Te mau “parau apî oaoa” i roto i te Apokalupo

“Hiˈo atura vau i te hoê melahi i te maueraa na ropu i te reva nei: ma te [parau apî maitai mure ore ei pororaa ˈtu ei parau apî oaoa] i te feia e parahi i te ao nei ra.”—APOKALUPO 14:6; MN.

1. Noa ˈtu e te tiaturi nei te mau Ite no Iehova e mea faauruahia te buka Apokalupo, no te aha e ere ratou i te hoê “pǔpǔ iti faaroo e au i te apokalupo”?

E ERE te mau Ite no Iehova i te hoê “pǔpǔ iti faaroo e au i te apokalupo” aore ra te hoê “pǔpǔ iti faaroo niuhia i nia i te mahana haamouraa,” mai ta vetahi pariraa ia ratou. Teie râ, te farii nei ratou i te buka Apokalupo ei tuhaa no te Parau faauruahia a te Atua. Parau mau, te vai ra te mau poroi haavaraa no te feia iino i roto i te Apokalupo. I roto râ i ta ratou pororaa i mua i te taata, te tuu ra na mua te mau tavini a te Atua i te tapao i nia i te tiaturiraa faahiahia e vai ra i roto i te Bibilia, tae noa ˈtu i to roto i te Apokalupo. No reira, eita ratou e amui aore ra e iriti i te tahi mea i te mau parau tohu i roto.—Apokalupo 22:18, 19.

Te feia faaite i te mau parau apî oaoa

2. Eaha te tahi mau irava ta te mau Ite no Iehova e faaohipa pinepine ra i roto i ta ratou ohipa pororaa?

² Te niu Bibilia e faahiti-pinepine-hia o te taviniraa a te mau Ite no Iehova i mua i te taata, o te mau parau ïa a Iesu: “E faaitehia teie parau apî maitai o te basileia e ati aˈe te fenua nei, ia ite hoi te mau nunaa atoa; o te hopea ihora ïa i reira ra.” (Mataio 24:14, nota i raro i te api) E eaha “teie parau apî maitai o te basileia”? E rave rahi Ite te pahono na roto i te faahitiraa i te mau irava o te Apokalupo pene 20 e te 21 no nia i te Faatereraa Tausani Matahiti a te Mesia e to ˈna Basileia e te totaiete taata, i reira e ‘ore roa ˈi’ te pohe, te oto, e te mauiui.—Apokalupo 20:6; 21:1, 4.

3. Te tuea ra te taviniraa a te mau Ite no Iehova i mua i te taata i teihea ohipa faauehia?

³ Ei feia faaite i teie mau parau apî oaoa, e auvaha mau â te mau Ite no Iehova no te hoê vea taipe i nia i te raˈi tei faataa-atoa-hia ta ˈna hopoia i roto i te Apokalupo. “Hiˈo atura vau i te hoê melahi i te maueraa na ropu i te reva nei: ma te [parau apî maitai mure ore ei pororaa ˈtu ei parau apî oaoa] i te feia e parahi i te ao nei ra, i te mau fenua atoa, e te mau opu atoa, e te mau reo atoa, e te mau nunaa atoa.” (Apokalupo 14:6; MN) I roto i “te parau apî maitai mure ore,” te vai atoa ra te faaiteraa e ua ‘riro te basileia [aore ra, faatereraa] o teie nei ao ei basileia no to tatou Fatu e no ta ˈna ra Mesia’ e ua tae i “te taime” i faataahia e Iehova ‘e haamou ai oia i te feia e faaino ra i te fenua nei.’ (MN) (Apokalupo 11:15, 17, 18) E ere anei teie i te parau apî oaoa mau?

Ta te Apokalupo e faanaho ra no tatou

4. (a) Eaha te tahi mau parau mau faufaa e haamatarahia ra i roto i te Apokalupo pene 1? (b) Eaha te titauhia ra i te feia e hinaaro e fanaˈo i te mau parau apî oaoa?

