Ia riro tatou ei feia taio oaoa i te buka Apokalupo

“E ao to ˈna to te taio, e to te feia e faaroo i teie nei parau tohu, e te haapao i tei papaihia i roto ra.”—APOKALUPO 1:3.

1. Eaha te mau huru tupuraa o te aposetolo Ioane i to ˈna papairaa i te Apokalupo, e no te aha teie mau orama i papaihia ˈi?

“O VAU nei, o Ioane . . . i te fenua vau i parauhia ra e, o Patamo, no te parau a te Atua, e no ta ˈu ra faaiteraa ia Iesu Mesia ra.” (Apokalupo 1:9) Tera ïa te mau tupuraa a papai ai te aposetolo Ioane i te buka Apokalupo. Te manaˈohia ra e ua afaihia oia i Patamo i te taime a faatere ai te Emepera Roma ra o Domitien (81-96 T.T.), o tei faahepo i te haamoriraa i te emepera e tei hamani ino i te mau Kerisetiano. I Patamo, ua fanaˈo Ioane i te hoê anairaa orama ta ˈna i papai. Ua papai oia i te reira eiaha no te faariaria i te mau Kerisetiano matamua, no te haapaari râ, no te tamahanahana, no te faaitoito ia ratou i roto i te mau tamataraa ta ratou e faaruru ra e to te tiai maira ia ratou.—Ohipa 28:22; Apokalupo 1:4; 2:3, 9, 10, 13.

2. No te aha mea faufaa te huru tupuraa o Ioane e to to ˈna mau hoa Kerisetiano no te mau Kerisetiano e ora ra i teie mahana?

² Mea faufaa roa te mau tupuraa o te papairaa o teie buka Bibilia no te mau Kerisetiano e ora ra i teie mahana. Te faaruru ra hoi Ioane i te hamani-ino-raa no te mea e ite oia no Iehova e no Ta ˈna Tamaiti, te Mesia ra o Iesu. Te ora ra oia e to ˈna mau hoa Kerisetiano i roto i te hoê huru tupuraa au ore no te mea a tutava noa ˈi ratou i te riro ei mau melo huiraatira maitatai, eita ta ratou e nehenehe e haamori i te emepera. (Luka 4:8) I te tahi mau fenua, tei roto te mau Kerisetiano mau i teie mahana i te hoê â tupuraa, na te Hau e faaoti eaha te mea “tano i te pae faaroo.” No reira, mea tamahanahana mau â te mau parau i roto i te faaomuaraa o te buka Apokalupo: “E ao to ˈna to te taio, e to te feia e faaroo i teie nei parau tohu, e te haapao i tei papaihia i roto ra: ua fatata te tau e tupu ai.” (Apokalupo 1:3) Oia mau, e nehenehe te feia taio maite e te auraro i te Apokalupo e ite i te oaoa mau e te mau haamaitairaa e rave rahi.

3. O vai te Tumu o te Apokalupo i horoahia ia Ioane?

³ O vai te Tumu teitei o te Apokalupo e eaha te auvaha i faaohipahia no te faatae mai i te reira? Te na ô maira te irava matamua e: “Te apokalupo a Iesu Mesia, ta te Atua i tuu mai ia ˈna ra, ia faaite oia i tana mau tavini i te mau mea e fatata i te tupu ra; e ua tono maira oia i tana melahi, e ua faaite maira i to ˈna nei tavini ia Ioane [na roto i te mau tapao].” (Apokalupo 1:1; MN) No te faaohie, o te Atua ra o Iehova te Tumu mau o te Apokalupo, ua horoa oia i te reira ia Iesu ra, e na roto i te arai o te hoê melahi, ua faaite Iesu i te reira ia Ioane. Ia faahohonu-rii-hia ˈtu â te hiˈopoaraa, e itehia e ua faaohipa atoa Iesu i te varua moˈa no te faatae i te mau poroi i te mau amuiraa e no te horoa i te mau orama ia Ioane ra.—Apokalupo 2:7, 11, 17, 29; 3:6, 13, 22; 4:2; 17:3; 21:10; a hiˈo i te Ohipa 2:33.

