“E vahine haviti mau â oe”

TE HIˈO ra Sara ati aˈe i te piha. A feruri na i teie vahine haviti mau no te pae hitia o te râ no ropu. Papu maitai te mauiui ra o ˈna. Mea maoro hoi to raua Aberahama oraraa i roto i teie fare.a E rave rahi tupuraa oaoa ta raua i ǒ nei.

Ua ora raua i Ura, te hoê oire ruperupe mau, mea rahi te taata rimaî e te taata hoohoo. Te auraa e mea rahi ta raua mau taoˈa. No Sara, e ere teie fare i te hoê vahi haapueraa taihaa. E vahi teie i reira raua Aberahama i oaoa ˈi e i oto atoa ˈi. E rave rahi taime to raua pureraa i to raua Atua ra o Iehova. No reira mea poihere na Sara teie fare.

Noa ˈtu râ, ua ineine oia i te faarue i taua vahi ra. Ua hau atu o ˈna i te 60 matahiti, e mea atea e te atâta te mau vahi ta ˈna e haere ra. Eita paha o ˈna e hoˈi faahou mai. No te aha to ˈna oraraa i taui taue ai? E eaha te haapii mai i to ˈna hiˈoraa?

“A VAIIHO I TO FENUA”

Ua paari Sara i Ura. I teie râ mahana, e huˈahuˈa noa tei toe mai. I te tau o Sara, mea rahi te pahi e tere na te anavai o Eupharate no te afai i te mau taoˈa faufaa i Ura. Mea taata roa na te mau aroâ, apapa noa te pahi i te uahu e mea rahi te hoohooraa na te matete. A feruri na ia Sara tei paari i taua oire ruperupe, ua matau roa oia i te taata e ora ra i ǒ. Ua matau atoa te taata ia ˈna, inaha e vahine haviti mau â oia. E fetii rahi atoa to ˈna i reira.

I roto i te Bibilia, ua matauhia Sara no to ˈna faaroo rahi, eiaha i te atua avaˈe haamorihia e to Ura. Ua hamanihia hoê pare teitei no tera atua. Area Sara e haamori oia i te Atua mau, Iehova. Aita i faahitihia mea nafea Sara i te iteraa o vai Iehova. I haamori na to ˈna metua tane i te mau idolo. Ua faaipoipo Sara ia Aberahama, e ahuru matahiti hau aˈe i to ˈna.b (Genese 17:17) Ua matauhia Aberahama i muri mai ei “metua no te feia atoa i faatupu i te faaroo.” (Roma 4:11) Mea faatura, mea tauaparau e mea turu roa raua te tahi i te tahi. Hau atu â râ, mea here na raua ia Iehova.

Mea here roa na Sara i ta ˈna tane. Ua ora raua i Ura i pihai iho i to raua fetii. Aita râ i maoro, û atura raua i te hoê fifi. Te faaite ra te Bibilia e “vahine fanau ore Sari, aita ïa e tamarii ta ˈna.” (Genese 11:30) I tera ra tau e i roto i te taˈere, mea haama roa teie tupuraa. Ua vai taiva ore râ Sara i to ˈna Atua e i ta ˈna tane. Ua riro Lota, hoê fetii ua pohe to ˈna papa, ei tamaiti na raua. I te hoê râ mahana, taui roa to raua oraraa.

Ua oaoa roa Aberahama a haere ai ia Sara ra. Ohipa maere mau tei tupu. Ua fa mai te Atua na roto i te hoê melahi e ua paraparau roa ˈtu ia ˈna. A feruri na i to Sara huru i mua i ta ˈna tane. Ua ani paha oia: ‘Eaha ta ˈna i parau? Faaite mai na!’ Ua feruri paha na mua Aberahama i ta ˈna e parau. Faaite atura oia e ua parau Iehova ia ˈna: “A vaiiho i to fenua e to fetii e a haere i te fenua ta ˈu e faaite ia oe.” (Ohipa 7:2, 3) Feruri atura raua i teie hopoia ta Iehova e horoa mai ra. E titauhia ia faarue raua i to raua oraraa fanaˈo no te ora i roto te fare ie. Eaha to Sara huru i tera taime? Hiˈo noa Aberahama ia ˈna. Ua ineine anei o ˈna i te turu i ta ˈna tane?

E maere paha tatou i tera huru tupuraa. Na ô paha tatou: “Aita te Atua i ani aˈenei ia ˈu aore ra to ˈu hoa ia na reira!” Tera râ, eita anei tatou e faaruru ra i te hoê â tupuraa e to Sara? Te ora nei tatou i roto i te hoê ao nounou taoˈa, o te turai mai ia imi na mua roa te oraraa fanaˈo e te papu aore ra te mau mea materia. Te faaitoito mai ra râ te Bibilia ia imi na mua te mau mea pae varua e ia faaoaoa i te Atua. (Mataio 6:33) A feruri ai i ta Sara i rave, e ui anaˈe ïa, ‘Eaha ta ˈu e faaoti?’

