Mau uiraa a te feia taio

Te faatupu nei e rave rahi mau Ite no Iehova i te mau oroa mahana faaipoiporaa. Te oroa mahana fanauraa, o te hoê ïa oroa o te mahana outou i fanauhia mai ai. Eaha ïa te tumu e faatupuhia ˈi te mau oroa mahana faaipoiporaa e eiaha te mau oroa mahana fanauraa?

Ma te huna ore, eita e titauhia i te hoê Kerisetiano ia faatupu i na oroa e piti. Tera râ, e ere ïa te auraa e, hoê â to raua faufaaraa aore ra e tia i te mau Kerisetiano ia tuu i tei faahiti-na-mua-hia (mau oroa mahana faaipoiporaa) e te mau oroa mahana fanauraa i nia i te hoê â faito.

Mai tei faahitihia, e nehenehe e parauhia e e mau oroa matahiti teie na toopiti oroa no te mea te “oroa matahiti,” e ‘taio mahana ïa i roto i te matahiti e faahaamanaˈo ra i te tahi ohipa i tupu.’ E nehenehe e haamanaˈohia te mau huru ohipa atoa i roto i te matahiti—te mahana i û ai to outou pereoo, i ite ai outou i te hoê poiriraa avaˈe, i haere ai outou e ǎu e to outou utuafare, e rave rau atu â. Mea papu maitai e eita te mau Kerisetiano e faariro i te mau “oroa matahiti” atoa ei mahana taa ê aore ra e faatupu i te hoê oroa faahaamanaˈoraa. E tia ia tatou ia hiˈopoa i te mau huru o te hoê tupuraa e ia faaoti eaha te tano ia rave.

Ei hiˈoraa, ua faaue taa ê te Atua i te mau Iseraela ia faatupu i te mau matahiti atoa i te oroa o te mahana a haere ai ta ˈna melahi na nia iho i te mau fare o te mau ati Iseraela i Aiphiti e te faahopearaa o te revaraa to ˈna nunaa i te matahiti 1513 H.T.T. (Exodo 12:14) I to te mau ati Iuda e to Iesu atoa faatupuraa i teie mahana oroa hoê taime i te matahiti, ei auraroraa ïa i te aratairaa a te Atua, e aita ratou i faatupu i te hoê oroa arearearaa aore ra i te hoê opereraa taoˈa horoa. Ua haapao atoa te mau ati Iuda i te oroa matahiti taa ê no te avari-faahou-raa o te hiero. Noa ˈtu e aita te faahaamanaˈoraa o teie tupuraa o te aamu i faauehia i roto i te Bibilia, te faaite ra te Ioane 10:22, 23 e aita o Iesu i faahapa i te reira. I te pae hopea, te vai nei ta te mau Kerisetiano hoê putuputuraa taa ê no te oroa matahiti o te poheraa o Iesu. Oia mau, ua riro te reira ei auraroraa i te faaueraa papu e horoahia ra i roto i te Parau a te Atua.—Luka 22:19, 20.

E no te oroa mahana faaipoiporaa ïa? I roto i te tahi mau fenua, e peu matauhia ia haamanaˈo te tane e te vahine faaipoipo i te oroa matahiti o to raua faaipoiporaa, te hoê faanahoraa i haamauhia e te Atua. (Genese 2:18-24; Mataio 19:4-6) Papu maitai e aita te Bibilia e faahiti ra i te faaipoiporaa mai te hoê ohipa ino. Ua haere o Iesu i te hoê oroa faaipoiporaa e ua apiti atoa oia i te oaoa i taua taime ra.—Ioane 2:1-11.

No reira, e ere i te mea huru ê ia maiti te hoê tane e te hoê vahine faaipoipo i te rave i te taime no te oroa matahiti o to raua faaipoiporaa, no te feruri faahou i taua taime oaoa ra e i ta raua opuaraa e rohi e manuïa ˈi to raua faaipoiporaa. E rave anei raua i taua oroa oaoa ra raua anaˈe, aore ra e titau manihini raua i te tahi mau fetii aore ra i to raua mau hoa, na raua iho â ïa e faaoti. Eiaha teie oroa ia riro ei taime no te faatupuraa i te hoê tamaaraa rahi. I taua mahana ra, e hinaaro te mau Kerisetiano ia arataihia ratou e te mau faaueraa tumu matauhia i te haapao i te mau mahana atoa i roto i to ratou oraraa. No reira, na te taata tataitahi e faaoti e haapao anei oia i te oroa matahiti o te faaipoiporaa aore ra eita.—Roma 13:13, 14.

Eaha ra ïa no te faatupuraa i te oroa mahana fanauraa? Te vai ra anei te tahi mau haapapuraa i roto i te Bibilia no nia i teie huru oroa matahiti?

Parau mau, i te omuaraa o teie senekele, ua faatupu te Feia Haapii Bibilia, matauhia i muri iho ei mau Ite no Iehova, i te mau oroa mahana fanauraa. E rave rahi o ratou o tei tapao i teie mau mahana i roto i te tahi mau buka iti tei parauhia Daily Heavenly Manna (Te mâna no te mau mahana atoa mai te raˈi mai). Te vai ra i roto hoê irava Bibilia no te mahana tataitahi, e e tuu e rave rahi mau Kerisetiano i te hoê hohoˈa iti o te hoê hoa Haapii Bibilia i nia i te mau api e au i te mau oroa mahana fanauraa o te mau hoa Haapii Bibilia. Oia atoa, te faatia ra Te Pare Tiairaa o te 15 no Febuare 1909 (Beretane) e, i te hoê tairururaa i tupu i Jacksonville, i Floride, Hau Amui no Marite, ua anihia o Taeae Russell ia tauma i nia i te tahua. No te aha? Ua horoahia na ˈna te hoê ô tiai-ore-hia ei mau afata vine, painapo, e anani no to ˈna oroa mahana fanauraa. Te faaite maira te reira i te ohipa i ravehia na i mutaa ihora. Oia atoa, a haamanaˈo na e i taua tau ra, ua faahaamanaˈo atoa te Feia Haapii Bibilia i te 25 no Titema ei oroa matahiti no te mahana fanauraa o Iesu. E peu matau-atoa-hia i te faatupu i te tamaaraa Noela i te pu i Brooklyn.