4. Eaha te ravea ta Iehova e faaohipa noa ra i teie mahana no te aratai i to ˈna nunaa i nia i te fenua?

⁴ Te faaohipa noa ra Iehova i ta ˈna Tamaiti, te ‘upoo o te ekalesia,’ no te haapii i ta ˈna mau tavini i nia i te fenua. (Ephesia 5:23; Isaia 54:13; Ioane 6:45) Te faaohipa atoa ra Iehova i to ˈna varua no te haapii i to ˈna nunaa. (Ioane 15:26; Korinetia 1, 2:10) E mai ia Iesu i faaohipa i “to ˈna nei tavini ia Ioane” no te horoa i te maa maitai i te pae varua i te mau amuiraa no te senekele matamua, te faaohipa atoa ra oia i teie mahana i “te tavini haapao maitai e te paari,” oia hoi to ˈna “mau taeae” faatavaihia i nia i te fenua, no te horoa i te “maa [pae varua] i te hora mau ra” i ta ˈna mau tavini e to ratou mau hoa. (Mataio 24:45-47; 25:40) E oaoa te feia e farii i te Tumu o ‘te mau mea maitatai i hohia mai’ ia tatou ra maoti te maa pae varua e te auvaha Ta ˈna e faaohipa ra.—Iakobo 1:17.

Te mau amuiraa arataihia e te Mesia

5. (a) Ua faaauhia te mau amuiraa Kerisetiano e ta ratou mau tiaau i te aha? (b) Noa ˈtu te huru tia ore o te taata, eaha te faaoaoa ia tatou?

⁵ I roto i te mau pene matamua o te Apokalupo, te faaauhia ra te mau amuiraa Kerisetiano i te mau lamepa. Te faaauhia ra to ratou mau tiaau i te mau melahi (mau vea) e i te mau fetia. (Apokalupo 1:20)a No nia ia ˈna, teie ta te Mesia i faaue ia Ioane e papai: “Te na ô maira oia o tei tapea i na fetia e hitu i tana rima atau ra, o tei hahaere na roto i te mau lamepa auro e hitu ra.” (Apokalupo 2:1) Te faaite ra na poroi e hitu i faataehia i na amuiraa e hitu i Asia e i te senekele matamua T.T. ra, e mau vahi puai e e mau vahi paruparu to te mau amuiraa e ta ratou mau matahiapo. Hoê â huru i teie mahana. No reira, e rahi roa ˈtu â tatou i te oaoa ia ore roa ˈtu tatou e haamoe i te mea ra e tei rotopu te Mesia, to tatou Upoo, i te mau amuiraa. Ua ite maitai oia eaha te tupu ra. Ei auraa taipe, tei roto te mau tiaau “i tana rima atau,” oia hoi i raro aˈe i ta ˈna faatereraa e aratairaa e e hopoia ta ratou i mua ia ˈna no ta ratou huru tiairaa i te mau amuiraa.—Ohipa 20:28; Hebera 13:17.

6. Eaha te faaite ra e e ere o te mau tiaau anaˈe te tia ˈtu i mua i te Mesia no ratou iho?

⁶ E hape râ tatou ia manaˈo tatou e o te mau tiaau anaˈe te tia ˈtu i mua i te Mesia no ta ratou mau ohipa. Teie ta te Mesia i parau i roto i te hoê o ta ˈna mau poroi: “E ite te mau [amuiraa] atoa, e o vau tei hiˈopoa i te manaˈo e te aau; e na ˈu e ho atu ia outou atoa i te au i ta outou na ohipa.” (Apokalupo 2:23; MN) E faaararaa teie e e faaitoitoraa atoa—e faaararaa i te mea ra e ua ite te Mesia eaha to tatou mau hinaaro hohonu, e faaitoitoraa no te mea te haapapu maira te reira e ua ite te Mesia i ta tatou mau tutavaraa e e haamaitai oia ia tatou ia rave tatou i tei maraa ia tatou.—Mareko 14:6-9; Luka 21:3, 4.

7. Nafea to te mau Kerisetiano i Philadelephia ‘mauraa i te parau o te faaoromai o Iesu’?

⁷ Aita e faahaparaa i roto i te poroi a te Mesia i te amuiraa i te oire Ludia i Philadelephia, te faahiti ra râ te reira i te hoê tǎpǔ faufaa roa no tatou. “No te mea ua mau papu oe i te parau faaoromai na ˈu ra, e mau atoa vau ia oe ia ora oe i taua hora [tamataraa] e tupu i te taata atoa ra, ei tamataraa i te feia e parahi i te fenua nei.” (Apokalupo 3:10; MN) Te auraa atoa o te mau parau Heleni no te mau parau ra ‘mau papu i te parau faaoromai na ˈu ra,’ oia ïa ‘mau papu i ta ˈu i parau no nia i te faaoromai.’ Ia au i te irava 8, aita noa te mau Kerisetiano i Philadelephia i auraro i te mau faaueraa a te Mesia, ua pee râ ratou i ta ˈna aˈoraa e faaoromai ma te haapao maitai.—Mataio 10:22; Luka 21:19.

