Te eˈa otahi o te ora mure ore
“O vau te eˈa, e te parau mau, e te ora.”—IOANE 14:6.
1, 2. Ua faaau Iesu i te eˈa o te ora mure ore i te aha, e eaha te faufaaraa o ta ˈna faahohoˈaraa?
I ROTO i ta ˈna Aˈoraa tuiroo i nia i te Mouˈa, ua faaau Iesu i te eˈa o te ora mure ore i te hoê purumu e tomohia na roto atu i te hoê uputa. A tapao na e te haapapu ra Iesu e e ere teie eˈa e tae atu ai i te ora i te mea ohie, a parau ai e: “E tomo na te uputa pirihao; te atea nei hoi te uputa e te aano nei te eˈa e tae atu ai i te pohe; e e rave rahi tei na reira i te tomo. Te apǐapǐ râ o te uputa e te piri hoi o te eˈa e tae atu ai i te ora [mure ore], e te iti hoi o te feia i ite atu i te reira!”—Mataio 7:13, 14.
2 Te taa ra anei ia outou te faufaaraa o teie faahohoˈaraa? Aita anei teie e faaite maira e hoê noa purumu aore ra eˈa o te aratai i te ora e e titauhia te tutavaraa e itea mai ai te reira e e ore ai e turori i nia i taua eˈa o te ora ra e e faarue atu ai? Eaha ïa te eˈa otahi e tae atu ai i te ora mure ore?
Te hopoia a Iesu Mesia
3, 4. (a) Nafea te Bibilia e faaite ai i te hopoia faufaa a Iesu i roto i to tatou faaoraraa? (b) Afea to Iehova faaiteraa no te taime matamua e e nehenehe â e noaa faahou i te huitaata te ora mure ore?
3 Papu maitai, e hopoia rahi ta Iesu i te pae o taua eˈa ra, mai ta te aposetolo Petero i parau: “Aore roa hoi e ora ia vetahi ê, aita ˈtu hoi e iˈoa i faaitehia mai [maori râ to Iesu anaˈe] i te taata i raro aˈe i teie nei raˈi, e ora ˈi tatou nei.” (Ohipa 4:12) Ua parau atoa te aposetolo Paulo e: “Area te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.” (Roma 6:23) Ua faaite Iesu iho e te eˈa otahi e tae atu ai i te ora mure ore, mea na roto ïa ia ˈna, inaha teie ta ˈna i parau: “O vau te eˈa, e te parau mau, e te ora.”—Ioane 14:6.
4 No reira, mea faufaa roa ia farii tatou i te hopoia a Iesu no te horoa i te ora mure ore. E hiˈopoa maite anaˈe i ta ˈna hopoia. Ua ite anei outou afea to Iehova faaiteraa no te taime matamua e e nehenehe â e noaa faahou i te huitaata te ora mure ore? I muri noa mai ïa i to Adamu hararaa. E hiˈopoa anaˈe nafea te faanahoraa a Iesu Mesia ei Faaora o te huitaata, i te tohu-matamua-raahia.
Te huaai i tǎpǔhia
5. Nafea tatou e ite ai o vai te ophi i faahema ia Eva?
5 Ua faaite te Atua ra o Iehova na roto i te mau parau taipe o vai te Faaora i tǎpǔhia. Ua na reira oia i to ˈna faahitiraa i te utua i nia i “te ophi” tei paraparau ia Eva e tei tamata ia ˈna ia ore e faaroo i te Atua ma te amu i te maa i opanihia. (Genese 3:1-5) Parau mau, e ere teie i te hoê ophi mau. E varua puai oia tei faataahia i roto i te Bibilia mai “taua ophi tahito ra . . . o tei parauhia o te diabolo ra, e o Satani.” (Apokalupo 12:9) Ua faaohipa Satani i teie animala haehaa mai te hoê auvaha no te faahema ia Eva. A faautua ˈi oia ia Satani, teie ta te Atua i parau ia ˈna: “E tuu hoi au i te au ore e riri ai ra ia orua o te vahine, e to huaai, e to ˈna ra huaai; na ˈna [te huaai o te vahine] e haaparuparu i to afii, e na oe e haaparuparu i to ˈna poro avae.”—Genese 3:15.
