5 E farii te Atua i te mau haapaoraa atoa—E parau mau anei?

Ua faaroo paha oe: “Mea rahi te ravea e tae ai i te hoê vahi, mea rahi atoa ïa te ravea no te haamori i te Atua. Na te taata taitahi e maiti i ta ˈna iho.”

Te haapii ra te Bibilia: Ia haamori tatou i te Atua ma te aau tae mau, eiaha ma te aau piti e te huru haavarevare. Ua faaite Iesu i te mau aratai haapaoraa o to ˈna ra tau no te aha te Atua i faarue ai ia ratou. Ua na ô oia: “E te mau haavare e, te au maite na outou i ta Isaia i parau mai ia outou na, a na ô mai ai oia ra e, Te faatura mai nei te vaha o teie nei feia ia ˈu, area to ratou aau ra tei te atea ê ïa.” (Mareko 7:6) Eita râ te aau tae mau e navai e farii ai te Atua i ta tatou haamoriraa.

Ua faataa maitai Iesu i te hape rahi o te haamoriraa a teie mau tia faaroo e a ta ratou mau pǐpǐ. Ua faahiti oia i ta te Atua i parau: “E haamoriraa faufaa ore . . . ta ratou ia ˈu, tei haapii ratou i tei tuuhia mai e te taata.” (Mareko 7:7) No te peeraa i ta ratou mau tutuu faaroo eiaha râ i te mau titauraa a te Atua i “faufaa ore” ai ta ratou haamoriraa.

Te haapii ra te Bibilia e hoê anaˈe ravea e aita ˈtu no te haafatata i te Atua. Te na ô ra te Mataio 7:13, 14: “E tomo na te uputa pirihao; te atea nei hoi te uputa e te aano nei te eˈa e tae atu ai i te pohe; e e rave rahi tei na reira i te tomo. Te apǐapǐ râ o te uputa e te piri hoi o te eˈa e tae atu ai i te ora, e te iti hoi o te feia i ite atu i te reira!”

Faufaaraa ia ite i te parau mau: A feruri na, ua faaineine oe ia oe ehia avaˈe i te maoro no te hoê hororaa atea. O oe te taata matamua tei tapae, aita râ i horoahia ˈtu te re no te mea ua ofati oe i te hoê ture ma te ite ore. Mai te aha ïa to oe huru? E na ô paha ïa oe e ua mâuˈa roa ta oe mau tutavaraa. E nehenehe atoa te reira e tupu no ta tatou haamoriraa i te Atua.

Ua faaau te aposetolo Paulo i ta tatou haamoriraa i te hoê tataˈuraa. Ia tataˈu te hoê maona ‘ma te ore e haapao i te ture, e ore oia e faakoronahia,’ ia au i te Timoteo 2, 2:5. Eita oia e re ia horo oia mai ta ˈna e hinaaro. Eita atoa ïa tatou e haamori i te Atua mai ta tatou e hinaaro. E farii maitai mai te Atua ia haamori tatou ia ˈna “ma te haapao i te ture,” oia hoi mai ta ˈna e faaue ra.

E mauruuru te Atua i ta tatou haamoriraa ia haapae tatou i te mau haavare no nia ia ˈna. Ua faataa Iesu i roto i te Ioane 4:23 e ‘e haamori te feia haamori mau i te Metua ma te varua e te parau mau.’ Na te Bibilia, te Parau a te Atua, e faaite maira eaha te ravea tano no te haamori ia ˈna.—Ioane 17:17.a

[Nota i raro i te api]

[Parau iti faaôhia i te api 8]

Te haapii ra anei te mau haapaoraa atoa i te taata ia haamori i te Atua mai ta ˈna e faaue ra?