Te riri i te nunaa ê e te haapaoraa

“I TO ˈu haereraa i Marite i te matahiti 1978, ua manaˈo vau e mea maoro to te fenua Marite faaafaroraa i to ˈna mau fifi o te riri i te nunaa ê e hoê â tiaraa tivila to te feia ereere,” ta Mark Mathabane ïa, papai buka i fanauhia i Afirika Apatoa, i parau i roto i te hoê uiuiraa manaˈo a te vea ra Time. “I roto i te mau tuhaa e rave rahi, ua ite au e e parau mau iho â. E au ra e to mua roa te fenua Marite i te fenua Afirika Apatoa. Ua ite au i muri iho ma te huru ê e aita te mafatu o te taata i taui roa.” Na te aha i faaite ia ˈna i teie tupuraa peapea?

“Hoê o te mau hora e ite-roa ˈˈe-hia ˈi te faataa-ê-raa i Marite, o te hora 11 i te poipoi ïa i te Sabati,” ta Mathabane ïa i parau. Ua ite oia e i roto atoa i te fare pure, eita te taata e au e apiti i roto i te pureraa e vetahi ê no te tahi atu nunaa. “Eaha to ratou manaˈo i te tahi atu nunaa i te tahi atu mau mahana o te hebedoma?” ta ˈna ïa i ui. Ma te titau i te haapiiraa no te faatupu i te tauiraa, ua parau o Mathabane e: “Maoti te haapiiraa e farii ai oe i te aifaitoraa taatoa o te taata.”

Te farii ra te mau Ite no Iehova e o te haapiiraa te ravea, te poroi nei iho â râ ratou i te haapiiraa i niuhia i nia i te Parau a te Atua. Oia, e tauturu te Bibilia ia ratou ia haapaiuma i te mau fifi o te manaˈo ino i te nunaa ê—tae noa ˈtu i te mau fenua ua parare roa te riri rahi i te opu fetii. I te mau hebedoma atoa i roto i ta ratou mau Piha no te Basileia, e putuputu te mau taata o te mau nunaa e te mau fenua rau ia haapiihia ratou i te mau ture e te mau faaueraa tumu o te Parau a te Atua, te Bibilia. Aita e ohiraa moni i teie mau putuputuraa. E farii-popou-hia outou ia haere mai outou!