“Na te parau mau outou e faatiamâ”
“E ite ïa outou i te parau mau, e na te parau mau outou e faatiamâ.” O ta Iesu ïa i parau a haapii ai oia i te nahoa taata i roto i te hiero i Ierusalema. (Ioane 8:32) Mea ohie na te mau aposetolo a Iesu ia ite i te mau haapiiraa a Iesu mai te parau mau. Ua ite ratou i te mau haapapuraa e rave rahi e no ǒ mai to ratou orometua haapii i te Atua ra.
I TEIE râ mahana, e nehenehe te tahi pae e manaˈo e mea fifi ia ite i te parau mau ta Iesu i faahiti. Mai i te tau o te peropheta Isaia, i teie mahana, te vai ra ‘teie e parau nei i te ino ra, e maitai, e te maitai ra, e ino; teie e parau nei i te pouri ra, e maramarama, e te maramarama ra, e pouri; teie e parau nei i te maramara ra, e momona, e te momona ra, e maramara.’ (Isaia 5:20) No te rahi o te mau manaˈo, te mau philosophia, e te mau huru oraraa e paturuhia nei i to tatou nei mahana, e rave rahi taata e manaˈo ra e e faaauraa to te mau mea atoa e aita e parau mau.
Ia parau atu Iesu i te feia e faaroo ra ia ˈna e na te parau mau ratou e faatiamâ, ua pahono ratou e: “E tamarii matou na Aberahama, aore â matou i riro ei tîtî na vetahi ê; eaha oe i parau mai ai e, E faatiamâhia outou?” (Ioane 8:33) Aita ratou e hinaaro ra e na te hoê taata aore ra te hoê mea ratou e faatiamâ. I reira râ to Iesu faataaraa ˈtu e: “Oia mau ta ˈu e parau atu nei ia outou, Te taata atoa e rave i te hara ra, e tîtî ïa na te hara.” (Ioane 8:34, MN) E nehenehe te parau mau ta Iesu e faahiti ra e iriti i te uputa o te tiamâraa i te hara. Ua parau Iesu e: “Na te Tamaiti outou i faatiamâ ra, ua tiamâ mau ïa outou.” (Ioane 8:36) No reira, te parau mau e faatiamâ i te taata, te parau mau ïa no nia ia Iesu Mesia, te Tamaiti o te Atua. Maoti noa te faaroo i te tusia o te oraraa taata tia roa o Iesu e nehenehe ai te hoê taata e faatiamâhia i te hara e te pohe.
I te hoê taime ê, ua parau Iesu e: “E haamaitai oe ia ratou i te parau mau na oe; o to parau na te parau mau.” (Ioane 17:17) Te parau a te Atua i papaihia i roto i te Bibilia, o te parau mau ïa e nehenehe e hopoi mai i te tiamâraa i te tiaturiraa niu ore e te haamoriraa hape. Te vai ra i roto i te Bibilia te parau mau no nia ia Iesu Mesia o te aratai i te taata ia tuu i te faaroo i nia ia ˈna e o te iriti i te eˈa o te hoê tiaturiraa nehenehe roa no a muri aˈe. E ohipa faahiahia mau te iteraa i te parau mau o te Parau a te Atua!
Eaha te faufaaraa i te iteraa i te parau mau? E rave rahi haapaoraa i teie mahana, a faahua noa ˈi e te pee ra ratou i te Bibilia, i hema rahi roa i te mau philosophia e te mau tutuu a te taata. Mea pinepine, mea haapeapea ore aˈe te mau aratai haapaoraa i te tanoraa o ta ratou poroi i te fariiraahia i te reira e te nahoa taata. Te manaˈo nei te tahi pae e e mauruuru te Atua i te mau haamoriraa atoa, e haapao noa oia e mea na roto te reira i te manaˈo tae. Ua faataa râ Iesu Mesia e: “Ua fatata râ, e teie nei hoi taua hora, e haamori ai i te Metua te feia haamori mau ra, ma te varua e te parau mau: o te huru ïa o te feia haamori ta te Metua e titau nei.”—Ioane 4:23.
Ia hinaaro tatou e haamori i te Atua ma te au, e tia ia tatou ia ite i te parau mau. E tumu parau faufaa roa teie. E au to tatou oaoa mure ore i te reira. No reira, e tia ia ui te taata atoa ia ˈna iho e: ‘E au anei ta ˈu haamoriraa i te Atua? Te anaanatae mau ra anei au i te haapii i te parau mau o te Parau a te Atua? Aore ra te mǎtaˈu ra anei au i ta te hoê maimi-maitai-raa e faaite mai?’