Te haamaitairaa a Iehova i nia i to tatou “fenua”

“E ora hoi te mau mea atoa i tahehia e taua pape ra.”—EZEKIELA 47:9.

1, 2. (a) Eaha te faufaaraa o te pape? (b) Te faahohoˈa ra te pape o te orama a Ezekiela i te aha?

E TAOˈA faahiahia roa te pape. Ua taaihia te oraraa atoa i te pae tino i te reira. Eita hoê aˈe o tatou e nehenehe e ora maoro aita e pape. E hinaaro atoa tatou i te reira no te tamâraa, i te mea e nehenehe te pape e faatahe e e horoi i te mau mea viivii. Oia, e horoi tatou i to tatou tino, to tatou ahu, e ta tatou maa i te pape. E nehenehe teie ohipa e faaora ia tatou.

² E faaohipa te Bibilia i te pape no te faahohoˈa i te mau faanahoraa pae varua a Iehova no te ora. (Ieremia 2:13; Ioane 4:7-15) I roto i taua mau faanahoraa ra, te vai ra te tamâraa i to ˈna nunaa na roto i te tusia taraehara o te Mesia e te ite i te Atua e vai ra i roto i ta ˈna Parau. (Ephesia 5:25-27) I roto i te orama a Ezekiela no nia i te hiero, e faataipe te anavai e tahe semeio mai na roto mai i te hiero i teie mau haamaitairaa o te horoa i te ora. Afea râ teie anavai e tahe mai ai, e eaha te auraa no tatou i teie mahana?

Te hoê anavai e tahe i roto i te hoê fenua i faanaho-faahou-hia

3. Eaha ta Ezekiela i ite ia au i te Ezekiela 47:2-12?

³ Ei tîtî i Babulonia, te hinaaro rahi ra te nunaa o Ezekiela i te mau faanahoraa a Iehova. Auê ïa faaitoitoraa no Ezekiela te iteraa i te pape i te fauraraa mai na roto mai i te vahi haamoriraa e te taheraa mai i rapae i te hiero o te orama! Te faito ra te hoê melahi i te anavai i te mau roaraa 1 000 kubiti atoa. E maraa noa to ˈna hohonuraa mai te momoa avae e tae atu i te turi e i te tauupu e i muri iho, e riro roa mai ei tahora e titau ia ǎu i roto. E horoa mai te anavai i te ora e te hotu maitai. (Ezekiela 47:2-11) Ua faaitehia Ezekiela e: “I nia iho i taua hiti pape ra, i teie paeau e tera paeau, e tupu ai te mau raau atoa nei ei maa.” (Ezekiela 47:12a) A tae atu ai te tahora i roto i te Miti Pohe—te hoê roto pape oraora ore—e hoˈi faahou mai te ora! E rahi roa mai te iˈa. E tere maitai te hoê ohipa ravaai.

4, 5. Nafea te parau tohu a Ioela no nia i te hoê anavai e tuea ˈi e ta Ezekiela, e no te aha e mea faufaa te reira?

⁴ Ua faahaamanaˈo paha teie parau tohu nehenehe mau i te mau ati Iuda e faatîtîhia ra i te tahi atu parau tohu i papaihia e piti senekele hau na mua ˈˈe. “E pihaa mai hoi te hoê pape i te fare o Iehova, e papehia ihora te peho ra o Sitima.”a (Ioela 3:18) Te faaite atea ra te parau tohu a Ioela, mai ta Ezekiela, e e tahe mai te hoê anavai na roto mai i te fare o te Atua, te hiero, e e hopoi mai i te ora i te hoê fenua pâpâmǎrô.

⁵ Mea maoro aˈenei to Te Pare Tiairaa faataaraa e e tupu te parau tohu a Ioela i to tatou nei tau.b Oia atoa ïa no te orama hoê huru a Ezekiela. I roto i te fenua i faanaho-faahou-hia o te nunaa o te Atua i teie mahana, mai i Iseraela i tahito ra, ua tae rahi mai te mau haamaitairaa a Iehova.

