Ia riro te mau mafatu ofai ei mau mafatu farii maitai
I TE MATAHITI 1989, UA FAATIAHIA TE MAU ITE NO IEHOVA NO POLONIA e te ture ei haapaoraa faanahohia. Ua tuu-hoê-hoê-hia te mau Ite i tapeahia no to ratou tiaraa Kerisetiano amui ore, i rapae, a vaiiho ai i roto i te fare tapearaa i te feia i tapeahia e rave rahi e hiaai ra i te haapii hau atu â i te Bibilia e o ratou. Teie te hoê aamu no nia i to te mau Ite no Iehova tutavaraa i te tauturu i te feia mafatu ofai ia farii i te puai o te Parau a te Atua, i roto i te hoê o taua mau fare tapearaa ra.
I WOŁÓW, te hoê oire 12 000 taata i Polonia apatoa e tooa o te râ, te vai ra te hoê fare tapearaa e 200 matahiti i reira te tahi o te mau taata ohipa ino roa ˈˈe no Polonia e tapeahia ˈi. Mai te faatiaraahia ta ratou ohipa e te ture, ua tutava te mau Ite no Iehova i te hopoi i te parau apî maitai o te Basileia na te feia i tapeahia i ǒ, e te na reira nei ratou ma te anaanatae rahi.
Te mea i haamarari i te eˈa, o te hoê ïa rata no ǒ mai i te Piha a te Hau no te Haavaraa i te avaˈe Febuare 1990 na te feia faatere fare tapearaa atoa no Polonia. Te faaara ra te rata “eiaha” ratou “ia haafifi” i te hoê noa ˈˈe taata i tapeahia e hinaaro ra e farii i te mau papai a te Watch Tower aore ra e farerei i te mau Ite no Iehova. Ua faaea te tahi mau Ite i te mau roaraa matahiti i roto i te fare tapearaa no Wołów, no reira, ua matau maitai ratou i te feia i faautuahia e i paetaetahia e rave rahi i ǒ. Ua tiaturi râ ratou e e haamaitai Iehova i ta ratou mau tutavaraa e vaiiho e na te parau mau o te Bibilia e haamǎrû i te mau mafatu ofai o te tahi atu feia i tapeahia.
Te haamataraa i te ohipa
“Mea fifi roa no te haamata i te porotarama,” ta Taeae Czesław ïa i parau, no te oire no Wrocław oia, fatata e 40 kilometera i te atea, e ua faatiahia oia e haere i te fare tapearaa i Wołów. “E rave rahi mau tauaparauraa roa e te feia toroa o te fare tapearaa no te haapapu ia ratou e mea maitai ta matou mau ‘ohipa faaroo’ no te feia i tapeahia.”
Ei faa-rahi-raa ˈtu â i te fifi, te haamanaˈo ra te hoa ohipa o Czesław oia hoi o Paweł e, “ua mârô te hoê taata toroa teitei e te faaohipa noa ra te feia i faautuahia i te mau ohipa faaroo ia noaa te mau maitai materia.” Ia tia mai râ e toru taata i riro na ei feia ohipa ino mau no te bapetizoraa i te matahiti 1991, ua taui aˈera te haerea o te feia mana toroa o te fare tapearaa, e ua maitai mai nei te rave-amui-raa i te ohipa.
“Ua haamata aˈera matou i te poro i te feia i faautuahia, i to ratou mau utuafare i haere mai e farerei ia ratou i te fare tapearaa, e oia atoa i te feia rave ohipa o te fare tapearaa,” ta Czesław ïa i faataa. “I muri iho, ua faatiahia matou e poro i te parau apî maitai i tera e tera piha tapearaa, o te hoê ïa faatiaraa varavara roa. I te pae hopea, i to matou iteraa mai i te feia matamua i anaanatae, ua faatiahia matou e haere i roto i te hoê piha nainai e faatere i te mau haapiiraa Bibilia e te mau putuputuraa Kerisetiano.” Oia mau, ua iriti Iehova i te uputa e tae atu ai i te mau mafatu ofai o te feia i tapeahia.