6, 7. (a) O vai te vahine e amo ra i te “huaai”? (b) O vai te Huaai i tǎpǔhia, e eaha ta ˈna e rave ra?
6 O vai teie “vahine” e au-ore-hia aore ra e ririhia e Satani? Mai “taua ophi tahito ra” e faaitehia ra e o vai i roto i te Apokalupo pene 12, oia atoa te vahine e ririhia e Satani. I roto i te irava 1, te parauhia ra e ua “vehîhia [oia] i te mahana, e te marama i raro aˈe i tana avae, e e korona fetia tei nia i tana upoo hoê ahuru e ma piti.” E faataipe teie vahine i te faanahonahoraa a te Atua o te mau melahi haapao maitai i nia i te raˈi, e faataipe te “tamaroa” ta ˈna e horoa mai i te Basileia o te Atua, o Iesu Mesia te Arii.—Apokalupo 12:1-5.
7 O vai ïa te “huaai” o te vahine, ia au i te Genese 3:15, o te haaparuparu i te “afii” o Satani, a pohe roa ˈi oia? O te taata ïa ta te Atua i tono mai nia mai i te raˈi e ia fanau-semeio-hia e te hoê paretenia, oia hoi, te taata ra o Iesu. (Mataio 1:18-23; Ioane 6:38) Te faaite ra te Apokalupo pene 12 e ei Taata faatere i faatiahia i nia i te raˈi, e aratai e e upootia teie Huaai o Iesu Mesia i te aroraa ia Satani e e haamau oia mai ta te Apokalupo 12:10 e parau ra, i “te basileia o to tatou Atua, e te mana o ta ˈna ra Mesia.”
8. (a) Eaha te ohipa apî ta te Atua i faanaho no te faatupu i ta ˈna opuaraa tumu? (b) O vai te mau melo o te faatereraa apî a te Atua?
8 E ohipa apî teie Basileia i roto i te rima o Iesu Mesia ta te Atua i faanaho no te faatupu i ta ˈna opuaraa tumu ia fanaˈo te taata i te ora mure ore i nia i te fenua. I muri aˈe i te orureraa hau a Satani, ua faanaho oioi noa Iehova e faaore i te mau faahopearaa atoa o te ohipa ino na roto i te ravea o teie faatereraa apî oia hoi te Basileia. I to Iesu tiaraa mai i te fenua nei, ua faaite oia e e ere oia anaˈe te faatere i roto i teie Basileia. (Luka 22:28-30) E maiti-atoa-hia te tahi atu mau taata no roto mai i te huitaata no te apiti atu ia ˈna i roto i te faatereraa i nia i te raˈi, o ratou ïa te piti o te tuhaa o te huaai o te vahine. (Galatia 3:16, 29) Te horoa ra te Bibilia i te numera o teie feia e faatere e o Iesu—no roto anaˈe mai i te huitaata hara i te fenua nei—oia hoi 144 000.—Apokalupo 14:1-3.
9. (a) No te aha Iesu i titauhia ˈi ia haere mai i nia i te fenua ei taata? (b) Nafea to Iesu faaoreraa i te mau ohipa a te Diabolo?
9 Teie râ, hou teie Basileia e haamata ˈi i te faatere, mea titauhia ia haere mai te tuhaa matamua o te huaai, o Iesu Mesia, i nia i te fenua. No te aha? No te mea ua nominohia oia e te Atua ra o Iehova “ia haamou [aore ra ia faaore] oia i te ohipa a te diabolo ra.” (Ioane 1, 3:8) I roto i te mau ohipa a Satani, te vai ra te turairaa ia Adamu ia hara oia, o tei hopoi mai ïa i te faautuaraa o te hara e te pohe i nia i te mau tamarii atoa a Adamu. (Roma 5:12) Ua faaore Iesu i teie ohipa a te Diabolo na roto i te horoaraa i To ˈna ora ei taraehara. Inaha, ua horoa Iesu i te hoê niu no te faaora i te huitaata mai raro aˈe i te faautuaraa o te hara e te pohe e ua iriti oia i te eˈa e tae atu ai i te ora mure ore.—Mataio 20:28; Roma 3:24; Ephesia 1:7.
