A faatupu i te mau huru maitatai o te tauturu ia outou ia faariro i te taata ei pǐpǐ
“E haere outou e faariro i te mau fenua atoa ei pǐpǐ.”—MATAIO 28:19.
1. Eaha te aravihi e te mau huru hinaarohia e te tahi mau tavini tahito a te Atua?
I TE TAHI mau taime e mea tia ia faatupu te mau tavini a Iehova i te aravihi e te mau huru o te tauturu ia ratou ia rave i to ˈna hinaaro. Ei hiˈoraa, i te faaueraa a te Atua, ua faarue Aberahama e o Sara i te oire ruperupe o Ura e ua hinaaro paha raua i te mau huru e te aravihi titauhia no te feia e parahi i roto i te tiahapa. (Hebera 11:8, 9, 15) I to ˈna aratairaa i te mau Iseraela i te Fenua tǎpǔhia, e mea titauhia ia faaite Iosua i te itoito, ia tiaturi ia Iehova, e ia ite i ta ˈna Ture. (Iosua 1:7-9) E noa ˈtu e mea aravihi aˈena o Bezaleela e Aholiaba, ua haamaitai aore ra ua faarahi mau atu â te varua o te Atua i te reira ia nehenehe taua na taata ra ia apiti e ia tiaau ma te manuïa i te faatiaraa o te sekene e te hamaniraa i te mau tauihaa.—Exodo 31:1-11.
2. E tauaparau tatou no nia i teihea mau uiraa i taaihia i te faariroraa i te taata ei pǐpǐ?
2 Tau senekele i muri aˈe, ua faaue Iesu Mesia i ta ˈna mau pǐpǐ: “E haere outou e faariro i te mau fenua atoa ei pǐpǐ, . . . ma te haapii atu ia ratou i te haapao i te mau mea atoa ta ˈu i parau atu ia outou na.” (Mataio 28:19, 20) Aita i horoahia aˈenei te hoê fanaˈoraa taa ê mai te reira i te taata. Eaha te mau huru maitatai e hinaarohia no te faariro i te taata ei pǐpǐ? E nafea tatou e faatupu ai i teie mau huru?
A faaite i te hoê here hohonu i te Atua
3. Te horoa nei te faaueraa e faariro i te taata ei pǐpǐ i teihea ravea na tatou?
3 E titau te paraparauraa ˈtu i te taata e te tutavaraa ia farii ratou i te haamori i te Atua mau ia here hohonu tatou ia Iehova. Ua nehenehe te mau Iseraela e faaite papu i to ratou here i te Atua ma te auraro i ta ˈna mau faaueraa ma to ratou aau atoa, ma te pûpû i te mau tusia e au, e ma te himene no te arue ia ˈna. (Deuteronomi 10:12, 13; 30:19, 20; Salamo 21:13; 96:1, 2; 138:5) Ei tavini o te faariro i te taata ei pǐpǐ, te tapea atoa nei tatou i te mau ture a te Atua, tera râ te faaite atoa nei tatou i to tatou here ia Iehova ma te parau ia vetahi ê no nia ia ˈna e ta ˈna mau opuaraa. E mea tia ia parau tatou ma te ite papu, ma te maiti i te mau taˈo tano no te faaite i to tatou huru aau haavare ore no nia i to tatou tiaturiraa no ǒ mai i te Atua ra.—Tesalonia 1, 1:5; Petero 1, 3:15.
4. No te aha Iesu i au ai i te haapii i te taata no nia ia Iehova?
4 No to ˈna here hohonu ia Iehova, mea au roa na Iesu i te paraparau no nia i te mau opuaraa a te Atua, te Basileia, e te haamoriraa mau. (Luka 8:1; Ioane 4:23, 24, 31) Inaha, ua na ô Iesu e: “Teie ta ˈu maa, o te haapao i to ˈna hinaaro o to tei tono mai ia ˈu nei, e te faaoti i ta ˈna ohipa.” (Ioane 4:34) E tano teie mau parau a te papai salamo no Iesu: “E mea au na ˈu te rave i to oe hinaaro, e tau Atua; te vai nei hoi ta oe ture tei roto i to ˈu nei aau. Te parau nei au i te parau-tia i roto i te amuiraa rahi o te taata nei; inaha, aore roa tau vaha i mamû i te reira, ua ite atoa hoi oe, e tau Atua, e Iehova.”—Salamo 40:8, 9; Hebera 10:7-10.
5, 6. Eaha te huru otahi hinaarohia e te mau tavini no te faariro i te taata ei pǐpǐ?