⁴ Te faaite ra te pene matamua o te buka Apokalupo ia Iehova mai “te Alepha e te Omega, . . . o te vai nei, e o tei vai na, e o te vai a muri noa ˈtu, o te Mana hope.” E te faaite ra taua buka ra i ta ˈna Tamaiti, o Iesu Mesia, mai “te ite parau mau,” “te matahiapo mai te pohe maira,” e “te arii o te mau arii o te ao nei.” Te parau atoa ra te reira no Iesu mai “tei aroha mai ia tatou nei, e ua tamâ ia tatou i ta tatou hara i to ˈna ihora toto.” (Apokalupo 1:5, 8) No reira, mai te omuaraa mai, te faaite ra te Apokalupo i te mau parau mau faufaa o te ora. Eita “te feia e parahi i te ao nei” e fanaˈo i te mau parau apî oaoa i faataehia ia ratou ra mai te peu e eita ratou e farii i te mana arii o Iehova, e faaohipa i te faaroo i te toto o Iesu i manii, e e tiaturi e ua faatia mai Iehova ia ˈna e i teie nei, o te Mesia te Arii o te fenua i haamauhia e te Atua.—Salamo 2:6-8.

5. Eaha te ohipa a te Mesia e faataahia ra i roto i te Apokalupo pene 2 e te 3?

⁵ Te faataa ra na piti pene i muri iho i te Mesia ra o Iesu mai te Tiaau i te raˈi î i te here o te mau amuiraa a ta ˈna mau pǐpǐ i nia i te fenua. I roto i te otaro i faataehia i na hitu amuiraa Kerisetiano i vai na i Asia Iti i te senekele matamua T.T., te vai ra te mau faaitoitoraa e mau aˈoraa papu maitai e tano noa i teie mahana. E haamata noa te mau poroi i faataehia i te mau amuiraa na roto i teie mau parau “ua ite au i ta oe ohipa” aore ra ‘ua ite au i to oe ati.’ (Apokalupo 2:2, 9) Oia, ua ite maitai te Mesia eaha te tupu ra i roto i te mau amuiraa a ta ˈna mau pǐpǐ. Ua haapopou oia i te vetahi no to ratou here, faaroo, itoito i roto i te taviniraa, faaoromai, e to ratou haapao maitai i to ˈna iˈoa e ta ˈna parau. Area vetahi ê atu ra, ua aˈo ïa oia no te mea ua iti mai to ratou here no Iehova e no ta ˈna Tamaiti, aore ra ua topa ratou i roto i te peu tia ore i te pae morare, te peu haamori idolo, aore ra te mau pǔpǔ iti faaroo taiva.

6. Eaha ta te orama i roto i te pene 4 e tauturu ra ia taa i te taata?

⁶ Te horoa ra te pene 4 i te hoê orama faahoruhoru o te terono o te Atua ra o Iehova i nia i te raˈi. Te pûpû maira te reira pene i te hoê hiˈoraa poto o te hanahana o te vairaa mai o Iehova e ta ˈna huru faatereraa e faaohipa i nia i te raˈi. Te faahanahana ra te feia faatere i faakoronahia, te haaati ra hoi to ratou terono i te terono pu o te ao taatoa, ia Iehova, e te parau ra ratou e: “E au te hanahana ia oe, e [Iehova], e te tura, e te mana, na oe hoi i hamani i te mau mea atoa nei, e no to oe hinaaro i mau ai, e i hamanihia ˈi ratou.”—Apokalupo 4:11; MN.

7. (a) Eaha ta te melahi e faaue ra i te mau taata o te fenua e rave? (b) Eaha te hoê tuhaa faufaa o ta tatou ohipa haapiiraa?

⁷ E auraa anei to te reira no te taata i teie mahana? Oia mau. Ia hinaaro ratou e ora i raro aˈe i te Basileia o te Mileniuma, e tia ïa ia pee ratou i ta te ‘melahi e maue ra na ropu i te reva’ e parau ra: “A mǎtaˈu i te Atua, e faahanahana ˈtu ia ˈna; ua tae hoi i te hora faautuaraa na ˈna ra.” (Apokalupo 14:6, 7) Te hoê o te mau tapao matamua a te ohipa haapiiraa Bibilia e ravehia ra e te mau Ite no Iehova, o te tautururaa ïa i “te feia e parahi i te ao nei” ia ite ia Iehova e ia haamori ia ˈna, ia farii i to ˈna tiaraa Poiete, e ia auraro ma te aau tae i to ˈna mana arii parau-tia.

