O te faaoaoaraa ia Iehova ta ˈu tapitapiraa matamua
FAATIAHIA E THEODOROS NEROS
Ua matara taue noa to ˈu opani piha tapearaa, e ua tuô atura te hoê ofitie e: “O vai o Neros?” I to ˈu parauraa ˈtu e o vau, ua faaue maira oia ia ˈu e: “A tia i nia. E haere matou e haapohe ia oe.” Ua tupu te reira i roto i te hoê aua faehau i Korinetia, i Heleni, i te matahiti 1952. No te aha to ˈu ora i haamǎtaˈu-roa-hia ˈi? Na mua vau e faataa ˈtu ai i te reira, a vaiiho na ia ˈu ia faatia rii atu ia outou i to ˈu aamu.
I TE area matahiti 1925, ua farerei te Feia Haapii Bibilia (te iˈoa o te mau Ite no Iehova i taua tau ra) i to ˈu metua tane. Aita i maoro, ua riro maira oia ei hoê o ratou e ua faaite oia i ta ˈna mau tiaturiraa i to ˈna na taeae e tuahine e vau, ua farii ratou pauroa i te parau mau a te Bibilia. E to ˈna mau metua atoa. I muri iho, ua faaipoipo oia, e ua fanauhia mai au i te matahiti 1929 i Agrinio, i Heleni.
Auê ïa mau matahiti riaria i taua tau ra no te fenua Heleni! Na mua, te vai ra te Tenerara haavî ra o Metaxas. I muri iho, i te matahiti 1939, ua tupu te Piti o te Tamaˈi Rahi, e i muri iti noa ˈˈe, ua haruhia te fenua e te mau Nazi. Ua parare te maˈi e te pohe poia. Ua tarihia te mau tino pohe i oruoru na nia i te mau brouette. Ua uˈana roa te ino i te ao nei, oia atoa te hinaaroraa i te Basileia o te Atua.
Te hoê oraraa no te taviniraa itoito
I te 20 no Atete 1942, a ruru ai matou no te hoê putuputuraa i rapaeau ia Tesalonia, ua tohu atura ta matou tiaau peretiteni i te mau manureva Beretane e faarue ra i te mau paura i nia i te oire e ua haapapu oia e e paruruhia matou na roto i te auraroraa i te faaueraa “eiaha hoi e faarue i to matou haaputuputuraa.” (Hebera 10:25) I taua taime ra, ua haere matou i tahatai, e tei rotopu vau i te feia e bapetizohia. I to matou haereraa mai i rapaeau i te pape, ua tia noa matou ma te anai, e ua himene atura to matou mau taeae e tuahine Kerisetiano i te hoê himene a haapopou ai ia matou no te faaotiraa ta matou i rave. O te hoê ïa mahana e ore roa e moehia!
I muri iti noa ˈˈe, a farerei ai mâua te tahi atu tamaroa i te taata i roto i ta mâua taviniraa na te mau fare, ua tapea te tahi mau mutoi ia mâua e ua afai atura ia mâua i te fare mutoi. No te haapapu e ua faarirohia mâua ei mau Communiste e ua opanihia ta mâua ohipa pororaa, ua taparahihia mâua e ua parauhia mai e: “O Iehova, o Staline ïa, e maau ma!”
I taua taime ra, te tupu ra ïa te tamaˈi tivila i Heleni, e ua puai roa te ohipa patoiraa i te mau Communiste. I te mahana i muri iho, ua haaporotehia mâua i mua i to mâua fare ma te ponaohia to mâua rima, e au mâua i te feia ohipa ino. E ere râ teie anaˈe te mau tamataraa ta ˈu i faaruru.
