata mai te animara, o te ore hoi e feruri. E nehenehe tatou e haapii mai i te mau mea i tupu na, e opua no a muri aˈe e e tapi i te hoê fa i roto i to tatou oraraa.

Eaha ta vetahi e pahono?

No e rave rahi, te ora nei tatou na mua roa no te titau i te taoˈa aore ra te roo e oaoa ˈi tatou.

Eaha te auraa o teie pahonoraa?

Na tatou iho e faaoti eaha te mau mea faufaa aˈe i roto i te oraraa. Mea faufaa aˈe to tatou mau hinaaro i to te Atua.

Eaha ta te Bibilia e haapii ra?

Ua noaa i te arii Solomona te taoˈa e rave rahi roa e ua tapi oia i te mau mea navenave. Aita râ to ˈna oraraa i faufaa roa ˈtu â i tera mau mea. Ua itea ia ˈna no te aha mau tatou e ora ˈi a papai ai oia: “E faaroo na tatou i te faaotiraa o taua mau parau nei: o te Atua te mǎtaˈu atu, e haapao hoi i ta ˈna parau; o ta te taata atoa ïa e ati noa ˈˈe.” (Koheleta 12:13) Eaha te auraa e haapao i ta te Atua parau?

Ua hinaaro atoa te Atua ia oaoa tatou i te oraraa. Ua papai Solomona: “E ere to te taata nei maitai te amu e te inu i te maa ra, ei maitai no ˈna i ta ˈna ra mau ohipa? t[e] ite nei hoi au e, na te rima ïa o te Atua i horoa mai.”—Koheleta 2:24.

Te hinaaro atoa ra te Atua ia here e ia aupuru tatou i to tatou utuafare. A hiˈo na i te aratairaa ohie e te au mau i horoahia i te melo taitahi o te utuafare.

“E aroha atoa t[e] mau tane i ta ratou iho mau vahine e tia ˈi mai ta ratou i aroha i to ratou iho tino.”—Ephesia 5:28.
“E te vahine ra ia auraro oia i tana tane.”—Ephesia 5:33.
“E te mau tamarii ra, e faaroo i to outou mau metua.”—Ephesia 6:1.

Ia faaohipa tatou i teie mau aratairaa Bibilia, e ite tatou i te tahi oaoa e mauruuru. Teie râ te ohipa faufaa roa ˈˈe te nehenehe e rave: e haapii hau atu â no nia i to tatou Atua Poiete e e haafatata ˈtu ia ˈna mai to tatou Hoa. Inaha, te ani maira te Bibilia ia “haafatata ˈtu i te Atua” a fafau atu ai: “Na ˈna e haafatata mai ia outou.” (Iakobo 4:8) E faufaa roa ˈtu â to oraraa ia na reira oe.

No te ite hau atu â e nafea ia tapi i te hoê huru oraraa ta te Atua e au, a hiˈo i te pene 12 o te buka Eaha ta te Bibilia e haapii mau ra? E nehenehe e rave mai i nia i te www.jw.org

Eaha ta Iesu i parau no nia i te tumu e ora ˈi tatou?

Ua ite iho â Iesu no te aha tatou e ora ˈi. Ua parau oia: “I fanau mai ai au, e i haere mai ai hoi au i te ao nei, e faaite i te parau mau.” (Ioane 18:37) I to ˈna oraraa, ua haapii noa Iesu i te taata te parau mau no nia i te Atua e i ta ˈNa mau opuaraa.

E faufaahia to tatou oraraa ia pee tatou i te hiˈoraa o Iesu. Te ani maira hoi Iesu ia haapii no nia ia ˈna. (Mataio 11:29) A hiˈo na e piti noa ravea e na reira ˈi tatou.

Ua haapii Iesu e no te oaoa, e titauhia ia ‘faaroo â e ia haapao i te parau a te Atua.’ (Luka 11:28) E na reira tatou ma te haapii no nia i “te Atua mau ra, e ia Iesu i te Mesia [ta ˈna] i tono mai.”—Ioane 17:3.

Ua faaue Iesu i ta ˈna mau pǐpǐ ia haapii ia vetahi ê i ta ratou iho i haapii mai. Ua parau oia: “E teie nei, e haere outou e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti, e no te [v]arua [m]aitai; ma te haapii atu ia ratou i te haapao i te mau mea atoa ta ˈu i parau atu ia outou na.”—Mataio 28:19, 20.

E maitai roa mai te oraraa o te taata o te haapii i te Bibilia e o te faaohipa i ta ratou i haapii. E e papu roa ˈtu â ia ratou e mea faufaa to ratou oraraa a tauturu ai ratou ia vetahi ê ia haapii no nia i te Atua.