A fanaˈo i “te oraraa mau”

UA HOROA te Atua ra o Iehova i te manaˈo o te tau mure ore i te taata. (Koheleta 3:11) No reira aita e ravea ta te taata i mua i te pohe, i te hoê â râ taime, e faatupu te reira i te hoê hinaaro rahi e ora.

Te horoa maira te Bibilia, te Parau faauruahia a te Atua, i te hoê tiaturiraa rahi. (Timoteo 2, 3:16) Aita o Iehova, te tumu mau o te here, i nehenehe e hamani i te taata ma te taa i te manaˈo o te tau mure ore e i muri iho e faautua ia ˈna ia ora noa oia tau matahiti noa. Eita roa ˈtu te poieteraa ia tatou ia hepohepo rahi tatou no to tatou huru e au i te huru o te Atua. Aita tatou i poietehia mai ‘te mau puaa manaˈo ore, i hamanihia no te haru e no te pohe.’—Petero 2, 2:12.

Ma te poiete ia Adamu raua Eva e te manaˈo o te tau mure ore, ua hamani te Atua ra o Iehova i te hoê mea “maitai roa”; ua hamani o ˈna ia raua e te ravea no te ora e a muri noa ˈtu. (Genese 1:31) Ma te peapea râ, aita nau hoa faaipoipo matamua i faaohipa maitai i to raua tiamâraa, a ore ai e auraro i te hoê opaniraa taa maitai a te Poiete e a ere atu ai i to raua huru tia roa matamua. Ei faahopearaa, ua pohe raua, ma te tufa i te huru tia ore e te pohe na to raua huaai.—Genese 2:17; 3:1-24; Roma 5:12.

Aita e parau aro i roto i te Bibilia no nia i te fa o te oraraa e te auraa o te pohe. Te parau ra oia e i roto i te pohe “aore hoi e ohipa, aore e imiraa, aore hoi e ite, aore hoi e paari” e aita ta “te feia i pohe ra e parau itea.” (Koheleta 9:5, 10) Na roto i te tahi atu mau taˈo, ua pohe te feia pohe. E ere te haapiiraa o te pohe-ore-raa o te nephe no roto mai i te Bibilia, no reira aita e parau aro hohonu no nia i te huru o te feia pohe.—Genese 3:19; Salamo 146:4; Koheleta 3:19, 20; Ezekiela 18:4.a

E opuaraa ta te Atua; aita o ˈna i poiete i te fenua “ia vaiiho-taata-ore-noa-hia.” Ua haamau o ˈna i te reira ia “taatahia” e te mau taata tia roa i roto i te mau huru tupuraa paradaiso, e aita te Atua i taui i ta ˈna opuaraa. (Isaia 45:18; Malaki 3:6) No te faatupu i te reira, ua tono oia i ta ˈna Tamaiti i te fenua nei. Ma te tapea i to ˈna haapao maitai e tae roa ˈtu i to ˈna poheraa, ua horoa o Iesu Mesia i te ravea no te hoo mai i te huitaata nei mai te pohe e te hara. Oia mau, ua parau o Iesu e: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.”—Ioane 3:16.

Mea maoro aˈenei, ua tǎpǔ te Atua e e poiete o ˈna “i te raˈi apî e te fenua apî.” (Isaia 65:17; Petero 2, 3:13) Te auraa ra e maiti oia i te hoê pǔpǔ taotiahia o te mau Kerisetiano haapao maitai no te ora i nia i te raˈi. E riro ratou e o Iesu atoa, ei pu faatereraa. Te faataa nei te Bibilia i te reira mai “te basileia o te ao,” aore ra te “hau o te Atua,” o te haapao i ‘te mau mea atoa o te ao nei.’ (Mataio 4:17; 12:28; Ephesia 1:10; Apokalupo 5:9, 10; 14:1, 3) I muri aˈe i te haamouraa i te paieti ore atoa i nia i to tatou fenua e te tamâraa ia ˈna, e faatupu te Atua i te hoê totaiete taata parau-tia apî, aore ra “fenua apî.” Tei roto atoa te feia ta te Atua e paruru i roto i te haamouraa o teie nei faanahoraa ino o te mau mea e fatata roa maira. (Mataio 24:3, 7-14, 21; Apokalupo 7:9, 13, 14) E apitihia ratou e te feia e faahoˈihia mai i te ora na roto i te tia-faahou-raa i tǎpǔhia mai.—Ioane 5:28, 29; Ohipa 24:15.