‘UA FAARUE RAUA I TE FENUA’

A faaineine ai ta ˈna mau taihaa, e titauhia ia Sara ia faaoti eaha ta ˈna e rave e ta ˈna e vaiiho. Aita o ˈna e nehenehe e rave i te mau taihaa rarahi no te tere na nia i te mau asini e kamela. Ia rave râ oia i te mau taihaa e tano no tera huru oraraa. Papu maitai, ua hoo aore ra ua horoa raua i te toea. Ua haapae atoa Sara i te oraraa oire, aita faahou o ˈna e haere i te matete, te hoohooraa taoˈa, mai te huero, te inaˈi, te maa hotu, te ahu e te tahi atu mau mea hinaarohia.

E ere paha mea ohie no Sara ia faarue i to ˈna fare mai te peu iho â râ e au te reira i te mau fare ta te mau ihipǎpǎ i ite mai i Ura. E rave rahi piha to vetahi o taua mau fare ra, e ua tamaumau-atoa-hia te pape na roto. Noa ˈtu e fare haihai, te vai ra iho â hoê tafare, te patu e te opani ia nehenehe e ponaohia. E paruru anei te fare ie i te eiâ aore ra i te mau animara oviri mai te liona e te daba? Pinepine hoi i te itehia taua mau animara ra i tera ra tau.

E no te utuafare o Sara? E ere mea ohie ia auraro i te faaueraa a te Atua ia vaiiho i ‘to raua fetii.’ Eita e ore e taeae e tuahine to Sara, e fetii piri atoa herehia e ana. Eita paha oia e farerei faahou ia ratou. Aita râ Sara i toaruaru, ua tamau oia i te faaineine ia ˈna no te faarue i tera oire.

Noa ˈtu ere mea ohie no Sara, taeraa te mahana no te reva ua ineine oia. Ei patereareha, ua haere atoa Tera na muri. E 200 matahiti to ˈna. (Genese 11:31) Mea rahi tei titauhia ia Sara ia rave no te aupuru i to ˈna papa ruhiruhia. Ua haere atoa Lota na muri ia ratou no te auraro i ta Iehova faaueraa ia “faarue . . . i te fenua o te Kaladaio.”—Ohipa 7:4.

Tere atura ratou na Eupharate no te haere i Harana, e 960 kilometera te atea i te pae apatoerau tooa o te râ ia Ura. Faaea ihora ratou i ǒ inaha ua paari roa Tera, aita oia i nehenehe faahou e tere atea. Ua faaea ratou i ǒ tae roa ˈtu i to ˈna poheraa. E 205 matahiti ïa to ˈna. Hou ratou a faarue ai i Harana, tapiti faahou maira Iehova i te parau ia Aberahama ia faarue i tera fenua e ia haere i te vahi ta ˈna e faaite atu. I tera râ taime, ua fafau Iehova ia Aberahama: “E faariro vau ia oe ei nunaa rahi.” (Genese 12:2-4) I to ratou faarueraa i Harana, e 75 matahiti to Aberahama e e 65 to Sara, aita râ ta raua e tamarii. E nafea ïa Aberahama e riro mai ai ei nunaa rahi? E rave anei oia i te tahi atu vahine na ˈna? Mea pinepine te faaipoiporaa e rave rahi vahine i te itehia i tera ra tau, peneiaˈe ua manaˈo Sara i tera ravea.

Noa ˈtu râ, ua faarue ratou i Harana. A tapao na râ o vai tei apiti ia ratou. Te na ô ra te Bibilia e ua rave Aberahama e to ˈna utuafare i te mau faufaa atoa ta ratou i haapue e “te feia tei noaa mai ia [ratou] i Harana.” (Genese 12:5) O vai ma taua feia ra? E tavini paha. Papu maitai, ua faaite Aberahama raua Sara ia ratou i ta raua mau tiaturiraa. Ia au i te tahi mau tatararaa ati Iuda, e au ra e ua apiti vetahi o taua feia ra ia Aberahama raua Sara no te haamori ia Iehova. Mai te peu e mea mau te reira, no to ˈna faaroo rahi ua paraparau Sara no nia ia Iehova e to ˈna tiaturiraa ma te papu. E faufaahia tatou i to ˈna hiˈoraa, inaha te ora nei tatou i te tau mea varavara roa te taata o te tiaturi nei i te Atua. Ia taio outou i te tahi irava Bibilia faaitoito mau, eita anei ta outou e nehenehe e faaite atu ia vetahi ê?