8. (a) Eaha ta Iesu i tǎpǔ i te mau Kerisetiano no Philadelephia? (b) O vai i teie mahana te faaruru ra i te “hora tamataraa”?

⁸ Ua parau atoa Iesu e e mau aore ra e paruru oia ia ratou i te “hora tamataraa.” Aita tatou i ite eaha te auraa o te reira no taua mau Kerisetiano ra i tera tau. Noa ˈtu e ua mau te hamani-ino-raa maa taime poto i muri aˈe i te poheraa Domitien i te matahiti 96 T.T., ua tupu faahou te mau hamani-ino-raa apî i raro aˈe i te faatereraa a Trajan (98-117 T.T.), aita e feaaraa e mau tamataraa hau te reira. Tera râ, te tupu ra te “hora tamataraa” rahi i “te mahana o te Fatu” i “te tau hopea” ta tatou e ora nei. (Apokalupo 1:10; Daniela 12:4) Ua faaruru te mau Kerisetiano faatavaihia i te varua i te hoê tau tamataraa taa ê mau i roto e i muri iti noa ˈˈe i te Tamaˈi Rahi Matamua. Aita râ te “hora tamataraa” i hope atura. Te ohipa ra te reira i nia i “te feia e parahi i te fenua nei,” tae noa ˈtu i te mau mirioni melo o te feia rahi roa, e tiaturi ra e ora ˈtu i te ati rahi. (Apokalupo 3:10; 7:9, 14) E oaoa tatou ia ‘mau tatou i ta Iesu i parau no nia i te faaoromai,’ oia hoi: “Area te mau papu e tae noa ˈtu i te hopea ra, oia te ora.”—Mataio 24:13.

Te auraroraa oaoa i te mana arii o Iehova

9, 10. (a) Eaha to tatou huru i mua i te orama o te terono o Iehova? (b) Nafea ta tatou taioraa i te Apokalupo e faaoaoa ˈi ia tatou?

⁹ E tia i te orama o te terono o Iehova e to ˈna aua i nia i te raˈi e faataahia ra i roto i te mau pene 4 e 5 o te Apokalupo ia haaputapû ia tatou. Ia maere tatou i te mau parau arueraa rotahi faahitihia e te mau varua puai i nia i te raˈi a auraro ai ratou ma te oaoa i te mana arii parau-tia o Iehova. (Apokalupo 4:8-11) E tia ia faaroohia to tatou reo i rotopu i te feia e parau ra e: “O te haamaitai, e te tura, e te hanahana, e te mana, ei ia ˈna ïa ei tei parahi i nia iho i te terono ra, e ei te Arenio, e a muri noa ˈtu.”—Apokalupo 5:13.

¹⁰ Ma te faaohie, te auraa ïa e auraro tatou ma te oaoa i te hinaaro o Iehova i roto i te mau mea atoa. Teie ta te aposetolo Paulo i papai: “E te mau mea atoa ta outou e rave ra, i te ohipa e te parau a rave anaˈe ïa ma te iˈoa o te Fatu ra o Iesu, ma te haamaitai i te Atua ra i te Metua ia ˈna ra.” (Kolosa 3:17) E oaoa mau â tatou i te taio i te Apokalupo ia farii tatou i te mana arii o Iehova i roto i te hohonu-roa-raa o to tatou mau manaˈo e mafatu e ia haapao tatou i to ˈna hinaaro i roto i te mau tuhaa atoa o to tatou oraraa.

11, 12. (a) Nafea te faanahoraa a Satani i nia i te fenua e faaaueuehia ˈi e e haamouhia ˈi? (b) Ia au i te Apokalupo pene 7, o vai ‘te mau’ i taua taime ra?

¹¹ Te auraroraa ma te oaoa i te mana arii o Iehova, tera te niu o te oaoa o te taata taitahi e to te ao atoa nei. E fatata te hoê aueueraa fenua rahi taipe i te faaaueue i te niu o te faanahoraa o te ao a Satani e i te haamou roa i te reira. Aita e vahi tapuniraa no te feia e patoi i te auraro i te Basileia i te raˈi o te Mesia, o te faahohoˈa ra i te mana arii tia o te Atua. Te na ô ra te parau tohu e: “E te mau arii o te ao nei, e te mau taata rarahi ra, e te mau taata taoˈa ra, e te mau tapena rarahi, e te mau taata mana, e te mau tîtî, e te mau tiamâ ra, tapuni anaˈe atura ïa i roto i te mau ana, e i roto i te mau mato o te mouˈa ra; e ua parau atura i te mau mouˈa, e te mau mato, A mairi mai i nia iho ia matou, e huna ia matou ia moe ê atu i te mata o tei parahi i nia iho i te terono ra, e te riri o te Arenio ra: ua tae hoi i te mahana rahi no to ˈna ra riri, e o vai te taata e mau?”—Apokalupo 6:12, 15-17.

