Te faatia ra te feia poro i te Basileia

Ua haamaitaihia te hoê imiraa i te Atua mau ra

I TE senekele 10 H.T.T., ua î roa te basileia o na opu e piti no Iuda i te haamoriraa hape. Teie râ, i roto i teie haamoriraa idolo rahi, te ora ra te hoê taata e mea tia to ˈna mafatu i mua i te Atua. O Iehosaphata to ˈna iˈoa. Ua parau te peropheta ra o Iehu no nia ia ˈna e: “Te vai ra . . . te parau maitai i roto ia oe ra, . . . [“ua faaineine oe i to oe mafatu no te imi i te Atua mau ra,” MN].” (Paraleipomeno 2, 19:3) Oia atoa i teie nei mahana, i teie tau “ati rahi,” e mau mirioni taata tei ‘faaineine i to ratou mafatu’ no te imi i te Atua mau ra o Iehova. (Timoteo 2, 3:1-5) Te haapapuhia ra te reira e te aamu i muri nei no Togo mai, i Afirika Tooa o te râ.

Ua haere Casimir i te haapiiraa Katolika e ua rave i ta ˈna fariiraa Euhari matamua i te ivaraa o to ˈna matahiti. I to ˈna naearaahia 14 matahiti, ua faarue atura o Casimir i te ekalesia. Ua turai te reira ia ˈna ia ora i roto i te mǎtaˈu no te mea ua manaˈo oia e te oreraa e haere i te oroa pureraa, e haere ïa oia i roto i te po auahi, aore ra i te vahi tamâraa hara.

I te fare haapiiraa, ua apiti atu o Casimir i te hoê pǔpǔ taurearea o te haapii ra i te Bibilia hoê taime i te hebedoma. Ua haamata atoa oia i te taio i te Bibilia o ˈna anaˈe. I te hoê taime, te taio ra oia i roto i te buka o te Apokalupo no nia i te hoê animala taehae riaria o tei aˈe mai raro mai i te moana. (Apokalupo 13:1, 2) I to ˈna aniraa ˈtu i te taata faatere i te pǔpǔ haapiiraa Bibilia no nia i te reira, ua pahonohia mai e e animala mau teie e e aˈe mau oia mai raro mai i te moana. Ua haapeapea teie faataaraa ia Casimir no te mea aita i atea ê to ˈna faaearaa i te Pae Ataranitita. Ua papu ia ˈna e tei rotopu oia i te feia matamua o te roohia e teie animala taehae.

Ua haamata o Casimir i te haaputu i ta ˈna moni ia nehenehe oia e horo i te pae apatoerau o te medebara no te ape i teie animala taehae. Ua faataa ˈtura oia i te hoê hoa haapiiraa no nia i ta ˈna opuaraa. Ei Ite no Iehova, ua haapapu to ˈna hoa haapiiraa ia ˈna e eita teie animala taehae mau e aˈe mai roto mai i te moana. I muri iti noa ˈˈe, ua titau-manihini-hia o Casimir i te mau putuputuraa i te Piha no te Basileia. Ua oaoa oia i te mau putuputuraa e ua haamata aˈera oia i te haere noa. Ua farii atoa oia i te hoê haapiiraa Bibilia i to ˈna fare.

A haere ai o Casimir i mua i roto i ta ˈna haapiiraa, ua haamata aˈera te patoiraa a te utuafare. Te faatupu ra to ˈna utuafare i te haamoriraa i te mau tupuna e te amu ra ratou i te iˈo animala tei ore i faatahehia te toto no roto mai i te mau tusia. I to Casimir patoiraa ma te faatura i te iˈo, ua haamǎtaˈuhia e ua anihia ia ˈna ia faarue i te fare. Ua faaea hau o Casimir, e aita te mau haamǎtaˈuraa i faatupuhia. Teie râ, i roto i na avaˈe e toru, teie huru iˈo anaˈe tei afaihia mai i te taime tamaaraa a te utuafare. Ua fifihia Casimir no te navai-ore-raa i te maa, ua faaoromai râ oia i te reira e te tahi atu mau fifi.

Ua tamau Casimir i te haere i mua i te pae varua e tae roa ˈtu i te pûpûraa ia ˈna e te bapetizoraa. I muri iho, ua nominohia oia ei tavini tauturu e ua haere oia i te maharaa o te pǔpǔ o te Haapiiraa faaineineraa no te Taviniraa i Togo. I teie nei, te oaoa nei oia i te raveraa i te ohipa i te amaa.

E, e parau mau te mau parau a te Arii ra o Davida i roto e rave rahi mau tupuraa: “Ia imi oe ia [Iehova] ra, e itea ˈtu oia e oe.”—Paraleipomeno 1, 28:9.

[Hohoˈa i te api 8]

Te oaoa nei Casimir (i te pae atau) i te raveraa i te ohipa i te amaa