Ua faahapa te faaroo o Noa i to te ao

UA FAAROO anei outou i te parau o Noa, te hoê taata mǎtaˈu i te Atua o tei hamani i te hoê araka no te faaoraraa i te hoê diluvi rahi? Noa ˈtu e mea tahito teie aamu, e mau mirioni taata tei ite maitai i te reira. Te mea râ ta te taata e rave rahi aita i ite, oia ïa e auraa to te oraraa o Noa no tatou paatoa.

No te aha e tia ˈi ia tatou ia anaanatae i te hoê aamu tahito e mau tausani matahiti aˈenei? Te vai ra anei te tahi mau tuearaa i roto i to Noa oraraa e to tatou? Mai te peu e e, nafea ïa tatou e faufaahia ˈi i to ˈna hiˈoraa?

Te ao i te tau o Noa

Ia au i te tuatapaparaa tau bibilia, ua fanauhia o Noa i te matahiti 2970 H.T.T.—126 matahiti i muri aˈe i te poheraa o Adamu. I te tau o Noa, ua î te fenua i te haavîraa uˈana, e ua maiti te rahiraa o te huaai o Adamu e pee i te hiˈoraa etaeta o to ratou tupuna. No reira, “ite aˈera Iehova, e ino rahi to te taata o te ao nei, e ua ino anaˈe te mau manaˈo atoa, e te mau opuaraa atoa o te aau i te mau mahana atoa ra.”—Genese 6:5, 11, 12.

E ere noa te orureraa hau a te taata te tumu i peapea ˈi Iehova. Te faataa ra te Genese e: “Ua hiˈo aˈera te tamarii a te Atua ra i te mau tamahine a te taata nei, e te maitai ra; ua rave ihora ratou i ta ratou i hinaaro ra ei vahine. . . . E aito haapao atâ tei te fenua nei i taua anotau ra. E a muri aˈera, ia rave hoi te tamarii a te Atua i te mau tamahine a te taata ra, fanau ihora ta ratou tamarii tamaroa, e riro atura ratou ei aito, e feia tui roo ïa i tahito ra.” (Genese 6:2-4) Ia faaau tatou i teie mau irava e te hoê faahitiraa a te aposetolo Petero, e ite tatou e e mau melahi faaroo ore te mau “tamarii a te Atua ra.” E te mau aito haapao atâ, aore ra Nephilim, o te mau tamarii ïa a te mau melahi taiva tei rave i te tino taata e tei taoto i te mau vahine.—Petero 1, 3:19, 20.

Te mau Nephilim, te auraa ra “Feia faatopa,” o te feia ïa o tei faatopa ia vetahi ê. Mea haavî roa ratou, e ua faaauhia te hara a to ratou mau metua taiata i te mau ohipa faufau a Sodoma e a Gomora. (Iuda 6, 7) Ua faatupu ratou paatoa i te ino i te rahi i nia i te fenua.

“Piˈo ore i to ˈna ra ui”

No te mea e ua parare roa te ino i faaoti ai te Atua e haamou i te huitaata. Te na ô ra râ te faatiaraa faauruahia e: “Area Noa i arohahia mai oia e Iehova ra. . . . E taata hau Noa i te parau-tia e te piˈo ore i to ˈna ra ui: e ua au to Noa haerea i te Atua.” (Genese 6:8, 9) Nafea e ‘au ai te haerea i te Atua’ i roto i te hoê ao paieti ore e au ia haamouhia?

Aita e feaaraa, ua haapii rahi o Noa na roto i to ˈna metua tane, o Lameha, te hoê taata faaroo i ora na i te tau o Adamu. I to ˈna mairiraa i ta ˈna tamaiti ia Noa (te auraa “Faafaaearaa,” aore ra “Tamahanahanaraa”), ua tohu o Lameha e: “E riro teie nei tamaiti ei haamaharaa aho no tatou, i to tatou rohirohi, e te ohipa a to tatou nei rima, no te fenua i parau-ino-hia e Iehova ra.” Ua tupu taua parau tohu ra i to te Atua faaoreraa i ta ˈna faainoraa i te fenua.—Genese 5:29; 8:21.