Te hoê porotarama haapiiraa o te manuïa
Aita i maoro, ua nainai roa te piha iti ra. No te mea ua apiti te feia i tapeahia e i bapetizohia i te mau taeae no rapae i roto i te ohipa pororaa, ua haamata aˈera te hoê rahiraa feia i faautuahia e 50 i te haere mai i te mau putuputuraa. “Hau atu i te toru matahiti i te maoro, ua faatere matou i ta matou mau putuputuraa i ǒ, e ua haere tamau mai te feia i tapeahia i te mau putuputuraa tahebedoma,” ta te hoê ïa matahiapo no taua vahi ra e faataa nei. No reira, i te avaˈe Me 1995, ua faatiahia ratou e faaohipa i te hoê piha rahi aˈe.
Nafea te mau taeae e hopoia ta ratou e faataa ˈi o vai te nehenehe e haere mai i te mau putuputuraa e faaterehia i te fare tapearaa? “E tabula iˈoa ta matou no te feia i tapeahia e anaanatae mau ra i te parau mau,” ta Taeae Czesław raua Zdzisław ïa e faataa nei. “Eita anaˈe te hoê taata i faautuahia e haere i mua aore ra ia mairi oia i te mau putuputuraa e aita ta ˈna e tumu maitai, o te faaite hoi e aita oia e haafaufaa ra i teie mau faanahoraa, e tumâ matou i to ˈna iˈoa i nia i te tabula iˈoa e e faaara matou i te raatira [taata faatere] fare tapearaa.”
I roto i ta ratou mau haapiiraa Bibilia, e haapii atoa te mau taeae i te feia i tapeahia nafea ia faaineine maitai i ta ratou mau putuputuraa e nafea ia faaohipa i ta tatou mau papai ma te aravihi. No reira, ia haere mai te feia i tapeahia i te mau putuputuraa, ua ineine maitai ratou e e pahono tahaa noa ratou. E horoa ratou i te mau pahonoraa o te faaitoito, e faaohipa ratou i te Bibilia ma te aravihi, e e faaau ratou i te aˈoraa i nia ia ratou iho, ma te faaô pinepine i roto i ta ratou mau pahonoraa i te mau manaˈo mai teie, ‘Te ite nei au e e tia ia ˈu ia na ô aore ra ia na reira.’
“I te taatoaraa, e 20 haapiiraa Bibilia e faaterehia ra i te fare tapearaa no Wołów. E vau i roto i te reira, na te feia i tapeahia e toru i riro ei feia poro e faatere ra,” ta te papai parau o te amuiraa ïa e parau nei. Mea maitai atoa ta ratou i noaa mai a poro ai ratou i tera e tera piha tapearaa e ia hahaere ratou na roto i te aua o te fare tapearaa. Ei hiˈoraa, i roto hoê ahuru avaˈe, mai te avaˈe Setepa 1993 e tae atu i te avaˈe Tiunu 1994, ua opere ratou e 235 buka, fatata e 300 buka rairai, e 1 700 vea. Aita i maoro aˈenei, e piti o na feia toroa o te fare tapearaa tei ani i te hoê haapiiraa Bibilia.
Mau rururaa taa ê i faatupu i te oaoa
Ia maoro rii, ua ravehia te tahi atu ohipa hau i roto i te porotarama haapiiraa i roto i taua fare tapearaa ra, oia hoi te mau rururaa taa ê. Na te mau tiaau ratere e te tahi atu mau taeae aravihi e vauvau i te mau tuhaa faufaa o te porotarama o te rururaa haaati e o te rururaa taa ê hoê mahana i roto i te piha faaetaetaraa tino o te fare tapearaa. Ua faatupuhia te rururaa taa ê matamua i te avaˈe Atopa 1993. E pae ahuru feia i tapeahia i tae mai, e “te mau utuafare taatoa, tae noa ˈtu te mau vahine e te mau tamarii apî, i haere mai na Wrocław mai,” ta te vea ra Słowo Polskie ïa i faataa, te feia taatoa i tae mai, 139 ïa. Ua nehenehe te taata e amu i te maa i faaineinehia e te mau tuahine e e faatupu atoa i te auhoaraa Kerisetiano maitai i te taime faafaaearaa o te porotarama o te rururaa.