5 No to ratou here i te Atua, e paraparau te mau taata apî no haapii noa ˈtura i te parau mau o te Bibilia, i te tahi mau taime ma te papu roa no nia ia Iehova e to ˈna Basileia i manuïa ˈi ratou i te faaitoito ia vetahi ê e hiˈopoa i te mau Papai. (Ioane 1:41) O te here i te Atua te huru otahi o te turai ia tatou ia haa no te faariro i te taata ei pǐpǐ. No reira e tapea ora noa anaˈe i tera here ma te taio e te feruriruri tamau i ta ˈna Parau.—Timoteo 1, 4:6, 15; Apokalupo 2:4.
6 Ua tauturu mau â to ˈna here ia Iehova ia riro Iesu Mesia ei orometua haapii itoito rahi. E ere râ tera anaˈe te tumu o to ˈna manuïaraa ei taata poro i te Basileia. No reira, eaha te tahi atu huru maitai tei faariro ia Iesu ei tavini manuïa i te faariro i te taata ei pǐpǐ?
E tâuˈa anaˈe ma te here i te taata
7, 8. Mea nafea Iesu i hiˈo ai i te taata?
7 Ua tâuˈa Iesu i te taata e ua anaanatae mau oia ia ratou. I to ˈna oraraa hou a riro ai ei taata ua au roa oia, ei “rave ohipa aravihi” a te Atua, i te mau mea taaihia i te huitaata. (Maseli 8:30, 31, MN) Ei taata i te fenua, ua aroha Iesu i te taata, ma te tamahanahana i tei haere mai ia ˈna ra. (Mataio 11:28-30; MN) Ua faaite Iesu i to Iehova iho here e aroha, e na te reira i aratai mai i te taata i te haamoriraa i te Atua mau hoê roa. Ua faaroo te mau huru taata atoa ia Iesu no te mea ua tâuˈa oia ia ratou e i to ratou mau huru tupuraa ma te here.—Luka 7:36-50; 18:15-17; 19:1-10.
8 I to te hoê taata aniraa nahea e noaa ˈi ia ˈna te ora mure ore, “ua hiˈo atura Iesu ia ˈna e ua aroha ˈtura ia ˈna.” (Mareko 10:17-21) No nia i te tahi mau taata no Betania o ta Iesu i haapii, te taio nei tatou e: “E aroha Iesu ia Mareta e tana [tuahine], e ia Lazaro.” (Ioane 11:1, 5; MN) Ua tâuˈa rahi roa Iesu i te taata i ore ai oia e faafaaea aˈe no te haapii atu ia ratou. (Mareko 6:30-34) No to ˈna anaanatae rahi î te here i te taata-tupu i manuïa hau atu ai Iesu i te tahi noa ˈˈe taata i te aratairaa i te taata i te haamoriraa mau.
9. Eaha to Paulo huru ei tavini o te faariro i te taata ei pǐpǐ?
9 Ua anaanatae mau atoa te aposetolo Paulo i te taata o ta ˈna i poro atu. Ei hiˈoraa, ua parau oia i te feia i riro mai ei Kerisetiano i Tesalonia: “No te rahi o to matou aroha ia outou, ua tia roa ia matou te horoa ˈtu i te evanelia a te Atua ia outou na, e eiaha hoi te reira anaˈe ra, o matou atoa iho ïa, no te mea ua riro outou ei here na matou.” Ei faahopearaa no te mau tutavaraa î i te here a Paulo, ‘ua fariu mai’ vetahi i Tesalonia ‘i te mau idolo no te [tavini] i te Atua ora.’ (Tesalonia 1, 1:9; MN; 2:8) Ia anaanatae mau tatou i te taata, mai ia Iesu e ia Paulo te huru, e oaoa atoa paha tatou i te iteraa ˈtu i te parau apî oaoa i te ôraa i roto i te aau o te “feia [aau farii e tano] no te ora mure ore.”—Ohipa 13:48; MN.
E faaite anaˈe i te hoê huru feruriraa haapae
10, 11. No te aha e hinaarohia ˈi te hoê huru feruriraa haapae ia tamata tatou i te faariro i te taata ei pǐpǐ?