Oia mau, ua paari mai te nunaa o te Atua i te pae varua mai taua tau mai â ra i roto e rave rahi mau tuhaa. I te mau matahiti 1920 ra, ua rahi atu â te maramarama o te parau mau e ua taa ˈtura ia ratou e:

Aita o Iesu i fanauhia i te 25 no Titema, no roto mai hoi teie taio mahana i te haapaoraa etene. Te faaue maira te Bibilia ia tatou ia faahaamanaˈo i te mahana o te poheraa o Iesu, eiaha râ te oroa matahiti o to ˈna fanauraa aore ra to vetahi atu fanauraa. Te tuea ra te haamanaˈoraa i te poheraa o Iesu i te irava i roto i te Koheleta 7:1 e i te parau ra e, mea hau aˈe te hopea o te oraraa o te hoê taata haapao maitai, i te mahana o to ˈna fanauraa. Aita te Bibilia e faahiti ra e ua faatupu te tahi noa ˈˈe tavini haapao maitai i te oroa o to ˈna mahana fanauraa. Te faahiti noa nei râ oia i te mau oroa mahana fanauraa o te mau etene, a faatuati ai teie mau oroa e te mau ohipa riaria. E tuatapapa anaˈe i te tupuraa o teie mau oroa mahana fanauraa.

Te oroa mahana fanauraa matamua, o to Pharao ïa i te tau o Iosepha. (Genese 40:20-23) No nia i teie tuhaa, te haamata ra te tumu parau no nia i te mau oroa mahana fanauraa i roto i te Encyclopædia of Religion and Ethics a Hastings mai teie: “Ua faatuatihia te peu o te oroa mahana fanauraa, ei taime faahaamanaˈoraa, i te numeraraa i te tau, e i roto i te huru raveraa, i te tahi mau peu faaroo tahito.” I muri iho, te faahiti ra taua buka ra i te taata ra o Sir J. Gardner Wilkinson, taata tuatapapa no nia ia Aiphiti, o tei papai e: “Te haafaufaa rahi ra te feia atoa no Aiphiti i te mahana, e te hora atoa o to ˈna mahana fanauraa; e peneiaˈe, mai tei itehia ra i Peresia, te faatupu ra te taata tataitahi i to ˈna oroa mahana fanauraa ma te oaoa rahi, a farii popou ai i to ˈna mau hoa ma te mau arearearaa amui atoa, e mai tei matauhia, ma te mau huru maa maitatai atoa.”

Te tahi atu oroa mahana fanauraa i faahitihia i roto i te Bibilia, o to Heroda ïa, i reira te tâpûraahia te arapoa o Ioane Bapetizo. (Mataio 14:6-10) Te horoa ra te buka parau paari ra The International Standard Bible Encyclopedia (neneiraa 1979) i teie haamaramaramaraa: “Ua faatupu te mau Heleni i tahito ra i te mau oroa mahana fanauraa o te mau atua e o te mau taata tiaraa teitei. E parauhia taua mau oroa ra na roto i te parau Heleni ra genéthlia, area te parau ra genésia, te hoê ïa oroa haamanaˈoraa i te mahana fanauraa o te hoê taata faufaa roa i pohe. I roto i te Mak[abaio] 2, 6:7, e ite tatou i te faahitiraa no nia i te genéthlia o Antiochus IV i te mau avaˈe atoa, i reira to te mau ati Iuda faaheporaahia ia ‘amu i te mau tusia.’ . . . I to Heroda faatupuraa i to ˈna oroa mahana fanauraa, ua ohipa oia ia au i te peu tumu Heleni; aita e haapapuraa no te faatupuraa i te mau oroa mahana fanauraa i Iseraela hou i te mau tau Heleni ra.”

Parau mau, aita te mau Kerisetiano mau e tapitapi rahi nei i te mau tumu e peneiaˈe i te mau taairaa i te pae o te mau faaroo tahito o te mau haerea aore ra mau peu matauhia atoa, eita atoa râ ratou e haafaufaa ore i te mau haapapuraa faufaa roa e vai ra i roto i te Parau a te Atua. Te haapapuhia ra e, te mau oroa mahana fanauraa i faatiahia i roto i te Bibilia, o to te mau Etene ïa e ua taai-anaˈe-hia i te mau ohipa riaria. No reira, te haamaramarama maira ïa te mau Papai e mea tano ore te faatupuraa i te mau oroa mahana fanauraa, eita ïa te mau Kerisetiano aau rotahi e haafaufaa ore i te reira.

No reira, noa ˈtu e na te mau Kerisetiano tataitahi e maiti e faatupu anei ratou i te oroa matahiti o to ratou faaipoiporaa, te vai ra te mau tumu papu maitai e haapae ai te mau Kerisetiano paari i te faatupu i te mau oroa mahana fanauraa.