Te fariiraa ma te oaoa i te aratairaa a Iehova
FAATIAHIA E ULYSSES V. GLASS
E taime taa ê mau â teie. E 127 noa feia haapii i roto i te pǔpǔ e faatuitehia ra, area te feia oaoa i putuputu mai ra, 126 387 ïa ratou no te mau nunaa e rave rahi mai. Te faatuitehia ra te 21raa o te pǔpǔ a te Haapiiraa Bibilia no Gileada a te Taiete Watchtower, i tupu i te oire no New York i te Yankee Stadium i te 19 no Tiurai 1953. No te aha e ohipa faufaa te reira i roto i to ˈu oraraa? E faataa rii atu ïa vau.
UA FANAUHIA vau i Vincennes, i Indiana, i Marite, i te 17 no Febuare 1912, e piti matahiti hou te fanauraahia te Basileia Mesia ia au i te faataaraa a te Apokalupo 12:1-5. I te matahiti na mua ˈtu, ua haamata to ˈu mau metua i te haapii i te Bibilia e te mau buka ra Études des Écritures. I te mau poipoi Sabati atoa, e taio Papa i te utuafare hoê o taua mau buka ra, e e tauaparau matou i te reira i muri iho.
Ua faaohipa Mama i ta ˈna e haapii ra no te haamataro i te feruriraa o ta ˈna mau tamarii. E vahine maitai roa oia—e vahine mǎrû roa e te ineine i te tauturu. E maha matou tamarii, mea here atoa râ na Mama te tahi atu mau tamarii a te feia tapiri. Ua horoa oia i te taime no matou. Mea au na ˈna e faatia ia matou i te mau aamu Bibilia e e himene e o matou.
E titau manihini atoa oia i ǒ matou ra e rave rahi o te ohipa ra i roto i te taviniraa ma te taime taatoa. E faaea mai ratou hoê aore ra e piti noa mahana, ma te faatupu pinepine i te mau putuputuraa e te hohora i te mau oreroraa parau i roto i to matou fare. Mea au iho â râ na matou te feia i faaohipa i te mau hohoˈa e i faatia mai ia matou i te mau aamu. I te hoê taime i te matahiti 1919, hoê matahiti i muri aˈe i te hoperaa te Tamaˈi Rahi Matamua, ua paraparau roa mai te taeae ratere ia matou te mau tamarii. Ua faahiti oia i te parau o te haamoˈaraa—ta tatou e parau ma te tano roa ˈtu â te pûpûraa—e ua tauturu oia ia matou ia taa nafea te reira e ohipa ˈi i nia i to matou oraraa. I muri aˈe i taua po ra i to ˈu haereraa i nia i te roˈi, ua pure au i to ˈu Metua i te raˈi e ua parau vau ia ˈna i to ˈu hinaaro e tavini noa ia ˈna.
I muri aˈe râ i te matahiti 1922, ua tuuhia taua faaotiraa ra i te piti o te parahiraa no te tahi atu mau haapeapearaa i roto i te oraraa. Ua taui noa matou i te vahi faaearaa e aita matou i amui atu i te hoê amuiraa a te nunaa o Iehova. Aita Papa i te fare no ta ˈna ohipa i nia i te purumu auri. E ere ta matou haapiiraa Bibilia i te mea tamau. Ua rave au i te tahi mau haapiiraa no te riro ei taata peni hohoˈa tapihoo e ua opua vau e haere i te hoê fare haapiiraa tuatoru faahiahia.
Te faatanoraa i ta ˈu tapao i roto i te oraraa
I roto i te afaraa o te mau matahiti 1930, ua haamata faahou te ao i te faatupu i te hoê tamaˈi rahi. Te faaea ra matou i Cleveland, i Ohio, i te haereraa mai te hoê Ite no Iehova i ǒ matou. Ua feruri maite atu â matou i ta matou i haapii i to matou nainairaa. Mea haapao maitai iho â râ to ˈu tuaana o Russell, e o o ˈna tei bapetizohia na mua. Mea taa ê rii au, teie râ i te 3 no Febuare 1936, ua bapetizo-atoa-hia vau. Te taa noa ˈtu ra ia ˈu i te auraa e pûpû ia ˈu no Iehova, e te haapii ra vau i te farii i te aratairaa a Iehova. I taua noâ matahiti ra, ua bapetizo-atoa-hia to ˈu na tuahine e piti o Kathryn e o Gertrude. Ua rave matou pauroa i te taviniraa ma te taime taatoa ei pionie.