E hitu rururaa taa ê hau tei faatupuhia mai reira mai, e e ere noa to roto i te fare tapearaa tei faufaahia i te reira, to rapae atoa râ. Ia haere atu te hoê tuahine Ite e farerei i te hoê taata i tapeahia na i Wołów e e faaea ra i teie nei i te oire, ua haamarirau oia i te omuaraa. I to ˈna râ iteraa e ua riro mai te hoê iho â taata i tapeahia ei Ite, no to ˈna maere rahi ua tuô aˈera oia e: “E Ite taua taparahi taata ra i teie nei?” Ei faahopearaa, ua farii aˈera taua taata ra i te hoê haapiiraa Bibilia.
Mau tauiraa faahiahia mau i faatupuhia
Ua haamǎrû mau anei teie porotarama haapiiraa faito rahi i te mau mafatu ofai o te feia i tapeahia? E vaiiho anaˈe e na ratou e faatia mai i to ratou aamu.
“Aita vau i ite aˈenei i to ˈu mau metua no te mea ua faarue raua ia ˈu i to ˈu nainairaa, e ma te mauiui mau aita vau i ite aˈenei eaha te auraa ia herehia oe,” ta Zdzisław ïa e faaite nei, te hoê taata mea feruri hohonu to ˈna huru. “Oioi roa i roto i to ˈu oraraa, ua ô vau i roto i te ohipa ino, e i te pae hopea, ua taparahi pohe roa vau i te hoê taata. Ua turai te manaˈo hohonu o te faahaparaa ia feruri au e haapohe ia ˈu, e te imi noa ra vau mai te maamaa i te hoê tiaturiraa mau. E, i te matahiti 1987, ua itea mai ia ˈu te vea ra Te Pare Tiairaa. Mea na reira to ˈu iteraa i te tiaturiraa o te tia-faahou-raa e o te ora mure ore. I to ˈu iteraa e te vai râ te ravea, ua faarue ihora vau i te manaˈo e haapohe ia ˈu e ua haamata aˈera vau i te haapii i te Bibilia. I teie nei, ua ite au eaha te auraa ia herehia oe e Iehova e te mau taeae.” Mai te matahiti 1993 to teie taparahi taata tahito riroraa ei tavini tauturu e ei pionie tauturu e i te matahiti i mairi aˈenei, ua riro oia ei pionie tamau.
I te tahi aˈe pae, ua farii oioi noa o Tomasz i te hoê haapiiraa Bibilia. “E ere râ te reira i te mea manaˈo-maitai-hia,” ta ˈna ïa e faaite nei. “Te haapii ra vau no te mea noa mea au na ˈu e faateitei ia faataa vau i te mau tiaturiraa a te mau Ite no Iehova ia vetahi ê. Aita râ vau e faaohipa ra i te parau mau a te Bibilia. I te hoê mahana, ua faaoti ihora vau e haere i te hoê putuputuraa Kerisetiano. Ua farii mai te feia i tapeahia e i bapetizohia ia ˈu ma te mahanahana mau. Ua itea mai nei ia ˈu e eiaha vau e tamata i te faateitei no to ˈu ite, ia haamǎrû râ vau i to ˈu mafatu ofai e ia taui i to ˈu huru feruriraa, e tia ˈi.” Ua haamata ihora o Tomasz i te ahu i te huru taata apî Kerisetiano. (Ephesia 4:22-24) I teie mahana, e Ite oia i pûpûhia e i bapetizohia e te oaoa nei oia i te poro i tera e tera piha tapearaa.
Mau faaheporaa a te mau hoa tahito
Ua farerei te feia i haapii i te parau mau i roto i te fare tapearaa i te mau faaheporaa teimaha a te mau hoa tahito i tapeahia e a te feia toroa o te fare tapearaa. Te haamanaˈo nei hoê i roto ia ratou e: “Ua faahaama e ua faaooo-pinepine-noa-hia vau. Ua haamanaˈo noa râ vau i te mau parau faaitoito a te mau taeae. ‘A tamau i te pure ia Iehova,’ ta ratou ïa i parau mai. ‘A taio i ta oe Bibilia e e ite oe i te hau i roto ia oe.’ Ua tauturu mau mai te reira.”