Te mau haamaitairaa rahi

6. Ua faahaamanaˈo te pîpîraa i te toto i nia i te fata o te orama i te mau ati Iuda i te aha?

⁶ Nohea mai te mau haamaitairaa i noaa i te nunaa o te Atua i faanaho-faahou-hia? A tapao na e te tahe ra te pape na roto mai i te hiero o te Atua. Oia atoa i teie mahana, no ǒ mai te mau haamaitairaa ia Iehova ra na roto mai i to ˈna hiero rahi pae varua—oia hoi te faanahoraa no te haamoriraa viivii ore. Te vai ra te tahi atu â parau faufaa i roto i te orama a Ezekiela. I roto i te aua i roto mai, e tahe mai te anavai na pihai iho i te fata, i te pae apatoa noa. (Ezekiela 47:1) Tei ropu mau te fata i te hiero o te orama. Te faataa papu ra Iehova ia Ezekiela i te reira e te faaue ra oia ia ˈna e pîpî i te toto o te hoê tusia i nia iho. (Ezekiela 43:13-18, 20) Mea faufaa roa taua fata ra no te mau ati Iseraela atoa. Ua haamanahia ta ratou faufaa e o Iehova mea maoro aˈenei i to Mose pîpîraa i te toto i nia i te hoê fata i raro i te Mouˈa Sinai. (Exodo 24:4-8) Eita e ore e ua faahaamanaˈo te pîpîraa i te toto i nia i te fata o te orama ia ratou e ia hoˈi ratou i to ratou fenua e faanaho-faahou-hia, e tae rahi mai te mau haamaitairaa a Iehova ia tamau noa ratou i te haapao maitai i ta ratou faufaa e o ˈna.—Deuteronomi 28:1-14.

7. Eaha te faufaaraa o te fata taipe no te mau Kerisetiano i teie mahana?

⁷ Oia atoa, te haamaitaihia ra te nunaa o te Atua i teie mahana na roto i te hoê faufaa—te hoê faufaa maitai aˈe, te faufaa apî. (Ieremia 31:31-34) Ua haamana-atoa-hia te reira mea maoro aˈenei i te toto, te toto o Iesu Mesia. (Hebera 9:15-20) I teie mahana, mea faufaa roa te fata taipe no tatou, noa ˈtu e e pǐpǐ faatavaihia tatou e e taata tufa i roto i taua faufaa ra, aore ra e mamoe ê atu o te haamaitaihia i te reira. E faataipe te reira i te hinaaro o te Atua no nia i te tusia o te Mesia. (Ioane 10:16; Hebera 10:10) Mai te fata taipe e vai ra i ropu mau i te hiero pae varua, mea faufaa roa te tusia taraehara o te Mesia i roto i te haamoriraa viivii ore. O te niu te reira no te faaoreraa i ta tatou mau hara e oia atoa ïa no to tatou tiaturiraa no a muri aˈe. (Ioane 1, 2:2) No reira tatou e tutava ˈi i te ora ia au i te ture o te faufaa apî, “te ture a te Mesia ra.” (Galatia 6:2) Ia tamau noa tatou i te na reira, e fanaˈo ïa tatou i te mau faanahoraa a Iehova no te ora.

8. (a) Eaha te erehia ra i roto i te aua i roto mai o te hiero o te orama? (b) Nafea te mau tahuˈa e horoi ai ia ratou i roto i te hiero o te orama a Ezekiela?

⁸ Hoê o taua mau faanahoraa ra, o te hoê ïa tiaraa viivii ore i mua ia Iehova. I roto i te hiero o te orama, te erehia ra te hoê tauihaa i roto i te aua i roto mai e vai maite ra hoi i roto i te aua o te sekene e o te hiero a Solomona—te hoê ïa farii-vai rahi, i parauhia i muri iho te hoê miti, ei horoiraa na te mau tahuˈa. (Exodo 30:18-21; Paraleipomeno 2, 4:2-6) Nafea ïa te mau tahuˈa e horoi ai ia ratou i roto i te hiero o te orama a Ezekiela? I roto ïa i te anavai e tahe semeio ra na roto mai i te aua i roto mai! Oia mau, e haamaitai Iehova ia ratou i te fanaˈoraa i te hoê tiaraa viivii ore, aore ra moˈa.

