Te haamoriraa i te Atua ma te parau mau

Ia fariihia te haamoriraa e te Atua, e tia ia niuhia i nia i te parau mau. (Ioane 4:23) Te faaite ra te Bibilia i te feia haamori mau mai te feia no roto i “te [“amuiraa,” MN] o te Atua ora ra, o te pou e te tumu o te parau mau ra.” (Timoteo 1, 3:15) Eita noa te feia i roto i te amuiraa o te Atua e tiaturi i te parau mau a te Atua e ora atoa râ ratou ia au i te reira e e paruru ratou i te reira ma te faaite i te reira na te fenua atoa nei.—Mataio 24:14; Roma 10:9-15.

MEA matau-maitai-hia te mau Ite no Iehova no ta ratou ohipa haapiiraa Bibilia e ravehia ra i teie nei i roto hau atu i te 200 fenua. E tuatapapa ratou i te Bibilia e e haapii ratou i te reira i te taata mai te parau mau, ma te ore e anoi atu i te mau philosophia a te taata. Ua matau anei outou i ta ratou mau haapiiraa i niuhia i nia i te Bibilia? E rave rahi te haamarirau i te faaroo i te mau Ite no Iehova no te manaˈo hape e haapararehia ra i nia ia ratou. Te titauhia nei râ te feia mafatu tia ia faaoti no ratou iho e e parau mau anei ta te mau Ite e poro ra aore ra eita. Eiaha te hoê faaotiraa faufaa mai teie ia niuhia i nia i tei faaroo-noa-hia. E rave rahi tei faanaho i ta ratou iho tuatapaparaa i te mau haapiiraa a te mau Ite no Iehova tei faufaa-rahi-hia.

E faaore te ite i te parau mau i te mǎtaˈu

A hiˈo na i te hiˈoraa o Eugenia. Ua paari oia i roto i te hoê utuafare Katolika etaeta. Tei roto to ˈna metua tane i te feia i faanaho i te fariiraa i te pâpa i Mexico i te matahiti 1979. Ia ˈna i haere i te tahi mau hoa ra, ua farerei Eugenia i te mau Ite no Iehova. Ma to ratou tauturu ua haamata aˈera oia i te tuatapapa maitai aˈe i ta te Bibilia e parau ra. Te haamanaˈo ra oia e: “I te omuaraa, ua haamata te mǎtaˈu i te fa mai. Ua itea mai ia ˈu te parau mau! Te auraa râ, ua hape ïa te rahiraa o ta ˈu mau tiaturiraa tahito. To ˈu utuafare, to ˈu mau hoa, te feia ta ˈu i here—ua hape paatoa ïa. Te fifihia ra vau. Te tamau noa ra vau i te uiui ia ˈu iho e nafea râ to ˈu utuafare i mua i tei itea mai nei ia ˈu. A mairi noa ˈi te mau mahana e ma te tauturu a Iehova, ua haamata aˈera vau i te rave i teie ohipa teimaha. I te hoê mahana, ua faaoti au e paraparau i te hoê hoa o te utuafare, te hoê orometua haapii i te tuatapaparaa no nia i te Atua. Ua faaite au ia ˈna i to ˈu hinaaro e ite mai i te parau mau. Ua parau mai nei oia e, ‘Ia hinaaro oe e ite i te parau mau, a imi i te mau Ite no Iehova.’”

Mai ta Eugenia i mǎtaˈu, ua tiahi to ˈna utuafare ia ˈna i rapae i te fare. Ua tamau noa râ te mau Ite i te tauturu ia ˈna i te pae varua. Te parau ra oia e: “Ua haapuaihia vau no te tia i te pae o te parau mau. Ua itea mai ia ˈu e eita e mâuˈa te aroraa no te reira. Mea faufaa roa te fariiraa mai te mau Ite no Iehova ia ˈu. Ua itea mai ia ˈu te here i roto i te amuiraa Kerisetiano. Ua tauturu mai te haafatataraa ˈtu i te faanahonahoraa a te Atua ia faaruru vau i te mǎtaˈu i te tiaraa o vau anaˈe i te pae o te parau mau.”

A hiˈo na i te tahi atu â hiˈoraa. Ua paari o Sabrina ma te haamatauhia i te mau tauaparauraa utuafare i nia i te Bibilia. Oia mau, ua faatupu ratou i te hoê ‘haapaoraa a te utuafare.’ Ua riro ei peu matauhia e ana te amuiraa ˈtu i roto i te mau melo o te mau haapaoraa rau no te faaite atu i to ratou mau hape. Ia pûpû atu te hoê Ite no Iehova i te hoê haapiiraa Bibilia na ˈna, ua farii oioi oia ma te manaˈo e faahapa i ta ratou mau tiaturiraa. Te haamanaˈo ra oia e: “I muri aˈe i to ˈu haapiiraa hau atu i te hoê matahiti, ua haamata aˈera vau i te mǎtaˈu e e erehia vau i ‘ta ˈu parau mau.’ Mea ohie roa na ˈu te faaiteraa i te hape o te mau haapaoraa e rave rahi ta ˈu i apiti, i teie râ taime, e ere i te mea ohie.”