10 E huru feruriraa haapae to te mau tavini tei manuïa i te faariro i te taata ei pǐpǐ. E ere te noaaraa te taoˈa rahi i te mea faufaa roa ˈˈe no ratou. Inaha, ua parau Iesu i ta ˈna mau pǐpǐ e: “Te faaô taiata o te feia taoˈa rahi i te Basileia o te Atua e!” Ua hitimaue te mau pǐpǐ i tera parau, ua na ô â râ Iesu e: “E te mau tamarii e, te faaô taiata o te feia i tiaturi i te taoˈa i te Basileia o te Atua e! E faaô ohie aˈe te kamela na roto i te apoo au i te taata taoˈa ia faaô i te Basileia o te Atua ra.” (Mareko 10:23-25) Ua faaitoito Iesu i te hoê oraraa ohie no ta ˈna mau pǐpǐ ia nehenehe ratou e haafaufaa rahi i te faariroraa i te taata ei pǐpǐ. (Mataio 6:22-24, 33) No te aha te hoê huru feruriraa haapae e tauturu ai ia tatou ia faariro i te taata ei pǐpǐ?
11 E titau te haapiiraa i te mau mea atoa ta Iesu i faaue e rave rahi tutavaraa. E tutava iho â te hoê tavini o te faariro i te taata ei pǐpǐ i te faatere i te mau hebedoma atoa i te hoê haapiiraa bibilia e te hoê taata anaanatae. Ia rahi atu â to ratou taime no te imi i te taata aau tae, ua faarue te tahi feia poro i te Basileia i ta ratou ohipa taime taatoa no te hoê ohipa afa mahana. E rave rahi Kerisetiano tei haapii i te hoê reo ê no te poro atu i te tahi mau pǔpǔ taata nunaa ê i to ratou vahi. Ua faarue vetahi atu feia poro i to ratou fare no te haere i te tahi atu vahi aore ra fenua no te apiti hau atu â i roto i te auhuneraa. (Mataio 9:37, 38) E titau teie mau mea atoa i te hoê huru feruriraa haapae. E hau atu â râ tei hinaarohia ia manuïa te hoê tavini o te faariro i te taata ei pǐpǐ.
E faaoromai anaˈe eiaha râ e haamâuˈa i te taime
12, 13. No te aha e mea faufaa roa ˈi te faaoromai no te faariro i te taata ei pǐpǐ?
12 O te faaoromai te tahi atu huru maitai o te tauturu ia tatou ia faariro i te taata ei pǐpǐ. E ohipa ru ta tatou poroi Kerisetiano, mea pinepine râ e taime rahi te pau e e titauhia te faaoromai no te faariro i te taata ei pǐpǐ. (Korinetia 1, 7:29) Aita o Iesu i ru noa i to ˈna iho teina ia Iakobo. Noa ˈtu e ua ite maitai paha o Iakobo i ta Iesu ohipa pororaa, no te hoê roaraa taime ua tapea te tahi mea ia ˈna ia ore ia riro mai ei pǐpǐ. (Ioane 7:5) I ropu râ i te tau poto o te poheraa o Iesu e te Penetekose 33 T.T., papu maitai, ua riro Iakobo ei pǐpǐ, no te mea te faaite ra te mau Papai e ua ruru oia no te pure e to ˈna metua vahine, to ˈna iho mau taeae mau, e te mau aposetolo. (Ohipa 1:13, 14) Ua haere maitai o Iakobo i mua i te pae varua, i muri aˈe ma te amo i te mau hopoia teimaha i roto i te amuiraa Kerisetiano.—Ohipa 15: 13; Korinetia 1, 15:7.
13 Mai te feia faaapu, te tanu nei te mau Kerisetiano i te mau mea, mai te taaraa i te Parau a te Atua, te here ia Iehova, e te huru feruriraa e au i te Mesia, o te pinepine i te tupu mǎrû. E titau te reira i te faaoromai. Ua papai Iakobo e: “E faaoromai, e au mau taeae, e ia tae mai te Fatu ra. Inaha hoi te faaapu ra, te tiai maite ra oia i te maa maitai o te fenua nei, te faaoromai maite ra hoi i te reira, e ia noaa mai te ûa matamua, e te ûa hopea ra. E faaoromai atoa hoi outou, e faaitoito na i to outou aau; ua fatata roa taua haerea mai o te Fatu ra.” (Iakobo 5:7, 8) Ua faaitoito Iakobo i te mau hoa faaroo ia ‘faaoromai e ia tae mai te Fatu.’ Ia ore te mau pǐpǐ e taa i te tahi mea, e faataa aore ra e faahohoˈa Iesu i te mau mea ma te faaoromai. (Mataio 13:10-23; Luka 19:11; 21:7; Ohipa 1:6-8) I teie nei i te vairaa mai o te Fatu, e hinaaro-atoa-hia te faaoromai a tutava ˈi tatou i te faariro i te taata ei pǐpǐ. Ia haapiihia te feia tei riro mai ei pǐpǐ a Iesu i teie tau ma te faaoromai e tia ˈi.—Ioane 14:9.
