Ua rave ratou i te hinaaro o Iehova

Ua maiti Maria i te “mea tia”

I TE tau o Iesu, ua taotiahia te mau vahine ati Iuda e te mau peu tutuu a te mau rabi. No reira, aita ratou i faaitoitohia ia haapii i te Ture. Oia mau, te na ô ra te hoê manaˈo i papaihia i roto i te Mishna e: “Mai te peu e e horoa te tahi taata i ta ˈna tamahine i te hoê ite o te Ture, e mai te mea ra e te haapii ra oia ia ˈna i te peu hairiiri.”—Sotah 3:4.

Ei faahopearaa, aita te mau vahine e rave rahi i haapii-maitai-hia i te senekele matamua i Iudea. “Aita e haapapuraa e hou te taviniraa a Iesu, ua faatiahia te mau vahine ia riro ei pǐpǐ a te hoê orometua rahi, e papu maitai e aita i faatiahia ia tere e teie orometua, aore ra ia haapii atu i te hoê noa ˈˈe taata maori râ te mau tamarii,” ta te buka ra The Anchor Bible Dictionary ïa e tapao ra. No te faahaehaa roa ˈtu â i te mau vahine, ua haamau atoa te tahi mau faatere haapaoraa i te hoê ture e parau ra eiaha te hoê tane e paraparau atu i te hoê vahine i te vahi taata!

Ua faahapa Iesu i teie mau haerea paieti ore. Ua haapii oia i te mau vahine oia atoa te mau tane, e ua ite-atoa-hia te tane e te vahine i rotopu i ta ˈna mau pǐpǐ. (Luka 8:1-3) I te hoê taime, ua titau manihini o Mareta e o Maria ia Iesu. (Luka 10:38) E mau tuahine o Lazaro teie nau vahine, e mau pǐpǐ e e mau hoa maitatai ratou e toru atoa ra no Iesu. (Ioane 11:5) E utuafare fetii matauhia teie, ia hiˈohia te rahiraa taata i haere mai e tamahanahana ia Mareta raua o Maria i to Lazaro poheraa. Noa ˈtu â, ua horoa mai te mea i tupu i to ratou fare a parahi ai Iesu ei manihini i reira, i te hoê haapiiraa faufaa eiaha no raua anaˈe, no tatou atoa râ.

Te haapiiraa i te pae avae o Iesu

Aita e feaaraa e ua hinaaro o Mareta e o Maria e horoa na Iesu i te hoê tamaaraa rahi, e peneiaˈe e maraa te reira ia raua. (A faaau e te Ioane 12:1-3.) I to ta raua râ manihini taeraa mai, ua ‘parahi aˈera Maria i te pae avae o Iesu i te faarooraa i ta ˈna parau.’ (Luka 10:39) Aita hoê aˈe tutuu a te taata e tapea ia Iesu ia haapii i te hoê vahine aau rotahi o te hinaaro roa ra e haapii! E nehenehe tatou e feruri ia Maria e parahi ra i mua ia Iesu, mai te hoê tamarii haere haapiiraa te huru o tei anaanatae roa i te faarooraa i te haapiiraa a ta ˈna Orometua.—A faaau e te Deuteronomi 33:3; Ohipa 22:3.

Taa ê atu ia Maria, te “peapea” ra ïa Mareta “i te haapaoraa i te [mau mea e rave rahi].” Ma te faaineine i te hoê maa faahiahia, ua rahi roa ta ˈna ohipa o te titau i te mau mea teimaha. Aita i maoro, ua inoino aˈera o Mareta e na ˈna e rave pauroa i te ohipa a parahi noa ˈi to ˈna tuahine i te pae avae o Iesu! No reira, ua tâpû atura Mareta peneiaˈe ma te taue, i ta Iesu paraparauraa ia Maria, a na ô atu ai e: “E te Fatu, e eita oe e haapao mai, e ua faarue mai tau [tuahine] ia ˈu, o vau anaˈe teie e rave noa ˈi? e parau atu oe ia ˈna e rave atoa mai.”—Luka 10:40; MN.

E ere te aniraa a Mareta i te mea ino. Inaha, e ohipa rahi te faaineineraa i te maa na te hoê pǔpǔ, eiaha ïa ia riro ei hopoia na te hoê anaˈe taata. Ua ite râ Iesu i roto i ta ˈna mau parau i te hoê ravea no te haapii i te hoê haapiiraa faufaa. “E Mareta e, e Mareta,” ta Iesu ïa i parau, “ua ahoaho oe, e te peapea na oe ia oe iho i te mau mea e rave rahi: hoê roa râ mea tia, e ua rave iho nei Maria i taua mea tia ra, e ore roa hoi ta ˈna e riro ê.”—Luka 10:41, 42.

Aita Iesu e parau ra e aita Mareta e anaanatae ra i te mau mea i te pae varua. Ua ite râ oia e e vahine paieti mau oia.a Papu maitai e na te reira na mua i turai ia ˈna ia titau manihini ia Iesu i ǒ na. I to ˈna râ aˈo-mǎrû-raa ˈtu, te haapapu ra Iesu e na roto i to ˈna haapeapea-maite-raa i te pae o te maa, te erehia ra oia i te hoê ravea varavara ia fanaˈo oia iho i te haapiiraa a te Tamaiti a te Atua.

Parau mau, e turu paha te peu tumu o taua tau ra i te manaˈo e maoti to ˈna aravihi i te mau ohipa o te fare e ite-roa ˈˈe-hia ˈi te faufaaraa o te hoê vahine. Te faaite ra râ te mau parau a Iesu e e nehenehe te mau vahine, oia atoa te mau tane, e parahi i te pae avae o te Tamaiti a te Atua e fanaˈo i te mau parau o te ora! (Ioane 4:7-15; Ohipa 5:14) Ia au i te reira, mea hau roa ˈˈe no Mareta ia pûpû i te tahi noa maa—aore ra hoê noa ˈˈe—ia nehenehe oia e parahi i te pae avae o te Fatu e e haapii na roto ia ˈna.—A faaau e te Mataio 6:25.

Te haapiiraa no tatou

I teie mahana, te ite-atoa-hia ra te tane e te vahine i rotopu i te feia e farii ra i te titau-manihini-raa a Iesu ‘e rave noa mai i te pape ora.’ (Apokalupo 22:7) Ma te turaihia e te here, e rohi te tahi—mai ia Mareta—i te haapao i te mau hinaaro o to ratou mau hoa faaroo. Mea ite e mea vitiviti ratou ia rave i te ohipa e te tǎpǔ ra Iehova e haamauruuru i ta ratou ohipa o te here. (Hebera 6:10; 13:16) Peneiaˈe hoê roa ïa to vetahi huru e to Maria. E mau taata e mamû noa e e faaroo noa ratou. E tauturu to ratou hinaaro e feruri hohonu i te Parau a te Atua ia ratou ia aˈa-papu-roa-hia i roto i te faaroo.—Ephesia 3:17-19.

E hinaaro-rahi-hia na huru e piti atoa ra i roto i te amuiraa Kerisetiano. I te pae hopea râ, e au i te taatoaraa ia ‘maiti i te mea tia’ ma te haafaufaa na mua i te mau mea pae varua. Ma te haapapu i te mau mea faufaa roa ˈˈe, e fanaˈo ïa tatou i te farii maitai e haamaitairaa a Iehova.—Philipi 1:9-11.

[Nota i raro i te api]