9. Nafea te feia i faatavaihia e te feia rahi roa e fanaˈo ai i te hoê tiaraa viivii ore i teie mahana?

⁹ Oia atoa, i teie mahana, ua haamaitaihia te feia i faatavaihia i te hoê tiaraa viivii ore i mua ia Iehova. E hiˈo Iehova ia ratou ei feia moˈa, a faariro ai ia ratou ei feia tia. (Roma 5:1, 2) Eaha ïa no nia i te feia rahi roa i faahohoˈahia e te mau opu e ere i to te opu tahuˈa? Te haamori ra ratou i roto i te aua i rapae mai, e te tahe atoa ra taua noâ anavai ra na te reira tuhaa o te hiero o te orama. Ua tano mau â ïa to te aposetolo Ioane iteraa i te feia rahi roa e ahu ra i te ahu teatea viivii ore a haamori ai ratou i roto i te aua o te hiero pae varua! (Apokalupo 7:9-14) Noa ˈtu eaha te mau hamani-ino-raa i farereihia e ratou i roto i teie nei ao ino, e nehenehe ratou e papu e ia tamau noa ratou i te faaohipa i te faaroo i nia i te tusia taraehara o te Mesia, e hiˈo Iehova ia ratou ei feia mâ e te viivii ore. Nafea ratou e faaohipa ˈi i te faaroo? Na roto i te peeraa i te mau taahiraa avae o Iesu, e te tiaturi-roa-raa i te tusia taraehara.—Petero 1, 2:21.

10, 11. Eaha te hoê auraa faufaa o teie pape taipe, e nafea te reira e taai ai i te tahe-puai-raa mai te anavai?

¹⁰ Mai tei parau-aˈena-hia, te vai ra te tahi atu â auraa faufaa o teie pape taipe—te ite. I roto i te fenua no Iseraela i faanaho-faahou-hia, ua haamaitai Iehova i to ˈna nunaa i te haapiiraa i te mau Papai na roto i te arai o te pǔpǔ tahuˈa. (Ezekiela 44:23) Oia atoa, ua haamaitai Iehova i to ˈna nunaa i teie mahana i te haapiiraa rahi i ta ˈna Parau mau, na roto i te arai o te “autahuˈa arii.” (Petero 1, 2:9) Ua tae rahi mai i teie anotau hopea, te ite no nia i te Atua ra o Iehova, no nia i ta ˈna mau opuaraa no te huitaata, e no nia iho â râ ia Iesu Mesia e te Basileia o te Mesia. Auê ïa te faahiahia ia roaa mai teie anavai faahaumǎrûraa pae varua o te hohonu noa ˈtura!—Daniela 12:4.

¹¹ Mai te anavai ta te melahi i faito i haere noa ˈtu i te hohonuraa, oia atoa te mau haamaitairaa e rave rahi o te horoa i te ora no ǒ mai ia Iehova ra, ua maraa rahi ïa no te haamâha i te mau taata i tae rahi mai i roto i to tatou fenua pae varua i haamaitaihia. Te faaite ra te tahi atu parau tohu no nia i te faanaho-faahou-raa e: “E riro te mea iti haihai ei tausani; e o tei riirii ra e riro ei fenua itoito: na ˈu, na Iehova, e faatupu etaeta i te reira, i to ˈna tau.” (Isaia 60:22) Ua tupu teie mau parau—ua amui mai te mau mirioni taata i roto ia tatou i roto i te haamoriraa viivii ore! Ua faarahi Iehova i te “pape” no te feia atoa e fariu mai i nia ia ˈna. (Apokalupo 22:17) Te ara ra oia e ia opere ta ˈna faanahonahoraa i nia i te fenua nei i te mau Bibilia e te mau papai Bibilia na te ao atoa nei, na roto i te mau hanere reo. Ua faanaho-atoa-hia te mau putuputuraa e te mau tairururaa Kerisetiano na te ao nei, ia nehenehe te taatoaraa e fanaˈo i te mau pape o te parau mau mai te kerehe ra te ateate. Eaha te mau faahopearaa o teie mau faanahoraa i nia i te taata?

E hopoi mai te pape i te ora!

12. (a) No te aha te mau tumu raau o te orama a Ezekiela e nehenehe ai e faahotu rahi mai? (b) Te faahohoˈa ra teie mau tumu raau hotu maitai i teie anotau hopea i te aha?