“POU IHORA ABERAMA I AIPHITI”

Mea na roto ratou i te anavai o Eupharate, peneiaˈe i te 14 no Nisana 1943 hou te tau o Iesu. Ua haere ratou i te pae apatoa e tomo atura i te fenua ta Iehova i fafau ia ratou. (Exodo 12:40, 41) A feruri na i te huru o Sara. Te hiˈo ra oia ati aˈe ia ˈna, te nehenehe e te haumǎrû o taua fenua ra. I pihai iho i te mau tumu raau rarahi o More, aita i atea roa i Sekema ua paraparau faahou Iehova ia Aberahama a na ô atu ai: “I to huaai e horoa ˈtu ai au i teie fenua.” Ua matau Aberahama i te parau o te “huaai.” Ua haamanaˈo paha oia i tei tupu i te ô i Edene, i taua taime ra ua tohu Iehova e fa mai hoê huaai no te haamou roa ia Satani. E ere a tahi ra to Iehova fafauraa ia Aberahama e e haamaitaihia te mau nunaa atoa o te fenua maoti te nunaa e na roto mai ia ˈna.—Genese 3:15; 12:2, 3, 6, 7.

Noa ˈtu râ, ua faaruru ratou i te fifi. Ua tupu te oˈe i Kanaana, pou ihora Aberahama e to ˈna utuafare i Aiphiti. Ua taa râ ia ˈna eaha te nehenehe e tupu. Parau atura oia ia Sara: “A faaroo mai na! Ua ite au e vahine haviti mau â oe. Ia ite to Aiphiti ia oe, e na ô iho â ratou: ‘E vahine faaipoipo tera na ˈna.’ E haapohe ratou ia ˈu, e vaiiho râ ratou ia oe ia ora. A parau na e tuahine oe no ˈu, a ore atu ai au e fifi maoti oe, e e ora noa ïa vau.” (Genese 12:10-13) No te aha Aberahama i faahiti ai i tera parau?

E ere o ˈna i te taata haavare e te paruparu mai ta vetahi e manaˈo ra. E tuahine hoi Sara no ˈna e ua tano ta ˈna i parau atu. Ua ite maitai raua Sara e mea faufaa roa te opuaraa a te Atua, ia fa mai te hoê huaai e nunaa na roto ia Aberahama. Mea faufaa ïa ia paruruhia Aberahama. Hau atu, te haapapu ra te ihipǎpǎ e pinepine te feia mana i Aiphiti i te haru i te hoê vahine e i te haapohe i ta ˈna tane. Ua haa ïa Aberahama ma te paari e ua turu Sara i ta ˈna faaotiraa.

Ia hiˈohia i tei tupu i muri mai, ua tano iho â ta Aberahama faaotiraa. Ua ite te mau huiarii no Aiphiti e vahine nehenehe roa o Sara noa ˈtu to ˈna matahiti. Faaite atura ratou ia Pharao. Faaue ihora oia ia afai mai ia Sara ia ˈna ra. Papu maitai, ua haapeapea roa Aberahama e ua mǎtaˈu roa o Sara. Tera râ, e au ra e ua riro Sara ei manihini taa ê na Pharao. Peneiaˈe ua faahinaaro Pharao ia Sara, e ua faaite oia i ta ˈna mau taoˈa rahi a faaau atu ai i to ˈna “taeae” ra ia Aberahama, to raua faaipoiporaa.—Genese 12:14-16.

A feruri na ia Sara i te aorai e mataitai ra i te fenua Aiphiti mai nia mai i te taupee. Eaha to ˈna huru? E patu teitei ati aˈe ia ˈna, e tafare to nia ˈtu e e maa au maitai i mua ia ˈna. E hema anei oia i teie oraraa fanaˈo aˈe i ta ˈna i ite i Ura? Auê ïa Satani i te oaoa ahani Sara i faaoti e faarue ia Aberahama no te riro ei vahine faaipoipo na Pharao! Aita râ. Ua vai taiva ore Sara i ta ˈna tane e i to ˈna Atua. Ahani pauroa te feia faaipoipo i pee i to ˈna hiˈoraa! Nehenehe anei ta oe e pee i te taiva ore o Sara i nia i to fetii e hoa?

Ua paruru Iehova i teie vahine here ma te tairi ia Pharao e to ˈna utuafare i te maˈi rahi. I to Pharao iteraa e vahine faaipoipo Sara na Aberahama, faahoˈi ihora oia ia Sara ia Aberahama e faaue atura oia ia raua ia faarue i Aiphiti. (Genese 12:17-20) Auê ïa Aberahama i te oaoa inaha ua hoˈi mai ta ˈna vahine ia ˈna ra! A haamanaˈo na i ta ˈna i parau atu i te omuaraa: “Ua ite au e vahine haviti mau â oe.” Te mea faufaa ˈtu â no Aberahama, te nehenehe ïa o te rotoraa o to Sara aau, e faufaa rahi hoi to te reira i te aro o Iehova. (Petero 1, 3:1-5) O tatou pauroa te nehenehe e faatupu i te mau huru maitatai. E pee tatou i te faaroo o Sara ia imi na mua tatou i te mau mea pae varua eiaha râ te taoˈa materia, ia tutava tatou i te faaite ia vetahi ê o vai te Atua e i te faatura i ta te Atua mau ture aveia i mua i te faahemaraa.