E ere râ ïa te auraa e aita roa ˈtu matou i manaˈo i te tahi atu mea. Ua faaroo maitai to ˈu tariˈa i te parauraa mai to ˈu taoete vahine no nia i te potii haviti roa o Ann te iˈoa, e tamahine “itoito roa” oia mai to ˈna iho â iteraa i te parau mau e to ˈna haereraa i te mau putuputuraa i to matou fare. I taua taime ra, e papai parau oia i roto i te hoê piha toroa haavaraa, e i roto hoê matahiti ua bapetizohia oia. Aita vau i opua e faaipoipo, mea papu râ e te turu taatoa ra o Ann i te parau mau. Ua hinaaro oia e faaô roa i roto i te taviniraa a Iehova. Eita roa ˈtu oia e parau e, “E nehenehe anei au e rave i te reira?” E ani râ oia e, “Eaha te ravea maitai roa ˈˈe no ˈu ia rave i te reira?” E ua faaoti oia i te tamau noa. Ua au roa vau i taua huru feruriraa maitai ra. Taa ê atu i te reira, mea haviti roa oia, e aita oia i taui. Ua riro mai oia ei vahine na ˈu, e aita i maoro ua apiti mai oia ia ˈu i roto i te taviniraa pionie.
Te haapiiraa faufaa ei pionie
Ei pionie, ua haapii mâua eaha te taviri o te mauruuru ia iti e ia rahi atoa ta mâua maa. (Philipi 4:11-13) I te hoê mahana, te haamata ra i te po e aita ta mâua e maa. E pae noa toata Marite ta mâua. Ua haere mâua i te hoê fare toa iˈo puaatoro, e ani atura vau e, “E nehenehe anei oe e horoa mai e pae toata mortadelle?” Ua hiˈo maira oia ia mâua e horoa maira e maha tâpû. Ua papu ia ˈu e ua hau atu i te pae toata, e ua horoahia mai te tahi mau maa.
Mea matauhia ia farerei i te patoiraa uˈana a rave ai mâua i ta mâua taviniraa. I te hoê oire i pihai iho ia Syracuse, i New York, tei roto mâua i te aroâ e opere haere ra i te mau api parau e e amo ra i te mau iri o te faaite ra i te hoê putuputuraa huiraatira taa ê. Ua haru e piti taata pautuutu ia ˈu e ua rave ino maira ia ˈu. E mutoi hoê, aita râ oia i oomo i to ˈna ahu mutoi, e aita oia i ite e e ani au i ta ˈna tareta. I reira iho, ua haere maira o Grant Suiter no te Betela i Brooklyn e parau maira e e haere matou i te fare mutoi no te faaafaro i te fifi. I muri iho, ua taniuniu oia i te Taiete i Brooklyn, e ua faauehia e piti o matou ia haere faahou i rapaeau i taua noâ mahana ra e te mau iri e te mau api parau no te horoa i te niu o te hoê tupuraa hiˈoraa i te pae haavaraa. Aita iho â i hape, ua tapeahia mâua. I to mâua râ parauraa i te mau mutoi e e horohia ratou i te haavaraa no te tapea-hape-raa ia mâua, ua tuu aˈera ratou ia mâua.
I te mahana i muri iho, e rave rahi taurearea faahuehue, i turaihia e te hoê perepitero, tei haere mai i ta matou vahi tairururaa, e aita hoê aˈe mutoi i reira. Ua tairi te mau taurearea ohipa ino i te mau raau base-ball i nia i te tahua raau, ua turai ratou i te tahi mau taata i putuputu mai i raro mai nia mai i te mau vahi parahiraa, e haere atura ratou i mua a tapea noa ˈi i te hoê reva Marite e a tuô ai e, “A aroha i te reva! A aroha i te reva!” I muri iho, ua himene ratou i te “Beer Barrel Polka.” Ua mau roa te putuputuraa ia ratou. Ua ite roa matou i te auraa o te mau parau a Iesu: “No te mea râ e ere outou i to teie nei ao, o vau i maiti ia outou no roto i teie nei ao, e riri mai ai teie nei ao ia outou.”—Ioane 15:19.