Te mau tamataraa i to ˈu faaroo i te fare haapiiraa
I te haamataraa o te matahiti 1944, te haere noa râ vau i te haapiiraa, e te faatere noa ra te mau Nazi ia Tesalonia. I te hoê mahana i te fare haapiiraa, ua parau mai ta matou orometua haapii i te haapaoraa, e perepitero Orthodoxe Heleni oia, e e uiuihia vau i nia i te haapiiraa o te mahana. “E ere o ˈna i te hoê Kerisetiano Orthodoxe,” o ta te tahi atu ïa mau tamarii i parau.
“Eaha ïa o ˈna?” o ta te orometua haapii ïa i ani.
“E Ite no Iehova vau,” o ta ˈu ïa i pahono atu.
“E luko i rotopu i te mau mamoe,” o ta ˈna ïa i parau puai, a haru mai ai e a poara mai ai oia ia ˈu.
‘Nafea te hoê mamoe,’ o ta ˈu ïa i uiui, ‘e nehenehe ai e hohoni i te hoê luko?’
Tau mahana i muri iho, te parahi ra fatata e 350 o matou i nia i ta matou airaa maa no te tamaa. Ua na ô atura te taata haapao e: “Na Neros e pure.” Ua faahiti au i te pure e parauhia ‘To matou Metua,’ o ta Iesu i haapii i ta ˈna mau pǐpǐ, mai tei papaihia i roto i te Mataio 6:9-13. Aita roa ˈtu te taata haapao i au, ua ani maira oia ma te riri mai to ˈna parahiraa mai e: “No te aha oe i pure ai mai tera?”
“No te mea e Ite no Iehova vau,” o ta ˈu ïa i parau. I reira, ua haru atoa mai oia ia ˈu e ua tupai mai oia ia ˈu i nia i te paparia. I muri iho i taua noa mahana ra, ua titau mai te tahi atu orometua haapii ia ˈu i roto i ta ˈna piha ohipa e ua na ô maira ia ˈu e: “Ua tano roa oe, e Neros, a tapea maitai i ta oe e tiaturi ra, e eiaha e tuu.” I taua po ra, ua faaitoito mai to ˈu metua tane ia ˈu ma te faahiti i te mau parau a te aposetolo Paulo e: “Te feia atoa e opua e haapao i te paieti ei roto â i te Mesia ra ia Iesu, e hamani-ino-atoa-hia ïa.”—Timoteo 2, 3:12.
I te otiraa ta ˈu haapiiraa tuarua, ua tia ia ˈu ia maiti i te toroa e rave. No te mea hoi e te tupu ra te aroraa tivila i Heleni, ua faaruru atoa vau i te tumu parau o te tiaraa amui ore Kerisetiano. (Isaia 2:4; Mataio 26:52) I te pae hopea, i te haamataraa o te matahiti 1952, ua faautuahia vau e 20 matahiti fare tapearaa no to ˈu patoiraa i te faaohipa i te mau mauhaa i roto i taua area tau fifi ra o te aamu o Heleni.
Ua tamatahia to ˈu tiaraa amui ore Kerisetiano
A tapeahia ˈi au i roto i te mau aua faehau i Mesolóngion e i Korinetia, ua nehenehe au e faataa i te mau tomana faehau e eita to ˈu haava manaˈo tei haapiihia i te Bibilia e faatia ia ˈu ia riro ei faehau no te turu i te mau ohipa politita. “Ua riro aˈena vau ei faehau na Iesu,” o ta ˈu ïa i faataa, ma te faahiti i te Timoteo 2, 2:3. I to ˈu faaueraahia ia feruri faahou, ua parau atura vau e aita vau i rave ru noa i ta ˈu faaotiraa, ua feruri maite râ vau ia au atoa i ta ˈu pûpûraa i te Atua no te rave i to ˈna hinaaro.
I te pae hopea, ua faaravehia vau i te mau ohipa faahepohia, ma te ore e horoahia mai i te maa i te mau piti mahana atoa i te roaraa e 20 mahana, e e taoto na vau i nia i te tima i roto i te hoê piha tapearaa, iti mai i te hoê metera i nia e piti metera i te aano. E e piti Ite ê atu to roto i taua piha tapearaa ra! I reira ïa, i roto i te aua no Korinetia, to ˈu piiraahia mai to ˈu piha tapearaa e e haapohehia vau.
