O Tito—“Te hoê hoa rave ohipa no to outou maitai”

I TE tahi mau taime, ua tupu te tahi mau fifi i roto i te amuiraa Kerisetiano o te senekele matamua. E tia ia faatitiaifarohia te reira, e mea titauhia te itoito e te auraro. O Tito te hoê taata i manuïa i te faarururaa ˈtu i te mau tautooraa e rave rau. Ei taata i ohipa atoa e te aposetolo Paulo, ua rave o ˈna i te tahi mau tutavaraa papu no te tauturu ia vetahi ê ia rave i te ohipa ia au i te hinaaro o Iehova. No reira o Paulo i parau ai i te mau Kerisetiano no Korinetia e ua riro o Tito ‘ei hoa rave ohipa no to ratou maitai.’—Korinetia 2, 8:23, MN.

O vai hoi o Tito? Eaha ta ˈna i rave i roto i te faatitiaifaroraa i te mau fifi? Nafea tatou e faufaahia ˈi ia hiˈo tatou i to ˈna haerea?

Te parau no te peritomeraa

E Heleni peritome-ore-hia o Tito. (Galatia 2:3)a I te mea e ua parau o Paulo ia ˈna ‘ta ˈna tamaiti mau i [“roto i te faaroo hoê ra,” MN],’ ua riro paha o Tito ei hoê o te mau tamarii pae varua a te aposetolo. (Tito 1:4; a faaau e te Timoteo 1, 1:2.) Ua apee o Tito ia Paulo, ia Baranaba, e i te tahi atu mau taata no Anetiohia, no Suria, i to ratou haereraa ˈtu i Ierusalema i te area matahiti 49 T.T. no te tuatapapa i te parau no te peritomeraa.—Ohipa 15:1, 2; Galatia 2:1.

Ua parauhia e mai te taime i mârôhia ˈi te tauiraa o te faaroo a te mau Etene aore i peritomehia i Ierusalema, ua tamau noa o Tito i te faaite e e nehenehe te mau ati Iuda e te feia e ere i te ati Iuda e fanaˈo i te maitai o te Atua noa ˈtu e ua peritomehia ratou aore ra aita. Ua mârô te tahi mau melo o te amuiraa no Ierusalema i riro na ei Pharisea hou ratou a farii ai i te Kerisetianoraa e, e tia i te mau Etene i taui i te faaroo ia peritomehia ratou e ia haapao i te Ture, ua patoihia râ teie manaˈo. E riro te turairaa ia Tito e te mau Etene ia peritomehia ratou ei faahaparaa i te mea e ua taaihia te faaoraraa i te maitai rahi o Iehova e te faaroo i roto ia Iesu Mesia eiaha râ i te ohiparaa o te Ture. E faahaparaa atoa te reira i te mea e ua fanaˈo te mau Etene aore ra to te mau nunaa ěê, i te varua moˈa o te Atua.—Ohipa 15:5-12.

Tonohia i Korinetia

I te taime a afaro ai te parau no te peritomeraa, ua haamanahia o Paulo e o Baranaba no te poro atu i te mau nunaa. I te hoê â taime, ua tutava atoa raua i te haamanaˈo i te taata rii. (Galatia 2:9, 10) Oia mau, i to Tito faahiti-faahou-raa-hia i roto i te aamu faauruahia fatata e ono matahiti i muri iho, tei Korinetia o ˈna, inaha na Paulo i tono ia ˈna no te faanaho i te tahi ohiraa ô no te feia moˈa. I to Tito raveraa i teie ohipa, e au ra e, ua farerei o ˈna i te tahi atu huru tupuraa hepohepo mau.