¹² No nia i taua uiraa ra, i roto i te pene i muri iho, te parau ra te aposetolo Ioane e ‘te tia noa ra’ te mau melo o te feia rahi roa i haere mai mai roto mai i te ati rahi “i mua i te terono, e i mua i te Arenio.” (Apokalupo 7:9, 14, 15) Te faaite ra to ratou tiaraa i mua i te terono o te Atua e te farii ra ratou i taua terono ra e te auraro taatoa ra ratou i te mana arii o Iehova. Te tia ra ïa ratou ma te fariihia.

13. (a) Eaha ta te rahiraa o te feia o te fenua e haamori ra, e eaha te faahohoˈa ra i te tapao i nia i to ratou rae aore ra to ratou rima? (b) No te aha ïa mea faufaa te faaoromai?

¹³ I te tahi aˈe pae, te parau ra te pene 13 e te haamori ra te toea o te feia e parahi ra i te fenua nei i te faanahoraa politita a Satani, tei faahohoˈahia e te hoê puaa taehae. E tapao to ratou i nia i to ratou “rae” aore ra to ratou “rima,” e tapao faaite i to ratou turu i te pae feruriraa e te pae tino i taua faanahoraa ra. (Apokalupo 13:1-8, 16, 17) Te na ô atoa ra te pene 14 i muri iho e: “O te haamori i te puaa e to ˈna ra hohoˈa, e tei ia ˈna te tapao tei nia i to ˈna rae, e aore ïa, tei te rima; e inu ïa oia i te uaina faariri a te Atua ra, o tei niniihia ma te anoi ore i roto i te auˈa riri na ˈna ra . . . Teie te faaoromai o te feia moˈa, o tei tapea i te parau a te Atua, e te faaroo ia Iesu ra.” (Apokalupo 14:9, 10, 12) A mairi ai te tau, teie te uiraa e hiti rahi maira: O vai ta outou e turu ra? O Iehova e to ˈna mana arii anei aore ra te faanahoraa politita paieti ore i faahohoˈahia e te puaa taehae? E oaoa te feia aita te tapao o te puaa i nia ia ratou e o te faaoromai ra ma te haapao maitai i te auraro i te mana arii o Iehova.

14, 15. Eaha te poroi e tâpû ra i te faataaraa a te Apokalupo i te Aramagedo, e eaha te auraa o te reira no tatou?

¹⁴ E fatata te feia faatere o “te fenua nei e o te ao atoa nei” i te faaû atu ia Iehova i nia i te parau o te mana arii. I Aramagedo, “te tamaˈi i taua mahana rahi o te Atua Puai hope ra,” e tupu ai te faaûraa. (Apokalupo 16:14, 16) E manaˈo taa ê te hiti mai ra i ropu i te faataaraa e e haaputuputu te feia faatere o te fenua no te tamaˈi ia Iehova. O Iesu iho te tâpû i te orama no te parau e: “Inaha, mai te eiâ ra to ˈu haereraa ˈtu. E ao to te ara ra, te tiai maite i to ˈna ahu ia ore oia ia haere tahaa noa a ite te taata i to ˈna nehenehe ore.” (Apokalupo 16:15) Te parauhia ra paha no te mau tiai ati Levi i te hiero, o te tatarahia te ahu e o te faahaamahia i mua i te taata ia itehia ratou e te taoto ra i roto i ta ratou ohipa.

¹⁵ Mea maramarama te poroi: Ia hinaaro tatou e ora ˈtu i Aramagedo, e tia ia vai ara noa tatou i te pae varua e ia tapea noa i to tatou ahu taipe o te faaite ra e e Ite haapao maitai tatou no te Atua ra o Iehova. E oaoa tatou ia ore tatou e varea i te taoto i te pae varua e ia tamau noa tatou ma te tuutuu ore i te apiti ma te itoito i roto i te haaparareraa i “te evanelia e tia i te vairaa” o te Basileia o te Atua i haamauhia.—Apokalupo 14:6.