E au te faatura i te Arenio

8. (a) Nafea te Mesia e faataahia ˈi i roto i te mau pene 5 e 6? (b) Eaha ta te feia atoa e faaroo i te mau parau apî oaoa e nehenehe e haapii na roto i teie orama?

⁸ Te faaite ra na piti pene i muri iho, te 5 e te 6, ia Iesu Mesia mai te hoê Arenio e au ia iriti i te hoê otaro i tapirihia e na tapao e hitu, o te faaite ra na roto i te mau parau taipe i te mau ohipa e tupu ra i to tatou nei tau. (A hiˈo i te Ioane 1:29.) Teie ta te mau reo i nia i te raˈi e parau ra i teie Arenio taipe: “E au oe ia rave i te [otaro] e ia vahi i te mau tapao taati ra: i taparahihia hoi oe, e ua hoo oe ia [ratou] ei taata no te Atua, i to oe iho na toto, no roto i te mau opu atoa, e te mau reo atoa, e te mau nunaa atoa e te mau fenua atoa; e ua faariro oe ia [ratou ei basileia], e ei tahuˈa na to matou Atua, e [e faatere ratou ei arii i te fenua nei].” (Apokalupo 5:9, 10; MN) Te haapii maira teie orama e maoti te toto o te Mesia i manii, e titauhia te tahi mau taata o te mau nunaa atoa e parahi i pihai iho ia ˈna i nia i te raˈi e e ‘faatere ei arii i te fenua nei.’ (A hiˈo i te Apokalupo 1:5, 6.) Ua faaitehia to ratou numera taotiahia i muri aˈe i roto i te Apokalupo.

9. Nafea te Mesia e faataahia ˈi i roto i te pene 6?

⁹ I roto i te tahi atu orama ra, te faaitehia ra te Mesia mai te taata faakoronahia e faahoro ra i te hoê puaahorofenua teatea, o te haere ra “ma te haapau atu, e ia pau atu â.” Auaa râ, e upootia oia i nia i te mau faahopearaa iino i faahohoˈahia e na toru taata faahoro puaahorofenua ê atu o te Apokalupo, ua hopoi mai hoi ta ratou hororaa uˈana i te tamaˈi, te oˈe, e te pohe i nia i te huitaata nei mai te matahiti faufaa roa 1914 mai. (Apokalupo 6:1-8) Te ohipa otahi a te Mesia, te Arenio a te Atua, i roto i te faaoraraa i te huitaata nei e i roto i te tupuraa o te mau opuaraa faahiahia a Iehova, e tumu parau matamua ïa o te ohipa haapiiraa Bibilia a te mau Ite no Iehova.

10. (a) Eaha te parau faufaa e horoahia ra i roto i te pene 7? (b) Eaha ta te Mesia i parau no nia i te feia o te fanaˈo i te Basileia?

¹⁰ E mau parau apî oaoa mau â to roto i te pene 7. I roto anaˈe i te buka Apokalupo e ite ai tatou i te numera o te feia ta Iesu i parau te “nǎnǎ iti” ta te Metua o te Arenio e horoa ˈtu i te Basileia. (Luka 12:32; 22:28-30) Ua tapaohia ratou e te Atua ra o Iehova maoti to ˈna varua. (Korinetia 2, 1:21, 22) Te haapapu ra te aposetolo Ioane, i fanaˈo i te Apokalupo, e: “Ua faaroo atura vau i te rahiraa o te feia i tapaohia ra: hoê hanere e maha ahuru ma maha i te tausani i tapaohia.” (Apokalupo 7:4) Te haapapuhia ra teie numera taa maitai i roto i te hoê pene i muri aˈe, oia hoi tera te numera taatoa o te feia ‘i tauihia no roto i te taata nei’ no te faatere e te Arenio i nia i te Mouˈa Ziona i nia i te raˈi. (Apokalupo 14:1-4) A horoa noa ˈi te mau ekalesia a te Amuiraa faaroo Kerisetiano i te mau faataaraa taa ore e te papu ore o teie numera, te parau ra te taata ite Bibilia ra o E. W. Bullinger ma te anaanatae e: “E parau ohie teie: mea taa ê te hoê numera taa maitai e te hoê numera otia ore i roto i teie pene.”