Te oreroraa parau huiraatira, o te haapurororaa ïa i te hoê oreroraa parau a J. F. Rutherford, te peretiteni o te Taiete Watch Tower i taua tau ra. Ua faaea mâua Ann i taua oire ra tau mahana e ua haere mâua e farerei i te mau taata no te pûpû ia ratou i te ravea e faaroo i te oreroraa parau i to ratou fare. Ua farii vetahi i taua pûpûraa ra.
Te fariiraa i te taviniraa na te ara
I muri iho, ua matara te mau ravea apî o te taviniraa. Ua anihia i to ˈu tuaana o Russell e ta ˈna vahine o Dorothy ia haere raua toopiti i te pǔpǔ matamua o te Haapiiraa no Gileada, i te matahiti 1943, e ua tonohia raua i muri iho ei mitionare i Cuba. Tei roto to ˈu tuahine o Kathryn i te pǔpǔ maha. Ua tono-atoa-hia oia i Cuba. Ua tonohia oia i muri aˈe i te Repubilita no Dominika e i Porto Rico i muri iho. E o mâua Ann ïa?
I to mâua faarooraa i te parau o te Haapiiraa no Gileada e te hinaaro ra te Taiete e tono i te mau mitionare i te tahi atu â mau fenua, ua manaˈo aˈera mâua e e nehenehe mâua e rave i te taviniraa na te ara. Na mua, ua manaˈo mâua e haere o mâua anaˈe i te fenua Mexique paha. I muri iho râ, ua faaoti mâua e mea maitai aˈe e tiai e e vaiiho e na te Taiete e tono ia mâua i muri aˈe mâua e haere ai i te Haapiiraa no Gileada. Ua taa ˈtura ia mâua e tera te faanahoraa ta Iehova e faaohipa ra.
Ua titau-manihini-hia mâua i te maharaa o te pǔpǔ o te Haapiiraa no Gileada. Na mua iti noa ˈˈe râ a haamata ˈi te pǔpǔ, ua ite maitai atu â o N. H. Knorr, te peretiteni o te Taiete Watch Tower Society i taua taime ra, i te mau taotiaraa o Ann no to ˈna maˈi polio mai to ˈna nainairaa mai â. Ua paraparau mai oia ia ˈu e ua faaoti oia e e ere i te mea maitai ia tono ia mâua e tavini i te tahi atu fenua.
Fatata e piti matahiti i muri aˈe, te rave ra hoi au i te mau faaineineraa no te tairururaa, ua haere mai â Taeae Knorr e farerei ia ˈu e ua ani mai e te anaanatae noa ra anei mâua i te haere i Gileada. Ua parau mai oia ia ˈu e eita mâua e tonohia i te ara; e ohipa ê ta ˈna i manaˈo. No reira, i te tapaoraahia te ivaraa o te pǔpǔ i te 26 no Febuare 1947, tei rotopu atoa mâua i te feia haapii.
Eita e moehia taua mau mahana ra i Gileada. Mea faufaa roa te mau haapiiraa i te pae varua. Ua tupu te mau auhoaraa no te oraraa taatoa. Ua haere roa ˈtu â to ˈu apitiraa i roto i te haapiiraa i mua.
I rotopu i te oire no Washington e Gileada
Mea apî roa te Haapiiraa no Gileada. Aita te faatereraa o te mau Hau Amui i ite maitai eaha te mau tapao o te haapiiraa, mea rahi ïa te mau uiraa i hiti mai. Ua hinaaro te Taiete ia tia ˈtu te hoê taeae i te oire no Washington. I reira to mâua tonoraahia tau avaˈe i muri aˈe i to mâua faatuiteraahia i Gileada. E tia ia ˈu ia tauturu ia noaa mai te mau parau faatia no te feia no te tahi atu â mau fenua o te haere ra i Gileada e ia noaa mai te mau parau mana ia nehenehe te feia i noaa te parau tuite e tonohia na te ara no te ohipa mitionare. Mea paetahi ore roa te tahi mau taata toroa e ua tauturu mai ratou. Area vetahi ê ra, mea au ore roa na ratou te mau Ite. Ua parau vetahi e mau manaˈo politita puai to ratou e e auraa to matou e te tahi mau pǔpǔ au-ore-hia e ratou.
