Mau uiraa a te feia taio

Nafea te ophi i te faataeraa i te manaˈo ra e ofati i te ture a te Atua no nia i te raau e ite ai i te maitai e te ino ia Eva i roto i te ô i Edene?

Te na ô ra te Genese 3:1 e: “E paari rahi to te ophi i to te mau manu avae maha atoa o te fenua, i ta te Atua ra ta Iehova i hamani ra; e ua na ô maira oia i te vahine, Oia ïa, ua parau mai te Atua e, Eiaha orua e amu i to te mau raau atoa o te ô nei?” Te vai ra e rave rau manaˈo nafea to te ophi neheneheraa e paraparau ia Eva. Te hoê manaˈo oia hoi ua na reira oia na roto i te hautiutiraa a te tino aore ra te mau aparaa. Ei hiˈoraa, ua parau te ekalesiatiko Beretane o Joseph Benson e: “E au ra e mea na roto iho â paha i te tahi mau huru tapao. Oia mau, ua manaˈo vetahi pae e i taua tau ra, e feruriraa to te mau ophi e ua ite ratou i te paraparau, . . . teie râ, aita e haapapuraa no nia i te reira.”

Teie râ, nafea te ophi e nehenehe ai e faaite atu i te manaˈo ia Eva e maoti te amuraa i te maa opanihia e riro mai ai oia mai te Atua ra te huru, e nehenehe ai oia e faaoti eaha te mea maitai e eaha te mea ino na roto i te faaohipa-noa-raa i te hautiutiraa a te tino? Hau atu â, ua apiti atu Eva i roto i te aparauraa, ma te pahono i te uiraa ta te ophi i faahiti. (Genese 3:2-5) E aratai te manaˈo e ua paraparau te ophi ma te mau tapao noa aore ra mau hautiutiraa i te faaotiraa e ua pahono Eva ma te faaohipa i te mau aparaa rima, area ra, te parau ra te Bibilia e ua paraparau oia.

A faahiti ai oia i teie tupuraa, ua faaara te aposetolo Paulo i te mau hoa Kerisetiano e: “Te mǎtaˈu nei râ vau, o te faainohia to outou aau . . . mai ta te ophi i haavare atu ia Eva i to ˈna ra paari.” No ǒ mai te fifi ta Paulo i parau i ‘te mau aposetolo haavare, te mau rave ohipa haavare.’ E ere te huru rapaeau aore ra te mau aparaa rima o teie “mau aposetolo rarahi atoa ra” te mea atâta roa ˈˈe. Tei roto te fifi atâta i ta ratou paraparauraa—ta ratou mau parau haavarevare no te faahema ia vetahi ê.—Korinetia 2, 11:3-5, 13.

Noa ˈtu e ua faaohipahia te paraparauraa no te aratai hape ia Eva i roto i te ô i Edene ra, aita hoê aˈe mea e faaite ra e e paraparau te ophi mau. Oia mau, e ere i te mea faufaa no ratou. I to te melahi a te Atua paraparauraa ia Balaama na roto i te hoê asini, aita te animara i hinaaro i te hoê uaua arapoa taa ê mai to te hoê taata. (Numera 22:26-31) Papu maitai, i to teie ‘aseni parau ore paraparau-taata-raa mai,’ no ǒ mai te mana no taua ohipa ra i te ao varua.—Petero 2, 2:16.

Ua faataahia te mea ora varua i muri i te ophi o tei paraparau ia Eva i roto i te Bibilia, mai ‘te ophi tahito, o tei parauhia te Diabolo e o Satani.’ (Apokalupo 12:9) No ǒ mai te mau parau ta Eva i faaroo e i pahono atu ia Satani ra, o “tei faahua melahi atoa ia ˈna iho no te maramarama.”—Korinetia 2, 11:14.

[Hohoˈa i te api 27]

“E riro orua mai te [A]tua ra te huru, i te ite i te maitai e te ino”