14. Noa ˈtu e e faaoromai tatou, e nafea tatou e faaohipa ˈi i to tatou taime ma te aravihi ei tavini o te faariro i te taata ei pǐpǐ?
14 Noa ˈtu e e faaoromai tatou, eita te parau e hotu mai i roto i te rahiraa o te taata tei haamata i te haapii i te Bibilia. (Mataio 13:18-23) I muri aˈe i te mau tutavaraa e au no te tauturu ia ratou, ma te paari e faaea ïa tatou i te horoa i te taime no teie mau taata e e imi tatou i te feia o te haafaufaa aˈe paha i te parau mau o te Bibilia. (Koheleta 3:1, 6) Parau mau, e hinaaro atoa paha te feia anaanatae ia rahi atu te tauturu no te taui i to ratou mau manaˈo, haerea, e fa matamua o te oraraa. No reira e faaoromai tatou mai ia Iesu i faaoromai e ta ˈna mau pǐpǐ o tei faatupu atâ i te haerea tano.—Mareko 9:33-37; 10:35-45.
Ia aravihi atu â tatou i te haapii
15, 16. No te aha e mea faufaa roa ˈi te huru ohie e te faaineine-maitai-raa ia faariro tatou i te taata ei pǐpǐ?
15 Te here i te Atua, te anaanataeraa i te taata, te hoê huru feruriraa haapae, e te faaoromai e titauraa faufaa ïa ia manuïa tatou i te faariro i te taata ei pǐpǐ. E mea tia atoa râ ia aravihi atu â tatou i te haapii, ia nehenehe tatou e faataa i te mau mea ma te ite maitai e te ohie. Ei hiˈoraa, e mea puai mau e rave rahi parau a Iesu Mesia, te Orometua Rahi, no to ratou huru ohie. Te haamanaˈo atoa nei outou i teie mau parau a Iesu e: ‘E haapue i te taoˈa na outou i nia i te raˈi.’ “Eiaha te mea moˈa ra e hopoihia ˈtu na te urî.” ‘E faatiahia te paari e ta ˈna mau tamarii.’ “E hopoi maori i ta Kaisara ia Kaisara ra, e ta te Atua ra, e hopoi â ïa i te Atua ra.” (Mataio 6:20; 7:6; 11:19; 22:21) Parau mau, aita Iesu i horoa noa i te mau parau poto. Ua haamaramarama oia e ua faataa i te mau mea ia tano ia na reirahia. E nafea outou e pee ai i te huru haapiiraa a Iesu?
16 O te faaineine-maitai-raa te ravea hoê no te haapii ma te ohie e te ite maitai. E paraparau rahi noa te hoê tavini ineine ore. E haapoiri mau â oia i te mau tuhaa faufaa no te rahi o te parau, ma te faaite i te mau mea atoa o ta ˈna i ite no nia i te hoê tumu parau. Taa ê atu râ, e manaˈo te tavini ineine maitai i te taata o ta ˈna e haapii atu, e feruri maite oia i te tumu parau, e e faaite maitai oia i te mea noa e hinaarohia. (Maseli 15:28; Korinetia 1, 2:1, 2) E feruri oia i ta te taata haapii i ite aˈena e eaha te mau tuhaa e mea tia ia tatarahia i roto i te haapiiraa. Mea ite roa paha te tavini e rave rahi mea anaanatae no nia i te tumu parau, ia faaorehia râ te mau haamaramaramaraa faufaa ore e ite maitai ai te taata.
17. E nafea tatou e tauturu ai i te taata ia feruri i nia i te mau Papai?
17 Ua tauturu atoa Iesu i te taata ia feruri, aita râ i horoa noa ˈtu i te mau mea. I te hoê taime, ei hiˈoraa, ua ui oia: “Eaha to oe manaˈo, e Simona? ei ia vai ra te hui arii o teie nei ao titau atu ai i te taoˈa aufau e te moni aufau? ei ta ratou iho tamarii anei, e ia vetahi ê anei?” (Mataio 17:25) Mea au roa paha na tatou te faataaraa i te Bibilia e mea tia ia haavî tatou ia tatou iho ia nehenehe te taata haapii e faaite i to ˈna manaˈo aore ra e faataa i te hoê mea tei hiˈopoahia i te hoê haapiiraa bibilia i te fare. Eiaha iho â tatou e ui rahi roa i te taata. Maoti te mǎrû, te mau faahohoˈaraa maitatai, e te mau uiraa e au, e nehenehe ai tatou e tauturu ia ratou ia taa i te mau tuhaa o te mau Papai i vauvauhia i roto i ta tatou mau papai bibilia.