“Aita to ˈu mau hoa tapearaa i tuutuu i te taora mai i te mau parau teimaha i nia ia ˈu,” ta Ryszard ïa e parau nei, te hoê taeae pautuutu i bapetizohia. “‘E nehenehe oe e haere i ta oe mau putuputuraa, eiaha râ e tamata i te faateitei e e parau e mea maitai aˈe oe, OK?’ ta ratou ïa e faaara mai. I to ˈu faatupuraa i te mau tauiraa i roto i to ˈu oraraa no to ˈu faaohiparaa i te mau faaueraa tumu a te Bibilia, ua mauiui au no te reira. Ua faatahuri ratou i to ˈu roˈi, ua taora haere i ta ˈu mau papai Bibilia, e ua hue i to ˈu tuhaa o te piha tapearaa. Ua pure au ia Iehova no te ani i te puai ia haavî au ia ˈu iho e i muri iho, ua haamata aˈera vau i te faanaho i te mau mea ma te ore e maniania. Ia maoro rii, ua faaea aˈera te mau totoaraa.”
“Ia ite te mau hoa tapearaa e ua opua maite matou e tavini ia Iehova,” ta te tahi atu â ïa feia i tapeahia e i bapetizohia e faatia nei, “e taui te huru o te faaheporaa. E parau paha ratou e, ‘A haamanaˈo, eita ta oe e nehenehe faahou e inu, e puhipuhi i te avaava aore ra e haavare.’ E tauturu teie huru faaheporaa i te hoê ia haavî i to ˈna tino, a haapae oioi ai i te mau peu ino aore ra mau hiaai maha ore atoa. E tauturu atoa te reira i te hoê ia faahotu i te mau hotu o te varua.”—Galatia 5:22, 23.
Te riroraa ei mau tavini i pûpûhia no te Atua
Ma te faatiahia e te feia mana toroa o te fare tapearaa, ua tupu te bapetizoraa matamua i roto i te piha faaetaetaraa tino i te tau uaaraa tiare no te matahiti 1991. O Zdzisław te taata oaoa e bapetizohia ra. Hoê ahuru ma piti feia i tapeahia tei tae mai, e ua haere mai e 21 taeae e tuahine no rapae mai no teie tupuraa. Ua faaitoito maite te putuputuraa i te feia i tapeahia. I te mea e ua haere maitai te tahi pae o ratou i mua, e piti faahou â taata i faautuahia tei bapetizohia i muri aˈe i taua noâ matahiti ra. E piti matahiti i muri aˈe, i te matahiti 1993, e piti taime te faatupuraahia te bapetizoraa, e e hitu faahou â taata i faautuahia tei faataipe i to ratou pûpûraa no Iehova!
Ua faataa te vea no taua vahi ra, te Wieczór Wrocławia, no nia i te bapetizoraa i tupu i te avaˈe Titema e: “Ua tamau noa te taata i te tomo i roto i te piha faaetaetaraa tino, a aroha ˈi i te mau taata atoa e a horoa ˈi i to ratou rima ia ratou. Aita e taata e hiˈohia mai te hoê taata ěê i ǒ nei. Ua riro ratou ei hoê utuafare rahi, tahoêhia i te pae o te feruriraa, o te huru oraraa, e o te taviniraa i te hoê Atua, o Iehova.” O taua “hoê utuafare rahi” ra, 135 ïa taata, tei roto atoa na feia i faautuahia e 50. E farerei anaˈe i te tahi o ratou.
