Uiraa 2: Eaha te tupu ia pohe au?

E TAMAROA apî o Roman a pohe ai hoê o to ˈna hoa rahi i roto i te hoê ati purumu. “Ua huru ê roa vau i te poheraa to ˈu hoa,” ta ˈna ïa e parau ra. “Tau matahiti i muri aˈe i tera ati, ua uiui noa vau eaha te tupu i nia ia tatou a pohe ai.”

No te aha teie uiraa?

E au ra e aita te taata i hamanihia no te pohe. Noa ˈtu ehia matahiti to tatou, aita tatou e hinaaro ra e pohe. Mea rahi te riaria ra i te ohipa e tupu a pohe ai.

Eaha ta vetahi e pahono?

Mea rahi te taata e tiaturi nei e e ora noa te hoê tuhaa o te taata tei pohe. No ratou, e haamaitaihia te feia maitai i te raˈi e e faautuahia te feia ino no ta ratou mau hara e a muri noa ˈtu. Area te tahi atu, te manaˈo ra ïa e ia pohe te taata, e faaea o ˈna i te ora e e haamoe-roa-hia oia.

Eaha te auraa o teie mau pahonoraa?

Ia au i te pahonoraa matamua, te ora noa ra te hoê taata pohe. Ia au i te piti o te pahonoraa, mea faufaa ore te oraraa. E pee paha te feia e manaˈo ra mai tera i teie huru feruriraa: “E amu tatou e e inu hoi; ananahi hoi tatou e pohe ai.”—Korinetia 1, 15:32.

Eaha ta te Bibilia e haapii ra?

Aita te Bibilia e haapii ra e e ora noa te hoê tuhaa o te taata i pohe. Ua faaurua te Atua i te arii Solomona ia papai: “Ua ite te feia e ora nei, e pohe ratou, aita râ a te feia i pohe ra e parau itea.” (Koheleta 9:5) Aita roa ˈtu ratou e ite ra eaha te tupu ra i te mea e ‘aita ta ratou e parau itea.’ Aita ta ratou e nehenehe e manaˈo aore ra e rave i te tahi mea. Eita ïa ratou e nehenehe e tauturu aore ra e haamauiui i te feia e ora nei.

Taa ê atu i ta e rave rahi e manaˈo nei, aita te Atua i opua ia pohe te taata. Ua poiete oia i te taata matamua ra o Adamu no te ora e a muri noa ˈtu i nia i te fenua. Ua faahiti te Atua i te pohe i te taime noa i parau ai oia ia Adamu te faautuaraa o te faaroo ore. Ua opani oia ia Adamu ia amu i te maa hotu o te hoê raau a faaara ˈtu ai e ia amu oia, e “pohe” oia. (Genese 2:17) Ahani Adamu raua Eva i faaroo, e ora ïa raua e to raua huaai o tei vai taiva ore i te Atua e a muri noa ˈtu i nia i te fenua.

Ua maiti Adamu e ore e tâuˈa i ta te Atua faaararaa. Ua hara oia a faaroo ore ai i te Atua. Pohe atura ïa oia. (Roma 6:23) I to ˈna poheraa, ua faaea Adamu i te ora e aita te hoê tuhaa i roto ia ˈna i ora noa. Ua parau te Atua ia Adamu: “E amu oe i ta oe maa ma te hou i nia i to rae, e hoˈi noa ˈtu oe i raro i te repo, no reira mai hoi oe; e repo hoi oe, e e hoˈi faahou atu â oe i te repo.” (Genese 3:19) No roto mai te huitaata ia Adamu. Ua raea ïa tatou i te hara e te pohe a Adamu.—Roma 5:12.

Noa ˈtu e ua maiti Adamu e faaroo ore, e faatupu te Atua i ta ˈNa opuaraa e faaî i te fenua i te huaai tia roa o Adamu. (Genese 1:28; Isaia 55:11) Fatata Iehova i te faahoˈi mai i te ora i te rahiraa o te taata i pohe. No nia i tera taime, ua parau te aposetolo Paulo: “E tia-faahou-raa to . . . te feia parau-tia e te feia parau-tia ore.”—Ohipa 24:15.

No te ite hau atu â eaha te tupu ia pohe tatou, a hiˈo i te pene 6 o te buka Eaha ta te Bibilia e haapii mau ra? E nehenehe e rave mai i nia i te www.jw.org

Eaha ta Iesu i parau no nia i te pohe?

Aita Iesu i farii i te manaˈo o te mau aratai haapaoraa o to ˈna ra tau o tei parau e aore e tia-faahou-raa to tei pohe. (Luka 20:27) Aita atoa o ˈna i haapii e e ora noa te hoê tuhaa o te taata tei pohe. Teie râ ta Iesu i haapii.

E au te pohe i te taoto. A pohe ai to ˈna hoa Lazaro, ua parau Iesu: “Ua taoto to tatou hoa o Lazaro, te haere nei râ vau e faaara ia ˈna.” Aita ta ˈna mau pǐpǐ i taa i ta ˈna i hinaaro e parau. Ua na ô atura ratou: “E te Fatu, te taoto ra oia e ora ïa.” Te faataa ra te faatiaraa Bibilia: “No te pohe te parau a Iesu i parau atura, i manaˈo râ ratou e no te taoto mau ta ˈna i parau maira. Ua faaite hua ˈtura Iesu ia ratou, Ua pohe roa Lazaro.”—Ioane 11:11-14.

E faahoˈihia mai te feia pohe i te ora. I to Iesu taeraa ˈtu i te oire tumu o Lazaro, ua tamahanahana oia i to Lazaro tuahine ra o Mareta ma te parau: “E tia faahou mai . . . to tuaane.” Fafau aˈera Iesu: “Tei ia ˈu te tia-faahou-raa e te ora, o te faaroo mai ia ˈu ra, pohe noâ oia e ora â ïa.” E parau fafau mau teie. I mua i te taata e rave rahi, ua faahoˈi mai Iesu ia Lazaro i te ora noa ˈtu e ua pohe o ˈna e maha mahana.—Ioane 11:23, 25, 38-45.

I roto i te orama ta ˈna i horoa i te aposetolo Ioane, ua fafau â Iesu e e faahoˈi mai oia i te taata pohe i te ora. Ua faataa oia i te hoê tau i reira te pohe e tuu ai i te feia atoa ta ˈna e tapea taipe ra.—Apokalupo 20:13.