Te mauruuru ra anei outou i te faanahonahoraa a Iehova?
“Te na ô maira Iehova, Te mau raˈi tau terono, e te fenua nei tau taahiraa avae.”—ISAIA 66:1.
1, 2. (a) Eaha te mau tapao papu o te faanahonahoraa a Iehova ta outou e nehenehe e faaite mai? (b) Ihea Iehova e parahi ai?
E TIATURI anei outou e e faanahonahoraa ta Iehova? Mai te peu e e, no te aha outou e tiaturi ai i te reira? Peneiaˈe e pahono outou e: ‘Oia mau, e Piha no te Basileia to matou. E amuiraa faanaho-maitai-hia ta matou e te hoê tino matahiapo. E tiaau haaati ta matou e nomino-tamau-hia no te haere mai e farerei tamau ia matou. E amui atu matou i roto i te mau rururaa e te mau tairururaa faanaho-maitai-hia. E amaa a te Taiete Watch Tower ta matou i to matou fenua. Papu mau, te haapapu mai nei teie atoa nei mau mea e hau atu â e te vai ra ta Iehova te hoê faanahonahoraa teie e tere nei.’
2 E mau tapao haapapu anaˈe teie no te hoê faanahonahoraa. Mai te peu râ e ta tatou e ite nei e e farii nei o to te fenua nei anaˈe, aita ïa e papu roa ra ia tatou te faanahonahoraa a Iehova. Ua faaite Iehova ia Isaia e te fenua nei, o Ta ˈna noa ïa taahiraa avae, area te mau raˈi ra, o Ta ˈna ïa terono. (Isaia 66:1) Eaha te mau raˈi ta Iehova e faahiti ra? To tatou reva mataˈi? Te reva teitei? Aore ra te tahi atu â vahi oraraa? Ua parau Isaia no nia i to Iehova “parahiraa [“teitei,” MN] moˈa e te nehenehe,” e ua faataa te papai salamo i teie mau raˈi mai “te vahi i parahihia e ana ra.” No reira, te faahiti ra te mau “raˈi” i roto i te Isaia 66:1 i te ao varua itea-ore-hia i reira Iehova e parahi ai i nia i te parahiraa teitei roa ˈˈe, aore ra hopea.—Isaia 63:15; Salamo 33:13, 14.
3. Nafea tatou e nehenehe ai e upootia i nia i te mau feaaraa?
3 No reira, mai te peu e te hinaaro mau nei tatou e taa e e farii i te faanahonahoraa a Iehova, e tia ia tatou ia hiˈo i te mau raˈi. I reira vetahi pae e fifihia ˈi. I te mea e e faanahonahoraa itea-ore-hia ta Iehova, nafea ïa tatou e ite ai e te vai mau ra te reira? E nehenehe vetahi pae e farerei i te feaaraa, a ui maere ai e, ‘Nafea e nehenehe ai e papu ia tatou?’ Oia mau, nafea te faaroo e nehenehe ai e upootia i nia i te feaaraa? Na ravea e piti, te haapiiraa taitahi hohonu ïa i te Parau a te Atua e te haere-tamau-raa e te raveraa i ta tatou tuhaa i roto i te mau putuputuraa kerisetiano. I reira tatou e ite ai i te maramarama o te parau mau ia ore te feaaraa. Ua itehia te tahi atu â mau tavini a te Atua tei feaa na. E hiˈopoa anaˈe i te huru o te tavini a Elisaia i to Iseraela aroraahia e te arii no Arama.—A faaau e te Ioane 20:24-29; Iakobo 1:5-8.
Te taata i ite atu i te mau nuu o te raˈi
4, 5. (a) Eaha te fifi i farereihia e te tavini o Elisaia? (b) Nafea to Iehova pahonoraa i te pure a Elisaia?
4 Ua tono te arii no Arama i te hoê nuu faehau rahi mau i te po i Dotana no te haru ia Elisaia. I to te tavini a Elisaia tiaraa mai i nia ia poipoi roa e i to ˈna haereraa mai i rapae, peneiaˈe no te huti i te mataˈi apî i nia i te tafare parahurahu o to raua nohoraa i te pae Hitia o te râ no Ropu, inaha, auê ïa hitimaueraa no ˈna e! E nuu Arama taatoa e te mau puaahorofenua e te mau pereoo tamaˈi te haaati ra i te oire, a tiai ai no te haru i te peropheta a te Atua. Ua tuô aˈera te tavini ia Elisaia e: “Auê, e tau fatu e! [“E nafea,” MN] tatou nei?” Oia ïa, ma te hitahita ore e ma te papu maitai, ua pahono atu Elisaia e: “Eiaha e mǎtaˈu, e rahi to tatou e iti to ratou.” Ua ui maere paha te tavini e: ‘Teihea ratou? Aita vau e ite ra ia ratou!’ I te tahi taime, te reira atoa paha to tatou fifi—te oreraa tatou e ite na roto i te mau mata o te maramarama, aore ra e taa, i te mau nuu o te raˈi.—Te mau arii 2, 6:8-16; Ephesia 1:18.