No to ˈna mǎtaˈu, ua faaea aˈera o Sabrina i ta ˈna haapiiraa Bibilia e te mau Ite no Iehova. I reira râ to ˈna iteraa i te ereraa i te pae varua. Ua opua aˈera oia e haamata faahou i te haapiiraa e i te pae hopea, ua farii aˈera oia i teie parau mau i ite-apî-hia. Ua haere o Sabrina i mua e tae roa i te hinaaroraa e opere i ta ˈna e haapii ra ia vetahi ê. Ua ani roa oia e e apee oia i te mau Ite i roto i ta ratou taviniraa i tera e tera fare. Te faataa ra Sabrina e: “Hou vau a fariihia ˈi e poro na muri i te mau Ite no Iehova, ua anihia mai au e: ‘E hinaaro mau anei oe e riro mai ei Ite no Iehova?’ ‘Eita!’ ta ˈu ïa i pahono. Ua tupu faahou te mǎtaˈu i roto ia ˈu.” I te pae hopea, i muri aˈe i to ˈna tamau-noa-raa i te haere i te mau putuputuraa atoa e te hiˈopoaraa i te nunaa o te Atua nafea ratou e faaohipa ˈi i te mau faaueraa tumu a te Bibilia, ua faˈi atura Sabrina e e parau mau iho â te reira. Ua bapetizohia oia e e vahine poro ma te taime taatoa oia i teie nei.

No te aha e taa ê roa ˈi?

Peneiaˈe e ui vetahi e, ‘No te aha te mau haapiiraa a te mau Ite no Iehova e taa ê roa ˈi i ta te tahi mau haapaoraa?’ E tauturu te hoê hiˈoraa poto i ta te mau Ite e tiaturi ra ia ite outou e e mau Kerisetiano manaˈo tae mau ratou, e e feia tuatapapa i te Bibilia haapao maitai ratou. Te faaitoito atu nei matou ia outou ia hiˈo roa i roto i ta outou iho Bibilia i te mau irava i roto i te haapotoraa o ta ratou mau tiaturiraa tumu e vai ra i nia ˈˈe.

Na roto i te hiˈopoa maite atu â i ta te mau Ite no Iehova e tiaturi ra e nafea ratou e pee ai i ta te Bibilia e haapii ra, e nehenehe outou e haamaitaihia i te tiamâraa ta te parau mau e horoa mai. (Ioane 17:17) Aita e tumu no te mǎtaˈu i te parau mau. A haamanaˈo i te tǎpǔ a Iesu: “E ite ïa outou i te parau mau, e na te parau mau outou e faatiamâ.”—Ioane 8:32.

[Tumu parau tarenihia i te api 6]

TE TAHI MAU TIATURIRAA TUMU A TE MAU ITE NO IEHOVA

◯ O Iehova te Atua Mana hope. E itehia to ˈna iˈoa hau atu i te 7 000 taime i roto i te mau papai tahito roa ˈˈe o te Bibilia.—Salamo 83:18.

◯ E Tamaiti a te Atua o Iesu Mesia i haere mai i te fenua nei e horoa i to ˈna ora no te huitaata. (Ioane 3:16, 17) E pee te mau Ite no Iehova i te mau haapiiraa a Iesu Mesia mai te itehia i roto i te mau Evanelia.

◯ No roto mai te iˈoa o te mau Ite no Iehova i te Isaia 43:10 o te parau ra e: “Te parau maira Iehova, O outou to ˈu ite.”

◯ Te Basileia ta te taata e pure i roto i te pure “To matou Metua,” e faatereraa ïa i nia i te raˈi o te fatata roa i te faaore i te mauiui e te oto o te ao nei e te faatupu i te Paradaiso ta te Bibilia e tǎpǔ ra.—Isaia 9:6, 7; Daniela 2:44; Mataio 6:9, 10; Apokalupo 21:3, 4.

◯ E nehenehe te taata atoa e haapao i te hinaaro o te Atua e fanaˈo i te mau haamaitairaa a te Basileia e a muri noa ˈtu.—Ioane 17:3; Ioane 1, 2:17.

◯ E tia i te mau Kerisetiano ia faaau i to ratou haerea i nia i ta te Bibilia e parau ra. E tia ia ratou ia tutava i te riro ei feia tia, i te ora ma te viivii ore e te tia i te pae morare e i te faaite i te aroha i to ratou taata-tupu.—Mataio 22:39; Ioane 13:35; Korinetia 1, 6:9, 10.

[Hohoˈa i te api 5]

Te haapii nei te mau Ite no Iehova i te parau mau o te Bibilia i te taata i roto hau atu i te 200 fenua