Ua faaino rahi te hoê taata ta ˈu i haere e farerei i to ˈna piha toroa ia matou no te mea eita matou e aroha i te reva aore ra e haere i te tamaˈi. I muri aˈe i to ˈna paraparau-riri-raa i te reira tau taime i te maoro, ua na ô roa ˈtura vau ia ˈna e: “Te hinaaro nei au ia ite oe, e ua ite hoi oe e, aita te mau Ite no Iehova e faaô ra i roto i te hoê tamaˈi i roto i te ao. Aita matou e faaô ra i roto i te mau ohipa a te ao. Aita matou e faaô ra i roto i ta ratou mau tamaˈi, mau ohipa politita. Eita roa ˈtu matou e amui atu i roto. Ua faaafaro aˈena matou i te mau fifi ta outou e faaruru ra; mea tahoê ta matou faanahonahoraa. . . . Eaha ïa ta oe e hinaaro ia rave matou? E hinaaro anei oe ia pee matou i ta outou huru raveraa e ia vaiiho i ta matou?” Aita o ˈna i parau faahou i muri iho.
Ua faataahia e piti mahana taatoa i te hebedoma no te ohiparaa e te mau piha toroa a te faatereraa. Hau atu â, te tavini ra mâua ei pionie taa ê. I taua tau ra, e titauhia 175 hora i roto i te taviniraa i te avaˈe (140 hora i muri aˈe), no reira e haere pinepine mâua i roto i te taviniraa e po noa ˈtu. Ua fanaˈo mâua i te mau taime oaoa. Ua faatere mâua e rave rahi haapiiraa maitatai e te mau utuafare taatoa, e ua haere maitai ratou i mua. Ua faaoti mâua Ann eiaha e fanau i te tamarii, i te pae varua râ, e tamarii ta mâua e te mau mootua e te mau hina. E oaoaraa ratou no mâua!
I muri iho i te matahiti 1948, ua horoahia mai te tahi atu â hopoia. Ua faataa o Taeae Knorr e e haapao o Taeae Schroeder, e papai parau e e taeae horoa i te haapiiraa i Gileada, i te tahi atu ohipa faufaa, no reira ua anihia mai ia ˈu e haapii i te mau pǔpǔ no Gileada i te taime e titauhia. Ma te taiâ rahi, ua hoˈi mâua Ann i Gileada, i South Lansing, i New York, i te 18 no Titema. I te omuaraa, tei Gileada mâua tau hebedoma noa, e i muri iho e hoˈi mâua i Washington. I te pae hopea râ, ua haere pinepine mâua i Gileada maoti râ i Washington.
I te reira tau ra, mai ta ˈu i parau i te omuaraa, te faatuiteraahia te 21raa o te pǔpǔ no Gileada i te Yankee Stadium i New York. No reira, ei hoê o te mau taeae i horoa i te haapiiraa, ua fanaˈo vau i te haamaitairaa e apiti i roto i taua porotarama faatuiteraa ra.
Te taviniraa i te Pu rahi
I te 12 no Febuare 1955, ua haamata mâua i te tahi atu taviniraa. Ua riro mai mâua ei melo no te fetii o te Betela i te pu rahi o te faanahonahoraa ite-mata-hia a Iehova. Eaha râ te titauhia? Na mua roa, e titauhia ia ineine i te rave i te mau mea atoa e faauehia mai e rave, te apitiraa i te mau opuaraa o te titau ia rave amui i te ohipa e o vetahi ê. Parau mau, ua na reira aˈena mâua, i teie nei râ, e melo mâua no te hoê pǔpǔ rahi aˈe—te fetii o te Betela i te pu rahi. Ua farii mâua ma te oaoa i teie taviniraa apî e faaite ra i te aratairaa a Iehova.
Te hoê tuhaa rahi o ta ˈu ohipa, no nia ïa i te haapaoraa i te haapurororaa parau. No te hinaaro i te mau aamu faahiahia e ia noaa mai te tahi mau haamaramaramaraa no ǒ mai i te mau pu e mau manaˈo oti noa to ratou, ua papai te mau vea i te tahi mau mea au ore i nia i te mau Ite no Iehova. Ua tutava matou i te faaafaro i taua ohipa ra.