18. Eaha tei taaihia i te “haapii-maite-raa ˈtu”?
18 Te faahiti ra te mau Papai i te “haapii-maite-raa ˈtu.” (Timoteo 2, 4:2; Tito 1:9) E hau atu teie aravihi i te haapii i te tauturu-noa-raa i te hoê taata ia tamau aau i te mau mea. E mea tia ia tamata tatou i te tauturu i te hoê taata haapii bibilia ia faataa ê i te mea mau e te mea hapa, i te maitai e te ino, i te paari e te mea maamaa. Ia na reira tatou e ia tutava tatou i te faatupu i te here ia Iehova i roto i te aau o teie taata, e ite paha ïa oia no te aha e mea tia ˈi ia auraro oia i te Atua.
Ia apiti ma te itoito rahi i te faariroraa i te taata ei pǐpǐ
19. Mea nafea te mau Kerisetiano atoa e tauturu ai i te faariroraa i te taata ei pǐpǐ?
19 E faanahonahoraa no te faariro i te taata ei pǐpǐ te amuiraa Kerisetiano. Ia riro te hoê taata apî ei pǐpǐ, e ere noa o te Ite no Iehova tei farerei e tei tauturu ia ˈna ia haapii i te Bibilia te tia ia oaoa. Ia faanahohia te hoê pǔpǔ taata no te imi i te hoê tamarii moe, o te hoê noa paha taata o teie pǔpǔ tei ite i te tamarii apî. Ia farerei faahou râ te tamarii i to ˈna na metua, o te mau taata maimi atoa te oaoa. (Luka 15:6, 7) Hoê â huru, te tutava paatoa nei te amuiraa i te faariro i te taata ei pǐpǐ. Te apiti nei te mau Kerisetiano atoa i te imiraa i te feia o te riro mai paha ei pǐpǐ a Iesu. E ia haamata te hoê taata apî i te haere mai i te mau putuputuraa i te Piha a te Basileia, te tauturu nei te mau Kerisetiano atoa i reira ia rahi atu â to ˈna mauruuru no te haamoriraa mau. (Korinetia 1, 14:24, 25) No reira, e oaoa te mau Kerisetiano atoa i te riroraa mai te mau hanere tausani taata ei pǐpǐ apî i te mau matahiti atoa.
20. E mea tia ia rave outou i te aha mai te peu e te hinaaro nei outou e haapii ia vetahi ê i te parau mau bibilia?
20 E oaoa e rave rahi Kerisetiano haapao maitai i te haapii i te hoê taata no nia ia Iehova e te haamoriraa mau. Noa ˈtu râ ta ratou mau tutavaraa, aita paha ratou i nehenehe e na reira. Mai te peu e tera iho â, a tamau i te haapaari i to outou here ia Iehova, i te anaanatae atu i te taata, i te faaite i te hoê huru feruriraa haapae, i te faaoromai, e a tamata ia aravihi atu â outou i te haapii. Hau roa ˈtu â, a pure no nia i to outou hinaaro e haapii atu i te parau mau. (Koheleta 11:1) Ia tamahanahanahia outou i te iteraa e e tuhaa te mau mea atoa ta outou e rave nei i te taviniraa ia Iehova no te faariro i te taata ei pǐpǐ o te faahanahana i te Atua.
E nehenehe anei oe e faataa?
• No te aha te faariroraa i te taata ei pǐpǐ e tamata ˈi i to tatou here i te Atua?
• Eaha te mau huru maitatai e hinaarohia e te tavini o te faariro i te taata ei pǐpǐ?
• Eaha tei taaihia i te “haapii-maite-raa ˈtu”?
[Hohoˈa i te api 21]
Ma te faariro i te taata ei pǐpǐ, te faaite nei te mau Kerisetiano i to ratou here hohonu i te Atua
[Hohoˈa i te api 23]
No te aha te taata poro e anaanatae ai ia vetahi ê?
[Hohoˈa i te api 24]
Eaha te tahi o te mau huru maitatai e hinaarohia e te taata poro?
[Hohoˈa i te api 25]
E oaoa roa te mau Kerisetiano atoa i te iteraa ˈtu i te mau faahopearaa maitatai o te faariroraa i te taata ei pǐpǐ