¹² E hopoi mai te anavai o te orama a Ezekiela i te ora e te oraora-maitai-raa. I to Ezekiela iteraa e e tupu te mau tumu raau i te hiti anavai, teie tei parauhia ia ˈna: “E ore hoi to ˈna rau e oriorio, e ore hoi e pau ta ˈna maa . . . E riro hoi ta te reira e faahotu mai ei maa, e to ˈna rau ei rapaau maˈi ïa.” No te aha teie mau tumu raau e hotu rahi ai mai teie? “No te mea i na te vahi moˈa mai te reira pape i te taheraa mai.” (Ezekiela 47:12b) Te faahohoˈa ra teie mau tumu raau taipe i te mau faanahoraa atoa a te Atua no te faahoˈi faahou i te huitaata i te tia-roa-raa na roto i te arai o te tusia taraehara a Iesu. I te fenua nei i teie taime, te aratai ra te toea i faatavaihia i te opereraa i te maa e te rapaauraa maˈi pae varua. I muri aˈe a fanaˈo ai na 144 000 i ta ratou haamauruururaa i nia i te raˈi, e tamau noa te mau haamaitairaa o ta ratou taviniraa ei tahuˈa e ei arii apiti e te Mesia a muri aˈe e ia tae roa i te taime e ore roa ˈi te pohe no ǒ mai ia Adamu ra.—Apokalupo 5:9, 10; 21:2-4.

13. Eaha te faaoraraa i ravehia i to tatou nei tau?

¹³ E tahe atu te anavai o te orama i roto i te Miti Pohe a faaora ˈi i te mau mea atoa e raeahia ˈtu. Te faahohoˈa ra teie miti i te mau mea atoa e ati noa ˈˈe i pohe i te pae varua. E hoˈi rahi mai râ te ora “i te mau vahi atoa i tahehia e taua pape ra.” (Ezekiela 47:9) I teie atoa anotau hopea nei, ua ora mai te mau taata i te pae varua i te mau vahi atoa i taeahia e te pape ora. Te feia matamua i faaorahia mai teie, o te toea i faatavaihia ïa i te matahiti 1919 ra. Ua hoˈi faahou mai ratou i te ora pae varua mai roto mai i te huru ohipa ore, e au i te pohe. (Ezekiela 37:1-14; Apokalupo 11:3, 7-12) Ua taea-atoa-hia te tahi atu â feia pohe i te pae varua e taua mau pape ora ra mai reira mai, e ua ora mai ratou e, o ratou te feia rahi roa o te mau mamoe ê atu e tamau noa nei i te maraa e te here nei e te tavini nei ia Iehova. Fatata roa, e fanaˈo te feia e rave rahi e faatiahia mai i teie mau faanahoraa.

14. Te faahohoˈa maitai ra te ohipa ravaai tere maitai i te pae Miti Pohe i te aha i teie mahana?

¹⁴ E horoa mai te oraora-maitai-raa i te pae varua i te ohipa tere maitai. O te faahohoˈahia ïa e te ohipa ravaai tere maitai i nia i te pae miti i pohe na. Ua faaue Iesu i ta ˈna mau pǐpǐ e: “E faariro vau ia orua ei ravaai taata.” (Mataio 4:19) I te anotau hopea nei, ua haamata te ohipa ravaai i te haaputuputuraahia te toea i faatavaihia, aita râ i faaea i reira. Ua taeahia te mau taata no te mau nunaa atoa i te pape ora no ǒ mai i te hiero pae varua o Iehova, tae noa ˈtu i te haamaitairaa o te ite papu. I te mau vahi atoa i taeahia e te anavai, ua itehia te ora pae varua.

15. Na te aha e faaite e eita te taatoaraa e farii i te mau faanahoraa a te Atua no te ora, e eaha te faahopearaa no taua mau taata ra?

¹⁵ Parau mau, e ere te mau taata atoa te farii maite i te poroi ora i teie mahana; na reira atoa no te feia e faatiahia mai i te tau o te Faatereraa Tausani Matahiti a te Mesia. (Isaia 65:20; Apokalupo 21:8) Te parau ra te melahi e eita te tahi mau vahi o te miti e ora mai. E “faarirohia” taua mau vahi vari oraora ore ra “ei vairaa miti [“papaa,” MN].” (Ezekiela 47:11) I rotopu i te mau taata i to tatou nei tau, eita te taatoaraa i taeahia e te pape ora a Iehova, e farii i te reira. (Isaia 6:10) I Aramagedo, e faarirohia te feia atoa i maiti e vai pohe noa e te maˈi i te pae varua ei vairaa miti papaa, oia hoi e haamouhia ratou e a muri noa ˈtu. (Apokalupo 19:11-21) E nehenehe râ te feia i inu i teie pape ma te haapao maitai, e ora mai e e ite i te tupuraa hopea o teie parau tohu.