Te faaite ra te episetole a Paulo i to Korinetia e ua papai na mua o ˈna “eiaha” ratou “e amui atu i te taiata.” E tia ia ˈna ia parau ia ratou e tiavaru i te hoê taiata i ore i tatarahapa i rotopu ia ratou. Oia mau, ua papai o Paulo i te hoê rata puai mau e “ma te roimata rahi hoi.” (Korinetia 1, 5:9-13; Korinetia 2, 2:4) Na roto i taua taime ra, ua tonohia o Tito i Korinetia no te apiti atu i roto i te ohiraa ô i faatupuhia i reira no te mau Kerisetiano veve no Iudea. Peneiaˈe, ua tono-atoa-hia o ˈna no te hiˈo i te huru o to Korinetia i mua i te rata a Paulo.—Korinetia 2, 8:1-6.

Eaha râ te huru o to Korinetia i mua i te aˈoraa a Paulo? No to ˈna hinaaro rahi i te ite, ua tono paha o Paulo ia Tito i Korinetia mai Ephesia ˈtu na nia i te Miti Égée, ma te faaueraa e faatae oioi mai i te parau faataa. Mai te peu e e oti teie ohipa hou te tere na te moana e faaea ˈi no te tau toetoe (ropuraa paha o te avaˈe Novema), e nehenehe ïa o Tito e haere i Teroa na nia i te pahi aore ra na nia i te purumu roa ˈˈe na Hellespont atu. Ua tae oioi paha o Paulo i te vahi farereiraa faanahohia i Teroa, no to te mau taata tupai auro râ faatupuraa i te tahi mau faahuehueraa, ua faarue o Paulo ia Ephesia na mua ˈˈe i te taime ta ˈna i faataa. I muri aˈe i te hoê tiairaa hepohepo i Teroa, ua itea mai ia Paulo e eita o Tito e haere mai na te pae moana mai. No reira Paulo i tutava ˈi i te haere avae atu ma te tiaturi e farerei ia ˈna i nia i te purumu. Ia tae atu oia i Europa, ua haere o Paulo na nia i te eˈa i parauhia Via Egnatia, e i te pae hopea ua farerei o ˈna ia Tito i Makedonia. Ua topa te hau o Paulo e ua oaoa aˈera oia i te mea hoi mea maitai roa te mau parau apî no Korinetia. Ua farii maitai te amuiraa i te aˈoraa a te aposetolo.—Korinetia 2, 2:12, 13; 7:5-7.

Noa ˈtu e ua haapeapea Paulo i te huru fariiraa e farereihia e ta ˈna i tono, ua tauturu te Atua ia Tito ia rave faahope oia i ta ˈna hopoia. Ua fariihia o Tito “ma te mǎtaˈu e te rurutaina.” (Korinetia 2, 7:8-15) Ei faaohiparaa i te mau parau a te taata tatara Bibilia W. D. Thomas: “E papu ia tatou e ma te ore e faaiti i te faahaparaa puai a Paulo ta [Tito] i paturu ma te aravihi e te mǎrû i mua i to Korinetia; ma te haapapu ia ratou e te haapeapea noa ra Paulo, na roto i ta ˈna mau parau, no to ratou maitairaa i te pae varua.” I te na reiraraa, ua tae roa o Tito i te here i te mau Kerisetiano no Korinetia no to ratou huru feruriraa auraro e ta ratou mau tauiraa manaˈo maitai. Ua riro to ratou haerea faahiahia ei faaitoitoraa no ˈna.

Eaha ˈtura ïa no te tahi atu tuhaa o te tere o Tito i Korinetia—te faanahoraa i te ohiraa ô no te feia moˈa i Iudea? Ua rave atoa o Tito i teie ohipa, mai ta te mau haamaramaramaraa i roto i te Korinetia 2 e faaite ra. Papu maitai e ua papaihia teie rata i Makedonia i te tau auhune o te matahiti 55 T.T., i muri noa ˈˈe i to Tito e o Paulo farereiraa. Ua papai o Paulo e ua faahoˈihia o Tito, o tei haamata i te ohiraa ô, e na tauturu e piti no te faahope roa i teie ohipa. No to ˈna anaanatae mau i to Korinetia, ua ineine noa o Tito i te hoˈi atu. A hoˈi ai Tito i Korinetia, mea papu e ua afai o ˈna i te piti o te rata faauruahia a Paulo i to Korinetia.—Korinetia 2, 8:6, 17, 18, 22.