A haere ai matou i te vahi haapoheraa, ua ui maira te ofitie e, “Eita anei oe e parau i te tahi mea?”
“Eita,” o ta ˈu ïa i pahono atu.
“Eita anei oe e papai i to oe fetii?”
“Eita,” o ta ˈu ïa i pahono faahou atu. “Ua ite aˈena ratou e e haapohehia paha vau i ǒ nei.”
Ua tae atura matou i te aua ra, e ua faauehia ˈtura vau ia tia i mua i te pǎpai. I muri iho, aita te mau faehau i faauehia ia pupuhi, teie râ ta te ofitie i parau, “A afai ia ˈna i roto.” E haavare haapoheraa teie, e ravea no te tamata i ta ˈu faaotiraa.
I muri iho, ua afaihia vau i te motu no Makrónisos, i reira ua faatiahia vau ia rave i te hoê Bibilia eiaha râ i te tahi atu mau papai. Te tiaihia ra 13 Ite i roto i te hoê fare nainai, tei faataa-ê-hia i na feia tapeahia ohipa ino fatata e 500. Teie râ, ua horoa-huna-hia mai te mau papai ia matou ra. Ei hiˈoraa, ua haponohia mai na ˈu i te hoê mahana i te hoê afata loukoúmia (te hoê monamona matauhia). No te mea e ua hinaaro ru te feia hiˈopoa e tamata i te loukoúmia, aita ratou i tâuˈa i Te Pare Tiairaa i hunahia i raro aˈe. “Ua amu te mau faehau i te loukoúmia, area matou ra, ua ‘amu’ ïa i Te Pare Tiairaa!” o ta te hoê ïa Ite i tapao.
Ua horoa-atoa-hia mai ia matou ra i te hoê buka tei matara apî mai i taua taime ra, oia hoi Eaha ta te haapaoraa i rave no te huitaata nei?, e na te hoê Ite i tapeahia, tei papu i te reo Beretane, i huri i te reira. Ua haapii atoa matou paatoa i Te Pare Tiairaa, ma te faatupu omoe noa i ta matou mau putuputuraa. Ua faariro matou i te fare tapearaa ei fare haapiiraa, ei ravea no te haapaari i to matou huru pae varua. Hau atu, ua oaoa matou no te mea ua ite matou e te oaoa ra o Iehova i to matou haerea taiva ore.
Tei Týrintha, i te pae hitia o te râ no Pelopónnisos, te fare tapearaa hopea i reira vau i te tapearaahia. I reira, ua ite au i te hoê tiai o tei hiˈopoa maitai ia faatere anaˈe au i te haapiiraa Bibilia a te hoê hoa i tapeahia. Ua maere au i to ˈu farereiraa i taua tiai ra tau matahiti i muri iho i Tesalonia! E Ite oia i taua taime ra. I muri iho, ua afaihia hoê o ta ˈna mau tamarii i te fare tapearaa, eiaha no te riro ei tiai, ei taata tapeahia râ. Ua mau oia i te fare tapearaa no te hoê â tumu i tapeahia ˈi au.
Te ohipa-faahou-raa i muri aˈe i te matararaa mai
I roto i te utua matamua e 20 matahiti fare tapearaa, ua tapea-noa-hia vau e toru matahiti. I muri aˈe i to ˈu matararaa mai, ua faaoti au e faaea i Ateno. Aita râ i maoro, ua pohehia ˈtura vau i te maˈi aoao e ua tia ˈtura ia ˈu ia hoˈi i Tesalonia. E piti avaˈe to ˈu tarava-noa-raa i nia i te roˈi. I muri iho, ua farerei au i te hoê potii haviti, o Koula to ˈna iˈoa, e ua faaipoipo mâua i te avaˈe Titema 1959. I te matahiti 1962, ua haamata oia i te tavini ei pionie, oia hoi ei tavini Ite no Iehova ma te taime taatoa. E toru matahiti i muri iho, ua nehenehe au e apiti atu e o ˈna i roto i te taviniraa pionie.