Ta te taraehara e faatupu ra
10. Nafea Iesu e o Adamu e aifaito ai?
10 I te mea e ua faataehia te ora o Iesu mai te raˈi mai i roto i te opu o te hoê vahine, ua fanauhia oia ei taata tia roa, aita i viiviihia e te hara a Adamu. E nehenehe ïa ta ˈna e ora e a muri noa ˈtu i nia i te fenua nei. Oia atoa, ua poietehia Adamu ei taata tia roa no te fanaˈo i te ora mure ore i nia i te fenua nei. Te haamanaˈo ra te aposetolo Paulo i te faaauraa i rotopu i na taata e piti i to ˈna papairaa e: “I hamanihia te taata matamua o Adamu ei taata ora; area te Adamu hopea [o Iesu Mesia], e [v]arua ora ïa. E repo te taata matamua, no te fenua; area te piti o te taata, o te Fatu ïa no te raˈi mai.”—Korinetia 1, 15:45, 47.
11. (a) Eaha te faahopearaa o te mau ohipa a Adamu e a Iesu i nia i te huitaata nei? (b) Nafea tatou ia hiˈo i te tusia o Iesu?
11 Te ite-atoa-hia ra te faaauraa i rotopu i na taata—na taata tia roa i taahi aˈenei i nia i te fenua nei—i roto i te Bibilia e parau ra e ua “horoa [Iesu] ia ˈna iho ei hoo [“aifaito,” MN] i te taata atoa.” (Timoteo 1, 2:6) Ua aifaito Iesu ia vai? Inaha hoi ia Adamu a vai tia roa ˈi oia! Te faahopearaa o te hara a te taata matamua ra o Adamu, te utua pohe ïa no te fetii taata atoa. Ua horoa mai te tusia o “te Adamu hopea” i te niu no te faaoraraa mai raro aˈe i te hara e te pohe, ia nehenehe tatou e ora e a muri noa ˈtu! Auê te tusia o Iesu i te faufaa mau e! Te parau ra te aposetolo Petero e: “Aore outou i hoohia i te mea e ino noa ra, mai te ario e te auro.” Aita, te faataa ra râ Petero e: “I te toto taoˈa râ o te Mesia ra, mai to te arenio ino ore e te maˈi ore.”—Petero 1, 1:18, 19.
12. Nafea te Bibilia e faataa ˈi i te faaoreraahia ta tatou utua pohe?
12 Te faataa ra te Bibilia ma te nehenehe mau nafea te utua pohe a te fetii taata e faaorehia ˈi ma te parau e: “E teie nei, mai te taata atoa i taea i te utua faahapa i te hara a te taata hoê ra [o Adamu], ua taea-atoa-hia te taata atoa i te tia ia ora, i te parau-tia [te haerea taiva ore o Iesu e tae noa ˈtu i to ˈna poheraa] a te taata hoê ra. Mai te taata atoa hoi e rave rahi i faarirohia ei taata hara i te haapao ore o te taata hoê ra [o Adamu], e rave rahi hoi tei faarirohia ei taata parau-tia, i te haapao o te taata hoê ra [o Iesu].”—Roma 5:18, 19.
Te hoê tiaturiraa hanahana
13. No te aha e rave rahi e manaˈo ai i ta ratou e rave no nia i te ora mure ore?
13 Ia oaoa roa tatou i teie faanahoraa a te Atua, e tia ˈi! Aita anei outou e putapû ra i te mea e ua horoahia mai te hoê Faaora? I to ratou aniraahia, “Mea anaanatae anei na outou te manaˈo e ora e a muri noa ˈtu?” i roto i te hoê uiuiraa manaˈo i ravehia e te hoê vea i te hoê oire rahi Marite, e 67,4 % o te feia i pahono tei parau, “Eita.” No te aha ratou i parau ai e eita ratou e hinaaro e ora e a muri noa ˈtu? Papu maitai no te mea e te faaauhia ra te oraraa i nia i te fenua i teie nei i te mau fifi e rave rahi. Ua parau te hoê taata e: “Aita vau e hinaaro ra ia au to ˈu mata i te mata ruau e 200 matahiti.”
