Faaitiraa i te ati o te aifaito-ore-raa

Fatata roa te Poiete i te afai mai i te aifaitoraa ta te mau taata e hiaai ra. A tiai noa ˈtu ai, e nehenehe tatou e rave i te tahi mau taahiraa avae no te faaiti mai i te ati o te aifaito-ore-raa o te haapeapea nei ia tatou e to tatou nei mau utuafare. Mai ta Nelson Mandela, te peretiteni tahito no Afirika Apatoa, i tapao, “na te ohipa ta tatou e manuïa i te rave, eiaha râ tei horoahia mai, e faataa ê ia tatou ia vetahi ê.”

UA HAAPAPU te aamu i ta ˈna mau parau. E rave rahi mau tane e mau vahine tei ore i fanaˈo rahi i to ratou fanauraa ra, ua manuïa râ ratou na roto i te faaohiparaa i ta ratou tufaa, o te faataa ê ïa ia ratou i te mau taata fanaˈo. I te tahi roa ˈˈe pae, ua haamâuˈa te feia i fanaˈo i to ratou fanauraa ra i ta ratou tufaa e aita ratou i manuïa i te faaohiparaa i ta tatou mau ravea.

A faaohipa maitai i ta outou tufaa!

Mea anaanatae roa na te mau Ite no Iehova e tauturu i te taata e noaa te hoê ite no nia i te mau opuaraa a te Atua na roto i te hoê haapiiraa Bibilia. Teie râ, ua ite ratou e no te taa maitai i te Bibilia, e tia i te taata ia ite i te taio. No taua tumu ra, ua haapii te mau Ite no Iehova i te mau ahuru tausani taata i te taio e te papai, na reira atoa e 23 000 taata (mai i ropu i te mau matahiti 1990) i roto noa i te hoê fenua no Afirika Tooa o te râ. No nia i te taviniraa totiale maere mau ta te mau Ite no Iehova e horoa ra, ua tapao te San Francisco Examiner e: “E tia ia outou ia hiˈo ia ratou ei feia huiraatira hiˈoraa maitai. E aufau oioi ratou i te mau tute, e rapaau i te feia maˈi, e e arai ratou i te ite ore i te taio.”

Hau atu â, ma te horoa i te hoê haapiiraa tamau no te oreroraa i te parau i mua i te taata, ua faaineine te mau Ite no Iehova i te mau hanere tausani taata ia riro mai ei mau taata orero aravihi, o te nehenehe e paraparau tahaa i mua i te taata. I rotopu i taua mau tausani taata ra, te vai ra te tahi e fifi to ratou na mua ˈˈe no te orero i te parau. A hiˈo na i te taata no Afirika Apatoa o te papai ra e: “Mea ino roa to ˈu uu e ua riro mai au ei taata mamahu, i te rahiraa o te taime, te tiaturi nei au e na vetahi ê e paraparau no ˈu. . . . I te taime a apiti ai au i te Haapiiraa o te Taviniraa Teotaratia e a tia ˈi au no te taio i te Bibilia i mua i te hoê pǔpǔ iti feia e faaroo ra . . . , ua rahi roa to ˈu uu aita ˈtura vau i nehenehe e faaoti i te tumu parau i roto i te taime faataahia. I muri aˈe i te putuputuraa ua horoa mai te [taeae aˈo] i te aˈoraa tano ma te mǎrû. Ua faaitoito o ˈna ia ˈu ia taio o vau anaˈe iho ma te reo puai. Ma te rave i te taime i tera e tera mahana, ua taio vau ma te reo puai i ta ˈu Bibilia e te vea ra Te Pare Tiairaa.” Ua maitai roa mai taua taata ra e e nehenehe o ˈna i teie nei e horoa i te oreroraa parau huiraatira i mua i te mau hanere, e te mau tausani atoa taata.

Te oaoaraa i te aifaitoraa i rotopu i te mau taeae

I te pae o te haapiiraa, te rapaauraa maˈi, e te tiaraa i te pae faanavairaa faufaa e totiale, mea taa ê roa te mau tupuraa i rotopu i te mau Ite no Iehova. Te faahohoˈa ra teie mau taa-ê-raa i te mau huru tupuraa tia ore o teie ao ta ratou e ora nei. Taa ê roa ra i te tahi atu mau pǔpǔ faaroo, ua faaore-roa-hia te mau fifi i te pae nunaa, totiale, e i te pae faanavairaa faufaa i rotopu ia ratou.