I te avaˈe Tenuare 1965, ua tonohia mâua i roto i te tuhaa haaati, ma te ratere na roto i te mau amuiraa no te haapaari ia ratou i te pae varua. I taua tau veavea ra, ua fanaˈo atoa mâua i te haamaitairaa e haere i ta mâua tairururaa mataeinaa rahi matamua, i Vienne, i Auteteria. E ere ïa mai ta matou i faatupu na i Heleni, i reira matou e amui omoe ai i roto i te ururaau no te mea ua opanihia ta matou ohipa. I te hopea o te matahiti 1965, ua anihia mai mâua ia haere e rave i te ohipa i te amaa a te mau Ite no Iehova i Ateno. No te maˈi râ o te tahi o to ˈu mau fetii, ua tia ia mâua ia hoˈi i Tesalonia i te matahiti 1967.
A rave noa ˈi mâua i ta mâua mau hopoia utuafare, ua tamau noa mâua i te rohi i roto i te ohipa poro evanelia. I te hoê taime, a paraparau ai au i to ˈu taeae fetii ra o Kostas, ua faataa vau ia ˈna i te nehenehe o te faanahonahoraa a te Atua e i te here, te tahoê, e te auraro i te Atua e vai ra i roto. Ua parau maira oia e, “E mea faahiahia roa ïa te reira ahiri e te vai ra te Atua.” Ua farii oia i ta ˈu aniraa e hiˈopoa e te vai ra anei te Atua aore ra aita. Ua parau atura vau e e haere mâua ta ˈu vahine i te hoê tairururaa na te mau nunaa atoa a te mau Ite no Iehova i Nuremberg, i Helemani, i te avaˈe Atete 1969. Ua ani maira oia e e nehenehe anei o ˈna e haere, e ua hinaaro atoa ˈtura to ˈna hoa ra o Alekos, o te haapii atoa ra i te Bibilia na muri iho ia mâua.
E mea faahiahia roa te tairururaa i Nuremberg! Ua faatupuhia te tairururaa i nia i te tahua rahi i reira to Hitler faatupuraa i te mau oroa no ta ˈna mau upootiaraa tamaˈi. Ua naeahia te hoê numera teitei e 150 000 tiahapa taata i tae mai, e ua itehia te varua o Iehova i roto i te mau ohipa atoa i tupu. I muri iti noa ˈˈe, ua bapetizohia o Kostas raua o Alekos. Te tavini nei raua toopiti i teie nei ei mau matahiapo Kerisetiano, e mau Ite atoa to raua utuafare.
Ua haamata vau i te haapii e te hoê vahine anaanatae. Ua faaite maira ta ˈna tane e ua hinaaro oia e hiˈopoa maitai i ta mâua mau tiaturiraa, e i muri iti noa ˈˈe, ua faaara maira oia ia ˈu e ua titau manihini oia i te tahi taata, o Sakkos Tane, e taata tuatapapa faaroo Orthodoxe Heleni oia, no te hoê tauaparauraa. Ua hinaaro te tane ra e uiui ia mâua toopiti. Ua haere maira o Sakkos Tane e te hoê perepitero. Ua haamata ˈtura te tane i te parau e, “Na mua, e hinaaro vau e ia pahono mai o Sakkos Tane i na uiraa e toru.”
Ma te amo i nia i te tatararaa o te Bibilia ta matou e faaohipa ra i roto i ta matou mau aparauraa, ua ani atura te tane ra e, “Uiraa matamua: E Bibilia mau anei teie, aore ra e Bibilia na te mau Ite?” Ua pahono atura o Sakkos Tane e e tatararaa haamanahia te reira, e ua faataa atoa oia i te mau Ite no Iehova ei “feia au roa i te Bibilia.”