14. No te aha te ora mure ore e riro ai ei oaoaraa rahi?
14 Teie râ, aita te Bibilia e parau ra e e ora tatou e a muri noa ˈtu i roto i te hoê ao i reira te taata e pohehia ˈi i te maˈi, e ruauhia ˈi e e farerei ai i te tahi atu â mau fifi. Aita, no te mea e faaore Iesu na roto i to ˈna tiaraa Faatere o te Basileia o te Atua, i teie mau fifi atoa i faatupuhia e Satani. Ia au i te Bibilia, “e hope roa hoi” te mau faatereraa haavî atoa o teie nei ao “i te parari e e pau” i te Basileia o te Atua. (Daniela 2:44) I reira, ei pahonoraa i te pure ta Iesu i haapii atu i ta ˈna mau pǐpǐ, e ‘tupu ai te hinaaro [o te Atua] i te fenua nei mai tei te raˈi atoa ra.’ (Mataio 6:9, 10, Today’s English Version) I roto i te ao apî a te Atua, i muri aˈe a tamâhia ˈi te fenua i te mau mea ino atoa, e faaohipa-taatoa-hia te mau maitai o te taraehara o Iesu. E faahoˈihia te taata atoa e au i te oraora-maitai-raa tia roa!
15, 16. Eaha te mau tupuraa e itehia i roto i te ao apî a te Atua?
15 No te feia e ora i roto i te ao apî a te Atua, e au ia ratou teie irava Bibilia: “E rahi hoi te poria o to ˈna ra tino i to te tamarii; e hoˈi oia i tana apîraa ra.” (Ioba 33:25) E tupu atoa te tahi atu tǎpǔ a te Bibilia: “Ei reira e faaaraarahia ˈi te mata o te matapo ra, e amaha hoi te tariˈa o te feia tariˈa turi ra: ei reira te pirioi e ouˈauˈa noa ˈi mai te aili, e himene mai hoi te vaha o te taata vava ra.”—Isaia 35:5, 6.
16 A feruri noa na: Noa ˈtu eaha to tatou faito matahiti, e 80 anei, e 800 anei, aore ra e hau atu, e vai oraora maitai noa to tatou mau tino. E riro mai tei tǎpǔhia e te Bibilia: “E ore hoi to reira e parau e, Ua paruparu vau i te maˈi.” I reira e tupu atoa ˈi teie tǎpǔ: “E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Isaia 33:24; Apokalupo 21:3, 4.
17. Eaha te mau ohipa ta tatou e manaˈo e rave te taata i roto i te ao apî a te Atua?
17 I roto i taua ao apî ra, e nehenehe ta tatou e faaohipa i to tatou roro faahiahia ia au i ta to tatou Poiete i hinaaro i to ˈna opuaraa i te reira ma te mau ravea otia ore no te haapii. A feruri noa na i te mau mea faahiahia atoa ta tatou e nehenehe e rave! Ua hamani te mau taata tia ore i te mau mea atoa e haaati ra ia tatou—te mau niuniu paraparau mea taˈitaˈi noa, te mau micro, te mau uati, te mau radiomessageur, te mau matini roro uira, te mau manureva, oia te mau mea atoa ua ite outou te iˈoa—maoti te mau mea e vai ra i roto i te repo fenua. Aita hoê aˈe o teie mau tauihaa i hamanihia i te mau mea ta ratou i hopoihia mai mai te hoê vahi atea roa i roto i te ao materia. Ma te ora mure ore i mua ia tatou, aita ïa e otia to te aravihi no te hamani i te mau tauihaa i roto i te Paradaiso i te fenua nei!—Isaia 65:21-25.
18. No te aha e ore roa ˈtu te oraraa e riro ei mea haumani i roto i te ao apî a te Atua?
18 E eita te oraraa e riro ei mea haumani. E tiai ru noa tatou i te taime tamaaraa, noa ˈtu e ua tamaa aˈena tatou tau ahuru tausani taime. Ei taata tia roa, e fanaˈo tatou i nia i te hoê faito teitei roa i te mau hotu maitatai o te Paradaiso i te fenua nei. (Isaia 25:6) E e oaoa tatou e a muri noa ˈtu i te atuaturaa i te mau animala e rave rahi i nia i te fenua e te fanaˈoraa i te mau mairiraa mahana nehenehe mau, te mau mouˈa, te mau anavai e te mau faa. Oia mau, eita te oraraa e riro ei mea haumani i roto i te ao apî a te Atua!—Salamo 145:16.