E ere no te mea te mǎtaˈu ra te mau metua i te Atua, e mea maitai ïa ta ratou mau tamarii i te pae varua, na te taata taitahi hoi e faatupu i to ˈna iho taairaa e o Iehova. Ua ‘au to Noa haerea i te Atua’ na roto i te tapiraa i te hoê huru oraraa i farii-maitai-hia e te Atua. No ta Noa i haapii no nia i te Atua, ua turaihia oia ia tavini ia ˈNa. Aita to Noa faaroo i aueue i to ˈna faaararaahia no nia i te opuaraa a te Atua e ‘haapohe i te mau mea ora atoa i te diluvi.’—Genese 6:13, 17.

Ua papu ia Noa e e tupu iho â teie ati aita i itehia aˈenei, ua faaroo oia i te faaueraa a Iehova: “A tarai oe i te tahi pahi no oe ei gophera te raau, e hamani hoi oe i te piha i roto i taua pahi na, e iˈa hoi i roto e rapae aˈe i te tapau.” (Genese 6:14) E ere i te ohipa nainai ia pee i te mau faataaraa papu maitai a te Atua no nia i te araka. Noa ˈtu râ, ‘ua na reira Noa i te mau mea atoa ta te Atua i faaue mai ia ˈna ra.’ Oia mau, “o ta ˈna ïa i rave maite.” (Genese 6:22) Ua tauturuhia o Noa na ta ˈna vahine e ta raua na tamaiti o Sema, o Hama, e o Iapheta e ta ratou mau vahine. Ua haamaitai Iehova i taua faaroo ra. Tera te hiˈoraa maitai no te mau utuafare i teie mahana!

Eaha te titauhia no te hamani i te araka? Ua faaue Iehova ia Noa e hamani i te hoê afata raau rahi e toru tahua o te painu, 133 metera i te roa, e 22 metera i te aano e 13 metera i te teitei. (Genese 6:15, 16) E tuea teie araka i tera mau pahi hoo taoˈa rau no teie tau.

E ohipa i te rahi teie! Eita e ore e e tia ia tâpû e mau tausani tumu raau, ia tie atu i te vahi e hamanihia ˈi te araka, e ia tarai i tera mau tumu raau ei iri aore ra ei pou. E tia atoa paha ia hamani i te paˈepaˈe, i te mau pine aore ra i te mau naero raau, i te tapau no te parai i nia i te araka ia ore te pape e ô i roto, e ia noaa mai te mau farii e te mau taihaa, e te vai ra ˈtu â. Ua titau-atoa-hia paha te tahi mau faaauraa e te feia tapihoo e ia aufau i te mau taihaa e te tauturu. E au ra e mea titauhia te ite i te ohipa tamuta ia tano maitai te mau iri e te mau pou e ia paari maitai te tino o te pahi. A feruri na—peneiaˈe fatata e 50 aore ra e 60 matahiti tei mairi i oti ai te pahi!

I muri iho, e tia paha ia Noa ia haapao i te faaineineraa i te maa na ratou e na te animara. (Genese 6:21) E tia paha ia ˈna ia amui e ia hiˈopoa i te mau nǎnǎ animara i roto i te araka. Ua rave o Noa i te mau mea atoa ta te Atua i faaue ia ˈna, e ua oti te ohipa. (Genese 6:22) Na te haamaitairaa a Iehova i haapapu e ua manuïa roa te ohipa.

Hoê “taata poro i te parau-tia”

Aita noa oia i hamani i te araka, ua faaite haere atoa o Noa i te hoê faaararaa e ua tavini i te Atua ma te haapao maitai ei “taata [poro] i te parau-tia.” Aita ‘roa râ te taata i ite, e roo-noa-hia ihora ratou e te diluvi, pau roa ˈtura ratou.’—Petero 2, 2:5; MN; Mataio 24:38, 39.