11. (a) Eaha te mau parau apî oaoa e vai ra i roto i te pene 7? (b) Eaha ta te mau melo o te “feia rahi roa” e nehenehe e fanaˈo?

¹¹ Eaha te numera otia ore ta Bullinger e parau ra? I te irava 9, ua papai te aposetolo Ioane e: “I muri aˈe i te reira, hiˈo atura vau, e inaha e feia rahi roa, e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa.” (Apokalupo 7:9) O vai teie feia rahi roa, eaha to ratou tiaraa i teie nei i mua i te Atua, e eaha te tiai maira ia ratou? E parau apî maitai te pahonoraa e au i te Apokalupo no te feia e parahi ra i te fenua nei. Te taio nei tatou e: “O te feia i haere mai mai roto mai i te ati rahi ra, e ua horoi i to ratou ahu, e ua teatea, i te toto o te Arenio ra.” Maoti te faaroo i te toto o te Mesia i manii, e paruruhia ratou i roto i “te ati rahi.” Na te Mesia ‘e aratai ia ratou i te mau pape ora pihaa ra; e na te Atua e horoi i to ratou roimata.’ (Apokalupo 7:14-17) Oia, e nehenehe te mau mirioni taata e ora ra i teie mahana e riro ei melo no teie nahoa aita e numera o te ora ˈtu i te hopea o teie faanahoraa o te mau mea ino. Ei mau taata i raro aˈe i te Arii ra o Iesu Mesia i roto i ta ˈna Faatereraa Mileniuma, e arataihia ratou e ana i te ora mure ore i nia i te fenua. E ere anei teie i te parau apî maitai?

“E mea mau hoi e te tia ta ˈna mau haavaraa”

12, 13. (a) Eaha to roto i te mau pene 8 e tae atu i te 19? (b) No te aha te feia aau haavare ore e ore ai e tia ia haapeapea no taua mau parau tohu ra?

¹² O te mau pene 8 e tae atu i te 19 te tumu i parauhia ˈi te buka Apokalupo ei buka e tohu ra i te mau ati riaria. Te vai ra te mau poroi haavaraa etaeta mau i roto (tei faahohoˈahia e te mau oto pu, te mau ati, e te mau auˈa o te riri o te Atua) i faataehia i te mau tuhaa e rave rau o te faanahoraa o te mau mea a Satani. E tupu mau â teie mau haavaraa, na mua i nia i te haapaoraa hape (“Babulonia Rahi”), e i muri iho i nia i te mau faanahoraa politita paieti ore, i faahohoˈahia e te mau puaa taehae.—Apokalupo 13:1, 2; 17:5-7, 15, 16.a

¹³ Te faataa ra teie mau pene i te tamâraahia te mau raˈi, i to Satani e ta ˈna mau demoni huriraahia na te hiti o te fenua. Te horoa maira te reira i te faataaraa maramarama hoê roa o te ati aita e faaauraa o te ao nei mai te matahiti 1914 mai â. (Apokalupo 12:7-12) Te faataa atoa ra taua mau pene ra, na roto i te mau parau taipe, i te haamouraa o te faanahoraa o te mau mea ino a Satani i nia i te fenua. (Apokalupo 19:19-21) E tia anei ia hitimahuta te feia aau haavare ore i taua mau ohipa maere ra? Eita, no te mea ia tupu te mau haavaraa a te Atua, e tuô te hoê nahoa taata i nia i te raˈi e: “Haleluia: o te ora, e te hanahana, e te tura, e te mana, tei te Fatu, tei to tatou Atua ïa. E mea mau hoi e te tia ta ˈna [mau haavaraa].”—Apokalupo 19:1, 2; MN.