E tahe te anavai i roto i te Paradaiso

16. Afea e nafea te orama a Ezekiela no nia i te hiero e ite ai i to ˈna tupuraa hopea?

¹⁶ Mai te tahi atu mau parau tohu no nia i te faanaho-faahou-raa, e itehia te tupuraa hopea o te orama a Ezekiela no nia i te hiero i te tau o te Mileniuma. I reira, aita faahou te pǔpǔ tahuˈa i te fenua nei. “E riro râ ratou ei tahuˈa na te Atua e na te Mesia, e e hau to ratou [“ei mau arii,” MN] ia ˈna ra [i te raˈi] e ia hoê tausani i te matahiti.” (Apokalupo 20:6) E apiti atu teie mau tahuˈa i nia i te raˈi i te Mesia i roto i te faataeraa mai i te mau haamaitairaa taatoa o te tusia taraehara o te Mesia. I reira te huitaata parau-tia e faaorahia ˈi, e faahoˈi-faahou-hia ˈi i te tia-roa-raa!—Ioane 3:17.

17, 18. (a) Nafea te hoê anavai pape ora i te faataaraahia i roto i te Apokalupo 22:1, 2, e afea taua orama ra e tupu mau ai? (b) I roto i te Paradaiso, no te aha te anavai pape ora e tahe puai ai?

¹⁷ Oia mau, i reira te anavai pape ora e itehia ra e Ezekiela e tahe puai roa ˈˈe ai. I reira te parau tohu i roto i te Apokalupo 22:1, 2 e tupu mau ai: “Ua faaite maira te melahi ia ˈu i te hoê pape ora tahe ra, mai te kerehe ra te ateate, no roto mai i te terono o te Atua e to te Arenio ra. E tei ropu i te aroâ i taua oire ra, e tei te tahi pae pape, e te tahi pae pape, o te raau ora ïa i te tiaraa, hoê ahuru ma piti huru o te huero, hoê marama hoê hoturaa, e hope roa ˈˈe te mau marama atoa ra; e te rau o taua raau ra, ei faaora ïa i te mau fenua.”

¹⁸ I roto i te Mileniuma, e faaorahia te mau maˈi atoa—i te pae tino, te pae o te feruriraa, e te pae o te mau manaˈo hohonu. Ua faahohoˈa-maitai-hia te reira e te ‘faaoraraa i te mau fenua’ na roto i te mau tumu raau taipe. Auaa te mau faanahoraa e faaohipahia e te Mesia e na 144 000, ‘e ore to reira e parau e, Ua paruparu vau i te maˈi.’ (Isaia 33:24) E i reira te anavai e tahe puai roa ˈˈe ai. E tia i taua anavai ra ia aano mai e ia hohonu atu â no te haamâha i te mau mirioni, peneiaˈe te mau miria taata e faatiahia mai no te inu i teie pape ora viivii ore. E faaora te anavai o te orama i te Miti Pohe, a hopoi ai i te ora i te mau vahi atoa e tahehia e te pape. I roto i te Paradaiso, e ora roa mai te mau tane e te mau vahine i te pae tino, e faaorehia hoi te pohe no ǒ mai ia Adamu ra ia faaohipa ratou i te faaroo i nia i te mau haamaitairaa o te hoo e faataehia mai i nia ia ratou. Te tohu ra te Apokalupo 20:12 e e heheuhia te “mau otaro, MN” i te reira tau, o te horoa i te maramarama hau ia fanaˈo atoa te feia e faatiahia mai. Ma te peapea râ, e patoi te tahi pae i te faaoraraa, tae noa ˈtu i roto i te Paradaiso. O teie feia orure hau te feia e ‘faarirohia ei vairaa miti papaa’ o te haamouraa mure ore.—Apokalupo 20:15.