Te faatia nei o Jerzy i bapetizohia i te avaˈe Tiunu e: “Noa ˈtu e ua fafa aˈena vau i te parau mau o te Bibilia ahia matahiti aˈenei, te mea e vai ra i roto ia ˈu, o te hoê mau ïa mafatu ofai. Te ohipa taviri taata, te faataaraa i ta ˈu vahine matamua, te taatiraa tia ore e o Krystyna, te hoê tamarii i fanauhia i roto i te faaturi, e te hoˈi-pinepine-raa i te fare tapearaa—teie ïa te huru o to ˈu oraraa.” I to ˈna iteraa i roto i te fare tapearaa e ua riro mai te tahi feia ohipa ino mau ei mau Ite, ua haamata aˈera oia i te uiui ia ˈna iho e: ‘Eita anei ta ˈu e nehenehe e riro atoa mai ei taata maitai aˈe?’ Ua ani aˈera oia i te hoê haapiiraa Bibilia e ua haamata ihora i te haere i te mau putuputuraa. Teie râ, te ohipa mau i turai ia ˈna, to ˈna ïa faarooraa i te auvaha ture ia parau e ua riro Krystyna ei Ite no Iehova a toru matahiti aˈenei. “Ua maere roa vau!” ta Jerzy ïa e parau nei. “Ua manaˈo aˈera vau e, ‘E o vau? Eaha ta ˈu e rave nei?’ Ua itea maira ia ˈu e no te fariihia mai au e Iehova, e tia ia ˈu ia faatitiaifaro i to ˈu oraraa.” Ei faahopearaa, ua tupu te hoê farereiraa oaoa i roto i te fare tapearaa—e o Krystyna e to raua tamahine 11 matahiti, o Marzena. Aita i maoro roa, te haamana maira raua i to raua faaipoiporaa i mua i te ture. Noa ˈtu â e tei roto noâ oia i te fare tapearaa e te farerei nei oia i te fifi i te tahi taime, ua haapii o Jerzy i te reo ma te aparaa rima e e nehenehe ta ˈna e tauturu i te feia tariˈa turi i tapeahia.
Ua ô aˈena Mirosław i roto i te mau ohipa ino a haere noa ˈi oia i te haapiiraa tuatahi. Te umere rahi ra oia i ta to ˈna mau hoa e rave ra, e aita i maoro, te na reira atoa ra oia. E rave rahi taata ta ˈna i eiâ aore ra i taparahi. E inaha, tapae atura oia i te fare tapearaa. “Ia tae atu vau i te fare tapearaa, ua imi au i te tauturu a te perepitero,” ta Mirosław ïa e faaite nei. “Ua inoino roa râ vau. No reira vau i faaoti ai e e haapohe au ia ˈu iho na roto i te inuraa i te raau taero.” I te mahana mau ta ˈna i opua e haapohe ia ˈna iho, ua tauihia oia i te tahi atu piha tapearaa. I reira, ua ite mai oia i te hoê papai-faahou-raa o Te Pare Tiairaa e paraparau ra no nia i te fa o te oraraa. “Te parau ohie e te maramarama, o ta ˈu mau ïa e hinaaro ra,” ta ˈna ïa e parau faahou nei. “I teie nei, te hinaaro ra vau e ora! No reira, ua pure au ia Iehova e ua ani au i te hoê haapiiraa Bibilia i te mau Ite.” Ua haere oioi oia i mua i roto i ta ˈna haapiiraa Bibilia e ua bapetizohia oia i te matahiti 1991. I teie nei, te tavini nei oia ei pionie tauturu i roto i te fare tapearaa, ma te haamaitaihia i te haereraa e poro i tera e tera piha tapearaa.
Tae roa mai i teie nei, ua taeahia 15 feia i tapeahia tei bapetizohia. Te taatoaraa o ta ratou paatoa utua, e 260 ïa matahiti. Ua tuuhia te tahi pae i rapae hou a hope ai ta ratou utua. Ua faaitihia 10 matahiti te utua e 25 matahiti a te hoê taata i tapeahia. E te tahi tei faaite i te anaanatae tei roto noa ˈi ratou i te fare tapearaa, ua bapetizohia ïa ei Ite i muri aˈe a tuuhia ˈi ratou i rapae. Hau atu â, te vai ra e maha taata hau i tapeahia teie e faaineine nei no te bapetizoraa.