14, 15. (a) Nafea teie faanahoraa ino e haamouhia ˈi ma te parau-tia? (b) No te aha e tia ˈi i teie tuhaa o te Apokalupo ia riro ei tumu e oaoa ˈi te feia aau haavare ore?

¹⁴ Eita Iehova e avari i te hoê faanahoraa o te mau mea parau-tia ma te ore e tamâ i te fenua i te feia e faaino ra i te reira. (Apokalupo 11:17, 18; 19:11-16; 20:1, 2) Aita râ e mana aore ra e puai to te taata aore ra to te hau politita no te rave i te reira. O Iehova anaˈe e ta ˈna Arii e Haava i maiti, te Mesia ra o Iesu, te nehenehe e rave i te reira ma te parau-tia.—Tesalonia 2, 1:6-9.

¹⁵ Mai ta te Apokalupo e faaite maitai ra, te opua ra Iehova e haamou i teie faanahoraa o te mau mea ino. Ia riro ïa te reira ei tumu no te oaoaraa no te mau tane e mau vahine “i autâ noa e ua pii hua, i te mau parau faufau atoa i ravehia.” (Ezekielaa 9:4) E tia ia taa ia ratou i te faufaaraa ru ia pee i te piiraa a te melahi e parau apî oaoa ta ˈna, o tei parau e: “A mǎtaˈu i te Atua . . . ua tae hoi i te hora faautuaraa na ˈna ra: e haamori outou ia ˈna, i tei hamani i te raˈi, e te fenua.” (Apokalupo 14:7) Ia haamori e ia tavini taua mau taata ra ia Iehova i pihai iho i ta ˈna mau Ite, “o tei haapao i te parau a te Atua ra, o tei mau maite i te parau a Iesu Mesia i faaite maira.”—Apokalupo 12:17.

Te Faatereraa Mileniuma hanahana

16. (a) No te aha te mau ekalesia a te Amuiraa faaroo Kerisetiano i patoi ai i te tiaturiraa o te Mileniuma? (b) No te aha te mau Ite no Iehova e tiaturi ai e e pahonohia te hohoˈa pure?

¹⁶ I roto i te mau pene 20 e tae atu i te 22 o te buka Apokalupo, te vai ra te niu Bibilia no te tiaturi i te Mileniuma. Teie anaˈe te buka o te Bibilia e faahiti mau ra i te hoê tau hoê tausani matahiti o te riro ei haamataraa o te hoê tau oaoaraa mure ore i nia i te raˈi e te fenua. Ua patoi te mau ekalesia a te Amuiraa faaroo Kerisetiano i te tiaturiraa o te Mileniuma. I te mea hoi e te haapii ra te ekalesia e e haere te feia parau-tia i nia i te raˈi e te feia iino i te po auahi, aita ïa e parahiraa no te hoê fenua paradaiso. Aita e auraa faahou to te hohoˈa pure e ani ra e ‘ia haapaohia te hinaaro o te Atua i te fenua nei mai tei te raˈi atoa ra,’ no te rahiraa o te mau melo o te mau ekalesia a te Amuiraa faaroo Kerisetiano. (Mataio 6:10, New International Version) E ere râ mai te reira no te mau Ite no Iehova. Te tiaturi papu nei ratou e aita te Atua ra o Iehova i hamani i te fenua “ia vaiiho-taata-ore-noa-hia,” tera râ, “ia taatahia.” (Isaia 45:12, 18) No reira, te tuati ra te parau tohu i tahito ra, te hohoˈa pure, e te tiaturiraa o te Mileniuma o te Apokalupo. I roto i ta ˈna Faatereraa Tausani Matahiti, e haapao te Mesia e ia tupu te hinaaro o Iehova i nia i te fenua, mai tei te raˈi atoa ra.