Ua hinaaro Taeae Knorr e ite papu e mea rahi mau â ta mâua ohipa, no reira te vai ra te tahi atu â mau hopoia. Ua titau vetahi o teie mau hopoia i te mau aravihi ta ˈu i faatupu ei taata peni hohoˈa tapihoo. Te tahi atu, o te haapaoraa ïa i te pu radio a te Taiete, te WBBR. Te vai atoa ra te ohipa e te mau hohoˈa teata tavirihia e te Taiete. Parau mau e e tuhaa atoa te aamu teotaratia no te haapiiraa i Gileada, i teie nei râ ua rau te mau opuaraa i ravehia ia nehenehe te nunaa o Iehova e ite hau atu â i te mau tuhaa huˈahuˈa o taua aamu ra o te faanahonahoraa teotaratia i teie tau e ia ite atoa te taata i te reira. Te tahi atu tuhaa o te haapiiraa no Gileada, o te oreroraa ïa i mua i te taata, e ua titauhia te tahi mau ohipa ia nehenehe te mau taeae i roto i te mau amuiraa e fanaˈo i te mau tuhaa faufaa o te oreroraa i mua i te taata. No reira mea rahi te ohipa.
Te ohipa-tamau-raa i Gileada
I te matahiti 1961, ua fatata hoi te haapiiraa a te mau tiaau ratere e a te mau rave ohipa a te amaa, ua faahaerehia te Haapiiraa no Gileada i Brooklyn, to reira te mau piha ohipa rahi a te Taiete Watch Tower. Tei roto faahou vau i te pǔpǔ haapiiraa—i teie taime ei melo tamau no te haapiiraa eiaha râ ei taeae mono o te horoa i te haapiiraa. Auê ïa haamaitairaa taa ê mau e! Te tiaturi papu nei au e e ô mau â te Haapiiraa no Gileada no ǒ mai ia Iehova ra, e ô i fanaˈohia e ta ˈna faanahonahoraa ite-mata-hia taatoa.
I Brooklyn, ua fanaˈo te mau pǔpǔ no Gileada i te tahi mau mea aita te feia haapii o te mau pǔpǔ na mua ˈtu i ite. Mea rahi aˈe te mau taeae orero manihini e mea piri roa te taairaa e te Tino Aratai e mea rahi te auhoaraa e te fetii o te Betela i te pu rahi. Ua nehenehe atoa te feia haapii e fanaˈo i te haapiiraa i te mau ohipa piha toroa, i te mau ohipa i te Betela, e i te mau tuhaa e rave rau o te ohipa neneiraa.
I te roaraa o te mau matahiti, ua taui noa te numera o te feia haapii e o te feia horoa i te haapiiraa. Ua taui atoa te vahi o te haapiiraa e rave rahi taime. I teie nei tei te hoê vahi nehenehe ïa i Patterson, i New York.
Te ohiparaa e te feia haapii
Mea oaoa mau â ia haapii i teie mau pǔpǔ! E mau taata apî aita e anaanatae ra i te rave i te mau mea i roto i te faanahoraa tahito. Ua vaiiho ratou i to ratou utuafare, to ratou mau hoa, to ratou fare, e te mau taata e paraparau ra i to ratou reo. E taui te ahuaraˈi, te maa—te mau mea atoa. Aita ratou i ite teihea fenua ratou e tonohia ˈi, ta ratou râ tapao o te riroraa ïa ei mitionare. Aita e faufaa ia turai i te mau taata mai teie.
Ia tomo vau i roto i te piha haapiiraa, e tamata noa vau i te tamǎrû i te feia haapii. Eita hoê taata e haapii maitai ia taiâ e ia haapeapea oia. Parau mau e na ˈu e haapii ia ratou, ua ite râ vau mai te aha te huru o te hoê taata haapii. Ua parahi na vau i nia i taua mau parahiraa ra na mua ˈˈe. Parau mau, ua rohi ratou no te haapii e rave rahi mau mea i Gileada, ua hinaaro atoa râ vau ia oaoa ratou.
Ua ite au e ia tonohia ratou i roto i ta ratou taviniraa, e hinaaro ratou i te tahi mau mea no te manuïa. E hinaaro ratou i te faaroo puai. E hinaaro ratou i te haehaa—te haehaa rahi. E tia ia ratou ia haapii i te vai afaro noa e te tahi atu mau taata, ia farii i te tahi mau tupuraa, ia faaore rahi i te hapa. E tia ia ratou ia tamau noa i te faaohipa i te hotu o te varua. E tia atoa ia ratou ia here i te taata e ia here i te ohipa no reira ratou i tonohia ˈi. Tera te mau mea ta ˈu i tutava noa i te haapapu maitai i te feia haapii i Gileada.
