Mea ino anei ia uiui i te Atua?

MEA ino no vetahi. Mea faatura ore paha no ratou ia ui no te aha te Atua e vaiiho ai i te tahi mea ia tupu aore ra eita. Tera anei to oe manaˈo?

Mai te peu e e, e maere paha oe i te ite e mea rahi te taata maitai tei ui i te Atua. A hiˈo na i te tahi o ta ratou mau uiraa:

O Ioba taiva ore: “Eaha te mea i ora ˈi te paieti ore nei? e i paari ai; e i rahi ai i te mana?”—Ioba 21:7.

Te peropheta haapao maitai o Habakuka: “Eaha hoi oe i hiˈo ai i te haavare, e te mamû noa ra oe ia horomii te taata ino i tei rahi ta ˈna parau-tia i ta ˈna iho?”—Habakuka 1:13.

Iesu Mesia: “E tau Atua, e tau Atua, eaha oe i faarue mai ai ia ˈu?”—Mataio 27:46.

Ia taio oe i te mau irava tapiri, eita oe e ite e ua huru ê te Atua ra o Iehovaa i taua mau uiraa haavare ore ra. E ere te reira i te mea maere. Ei hiˈoraa, aita te Atua e inoino ra ia ani tatou ia ˈna ia haamâha i to tatou mau hinaaro faufaa i te pae tino e maitai ai tatou. Te oaoa ra o ˈna i te na reira. (Mataio 6:11, 33) Oia atoa, ua ineine oia i te pahono i ta tatou mau aniraa e maitai ai tatou i te pae aau e feruriraa. (Philipi 4:6, 7) Inaha, ua parau Iesu i ta ˈna mau pǐpǐ ia tamau i te ani e e horoahia mai ta ratou. (Mataio 7:7) Ia au i te mau irava tapiri o teie parau fafau a Iesu, te parau ra o ˈna no nia i te noaaraa i te mau mea materia e i te mau pahonoraa i te mau uiraa faufaa.

Ahani e nehenehe ta oe, teihea uiraa i muri nei ta oe e hinaaro e ui i te Atua?

• Mea faufaa anei to ˈu oraraa?

• Eaha te tupu ia pohe au?

• No te aha oe e faatia ˈi ia mauiui au?

I te mea e “te mau parau moˈa atoa i papaihia ra e mea faaurua mai ïa e te Atua,” e ite oe i ta te Atua pahonoraa i roto i ta ˈna Parau, te Bibilia. (Timoteo 2, 3:16) A hiˈo na no te aha vetahi e tuu ai i te mau uiraa i nia nei e eaha ta te Bibilia e pahono ra.