No te aha e pee ai i te mau ture Bibilia?

MEA etaeta anei ta te Bibilia e haapii ra no nia i te taatiraa pae tino? Mea tano ore anei no teie tau? E ere roa ˈtu. E paruru te reira ia tatou i te:

▪ Maˈi pee na roto i te taatiraa pae tino

▪ Hapû tiamâ ore

▪ Faahopearaa mauiui o te faataaraa

▪ Manaˈo faahapa

▪ Haama

Te hinaaro ra to tatou Atua Poiete ra o Iehovaa ia oaoa e ia maitai tatou i te faaohiparaa i ta ˈna mau mea atoa i ho mai. Ia au i te Isaia 48:17, na ˈna e “faaite ia oe i te mea e maitai ai oe.” E fanaˈo te taata o te haapao i te mau aratairaa Bibilia i te:

▪ Haamaitairaa a te Atua

▪ Hau o te feruriraa

▪ Utuafare tahoê

▪ Roo maitai

▪ Faatura ia ˈna iho

Te pee ra anei oe i te mau ture a te Atua no nia i te mea maitai e te mea ino? Mai te peu e aita, e nehenehe anei oe e taui i to oe huru oraraa? E faahapa noa anei te Atua ia oe no to oe haerea na mua ˈˈe?

I te senekele matamua, e taiata, e faaturi e e mahu te tahi mau melo o te amuiraa Kerisetiano na mua ˈˈe. Ua faaoti ratou e taui e ua haamaitai-rahi-hia ratou. (Korinetia 1, 6:9-11) I teie mahana, e rave rahi i te ao nei tei na reira atoa. Ua haapae ratou i to ratou oraraa taiata no te pee i te mau ture Bibilia e ua haamaitaihia ratou. A hiˈo na ia Sarah tei faahitihia i te api 3.

“Aita vau i ahoaho faahou”

Ua taa ia Sarah e i roto i to ˈna oraraa taiata, aita roa ˈtu oia i ite i te tiamâraa e te oaoa ta ˈna i hinaaro noa na, i te haama râ. Te faatia ra oia e aita to ˈna manaˈo haava i hauti faahou. Ua taiâ oia ia hapû aore ra ia peehia oia i te maˈi riaria. Ua ite iho â oia e te vai ra te Atua o te mauiui ra no to ˈna huru oraraa. No ˈna, mea viivii oia e ua ahoaho roa oia.

Tutava ˈtura Sarah i te taui i to ˈna huru oraraa. Ua ani oia i te tauturu a to ˈna na metua Ite no Iehova e a te mau matahiapo Kerisetiano feruriraa paari o te amuiraa. Ua putapû Sarah i to ratou maitai e to ratou here. Te parau ra oia: “Aita vau i ahoaho faahou.”

I teie nei, e piti tamarii ta Sarah. Ua faaite oia ia raua i ta ˈna i rave na ia taa ia raua e ua fifi roa o ˈna i te oreraa e tâuˈa i te ture a te Atua. E maitai râ te noaa mai i te pae tino, feruriraa e aau i te oraraa ia au i te ture a te Atua no nia i te taatiraa pae tino. Ua papu ia Sarah e ua horoa mai te Atua i te mau ture no nia i te mea maitai e te mea ino ia ore tatou ia fifi.

E maitai atoa oe i te peeraa i te aratairaa î i te here a te Atua. Te parau ra te Bibilia e ‘mea tia te haapaoraa a Iehova, e oaoa ˈi te aau; te aˈo a Iehova e mea maramarama ïa, e maramarama ˈi te mata nei e e utua maitai rahi ia haapao i te reira.’—Salamo 19:8, 11.b

[Nota i raro i te api]

[Parau iti faaôhia i te api 8]

E tupu te mauiui i te tâuˈa-ore-raa i te mau ture Bibilia

[Parau iti faaôhia i te api 9]

E manaˈo haava maitai to na hoa faaipoipo e pee ra i te mau ture Bibilia e mea tahoê raua