Te faaîraa i te mau titauraa a te Atua
19. No te aha mea tano ia tiaturi e te vai ra te mau titauraa no te fanaˈo i te ô o te ora a te Atua?
19 E manaˈo anei outou e e horoa noa mai te Atua i te ora mure ore i roto i te Paradaiso ia ore tatou ia rave i te hoê noa ˈˈe mea? E ere anei i te mea tano ia titau mai te Atua i te hoê ohipa ia tatou? Papu maitai e oia. Oia mau, eita te Atua e taora noa mai i te ô ia tatou ra. Te pûpû maira oia i te reira, e tia râ ia tatou ia faaitoito i te rave i te reira. E titauhia te tutavaraa. Peneiaˈe e ui outou i te uiraa iho ta te taurearea apî taoˈa rahi ra i ui atu ia Iesu: “Eaha ta ˈu ohipa maitai e rave e noaa ˈi te ora mure ore ia ˈu?” Aore ra e ui paha outou mai te tiai i te fare tapearaa no Philipi i ui atu i te aposetolo Paulo: “Eaha [“te tia ia ˈu ia rave,” MN] e ora ˈi au?”—Mataio 19:16; Ohipa 16:30.
20. Eaha te hoê titauraa faufaa no te ora mure ore?
20 I te po hou oia a pohe ai, ua faahiti Iesu i te hoê titauraa tumu i to ˈna pureraa i to ˈna Metua i te raˈi: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) E ere anei i te hoê titauraa tano ia noaa ia tatou te ite no nia ia Iehova, oia i faanaho i te ora mure ore, e no nia i tei pohe no tatou, o Iesu Mesia? Te titauhia ra râ hau atu â i te noaaraa mai taua ite ra.
21. Nafea tatou e faaite ai e te faaî ra tatou i te titauraa e faaohipa i te faaroo?
21 Te na ô atoa ra te Bibilia e: “O tei faaroo i te Tamaiti ra e ora mure ore to ˈna.” Te parau faahou ra oia e: “O tei ore i faaroo i te Tamaiti ra, e ore oia e ite i te ora; te vai ra ïa te riri o te Atua i nia iho ia ˈna.” (Ioane 3:36) E nehenehe outou e faaite e te faaohipa ra outou i te faaroo i roto i te Tamaiti na roto i te raveraa i te mau tauiraa i roto i to outou oraraa e te faaauraa ˈtu i te reira i nia i te hinaaro o te Atua. E tia ia outou ia faarue i te mau haerea ino atoa ta tatou i pee na e e opua ˈtu ai e rave i te mauruuruhia e te Atua. E tia ia outou ia faaroo i te faaueraa a te aposetolo Petero: “E teie nei, e tatarahapa outou, e e fariu mai, ia paraihia ta outou hara, ia itea mai te anotau haumâru no ǒ mai i te aro o [“Iehova,” MN] ra.”—Ohipa 3:19.