‘E ao to te feia haapao i tei papaihia’

16. No te aha te mau pene hopea o te Apokalupo e riro ai ei tumu taa ê no te oaoa?

¹⁶ E umere noa te feia taio oaoa i te buka Apokalupo ia taio ratou i te mau pene hopea o te faataa ra i to tatou tiaturiraa hanahana—te hoê raˈi apî e te hoê fenua apî, oia hoi te hoê Basileia parau-tia i nia i te raˈi e faatere i nia i te hoê totaiete taata apî i tamâhia, no te arue ia Iehova “te Atua Mana hope ra.” (Apokalupo 21:22) A hope ai te anairaa orama faahiahia, ua parau te vea melahi ia Ioane e: “E parau mau teie nei mau parau, e te haavare ore: ua tono mai hoi [Iehova] ra, o te Atua o te mau peropheta moˈa ra i tana melahi e faaite i tana mau tavini i te mau mea e fatata i te tupu ra. E inaha, te haere vave atu nei au; e ao to te haapao i te mau parau tohu i roto i teie nei [otaro].”—Apokalupo 22:6, 7; MN.

17. (a) Eaha te haapapuraa e vai ra i roto i te Apokalupo 22:6? (b) Eaha ta tatou e ara i te ape?

¹⁷ E haamanaˈo te feia taio oaoa i te Apokalupo i taua mau parau ra o te tuea ra i tei papaihia i te omuaraa o te “otaro.” (Apokalupo 1:1, 3) Te haapapu maira teie mau parau e ‘e fatata te mau mea’ atoa i tohuhia i roto i teie buka hopea o te Bibilia “i te tupu.” Te ora nei tatou i roto roa i te tau hopea e e fatata mau â te mau ohipa faufaa i tohuhia i roto i te Apokalupo i te tupu oioi te tahi i muri i te tahi. Eiaha ïa te hiˈoraa aueue ore o te faanahoraa a Satani e haavarea ia tatou i te taoto. E haamanaˈo te taata taio o te vai ara noa ra i te mau faaararaa e vai ra i roto i te mau poroi i faataehia i na amuiraa e hitu i Asia e e ape ratou i te mau marei o te nounou taoˈa, te peu haamori idolo, te peu tia ore i te pae morare, te pumahanahana, e te mau pǔpǔ iti faaroo taiva.

18, 19. (a) No te aha e tia ˈi ia Iesu ia haere mai, e eaha ta tatou e nehenehe e tiaturi ia au i ta Ioane i parau? (b) No te aha Iehova e “haere” mai ai?

¹⁸ I roto i te buka Apokalupo, te faaite ra Iesu e rave rahi taime e: ‘E haere vave atu vau.’ (Apokalupo 2:16; 3:11; 22:7, 20a) E tia ia ˈna ia haere mai no te haava ia Babulonia Rahi, te faanahoraa politita a Satani, e te feia atoa e patoi i te auraro i te mana arii o Iehova, o te faahohoˈahia ra i teie nei e te Basileia Mesia. Te apiti nei tatou i to tatou reo e to te aposetolo Ioane i parau e: “Amene. Oia ïa, a haere mai, e te Fatu, e Iesu e!”—Apokalupo 22:20b.

¹⁹ Te na ô ra Iehova e: “Inaha, te haere vave atu nei au; e tei ia ˈu nei ta ˈu utua, ia hopoi atu na te taata atoa i tei au i ta ˈna ra ohipa.” (Apokalupo 22:12) A tiai noa ˈi tatou i te haamaitairaa hanahana o te ora aita e hopearaa ei tuhaa o te “raˈi apî” aore ra o te “fenua apî” i tǎpǔhia, ia apiti atoa ïa tatou ma te itoito i roto i te titau-manihini-raa i te feia aau haavare ore atoa: “E haere mai. E o tei poihâ ra, a haere mai. E tei hinaaro ra, a rave noa mai oia i te pape ora.” (Apokalupo 22:17) Ia riro atoa mai hoi ratou ei feia taio oaoa i te buka faauruahia e te anaanatae, oia te Apokalupo!

[Nota i raro i te api]

Mau manaˈo e haamanaˈo

◻ Eaha te auvaha ta Iehova i faaohipa no te faatae mai i te Apokalupo, e eaha ta tatou e haapii ra na roto i te reira?

◻ No te aha tatou e oaoa ˈi i te taio i te mau poroi i faataehia i na amuiraa e hitu i Asia?

◻ Nafea tatou e nehenehe ai e manuïa i roto i te “hora tamataraa”?

◻ Eaha te oaoa ta tatou e ite ia haapao tatou i te mau parau o te otaro i roto i te Apokalupo?

[Hohoˈa i te api 15]

E oaoa te feia e farii i te Tumu o te mau parau apî oaoa

[Hohoˈa i te api 18]

E oaoa te taata e vai ara noa