A ara i te peu simonie!

E TAATA faatura-rahi-hia o Simona no Samaria i roto i to ˈna oire. Ua ora na oia i te senekele matamua o to tatou tau, e i te mea e ua putapû roa te feia i ta ˈna mau ohipa tahutahu i parau ai ratou no nia ia ˈna e: “O te mana rahi o te Atua ra teie nei taata.”—Ohipa 8:9-11.

I muri aˈe râ i to Simona riroraa ei Kerisetiano bapetizohia, ua itea aˈera ia ˈna te hoê mana hau aˈe i ta ˈna i faaohipa na mua ˈtu. O te mana ïa o te fanaˈohia ra e te mau aposetolo a Iesu, ia nehenehe ratou e pûpû atu i te mau ô semeio o te varua moˈa na vetahi ê. No to ˈna horuhoru rahi, ua pûpû atura o Simona i te moni na te mau aposetolo e ua ani oia e: “E ho mai atoa mai i tena na mana no ˈu, ia tuu vau i tau rima i nia iho i te taata ra, ia noaa mai te [v]arua [moˈa] ia ˈna.”—Ohipa 8:13-19.

Ua faahapa ˈtura Petero ia Simona, i te na ôraa e: “Ia reva atoa ˈtu ta oe moni e o oe atoa i te pohe, o oe i manaˈo e, e hoo na ta te Atua i horoa noa maira i te moni. Aita roa a oe faufaa i teie nei parau, aore roa i tia to oe aau i mua i te aro o te Atua ra.”—Ohipa 8:20, 21.

No roto mai i teie aamu Bibilia te taˈo ra “simonie,” i faataahia mai “te hara e hoo mai aore ra e hoo atu i te hoê tiaraa aore ra i te hoê haereraa i mua i roto i te ekalesia.” Te farii nei te New Catholic Encyclopedia e, mai te 9raa e tae atu i te 11raa o te senekele iho â râ “te ôraa mai te simonie i roto i te mau fare monahi, te mau ekalesiatiko, te mau epikopo, e i roto atoa i te mau Pâpa.” Te tapao nei te ivaraa o te neneiraa a te Encyclopædia Britannica (1878) e: “Te haapapu nei te hoê tuatapaparaa i te aamu o te mau apooraa a te Pâpa i te taata haapii e aitâ aˈenei e maitiraa aita i viiviihia i te simonie, e i roto i te rahiraa o te mau tupuraa ua riro na te simonie i faaohipahia i roto i te apooraa ei mea faufau roa, haama roa, e te mea ite-maitai-roa ˈˈe-hia.”

E tia i te mau Kerisetiano mau i teie mahana ia ara i te simonie. Ei hiˈoraa, e nehenehe paha vetahi e arue rahi aore ra e horoa rahi i te mau ô na te feia o te nehenehe e horoa rahi na ratou i te mau hopoia hau. I te tahi aˈe pae, e nehenehe te feia na ratou e horoa i taua mau huru hopoia ra e hiˈo paetahi i te feia o te nehenehe—e pinepine o te ineine—i te haamauruuru ia ratou i te mau ô. E simonie teie na tupuraa e piti, e te opani papu ra te mau Papai i taua huru haerea ra. Ua aˈo Petero ia Simona e: “E teie nei, e tatarahapa oe i taua hara na oe nei, e e pure i te Atua, peneiaˈe o te matara taua hara manaˈo aau na oe na [“teie opuaraa na oe iho,” New Jerusalem Bible]. Te hiˈo atu nei au ia oe mai te au avaava ra, e mai te mea ruuruuhia i te ino ra.”—Ohipa 8:22, 23.

Te vahi oaoa, ua ite Simona i te ino mau o to ˈna hinaaro tia ore. Ua taparu oia i te mau aposetolo e: “E pure orua [“ia Iehova,” MN] ia ˈu ia ore au ia roohia i ta orua i parau na.” (Ohipa 8:24) Ma te ara maite i te haapiiraa faufaa e vai ra i roto i taua tupuraa ra, e tia i te mau Kerisetiano mau ia ape i te mau peu simonie atoa.