22. Eaha te mau ohipa e titauhia no te pee i te mau taahiraa avae o Iesu?
22 Ia ore roa ˈtu ia moehia ia tatou e mea na roto noa i te faaohiparaa i te faaroo i roto ia Iesu e fanaˈo ai tatou i te ora mure ore. (Ioane 6:40; 14:6) E faaite tatou e te faaohipa ra tatou i te faaroo i roto ia Iesu na roto i te ‘pee-maite-raa i to ˈna mau taahiraa avae.’ (Petero 1, 2:21) Eaha te titauhia i roto i te pee-maite-raa ia Iesu? Inaha, i roto i te hoê pure i te Atua, ua parau Iesu e: “Teie au, e tau Atua, te haere nei au e faatia i to oe hinaaro.” (Hebera 10:7) No te pee i te hiˈoraa o Iesu, mea faufaa ia hinaaro mau outou e haapao i te hinaaro o te Atua e e pûpû i to outou ora no Iehova. I muri aˈe, mea titauhia ia faataipe outou i taua pûpûraa ra na roto i te bapetizoraa i roto i te pape; ua haere atoa Iesu iho ia bapetizohia oia. (Luka 3:21, 22) E mea tano roa ia rave i teie mau taahiraa avae. Ua parau te aposetolo Paulo e “te faahepo nei te here o te Mesia ia tatou.” (Korinetia 2, 5:14, 15, MN) Nafea? Na te here i turai ia Iesu ia horoa i to ˈna ora no tatou. Eita anei teie e faahepo ia tatou ia farii atu i te reira na roto i te faaohiparaa i te faaroo i roto ia ˈna? Oia, e faahepo te reira ia tatou ia pee i to ˈna hiˈoraa î i te here ma te horoa ia ˈna iho no te tauturu ia vetahi ê. Ua ora te Mesia no te rave i te hinaaro o te Atua; e tia ia tatou ia na reira atoa, eiaha e ora faahou no tatou.
23. (a) Ia amuihia te feia e fanaˈo i te ora i te aha? (b) Eaha te titauhia i te feia i roto i te amuiraa Kerisetiano?
23 E ere teie te taahiraa avae hopea. Te parau ra te Bibilia e a bapetizohia ˈi na 3 000 i te Penetekose 33 T.T., ua “amui-atoa-hia” ratou. Ua amui-atoa-hia i te aha? “Mau papu maite atura ratou i ta te mau aposetolo i haapii ra, e te amui-maite-raa,” ta Luka ïa e faataa ra. (Ohipa 2:41, 42) Oia, te putuputu ra ratou no te haapii i te Bibilia e no te amuimui te tahi i te tahi, no reira, ua amuihia ˈtu ïa ratou i te amuiraa Kerisetiano, aore ra ua riro mai ratou ei melo no te reira. Ua haere tamau te mau Kerisetiano matamua i te mau putuputuraa no te fanaˈo i te haapiiraa i te pae varua. (Hebera 10:25) Te na reira atoa ra te mau Ite no Iehova i teie mahana, e te hinaaro nei ratou e faaitoito ia outou ia haere i taua mau putuputuraa ra e o ratou.
24. Eaha “te ora mau,” e nafea e afea te reira e tupu ai?
24 E mau mirioni taata teie e pee nei i te eˈa pirihao e aratai i te ora. E titauhia te tutavaraa no te faaea i nia i teie eˈa pirihao! (Mataio 7:13, 14) Ua faaite Paulo i te reira i roto i ta ˈna titauraa mahanahana: “Rohi hua oe i te rohiraa maitai ra i te faaroo; e haru i te ora mure ore, i parauhia ˈi hoi oe na.” Mea faufaa taua rohiraa ra no te “tapea papu i te ora mau, MN.” (Timoteo 1, 6:12, 19) Taua ora mau ra, e ere ïa teie oraraa nei î i te oto e te mauiui, i noaa mai na roto i te hara a Adamu. E ere, o te oraraa râ i roto i te ao apî a te Atua e fatata roa i te tupu ia faaohipahia te mau maitai o te tusia taraehara a te Mesia i nia i te feia atoa e here i te Atua ra o Iehova e ta ˈna Tamaiti i muri aˈe a haamouhia ˈi teie faanahoraa o te mau mea. Ia maiti ïa tatou paatoa i te ora—“te ora mau”—te ora mure ore i roto i te ao apî hanahana a te Atua.
Nafea outou ia pahono?
◻ O vai te ophi, te vahine, e te huaai i roto i te Genese 3:15?
◻ Nafea Iesu i te aifaitoraa e o Adamu, e eaha ta te hoo i haamanuïa?
◻ Eaha ta outou e nehenehe e tiaturi e riro te ao apî a te Atua ei mea oaoa no outou?
◻ Eaha te mau titauraa e tia ia tatou ia faaî no te ora i roto i te ao apî a te Atua?
[Hohoˈa i te api 10]
No te feia apî e te feia ruhiruhia, o Iesu te eˈa otahi o te ora mure ore
[Hohoˈa i te api 11]
I te taime i faataahia e te Atua, e hoˈi te ruhiruhia i to ˈna apîraa