“E rave rahi ta tatou, te mau Katolika, e haapii mai na roto mai ia ratou”
NA TE hoê orometua haapii no Bari, i Italia, teie faahitiraa no nia i te mau Ite no Iehova, a haapii noa ˈi oia i roto i ta ˈna piha haapiiraa tuarua no nia i te aamu o te haapaoraa. Ua parau atu te orometua haapii i te mau tamarii haapii e e faaohipa oia i te mau ripene video ei ravea no te haapiiraa. I to ˈna faarooraa i te reira, ua faaau aˈera te hoê o te mau tamarii haapii o Roberto te iˈoa, 18 matahiti, e ia faaôhia ta ˈna haapaoraa i roto i te tauaparauraa. Ua pûpû atu oia i te ripene video Te mau Ite no Iehova—Te hoê iˈoa, te hoê faanahonahoraa (Farani). Ua farii oia i te pûpûraa a Roberto, e ua mataitai te taatoaraa o te pǔpǔ o na 30 tamarii haapii i te ripene video. “Ua putapû roa te taatoaraa i te tahoêraa, te nahonahoraa, e te here hohonu e itehia ra i rotopu i te mau Ite no Iehova,” o ta Roberto ïa e parau ra. “Ua maere roa ˈtu â ratou i te iteraa e te neneihia ra i te mau avaˈe atoa e 40 mirioni vea o Te Pare Tiairaa e 36 mirioni vea o te A ara mai na!”
E rave rahi mau hoa haapiiraa to Roberto i parau i muri aˈe i to ratou mataitairaa i te ripene video e: “Aita vau i manaˈo noa ˈˈe e mea nahonaho roa outou.” No nia i te mau Ite no Iehova, ua parau te orometua haapii i ta ˈna mau tamarii haapii e: “A hiˈo na e mea nafea to ratou faaroo e turai ai ia ratou ia vai hoê noa e te nahonaho. E rave rahi ta tatou, te mau Katolika, e haapii mai na roto mai ia ratou.” Ua turu rahi te ripene video e ta ratou tauaparauraa i muri aˈe ia taa-maitai-hia ˈtu â te mau Ite no Iehova.