Te hoê faaipoiporaa taa ê roa

I TE pae apatoerau no Mozambique, te vai ra te hoê peho heeuri haaatihia e te mau mouˈa nehenehe—mea taratara vetahi, area te tahi atu ra, ua tapoˈihia ïa e te mau ururaau e te mau faaapu ruperupe. Tei reira hoi te oire iti no Fíngoè. I te mau po marama i te tau toetoe, e anapanapa te mau fetia i nia i te raˈi, e i te mea e mea anaana roa te avaˈe, e turama oia i te mau fare tapoˈihia e te papaa iti o te feia no te oire iti. I teie vahi faahiahia roa ïa i tupu ai te hoê faaipoiporaa taa ê.

Tau hanere taata tei haere na raro tau hora e tau mahana atoa te maoro, i teie oroa taa ê. Ua haere vetahi na roto i te mau vahi hotu ore e te atâta, parahihia e te mau hyène, te mau liona, e te mau elefani. Taa ê atu i to ratou iho mau otaa, ua afai atoa mai e rave rahi ratere i te moa, te puaaniho, e te maa tupu. I muri aˈe i to ratou tapaeraa i te oire iti, ua haere ratou i nia i te hoê mahora i reira hoi e faatupu-noa-hia ˈi te mau tairururaa kerisetiano. Noa ˈtu te rohirohi no te tere, mea oaoa ratou, e ua faaite to ratou mata ataata i to ratou hinaaro ru e ite i te mea e tupu i muri iho.

O vai ma te feia e faaipoipo? Mea rahi ratou! Oia, e rave rahi taata e faaipoipo. Aita teie mau taata e apiti ra i roto i te hoê faaipoiporaa rahi faahiahia roa. Tera râ, e feia haavare ore ratou e e opuaraa maitai ta ratou, aita hoi ratou i nehenehe na mua ˈˈe e haamana i to ratou faaipoiporaa no te mea e mea atea roa to ratou faaearaa i te mau piha hau tivila. Ua ite teie mau taata atoa i te mau faatureraa a te Atua no nia i te faaipoiporaa, i to ratou haapiiraa i te Bibilia e te mau Ite no Iehova. Ua haapii ratou e e tia ia ratou ia faaipoipo ia au i te mau ture o te fenua, ia auhia mai ratou e to ratou Poiete, te Tumu o te faaipoiporaa, mai ia Iosepha raua o Maria o tei faaî i te mau titauraa no te tapao i te iˈoa i te area taime o te fanauraa o Iesu.—Luka 2:1-5.

Te faaineineraa i te oroa

Ua faaoti te amaa a te mau Ite no Iehova no Mozambique e tauturu atoa mai. Na mua, ua anihia i te mau Piha faatere hau o te Haavaraa e o te Fenua i roto i te oire pu ra o Maputo, no te faataa e eaha te mau ohipa e titauhia ra e te ture. I muri iho, ua ani atura te mau mitionare no te oire pu o te mataeinaa no Tete i te feia faatere no te faaau â i te mau faanahoraa. Ua faataahia ˈtura te hoê taio mahana e reva ˈi te mau mitionare e te feia toroa no te Notera e te Tuhaa Tapaoraa Tivila, i te oire iti no Fíngoè. I taua taime atoa ra, ua hapono te amaa i te hoê rata haamaramaramaraa o te horoa ra i te mau faaueraa i te mau amuiraa atoa e apiti mai. Ua tiai ru te mau Ite e te feia toroa atoa no reira i taua oroa taa ê.

I te Sabati 18 no Me 1997, ua tae e toru mitionare e te feia toroa a te hau i Fíngoè. Ua faaineine te feia mana no reira i te mau fare au maitai no te feia toroa i pihai iho mai i te fare a te hau. Teie râ, no to ratou maere rahi i te farii maitai o te mau Ite no Iehova, ua hinaaro aˈera te feia toroa ratere e faaea i pihai iho i te mau mitionare i roto i te mau fare iti hamanihia e te mau mea e vai ra. Ua maere ratou i te faarooraa e e matahiapo te hoê o te feia tunu maa, i roto i te amuiraa no reira, e tei rotopu te hoê tiaau ratere i te feia tauturu o te rave ra i te mau ohipa haihai roa no te faaineine i te faaipoiporaa. Ua ite atoa ratou i te huru maitai o te mau mitionare, o tei faaea ma te ore e amuamu i roto i te hoê fare iti haihai e tei hopu ma te taipu i te pape i roto i te hoê farii nainai. Aita ratou i ite aˈenei i teie huru taairaa paari i rotopu i te mau taata no te mau huru oraraa e rave rau. Te mea râ i haamaere roa ia ratou, o te faaroo ïa i faaitehia no te rave i te mau haapaeraa rahi no te faaau atu i te ture o te fenua e te faanahoraa a te Atua.

Te hoê oroa oaoa

A tae mai ai te feia e faaipoipo, ua faaineine oioi atura ratou no te tuhaa matamua o te faaipoiporaa: te noaaraa mai te hoê parau fanauraa. Ua tiai atura ratou paatoa ma te faaoromai, te tahi i muri iho i te tahi, i mua i te pǔpǔ Haamanaraa Tivila no te horoa ˈtu i ta ratou iho mau haamaramaramaraa. I muri iho, ua anai faahou ratou, te tahi i muri iho i te tahi, no te pata ia ratou i te hohoˈa, i muri iho, ua haere ratou e tii i ta ratou mau parau tiaraa i te pǔpǔ ra no te Tuhaa Tapaoraa Tivila. I muri iho, ua hoˈi faahou ratou i te pǔpǔ Haamanaraa Tivila no te faaineine i te parau faaipoiporaa hinaaro-rahi-hia. I muri iho i te reira, ua tia noa ratou i nia ma te faaoromai a tiai noa ˈi e ia piihia mai to ratou iˈoa na roto i te haapuai reo. E taime horuhoru te horoaraahia te mau parau faaipoiporaa. E oaoa rahi tei tupu a afai ai te feia faaipoipo taitahi i ta ratou parau faaipoiporaa i nia mai te hoê tapao faufaa roa no te re.