17. Eaha te faaite ra e e auraa pae tino to “na matahiti hoê tausani”?

¹⁷ E ono taime te faahitiraahia te mau parau ra ‘hoê tausani matahiti’ i roto i na irava matamua e hitu o te Apokalupo pene 20. Mea anaanatae ia tapao e ua faaohipahia taua mau parau ra e toru taime e te faataa iˈoa papu ra “na,” e tapao faaite ïa e e mileniuma mau iho â teie, e ere noa i te hoê area tau roa papu ore, mai ta te feia tatara parau e rave rahi a te Amuiraa faaroo Kerisetiano e hinaaro ra ia tiaturi tatou. Eaha te tupu i roto i te Mileniuma? Na mua, e tapeahia Satani e hope noa ˈtu taua tau ra. (Apokalupo 20:1-3; a hiˈo i te Hebera 2:14.) Auê ïa parau apî maitai e!

18. (a) No te aha e nehenehe ai e parau e e “mahana” haavaraa te Mileniuma? (b) Eaha te tupu ia hope na tausani matahiti?

¹⁸ I te mea e ua horoahia “te mana haava” i te feia e “faatere ei arii e o ˈna, MN” oia hoi te Mesia “e ia hoê tausani i te matahiti,” e “mahana” haavaraa ïa teie area tau hoê tausani matahiti. (Apokalupo 20:4, 6; a hiˈo i te Ohipa 17:31; Petero 2, 3:8.) E faatiahia mai te feia pohe, e e haavahia ratou e te feia e ora ˈtu i “te ati rahi” ma te tia ia au i ta ratou mau ohipa, i roto i taua taime ra. (Apokalupo 20:12, 13) Ia hope na tausani matahiti, e tuu-poto-hia mai Satani no te tamata i te huitaata i te tamataraa hopea, i muri iho, e haamou-roa-hia oia, ta ˈna mau demoni, e te feia orure atoa i nia i te fenua. (Apokalupo 20:7-10) Area te feia e manuïa i roto i te tamataraa, e papaihia ïa to ratou iˈoa o te ore roa e tumâhia i roto i “te buka ora” e e ô atu ratou i roto i te hoê oraraa oaoa mure ore, a tavini ai e a haamori ai ratou ia Iehova i nia i te hoê fenua paradaiso.—Apokalupo 20:14, 15; Salamo 37:9, 29; Isaia 66:22, 23.

19. (a) No te aha tatou e nehenehe ai e tiaturi papu e e tupu iho â te mau parau tǎpǔ faahiahia i roto i te buka Apokalupo? (b) Eaha te hiˈopoahia i roto i te tumu parau i muri nei?

¹⁹ Tera ïa te mau parau apî oaoa e faaitehia ra i roto i te Apokalupo. E ere teie i te mau parau tǎpǔ faufaa ore a te taata. Teie hoi ta te aposetolo Ioane i papai: “Ua parau maira tei parahi i nia iho i te terono ra, Inaha, te faaapî nei au i te mau mea atoa nei. E ua parau maira oia ia ˈu, A papai, e parau mau hoi teie nei mau parau, e te haavare ore.” (Apokalupo 21:5) Eaha te tia ia rave tatou no te apiti i roto i te tupuraa o teie mau parau apî oaoa? Mea rahi te mau aˈoraa i roto i te buka Apokalupo no te feia e hinaaro e faaoaoa i te Atua. E horoa mai te peeraa i taua mau aˈoraa ra i te oaoa aita e otia, i teie nei e a muri noa ˈtu, mai ta te tumu parau i muri nei e faaite mai.

[Nota i raro i te api]

Mau manaˈo e haamanaˈo

◻ Eaha te mau parau mau faufaa e vai ra i roto i te Apokalupo pene 4 e tae atu i te pene 6 o te riro ei tuhaa faufaa o te mau parau apî oaoa?

◻ Eaha te mau parau apî oaoa e vai ra i roto i te Apokalupo pene 7?

◻ No te aha te feia aau haavare ore e ore ai e tia ia haapeapea no te mau poroi haavaraa i roto i te Apokalupo?

◻ Nafea te Mileniuma e riro ai ei “mahana” haavaraa?

[Hohoˈa i te api 10]

E faaore roa te Arii ra o Iesu Mesia i te tamaˈi, te oˈe, e te pohe i nia i te fenua