Ua faatupu ratou i te reira ma te horoa i te mea maitai roa ˈˈe i roto i te faaohiparaa i ta ratou i haapii i roto i te Bibilia. Te farii nei ratou ma to ratou mafatu taatoa i te mau faaueraa tumu o te Bibilia mai teie: “E ore hoi ta Iehova hiˈoraa e au i ta te taata; e hiˈo hoi te taata i te huru i rapae au aˈe, area o Iehova, e hiˈo ïa i te aau.” (Samuela 1, 16:7) “E ore te Atua e haapao i te huru o te taata. O tei mǎtaˈu ra ia ˈna, e o tei rave i te parau-tia i te mau fenua atoa ra, o te itehia mai ïa e ana.” (Ohipa 10:34, 35) “Eiaha roa te ino e tahoohia i te ino i te taata atoa nei. E haamanaˈo na i te mea maitai i te aro o te taata atoa nei. Peneiaˈe o te tia ra, e parahi hau noa outou i roto i te taata atoa nei.”—Roma 12:17, 18; a hiˈo atoa i te Timoteo 1, 6:17-19; Iakobo 2:5, 9.

Ma te farii maite i teie mau faaueraa tumu o te Bibilia tei turu i te tahoêraa, eita te mau Ite no Iehova e farii i rotopu ia ratou i te hoê noa ˈˈe faaiteraa i te aifaito-ore-raa niuhia i nia i te mau taa-ê-raa i te pae nunaa, totiale, aore ra i te pae faanavairaa faufaa. Ei hiˈoraa, aita to taua mau ohipa ra e tuhaa i roto i te faaotiraa o vai te nehenehe e amo i te hopoia o te taviniraa i roto i te amuiraa Kerisetiano. E horoa-noa-hia te mau toroa, mai te haapiiraa aore ra te tiaauraa, i nia i te niu o te mau aravihi i te pae varua.—Timoteo 1, 3:1-13; Tito 1:5-9.

No te feia tei mauiui i raro aˈe i te mau aifaito-ore-raa o te hoê ao pae tahi, auê te haumǎrû e ia faariro vetahi ia ratou ei mau taeae e mau tuahine aifaito i mua i to ratou Poiete! E nehenehe ta Martina e haapapu i te reira. I muri aˈe i to to ˈna metua tane faarueraa i te utuafare, ua paari o ˈna i roto i te hoê utuafare veve e hoê metua. Ua tuu-noa-hia o ˈna i te hiti, aita o ˈna i tiaturi ia ˈna iho, e mea fifi mau no ˈna ia afaro e o vetahi ê. Ua faatupu o ˈna i te hoê haerea tâuˈa ore. Teie râ, ua taui te mau ohipa i muri aˈe i to ˈna haamataraa i te haapii i te Bibilia e i to ˈna riroraa mai ei Ite no Iehova. Te parau ra oia e: “E tia noâ ia ˈu ia aro i te mau manaˈo ino, i teie nei râ e nehenehe ta ˈu e faaruru maitai roa ˈtu â i te fifi. Ua maitai mai to ˈu faatura ia ˈu iho, e te paraparau nei au ma te tiaturi rahi. Ua haapii te parau mau ia ˈu ia amo i ta ˈu hopoia. I teie nei, te ite nei au e te here ra o Iehova ia ˈu e e tia iho â ia orahia te oraraa.”

Ei pǔpǔ Kerisetiano no te mau nunaa atoa, te oaoa nei te mau Ite no Iehova i roto hau atu i te 230 fenua i te hoê aifaitoraa otahi mau i roto i te ao i teie mahana. E nehenehe anei te tahi atu faanahonahoraa faaroo e parau atoa mai teie te huru e e haapapu i te reira?

Parau mau, e manaˈo tanotano to te mau Ite no Iehova. E faˈi iho â ratou e ei faahopearaa no te hoê tupuraa tia ore, eita ratou e nehenehe e tumâ i te aifaito-ore-raa o te taata mai ta vetahi ê i tamata i te roaraa o te mau senekele—e o tei ore hoi i manuïa. Noa ˈtu râ, te oaoa nei ratou, inaha, ua haa rahi ratou e ia iti mai teie fifi rahi i rotopu ia ratou iho. E ma te faaroo puai i te parau tǎpǔ a te Atua, te tiai nei ratou i te hoê ao apî parau-tia i reira te aifaito-ore-raa e riro ai ei ohipa tahito.

Oia mau, fatata roa te taatoaraa o te mau taata auraro i te faahoˈihia i roto i te aifaitoraa “i te pae o te tura e te mau tiaraa” ta to ratou Poiete i opua no ratou i te omuaraa ra. Auê ïa manaˈo nehenehe mau e! E i teie taime e riro te reira ei ohipa mau!

[Hohoˈa i te api 7]

E arai te mau Ite no Iehova i te ite ore i te taio ma te haapii i te mau ahuru tausani taata i te taio e te papai

[Hohoˈa i te api 8]

Te tauturu nei te parau mau o te Bibilia ia faaore i te mau fifi i te pae nunaa, totiale, e i te pae faanavairaa faufaa