Ia hiˈo tatou i te veve pae varua i taua tau ra, mea ohie ia taa e, papu maitai, ua faaooo, ua rave ino e ua tâhitohito te taata i te fetii o Noa. Eita e ore e ua parau te taata e e maamaa o Noa ma. Ua manuïa râ o Noa i to ˈna faaitoitoraa e to ˈna tururaa i to ˈna fetii i te pae varua, no te mea aita roa ˈtu ratou i farii i te mau ohipa haavî, te morare ore, e te orure hau a te feia paieti ore o to ratou tau. Na roto i te parau e te ohipa o tei faaite i to ˈna faaroo, ua faahapa o Noa i to te ao i taua tau ra.—Hebera 11:7.

Paruruhia i roto i te diluvi

Na mua iti noa ˈˈe i te toparaa te ûa, ua parau te Atua ia Noa e tomo i roto i te araka. A tomo ai to Noa fetii e te mau animara, “na Iehova i opani i te uputa” ia ore te feia tâhitohito atoa e tomo atu. A tupu ai te diluvi, e au ra e ua vaiiho te mau melahi faaroo ore i te tino taata e ua ora mai ratou. E te toea? Ua pohe ïa te mau mea ora atoa i nia i te fenua i rapaeau i te araka, tae noa ˈtu te mau Nephilim! O Noa e to ˈna fetii anaˈe tei ora mai.—Genese 7:1-23.

Ua faaea o Noa e to ˈna fetii hoê matahiti avaˈe e hoê ahuru mahana i roto i te araka. Ua haa ratou i te faatamaa e i te pîpî i te mau animara, i te tamâ i te mau pehu, e i te pee maite i te taime. E tataio mahana te Genese i te mau tuhaa atoa o te diluvi ma te taa maitai, mai te hoê buka pahi, o te faaite ra e mea mau te aamu.—Genese 7:11, 17, 24; 8:3-14.

Aita e feaaraa e i roto i te araka, ua faatupu Noa e to ˈna fetii i te mau aparauraa pae varua e ua arue ratou i te Atua. E au ra e e mea na roto ia Noa e to ˈna fetii i paruruhia ˈi te aamu hou te diluvi. E riro hoi te mau tutuu parau-vaha-hia e nehenehe e tiaturihia aore ra te mau parau tuatapaparaa papaihia e vai ra ia ratou ra, ei mea faufaa no te faahohonu i te roaraa o te diluvi.

Eaha râ paha o Noa e to ˈna fetii i te oaoa i te taahi faahou i nia i te repo mǎrô! Te ohipa matamua ta ˈna i rave, o te faatiaraa ïa i te hoê fata e i te ohiparaa ei tahuˈa no to ˈna fetii no te pûpû i te mau tusia na Tei faaora ia ratou.—Genese 8:18-20.

“Mai tei te anotau ra ia Noa ra”

Ua parau Iesu Mesia e: “Mai tei te anotau ra ia Noa ra, oia atoa te haerea mai o te Tamaiti a te taata nei.” (Mataio 24:37) I teie mahana, e feia poro i te parau-tia atoa te mau Kerisetiano, o te faaitoito ra i te taata ia tatarahapa. (Petero 2, 3:5-9) Ia hiˈohia taua faaauraa ra, e ui paha tatou eaha tei puta i roto i te feruriraa o Noa hou te diluvi. Ua manaˈo anei oia e ua faufaa ore ta ˈna pororaa? Ua rohirohi anei oia i te tahi taime? Aita te Bibilia e faaite ra. Ua ite noa tatou e ua faaroo Noa i te Atua.