“Te oraraa mau” i muri iho

No te haapapu i te faataaraa faahiahia o te huru oraraa i roto i te Paradaiso i te fenua nei, te parau ra te Atua e: “Inaha, te faaapî nei au i te mau mea atoa nei.” (Apokalupo 21:5) Eita ta te feruriraa taata nei e nehenehe e taa maitai i te ohipa faahiahia ta te Atua e rave no te huitaata. E poiete te Atua i te hoê Paradaiso e ati aˈe teie nei ao, ia au i te ô i Edene. (Luka 23:43) Mai i Edene, e rau te huru nehenehe e te au maite o te û, te taˈi, e te taota. E ore roa te veve e te navai-ore-raa o te maa, te parau ra hoi te Bibilia no taua tau ra e: “Ua mou te mau mea tahito ra.” (Apokalupo 21:4; Salamo 72:16) Eita te taata e parau faahou e, “Ua paruparu vau i te maˈi,” inaha e faaorehia te maˈi e a muri noa ˈtu. (Isaia 33:24) Oia mau, e ore roa te mau tumu atoa o te mauiui, e tae noa ˈtu te enemi tahito o te huitaata nei, te pohe. (Korinetia 1, 15:26) I roto i te hoê orama faahiahia mau o te “fenua apî,” te totaiete taata apî i raro aˈe i te faatereraa a te Mesia, ua faaroo te aposetolo Ioane i te hoê reo o te parau ra e: “E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa.” Eaha te nehenehe e afai mai i te tamahanahanaraa e te oaoaraa rahi aˈe maoti râ te tupuraa o teie tǎpǔ a te Atua?

Ia faataa oia i te oraraa a muri aˈe, e haamatara te Bibilia i te mau huru tupuraa o te haamâha i te mau hiaai o te taata i te pae morare e te pae varua. E naea-roa-hia te mau tapao tia atoa ta te huitaata i tutava noa i te imi ma te manuïa ore e tae roa mai i teie nei. (Mataio 6:10) I roto i te reira te vai ra te hiaai i te parau-tia, tei ore i naeahia inaha ua pinepine te taata i te hepohepo i te feia ino mau tei haavî i te feia paruparu. (Koheleta 8:9) Ua tohu te papai salamo no nia i te mau huru tupuraa i raro aˈe i te faatereraa a te Mesia: “I to ˈna ra tau e tupu roa ˈi te parau-tia; e rahi roa hoi te hau.”—Salamo 72:7.

Ua faatusia te taata e rave rahi no te aifaitoraa, te tahi atu hiaai. Ia tae i te “poiete-faahou-raa” e faaore roa te Atua i te hiˈo-ino-raa. (Mataio 19:28, MN) E fanaˈo te taatoaraa i te hoê â tura. E ere roa ˈtu te aifaitoraa e faahepohia e te hoê faatereraa haavî. E faaore-roa-hia râ te mau tumu o te hiˈo-ino-raa, e tae noa ˈtu te nounou taoˈa e te teoteo o te aratai i te taata ia imi i te faatere ia vetahi ê aore ra ia haapue rahi i te taoˈa materia. Ua tohu o Isaia e: “E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira. E ore ratou e patu, e na vetahi ê e parahi; e ore ratou e tanu, e na vetahi ê e amu.”—Isaia 65:21, 22.