E ere noa o Tito i te hoê taata faanaho aravihi, e taata râ oia o te nehenehe e poroihia e rave rahi mau ohipa i roto i te mau tupuraa fifi roa. E taata itoito oia e te paari e te aueue ore. Ua ite iho â o Paulo e e nehenehe o Tito e faaruru i te mau tautooraa o “te mau aposetolo rarahi atoa ra” no Korinetia. (Korinetia 2, 11:5) E haapapuhia teie huru o Tito i muri rii aˈe i roto i te mau Papai, i roto i te tahi atu ohipa teimaha.

I nia i te motu no Kereta

Mea papu e i roto i te area matahiti 61-64 T.T., ua papai o Paulo ia Tito, o tei tavini ra i nia i te motu Kereta i Mediteranea. Ua faarue o Paulo ia ˈna i reira no te “faanehenehe . . . i tei toe ra” e no te “faatoroa i te [“matahiapo,” MN] i te mau oire atoa ra.” Ua matau-noa-hia te rahiraa o to Kereta ei “haavare . . . e puaa ino, e arapoa rahi faatau ïa.” No reira i Kereta, e titau-faahou-hia o Tito ia ohipa ma te itoito e te aueue ore. (Tito 1:5, 10-12) E hopoia rahi roa teie no te mea na te reira e haapapu i te Kerisetianoraa no a muri aˈe i nia iho i te motu. Ma te faauruahia, ua tauturu o Paulo ia Tito na roto i te haapapuraa eaha te titauhia ra i te mau tiaau no a muri aˈe. Te reira noa râ te mau titauraa ia nominohia te mau matahiapo Kerisetiano.

Aita te mau Papai e faataa ra afea ra to Tito faarueraa ia Kereta. No to ˈna vai-maoro-raa i ǒ i ani ai Paulo ia ˈna e haapao i to Zena e to Apolo mau hinaaro, o tei faaea i reira i roto i to raua tere no te hoê taime aore i faataahia. Eita râ o Tito e faaea maoro roa i nia i te motu. Te opua ra o Paulo i te tono atu ia Aretema aore ra ia Tuhiko, e i muri iho e farerei atu o Tito ia Paulo i Nikopoli, peneiaˈe tei te pae apatoerau o Heleni teie nei oire tuiroo.—Tito 3:12, 13.

I roto i te faahitiraa poto hopea a te Bibilia no nia ia Tito, e haapii mai tatou e i te area matahiti 65 T.T. paha to Paulo tonoraa ia ˈna no te tahi atu ohipa. Ua aratai te reira ia ˈna i Dalematia, te tahi tuhaa fenua no te pae hitia o te râ o te Miti Adriatique i teie mahana o Croatie ïa. (Timoteo 2, 4:10) Aita i faaitehia mai eaha ta Tito i rave i reira, ua faahitihia râ e ua tonohia o ˈna no te faatitiaifaro i te tahi mau ohipa a te amuiraa e no te rave i te taviniraa mitionare. Mai te peu e te reira iho â, e ohipa o Tito ia au i te aravihi ta ˈna i faaite i Kereta.

E mauruuru rahi mau to tatou no te mau tiaau Kerisetiano paari mai ia Tito! E tauturu mai to ratou taa-maitai-raa i te mau faaueraa tumu a te Bibilia e to ratou itoito no te faaohipa i te reira, i te paruru i te maitairaa pae varua o te amuiraa. E pee anaˈe i to ratou faaroo e e riro anaˈe mai ia Tito ma te faahaere i mua i te mau faufaa pae varua a to tatou mau hoa faaroo.—Hebera 13:7.

[Nota i raro i te api]

[Hohoˈa i te api 31]

Ua riro o Tito ei hoa rave ohipa itoito no te maitai o te mau Kerisetiano no Korinetia e no te tahi atu mau vahi