19. (a) Nafea te tufaraa i te fenua e tupu ai i roto i te Paradaiso? (b) Eaha te mea i roto i te Paradaiso ta te oire e faahohoˈa? (c) Eaha te auraa e tei te atea rii te oire i te hiero?

¹⁹ I te reira atoa tau e itehia ˈi te tupuraa hopea o te tufaraa i te fenua o te orama a Ezekiela. Ua ite Ezekiela i te fenua i tufa-maitai-hia; oia atoa, e nehenehe te Kerisetiano haapao maitai taitahi e papu e e parahiraa to ˈna, e tufaa to ˈna i roto i te Paradaiso. Oia atoa, ma te nahonaho maitai e haamâhahia te hinaaro e fanaˈo i te hoê fare e na tatou iho e faaea e e atuatu. (Isaia 65:21; Korinetia 1, 14:33) Ua faahohoˈa maitai te oire ta Ezekiela i ite i te faanahoraa no te tiaauraa ta Iehova i opua no te fenua apî. Eita te pǔpǔ tahuˈa i faatavaihia e faaea tino faahou mai i rotopu i te huitaata nei. Te reira ïa ta te orama e faaite maira na roto i te faataaraa e tei nia te oire i te fenua “o teie nei ao” mea atea rii i te hiero. (Ezekiela 48:15) Teie râ, a faatere ai na 144 000 e te Mesia i nia i te raˈi, e mau tia atoa to te Arii i te fenua nei. E faufaa-rahi-hia te mau taata ta ˈna e faatere i te aratairaa î i te here a te pǔpǔ o te raatira. Aita râ teie faatereraa i nia i te fenua, tei nia oia i te raˈi. E vai ïa te taata atoa i te fenua nei, tae noa ˈtu te pǔpǔ raatira, i raro aˈe i te Basileia a te Mesia.—Daniela 2:44; 7:14, 18, 22.

20, 21. (a) No te aha mea tano te iˈoa o te oire? (b) Eaha te mau uiraa te tia ia tatou ia uiui ua maramarama anaˈe ia tatou te orama a Ezekiela?

²⁰ A tapao na i te mau parau hopea a te tohu a Ezekiela: “E te iˈoa o taua oire ra mai taua mahana maira, Tei reira Iehova.” (Ezekiela 48:35) Aita teie oire e vai ra no te horoa i te puai aore ra te mana na te taata; aita atoa e vai ra no te haamau i te hinaaro o te taata. E oire teie no Iehova, e faaite ra i to ˈna feruriraa e ta ˈna huru raveraa ohipa î i te here e te manaˈo faito noa. (Iakobo 3:17) E horoa mai te reira i te haapapuraa mahanahana mau e e haamaitai Iehova i ta ˈna totaiete taata o te “fenua apî” i faanaho-maitai-hia e a muri noa ˈtu.—Petero 2, 3:13.

²¹ Eita anei tatou e anaanatae roa ia feruri tatou i te reira? E tia ïa ia uiui tatou taitahi e: ‘Eaha to ˈu huru i mua i te mau haamaitairaa faahiahia mau i faaitehia mai i roto i te orama a Ezekiela? Te paturu ra anei au ma te haapao maitai i te ohipa e ravehia ra e te mau tiaau î i te here, oia hoi te toea i faatavaihia e te mau melo o te pǔpǔ raatira no a muri aˈe? Ua faariro anei au i te haamoriraa viivii ore ei ohipa faufaa roa ˈˈe o to ˈu nei oraraa? Te haafaufaa mau ra anei au i te pape ora e tahe rahi maira i teie mahana?’ Ia tamau noa ïa tatou taitahi i te na reira e i te oaoa i roto i te mau faanahoraa a Iehova e a muri noa ˈtu!

[Nota i raro i te api]

Nafea outou ia pahono?

◻ Te faahohoˈa ra te pape e tahe ra na roto mai i te hiero i te aha?

◻ Eaha te faaoraraa ta Iehova i rave na roto i te anavai taipe, e no te aha te anavai i tahe puai ai?

◻ Te faahohoˈa ra te mau tumu raau i te hiti anavai i te aha?

◻ E faahohoˈa te oire i te aha i roto i te Faatereraa Mileniuma, e no te aha mea tano te iˈoa o te oire?

[Hohoˈa i te api 23]

Te faahohoˈa ra te anavai pape ora i te mau faanahoraa a te Atua no te ora