Ua ani faahou te tane ra e, “Uiraa piti: E feia maitatai anei te mau Ite no Iehova i te pae morare?” I te tanoraa mau, ua hinaaro oia e ite e mai te aha te huru o te feia o ta ta ˈna vahine i amuimui. Ua pahono atura te taata tuatapapa faaroo ra e mea maitai roa ratou i te pae morare.
“Te uiraa toru,” o ta te tane ïa i parau faahou, “Te aufauhia ra anei te mau Ite no Iehova?” “Aita,” o ta te taata tuatapapa faaroo ïa i pahono atu.
“Ua noaa ia ˈu te mau pahonoraa o ta ˈu mau uiraa, e ua rave au i ta ˈu faaotiraa,” o ta te tane ïa parau hopea. I muri iho, ua tamau noa oia i ta ˈna haapiiraa Bibilia e aita i maoro, ua bapetizohia oia ei Ite no Iehova.
Te hoê oraraa faufaa e te oaoa
Ua haamata faahou vau i te tavini ei tiaau haaati i te avaˈe Tenuare 1976. Tau ono matahiti i muri iho, ua fanaˈo vau i te haamaitairaa e apiti i roto i te aratairaa i te hoê huru pororaa apî i Heleni—te pororaa na te aroâ. I muri iho, i te avaˈe Atopa 1991, ua tavini atura mâua ta ˈu vahine ei pionie taa ê. Tau avaˈe i muri iho, ua tâpûhia vau e maha taime i te pae o te mau uaua toto o te mafatu, auaa râ te reira i manuïa. Mea maitai rii au i teie nei, e ua nehenehe au e poro faahou ma te taime taatoa. Te tavini atoa nei au ei matahiapo i roto i te hoê o te mau amuiraa i Tesalonia, e te ohipa atoa nei au e te Tomite Tuatiraa e te Fare maˈi (CLH na roto i te reo Farani) no reira no te tauturu i te mau taata i te pae rapaauraa.
A haamanaˈo ai au i to ˈu oraraa, te taa ra ia ˈu e mea oaoa ia rave i te mau mea e auhia ra e to tatou Metua i nia i te raˈi. Te oaoa nei au e mea maoro aˈenei to ˈu fariiraa i ta ˈna titau-manihini-raa au maitai: “E tau tamaiti, ia paari hoi oe, ia oaoa tau [“mafatu,” MN], ia tia ia ˈu ia patoi atu i tei faaino mai ia ˈu nei.” (Maseli 27:11) Te oaoa mau nei to ˈu mafatu ia ite au i te maraaraa na te ao nei o te numera o te feia aau rotahi e haere maira i roto i te faanahonahoraa a Iehova. Ua riro mau â ei haamaitairaa taa ê ia tauturu i te feia ia tiamâ mai na roto i te ravea o te parau mau a te Bibilia e e nehenehe ïa ratou e fanaˈo i te ora mure ore i roto i te ao apî parau-tia!—Ioane 8:32; Petero 2, 3:13.
Te tutava noa nei mâua i te faaitoito i te mau tavini apî a Iehova ia haamau i te taviniraa ma te taime taatoa ei fa na ratou, ia pûpû i to ratou taime e to ratou puai no ˈna. Oia mau, ua riro te tiaturiraa ia Iehova e te iteraa i te mauruuru rahi i te faaoaoaraa i to ˈna mafatu ei oraraa au roa ˈˈe ta te hoê taata e nehenehe e fanaˈo!—Maseli 3:5; Koheleta 12:1.
[Hohoˈa i te api 21]
(Mai te pae aui i te pae atau)
Te taviniraa i roto i te fare tutu a te Betela i te matahiti 1965
Te hohoraraa i te hoê oreroraa parau i te matahiti 1970 a opanihia ˈi ta matou pororaa
E ta ˈu vahine i te matahiti 1959
[Hohoˈa i te api 23]
E ta ˈu vahine, o Koula