Aita mau â vau i ite ehia taata ta ˈu i haapii. Ua ite râ vau eaha to ˈu manaˈo ia ratou. I muri aˈe e pae avaˈe e o ratou i roto i te piha haapiiraa, e au roa vau ia ratou. I muri iho ia ite au ia ratou ia haere i mua e ia horoahia ta ratou mau parau tuite i te mahana faatuiteraa, ua ite au e ua faaoti ratou ma te manuïa i ta ratou haapiiraa e ua fatata ratou i te reva. E au mai te hoê pae o to ˈu utuafare o te haere ra. Nafea oe e ore ai e here i te feia i ineine i te horoa ia ratou e i te rave i te ohipa ta teie feia apî e haere e rave?
Tau matahiti i muri aˈe ia hoˈi mai ratou, e faaroo vau ia ratou ia faatia i to ratou mau oaoa i roto i te taviniraa, e mea na reira vau e ite ai e tei roto noa ratou i ta ratou taviniraa a rave ai i tei haapiihia ia ratou. Eaha to ˈu manaˈo? E manaˈo oaoa ïa.
Te hiˈoraa i mua nei
Ua mohimohi to ˈu mata i teie nei, e te ite ra vau i te mauruuru ore ta te reira e faatupu ra. Eita ta ˈu e nehenehe faahou e haapii i roto i te piha haapiiraa no Gileada. I te omuaraa, mea fifi roa ia taui, i roto râ i to ˈu oraraa ua haapii au i te farii i te mau tupuraa e i te haapaiuma i te reira. E manaˈo pinepine au i te aposetolo Paulo e i te ‘tara i roto i to ˈna tino.’ E toru taime to Paulo pureraa ia ora mai oia i taua mauiui rahi ra, ua na ô râ te Fatu ia ˈna e: “To ˈu nei maitai atire ïa ta oe: ei te paruparu e taa maitai roa ˈi to ˈu puai.” (Korinetia 2, 12:7-10) Ua ora noa Paulo e te reira. Mai te peu e ua nehenehe oia, e tia ia ˈu ia tamata. Noa ˈtu e aita faahou vau e horoa ra i te haapiiraa, te oaoa nei au i te mea e e nehenehe noa vau e ite i te feia haapii ia haere mai e ia haere atu i te mau mahana atoa. I te tahi mau taime, e paraparau vau ia ratou, e e oaoa to ˈu mafatu i te manaˈo i to ratou huru feruriraa maitai.
Mea faahiahia mau â ia feruri i te mau mea i mua nei. Te haamauhia ra i teie nei te hoê niu. E tuhaa rahi ta Gileada i rave. I muri aˈe i te ati rahi, ia tatarahia te mau otaro i faahitihia i roto i te Apokalupo 20:12, e itehia hoê tausani matahiti haapiiraa rahi atu â i te mau eˈa o Iehova. (Isaia 11:9) E ere râ te reira i te hopea. O te haamataraa noa râ. Mea rahi â te haapii no nia ia Iehova e mea rahi â te ohipa e rave ia ite tatou i ta ˈna mau opuaraa ia tupu. Te tiaturi papu nei au e e faatupu Iehova i ta ˈna mau opuaraa faahiahia, e te hinaaro nei au e tae i reira no te farii i te mau aratairaa a Iehova no tatou i reira.
[Hohoˈa i te api 26]
Te faatuiteraa i Gileada i te Yankee Stadium no New York i te matahiti 1953
[Hohoˈa i te api 26]
Gertrude, o vau, Kathryn, e Russell
[Hohoˈa i te api 26]
Te ohiparaa e N. H. Knorr (pae aui roa) e M. G. Henschel i roto i te faanahonahoraa i te tairururaa
[Hohoˈa i te api 26]
I roto i te piha haapurororaa WBBR
[Hohoˈa i te api 29]
I roto i te piha haapiiraa no Gileada
[Hohoˈa i te api 31]
E o Ann, aita i maoro roa aˈenei