Te parau mau e maitai ai to oe oraraa

UA FAAROO aore ra ua haapiihia paha oe i te mau haavare no nia i te Atua tei faahitihia mai nei. Te taiâ nei râ paha oe i te haapae i ta oe i tiaturi maoro na.

Mai tera iho â. Te opani ra te tahi mau haapaoraa i te taata ia faaau i ta ratou mau haapiiraa e ta te Bibilia. Te parau ra te tahi atu e mea fifi roa ia taa i te Bibilia no te huna i ta ratou mau haavare. Area te rahiraa o te mau pǐpǐ a Iesu, ua taa ïa i ta ˈna mau parau. Aita hoi ratou i haere i te haapiiraa.—Ohipa 4:13.

Te ere ra anei oe i te faaroo ia hiˈopoa oe i ta oe mau tiaturiraa? Eita te Atua e riri ia oe no te imiraa i ta ˈna e titau maira i roto i te Bibilia, ta ˈna poroi no te huitaata. Te faaitoitohia ra oe ia hiˈopoa i te Bibilia ‘ia ite oe i te hinaaro tia o te Atua, e te au, e te maitai,’ ia au i te Roma 12:2.

Mea faufaa ia imi i te parau mau no nia i te Atua, eiaha noa no te haapii i te tahi mea apî, ia maitai atoa râ to oe oraraa. (Ioane 8:32) A hiˈo na ia Deanne tei faahitihia. I teie nei, te tiaturi ra oia i te Parau a te Atua. Te faatia ra oia e i to ˈna haapiiraa i te Bibilia, mea maramarama roa. Ite atura oia e e ere Iehova i te hoê Atua taa ore, e Metua î râ i te here i te raˈi. I teie nei, e fa ta ˈna i roto i te oraraa.

I haapii na paha oe i te Bibilia ma te manaˈo e aita e apî. Eiaha e vaiiho i ta oe haapiiraa. Te tamataraa i te taa i te Bibilia ma te tiaturi noa i te mau haavare no nia i te Atua, e au ïa i te tataîraa i te hoê matini ma te rave i te hoê buka ê roa. E haere paha ia oe ia tamaumau i te tahi noa mau tuhaa o taua matini ra. E taora râ oe i te tauera no te fiu. A rave i te buka o tera matini, e oti ïa ia oe i te tataî.

E hinaaro anei oe e ite i te parau mau no nia i te Atua? A farerei i te mau Ite no Iehova e vai ra i to oe vahi aore ra a papai i te vahi nohoraa e tano i te api 4 o teie vea no te ani i te hoê haapiiraa Bibilia tamoni ore i te fare.

[Parau iti faaôhia i te api 9]

‘Ia ite oe i te hinaaro tia o te Atua, e te au, e te maitai.’—ROMA 12:2