Eaha te roo ta outou e amo ra?

I ROTO i te Bibilia, i te tahi taime, e au te taˈo ra “iˈoa” i te roo o te taata. Ei hiˈoraa, ua papai te Arii paari ra o Solomona e: “E maitai rahi to te iˈoa maitai i to te monoˈi hauˈa maitai ra; e te mahana e pohe ai ra i te mahana fanauraa.” (Koheleta 7:1; a faaau e te Maseli 22:1.) Ia au i te mau parau a Solomona, aita te hoê taata i fanauhia mai e te hoê roo maitai. I roto râ i te roaraa o to ˈna oraraa e roaa ˈi ia ˈna te hoê roo e auraa mau to ˈna. E faaite to ˈna iˈoa ia ˈna ia au i to ˈna iho mau huru, e taata horoa rahi anei oia aore ra e taata miimii, aroha anei aore ra mahanahana ore, haehaa aore ra teoteo, e taata parau-tia anei oia aore ra e taata ino.

E rave anaˈe na i te hiˈoraa o Davida. I te roaraa o ta ˈna faatereraa arii, ua haapapu oia i to ˈna paari e to ˈna aueue ore. I te hoê â taime, ua farii Davida ma te haehaa i to ˈna mau hapa e ua tatarahapa oia i ta ˈna mau hara ino mau. Ma te tumu papu, ua faataa te peropheta a Iehova e e “taata e au i to [te Atua] ra aau” o Davida. (Samuela 1, 13:14) Ua noaa aˈena i te taurearea ra o Davida te roo maitai i mua i te Atua.

I te tahi aˈe pae, ua faatupu te Arii no Iudea ra o Iehorama i te hoê roo ino no ˈna iho. Ua haafariu ê oia i to ˈna mau taata i te haamoriraa a Iehova e ua haapohe atoa oia i to ˈna e ono taeae e vetahi o te mau tamaiti hui arii o Iuda. I te pae hopea, ua tairi o Iehova ia Iehorama i te hoê maˈi mauiui mau o te aratai ia ˈna i te pohe. Te parau ra te Bibilia e “ua pohe hoi [Iehorama] ma te oto-ore-hia,” aore ra mai ta te Today’s English Version e faataa ra, “aita hoê noa ˈˈe taata i oto ia ˈna i pohe.”—Paraleipomeno 2, 21:20.

Te haapapu ra te oraraa o Davida e o Iehorama i te tano-mau-raa o te maseli Bibilia: “E haamaitaihia te feia parau-tia ia manaˈohia ra; area te iˈoa o te taata paieti ore ra, e tahuti ïa.” (Maseli 10:7) No reira, e tia ia tatou tataitahi ia feruri maite i te uiraa, ‘Eaha te roo ta ˈu e faatupu ra i mua i te Atua e i mua i to ˈu taata-tupu?’