Ua mauiui mau te taata no te haamaniiraa toto i roto i te tamaˈi a te taata noa iho e a te nunaa! Ua tamau te reira mai te haapoheraahia o Abela e tae roa mai i te mau tamaˈi o teie tau. Ehia maororaa to te taata tiaturi-noa-raa e tiairaa, ma te faufaa ore, e ia haamauhia te hau! I roto i te Paradaiso e haamau-faahou-hia, e faaite te mau taata atoa i te hau e te mǎrû; “e oaoa ratou i te rahi o te hau ra.”—Salamo 37:11.

Te parau nei te Isaia 11:9 e: “E î hoi te fenua i te ite ia Iehova, mai te vairaa miti e î i te miti ra.” No to tatou huru tia ore i tufahia, taa ê atu i te tahi mau mea, eita e taa maitai ia tatou te auraa o teie mau parau. E tiâ paha ia tatou ia haapii nafea te ite papu i te Atua e tahoê ai ia tatou e o ˈna e nafea te reira e horoa mai ai i te oaoa rahi. Teie râ, i te mea e te faaite maira te mau Papai ia tatou e e Atua faahiahia o Iehova i te pae o te puai, te paari, te parau-tia, e te here, e nehenehe tatou e papu e e faaroo mai o ˈna i te mau pure atoa e faahitihia e te feia o te “fenua apî.”

E ohipa papu “te oraraa mau”—A haru i te reira!

No te feia e rave rahi, e moemoeâ aore ra e manaˈo noa te ora mure ore i roto i te hoê ao maitai aˈe. No te feia râ e tiaturi mau ra i te parau tǎpǔ o te Bibilia, e ohipa papu ïa teie tiaturiraa. E au te reira i te hoê tutau no to ratou oraraa. (Hebera 6:19) Mai te hoê tutau e tapea maitai ra i te hoê pahi ia ore ia painu, e turu te tiaturiraa o te ora mure ore i te taata eiaha ratou ia aueue e e horoa te reira i te ravea ia ratou no te faaruru i te mau fifi ino mau o te oraraa e te haavî atoa ˈtu.

E nehenehe tatou e papu e e faatupu iho â te Atua i ta ˈna mau tǎpǔ. Ua horoa atoa o ˈna i te hoê haapapuraa ma te faahiti i te hoê euhe o te ore e nehenehe e faaorehia. Ua papai te aposetolo Paulo e: “Te Atua, hinaaro aˈera oia i te faaite papu mai i te feia tufaa i tei parauhia maira i te hirohirouri ore o ta ˈna ra opua, haapapu atura i te tǎpǔ; ia rahi to tatou mauruuru i taua na parau hirohirouri ore e piti ra, o tei ore e tia i te Atua ia haavare ra, [“ia faaitoito-hua-hia tatou . . . i te haru i te tiaturiraa i tuuhia mai i mua ia tatou,” MN].” (Hebera 6:17, 18) Taua “na parau hirohirouri ore e piti ra,” ta te Atua e ore e nehenehe e faaore, o ta ˈna ïa fafau e ta ˈna tǎpǔ, te niu o ta tatou mau tiairaa.

E mahanahanahia e e puaihia tatou i te pae varua maoti te faaroo i te mau parau tohu a te Atua. Mai te reira te faaroo o Iosua, te hoê raatira o te nunaa Iseraela. I to Iosua horoaraa i ta ˈna oreroraa parau aroharaa hopea i to Iseraela, mea paari roa oia e ua ite oia e fatata oia i te pohe. Ua faaite râ oia i te taiva ore puai e te fati ore, no roto mai i te hoê tiaturiraa taatoa i te mau parau tǎpǔ a te Atua. I muri aˈe i to ˈna parauraa e te haere nei o ˈna “na te eˈa o to te ao atoa nei,” oia te eˈa o te aratai i te huitaata taatoa i te pohe, ua parau o ˈna e: “Ua ite atoa hoi outou i roto i to outou aau, e i roto i to outou mau [“nephe,” MN], e aore roa te hoê o te mau mea maitatai ta to outou Atua ta Iehova i parau ai ia outou ra i ore i te tia; ua hope roa i te tupu ia outou, aore roa te hoê i toe.” Oia mau, e toru taime to Iosua parau-noa-raa e e tapea noa o Iehova i ta ˈna mau parau tǎpǔ atoa.—Iosua 23:14.