Haamauruururaa a te feia mana toroa o te fare tapearaa
“Ua ite-maite-hia ‘te tauiraa o te feia i faautuahia,’” ta te hoê ïa parau faataa a te fare tapearaa e parau nei. “E rave rahi tei faaea i te puhipuhi i te avaava, e e tamâ maitai ratou i to ratou mau piha tapearaa. E ite-maitai-hia teie mau tauiraa o te haerea i nia i te feia i faautuahia.”
Te faatia ra te vea ra Życie Warszawy e ua mauruuru te faatereraa o te fare tapearaa no Wołów i te mea e “ua titiaifaro te feia i faautuahia; aita ratou e haafifi nei i te feia tiai o te fare tapearaa.” Te tapao faahou ra te tumu parau e ua tahoê maitai atu te feia i tuuhia i rapae hou a hope ai ta ratou utua i te pûpû o te mau Ite no Iehova e eita ratou e rave faahou i te eˈa o te ohipa ino.
E eaha te manaˈo o te taata faatere fare tapearaa? “Mea au roa e mea faufaa roa te ohipa a te mau Ite no Iehova i roto i te fare tapearaa,” ta ˈna ïa e parau nei. Te mauruuru nei te taata faatere fare tapearaa i te mea e “i roto i ta ratou haapiiraa Bibilia [e te mau Ite], e taui te mau mea faufaa e te mau ture a te feia i faautuahia, o te horoa ïa na ratou i te hoê puai aratairaa apî i roto i to ratou oraraa. Mea mǎrû e mea maitai roa to ratou haerea. E feia rave ohipa itoito ratou, aita roa ˈtu ratou e faatupu ra i te fifi.” E riro iho â ïa teie mau manaˈo maitai roa o te feia mana toroa ei hoonaraa na te mau Ite i ohipa e te feia i tapeahia i te fare tapearaa no Wołów.
Te taa maitai nei i te mau Ite i haere atu i te fare tapearaa te mau parau a Iesu: “Ua ite au i ta ˈu iho [mamoe], e ua itehia vau e [ta ˈu mau mamoe]. . . . E faaroo mai hoi ratou i to ˈu reo, ia hoê aˈe nǎnǎ, e hoê hoi tiai.” (Ioane 10:14, 16; MN) Eita roa ˈtu te mau patu o te hoê fare tapearaa e opani i te Tiai mamoe Maitai, o Iesu Mesia, ia haaputuputu i te feia e au i te mamoe. Te mauruuru nei te mau Ite no Wołów i te mea e ua noaa ia ratou te haamaitairaa e apiti i roto i teie taviniraa oaoa. E te tiaturi nei ratou ia Iehova e e tamau oia i te haamaitai na roto i te tautururaa i te mau mafatu ofai e rave rahi atu â ia farii i te parau apî maitai o te Basileia hou te hopea e tae mai ai.—Mataio 24:14.
[Tumu parau tarenihia i te api 27]
Te fifi o “te pêpe rarahi”
“I muri aˈe i to ˈna faaearaa i roto i te fare tapearaa no te hoê tau, mea pinepine te hoê taata i tapeahia i te ore e taa faahou eaha te auraa te oraraa ma te tiamâ, aore ra oia anaˈe,” ta te mau Ite e ohipa nei i te fare tapearaa no Wołów ïa e tapao nei. “To matou fifi, o te fifi iho â râ o ‘te pêpe rarahi,’ te hoê taata i tuuhia i rapae i te fare tapearaa o te ore i ite i te haapao ia ˈna iho. No reira te tuhaa ohipa a te amuiraa e hau aˈe ai i te haapii-noa-raa i te parau mau o te Bibilia ia ˈna. E tia ia matou ia faaineine ia ˈna i te riro mai ei melo no te totaiete taata, a faaara ˈi ia ˈna i te mau mea atâta e te mau faahemaraa apî ta ˈna e nehenehe e farerei. Noa ˈtu e e haapao maitai matou eiaha e paruru rahi roa ia ˈna, e tia ia matou ia tauturu ia ˈna ia rave i te hoê haamataraa apî i roto i te oraraa.”