Te ite ra anei outou i te faaauraa mau i to Noa oraraa e to tatou? Ua faaroo oia ia Iehova noa ˈtu te patoiraa e te haafifiraa. No reira Iehova i parau ai e e taata parau-tia oia. Aita te fetii o Noa i ite afea roa te Atua e hopoi mai ai i te diluvi, ua ite râ ratou e e tupu te reira. Ua turu te faaroo i te parau a te Atua ia Noa i te roaraa o te mau matahiti haaraa e pororaa e au ra e mea hotu ore. Oia mau, te parauhia ra e: “No te faaroo hoi to Noa, a faaitehia mai ai oia e te Atua i te mau mea aore â i itea maira, e roohia ihora e te mǎtaˈu, i tarai ai i te pahi ia ora to ˈna fetii; faahapa ihora i to te ao, e riro atura oia ei fatu i te parau-tia e noaa i te faaroo ra.”—Hebera 11:7.

Nafea te noaaraa mai ia Noa taua faaroo ra? E au ra e ua rave oia i te taime no te feruriruri i te mau mea atoa ta ˈna i ite no nia ia Iehova e ua vaiiho oia e na taua ite ra e aratai ia ˈna. Aita e feaaraa, ua paraparau Noa i te Atua na roto i te pure. Oia mau, no te mea ua matau roa ino oia ia Iehova i ‘au ai to ˈna haerea i te Atua.’ Ei upoo utuafare, ua horoa o Noa ma te oaoa i to ˈna taime no to ˈna fetii e ua haapao ia ratou ma te here. Oia atoa, ua haapao oia i te mau faufaa pae varua a ta ˈna vahine, a ta ˈna na tamaiti e toru, e a ta ˈna na hunoa.

Mai ia Noa, ua ite te mau Kerisetiano mau no teie tau e e fatata Iehova i te haamou i teie faanahoraa paieti ore o te mau mea. Aita tatou i ite eaha taua mahana aore ra taua hora ra, ua taa râ ia tatou e ia pee tatou i te faaroo e te auraro o teie “taata poro i te parau-tia,” ‘e ora ïa tatou.’—Hebera 10:36-39.

[Tumu parau tarenihia i te api 29]

Ua tupu mau anei te diluvi?

Ua haaputu te mau aivanaa no nia i te taata e 270 aai o te diluvi fatata a te mau opu taata e mau nunaa atoa. “E itehia te aamu o te diluvi i te ao atoa,” ta te aivanaa Claus Westermann ïa e parau ra. “Ua riro te reira ei tuhaa o ta tatou tufaa tumu i te pae o te taˈere, mai te aamu o te poieteraa. Mea maere mau â: i te mau vahi atoa i te fenua nei, e ite tatou i te mau aamu o te hoê diluvi rahi i tahito ra.” Nafea ia faataa i te reira? Te na ô ra te taata tatara parau o Enrico Galbiati e: “Ua riro te tutuu o te hoê diluvi e vai noa ra i ǒ te mau taata taa ê i purara haere ei tapao faaite i te tupuraa mau i te pae tuatapaparaa o te niu o taua mau tutuu ra.” No te mau Kerisetiano râ, mea faufaa roa ˈˈe te mea ra e ua faahiti Iesu iho i te diluvi ei ohipa tei tupu mau i roto i te tuatapaparaa o te taata, eiaha te mau parau a te mau aivanaa.—Luka 17:26, 27.

[Tumu parau tarenihia i te api 30]

E aai anei te mau Nephilim?

Mea matauhia te mau aai no nia i te mau atua o tei taoto i te mau taata—e te mau “aito” aore ra “afa atua” i fanauhia mai—i roto i te teologia no Heleni, Aiphiti, Ougarit, Ura, e no Mesopotamia. E tino taata to te mau atua o te aai Heleni e mea haviti roa ratou. E tamaa ratou, e inu, e taoto, e taati, e tatamaˈi, e aro, e râmâ, e e mafera ratou. Noa ˈtu e e parauhia e mea moˈa ratou, e faahema ratou e e rave i te ohipa ino. Te parauhia ra e e tupuna atua e taata to te mau aito mai ia Achille, e e hau aˈe to ratou puai i to te taata, tera râ, e nehenehe ratou e pohe. No reira, te haamaramarama maira te mau parau o te Genese no nia i te mau Nephilim nohea mai paha taua mau aai ra.