E nehenehe atoa outou e faatupu i te hoê â faaroo i te tǎpǔ a te Atua i te hoê ao apî e fatata roa i te haamauhia. Ia haapii outou i te Bibilia ma te aau rotahi, e maramarama ïa outou o vai o Iehova e no te aha e tia iho â ia outou ia tiaturi mau ia ˈna. (Apokalupo 4:11) E faaroo aueue ore to Aberahama, Sara, Isaaka, Iakoba, e te tahi atu feia haapao maitai no tahito ra, mea niuhia to ratou faaroo i nia i to ratou ite hohonu i te Atua mau ra o Iehova. Ua vai puai noa ratou i roto i te tiaturiraa, noa ˈtu e “aita i noaa tei parauhia maira” a ora noa ˈi ratou. Noa ˈtu râ, ‘ua hiˈo ratou i taua mau mea ra i te atea ê, e ua faaroo papu e ua farii maite.’—Hebera 11:13.

Ma te maramarama i te mau parau tohu o te Bibilia, te ite nei tatou e te fatata maira te “mahana rahi o te Atua Puai hope ra,” i reira hoi te fenua e tamâhia ˈi i te mau ino atoa. (Apokalupo 16:14, 16) Mai te mau taata haapao maitai no tahito ra, e tia ia tatou ia vai noa i roto i te tiairaa ma te tiaturi i te mau tupuraa no a muri aˈe, ma te turaihia e te faaroo e te here atoa i te Atua e te hinaaro i “te oraraa mau.” E faaitoitoraa puai te fatata-roa-raa mai te ao apî no te feia e faaohipa ra i te faaroo ia Iehova e o te here ra ia ˈna. E tia ia atuatuhia teie faaroo e teie here no te fanaˈo i te maitai e te paruru o te Atua i to ˈna ra mahana rahi, o te fatata roa maira.—Zephania 2:3; Tesalonia 2, 1:3; Hebera 10:37-39.

No reira, mea au anei na outou te ora? E te hinaaro ra anei outou i “te oraraa mau”—te oraraa ei tavini no te Atua ma te tiaturiraa o te oraraa oaoa no a muri aˈe, oia, te ora mure ore? Mai te peu e te reira ta outou e imi ra, a haapao i te aˈoraa a te aposetolo Paulo, o tei papai e e tia ia tatou ‘eiaha e tiaturi i te taoˈa rahi itea ore, ei te Atua râ.’ Te na ǒ faahou ra o Paulo e: ‘Ia taoˈa i te ohipa maitatai ra,’ o te faahanahana ïa i te Atua, ia “noaa maite te oraraa mau, MN.”—Timoteo 1, 6:17-19.

Ia farii outou i te hoê haapiiraa Bibilia e te mau Ite no Iehova, e nehenehe e noaa ia outou te hoê ite o te aratai ia outou i te “ora mure ore.” (Ioane 17:3) Ma te here, te faataa ra te Bibilia i te titauraa e au i ta te hoê metua tane i te taatoaraa: “E tau tamaiti, eiaha e haamoe i ta ˈu nei aˈo; ia haapao maite to aau i ta ˈu nei ture: e maoro hoi to oe ra pue mahana e to oe ra mau matahiti, e te ora hoi e te hau ta te reira e amui atoa mai ia oe ra.”—Maseli 3:1, 2.

[Nota i raro i te api]