Ua tupu teie mau mea atoa i nia i te mahana puai. Aita râ te veavea e te repo puehu i haafifi i te oaoa o te oroa.

E mea faaeta maitai te mau tane, e rave rahi e pereue e e taamu arapoa to ratou. Ua oomo mai te mau vahine i te mau ahu tumu, tae noa ˈtu i te hoê ahu roa e te mau peni oraora, piihia e capulana, tei taamuhia i nia i to ratou tauupu. Te amo ra vetahi i ta ratou aiû tei vehîhia i taua ahu atoa ra.

E mea tere maitai te mau mea, tera râ, ua rahi roa te feia e faaipoipo i te hoê noa mahana. I te haapoiriraa, ua faaoti atura te feia toroa a te hau ma te maitai e tamau i te tauturu i te feia faaipoipo. Ua parau ratou e eita ta ratou e nehenehe e faarue i “to matou mau taeae” e tiai noa ra, i muri aˈe i to teie feia raveraa i te haapaeraa rahi no te haere mai i reira. E haamanaˈo-noa-hia teie huru feruriraa e rave amui i te ohipa e te haapaeraa ia ˈna iho.

E mea toetoe roa i te po. Tei roto vetahi i te mau fare iti, area te rahiraa o te feia faaipoipo ra, to rapaeau ïa e tamahanahana ra ia ratou ati aˈe i te auahi. Aita te reira i faaiti i te oaoaraa o te oroa. Puai aˈe i te paapaainaraa o te auahi, te faaroohia ra te ata e te himene, himenehia i nia e maha nota. E rave rahi tei faatia i to ratou tere, a tapea noa ˈi i ta ratou mau parau apî i noaa mai.

I te aahiata, ua haere vetahi i te pu o te oire iti no te hoo i ta ratou mau moa, mau puaaniho, e mau maa tupu no te tauturu i te aufau i te haamâuˈaraa no te haamana i to ratou faaipoiporaa. Ua rave mau â e rave rahi i “te mau haapaeraa” o taua mau animala ra, ma te hoo mama aˈe i to ratou faito hoo mau. No te feia veve, e mea faufaa roa te hoê puaaniho e mea moni atoa; ua ineine râ ratou i te rave i teie haapaeraa no te faaipoipo e no te faaoaoa i to ratou Poiete.

Te mau fifi o te tere

E rave rahi feia faaipoipo tei haere na raro e mau kilometera te atea no te tae mai i reira. O ta Chamboko ïa raua ta ˈna vahine ra o Nhakulira, i rave. Ua faatia raua i to ratou aamu i te piti o te po o te oroa a tamahanahana ˈi raua i to ratou avae i pihai iho i te auahi. Noa ˈtu e e 77 matahiti to ˈna, ua po hoi to ˈna hoê mata e te tahi mata ra, ua mohimohi ïa, ua haere avae noa o Chamboko e toru mahana e te toea o ta ˈna amuiraa, no te mea ua faaoti oia e haamana i to ˈna faaipoiporaa e 52 matahiti te maoro.

Ua faaea aˈena o Anselmo Kembo, e 72 matahiti to ˈna, ia Neri tau 50 matahiti te maoro. Tau mahana na mua ˈˈe i te tere, ua puta ino to ˈna avae i te hoê tara rahi a tanu ai oia i roto i ta ˈna faaapu. Ua horo atura oia i te fare maˈi piri roa ˈˈe no te rapaau i to ˈna avae. Noa ˈtu râ, ua faaoti oia e rave i teie tere na raro noa, ma te haere pirioi i Fíngoè ma te mauiui. E toru mahana te maoro. Aita o Anselmo i nehenehe e tapea i to ˈna oaoa a tapea ˈi oia i ta ˈna parau faaipoiporaa i roto i to ˈna rima.

Te tahi atu taata i faaipoipo apî, o Evans Sinóia ïa, e rave rahi vahine ta ˈna na mua ˈˈe. I to ˈna haapiiraa i te parau mau o te Parau a te Atua, ua faaoti atura oia e haamana i to ˈna faaipoiporaa e ta ˈna vahine matamua, aita râ teie vahine i farii, ua faarue maira oia ia ˈna no te tahi atu tane. Area te piti o ta ˈna vahine ra, o tei haapii atoa i te Bibilia, ua farii ïa i te faaipoipo ia ˈna. Ua haere raua toopiti na raro na roto i te hoê tuhaa fenua atâta, parahihia e te mau liona e te tahi atu mau animala taehae. I muri aˈe i te hoê tere e toru mahana, ua manuïa atoa raua i te faaipoipo ia au i te ture.

I te Mahana pae, e pae mahana i muri aˈe i to te mau mitionare e te feia toroa taeraa mai, ua oti te ohipa. Te faahopearaa, oia hoi e 468 parau tiaraa e e 374 parau fanauraa tei horoahia. E 233 parau faaipoiporaa tei horoahia! Ua tupu te oaoa rahi. Noa ˈtu te rohirohi, ua farii ratou pauroa e e mea hoona mau â te reira. Ma te feaa ore, e mau roa teie oroa i roto i te feruriraa e te mafatu o te feia atoa i apiti mai, e ore roa e moehia. Oia mau, e faaipoiporaa taa ê roa teie!