Te farii ra anei te Atua i te mau huru haamoriraa atoa?
Pahonoraa matauhia:
▪ “E eˈa te mau haapaoraa atoa e aratai atu i te Atua ra.”
▪ “Atira noa ˈtu ta oe tiaturiraa mai te peu e e mea haavare ore oe.”
Eaha ta Iesu i parau?
▪ “E tomo na te uputa pirihao; te atea nei hoi te uputa e te aano nei te eˈa e tae atu ai i te pohe; e e rave rahi tei na reira i te tomo. Te apǐapǐ râ o te uputa e te piri hoi o te eˈa e tae atu ai i te ora, e te iti hoi o te feia i ite atu i te reira!” (Mataio 7:13, 14) No Iesu, e ere o te taatoaraa o te haapaoraa te fariihia e te Atua.
▪ “E rave rahi te parau mai ia ˈu ia tae i taua mahana ra, E te Fatu, e te Fatu, e ere anei ua haapii matou ma to oe iˈoa, e ua tatai i te mau demoni i to oe iˈoa, e ua rave i te semeio e rave rahi i to oe iˈoa? O ta ˈu ïa e parau atu, Aita roâ vau i ite ia outou. E haere ê atu outou, e te feia rave parau ino.” (Mataio 7:22, 23) Eita Iesu e farii i te feia atoa e parau ra e pee ia ˈna.
MEA rahi te taata faaroo o te poihere ra i ta ratou iho mau tiaturiraa e tutuu. E nafea râ mai te peu e aita tera mau haapiiraa e tuati ra e to te Parau a te Atua, te Bibilia? Ua faaite Iesu i te fifi atâta e pee i te mau tutuu a te taata i to ˈna parauraa i te mau aratai haapaoraa i to ˈna tau e: ‘Ua faaore outou i te ture a te Atua i ta outou na tutuu.’ E ua faahiti atura oia i ta te Atua i parau: “Te ati mai nei teie nei feia ia ˈu i to ratou vaha, e te faatura mai nei ia ˈu i to ratou utu; tei te atea ê râ to ratou aau ia ˈu. E mea faufaa ore râ ta ratou e pure ia ˈu nei, a haapii ai i tei tuuhia mai e te taata anaˈe ra.”—Mataio 15:1-9; Isaia 29:13.
E mea faufaa atoa te haerea, eiaha noa te mau tiaturiraa. Te na ô ra te Bibilia no vetahi e parau ra e haamori i te Atua e: “Te parau nei ratou e ua ite i te Atua, area ta ratou ohipa, te parau nei ïa aore i ite ia ˈna.” (Tito 1:16) Inaha, te na ô ra te Bibilia no te feia e ora nei i to tatou nei tau: “Te hinaaro i te mau mea e navenave ai ra aore hinaaro i te Atua, e hohoˈa paieti hoi to ratou, o te puai râ o te reira ra, ua hunahia ïa ia ratou, e fariu ê oe i te reira.”—Timoteo 2, 3:4, 5.
E titauhia te aau haavare ore, eita râ e navai. No te aha? E nehenehe te hoê taata e hape e mea haavare ore hoi oia. No reira, e mea faufaa roa te ite mau i te Atua. (Roma 10:2, 3) Ia noaa mai taua ite ra e ia ohipa tatou ia au i ta te Bibilia e parau ra, e mauruuru mai ïa te Atua. (Mataio 7:21) Oia mau, ua taaihia te haapaoraa mau i te manaˈo turai mau, te tiaturiraa mau, e te ohipa mau. E te ohipa mau, o te raveraa ïa i te hinaaro o te Atua i te mau mahana atoa!—Ioane 1, 2:17.
Mai te peu e e hinaaro oe e ite hau atu â no nia i ta te Bibilia e haapii maira no nia i te Atua, a ani i te mau Ite no Iehova i te hoê haapiiraa bibilia tamoni ore i te fare.
[Parau iti faaôhia i te api 9]
Ua taaihia te haapaoraa mau i te manaˈo turai mau, te tiaturiraa mau, e te ohipa mau