5 Ua pure aˈera Elisaia e ia araara te mata o ta ˈna tavini. Eaha tei tupu i muri mai? “Ua faaaraara aˈera Iehova i te mata o taua taata apî ra; ite atura oia; e inaha, ua î te mouˈa i te puaahorofenua, e te pereoo auahi, i te haaatiraa ia Elisaia ra.” (Te mau arii 2, 6:17) Oia, ua ite ihora oia i te mau nuu o te raˈi, te mau nuu melahi e tiai ra no te paruru i te tavini a te Atua. I teie nei, e nehenehe ta ˈna e taa i te tiaturi o Elisaia.
6. Nafea e noaa ˈi ia tatou te ite aravihi no nia i te faanahonahoraa a Iehova i nia i te raˈi?
6 E farerei anei tatou i te tahi taime i te fifi no te taa mai te tavini a Elisaia? E hiˈo noa anei tatou i te paeau ite-mata-hia o te mau tupuraa e haamǎtaˈu ra ia tatou aore ra i te ohipa kerisetiano i roto i te tahi mau fenua? Mai te peu e e, e nehenehe anei tatou e tiai i te hoê orama taa ê no te haamaramarama ia tatou? Eita, no te mea te vai ra ia tatou ra te hoê mea aita ta te tavini a Elisaia—te hoê buka taatoa e rave rahi mau orama i roto, te Bibilia, o te nehenehe e horoa mai na tatou i te ite aravihi no nia i te faanahonahoraa i nia i te raˈi. E horoa atoa mai taua Parau i faauruahia ra i te mau faaueraa tumu no te aratai ia tatou ia faatitiaifaro i te mau mea i roto i to tatou feruriraa e to tatou huru oraraa. Teie râ, e tia ia tatou ia tutava i te imi i te ite-maite-raa e ia faahotu i te mauruuru no te mau faanahoraa a Iehova. E e nehenehe tatou e rave i te reira na roto i te haapiiraa taitahi, oia atoa te pure e te feruri-hohonu-raa.—Roma 12:12; Philipi 4:6; Timoteo 2, 3:15-17.
E haapii anaˈe no te taa
7. (a) Eaha te fifi peneiaˈe e farereihia ra e vetahi i te pae o te haapiiraa taitahi? (b) No te aha e titauhia ˈi te tutavaraa i roto i te haapiiraa taitahi?
7 E ere iho â te haapiiraa taitahi i te hoê ohipa oaoa no te mau taata e rave rahi, mai te feia aita i oaoa aˈenei i te haapii i te fare haapiiraa aore ra aita i haere aˈenei i reira. Teie râ, mai te peu e e hinaaro tatou e taa e e farii i te faanahonahoraa a Iehova na roto i to tatou mata o te maramarama, e tia ia tatou ia faahotu i te hinaaro e haapii. E nehenehe anei ta outou e fanaˈo i te hoê amuraa maa maitatai ma te ore e faaineine atu? Mai ta te utuutu maa atoa e faaite mai ia outou, e rave rahi ohipa e titauhia no te faaineine i te hoê amuraamaa maitatai. Teie râ, e nehenehe te reira e amuhia i roto i te hoê noa afa hora aore ra iti aˈe. I te tahi aˈe pae, e nehenehe te mau haamaitairaa a te haapiiraa taitahi e vai noa i te roaraa o te hoê oraraa. E nehenehe te haapiiraa taitahi e riro mai ei ohipa anaanatae mau ia ite tatou i te mau haereraa i mua ta tatou e nehenehe e rave. Ua tano maitai to te aposetolo Paulo parauraa e e tia ia haapao maitai tamau noa tatou ia tatou iho e i ta tatou e haapii ra e ia tamau tatou i te rohi i te taio i mua i te taata. Mea titauhia te tutavaraa tuutuu ore, e nehenehe râ te mau haamaitairaa e riro ei mea mure ore.—Timoteo 1, 4:13-16.
8. Eaha te haerea e faaitoitohia ra i roto i te Maseli?
8 Ua parau te hoê taata paari i mutaa iho e: “E tau tamaiti [aore ra, tamahine], ia farii mai oe i ta ˈu nei parau, e ia vaiiho maite i ta ˈu parau i pihai iho ia oe; ia fariu mai i to tariˈa i te paari; e ia imi to aau i te ite ra; ia titau hua oe i te haapao maitai, e ia faateitei i to reo ia noaa te ite ra; ia imi hua oe ia ˈna mai te ario ra, e ia paheru hua oe ia ˈna, mai te taoˈa hunahia ra; e ite ïa oe i te mǎtaˈu ia Iehova, e noaa ïa ia oe te ite i te Atua.”—Maseli 2:1-5.
9. (a) Nafea te faufaa o te auro e faaauhia ˈi i “te ite i te Atua”? (b) Eaha te mau mauhaa ta tatou e hinaaro no te imi i te ite papu?
9 Te ite ra anei oe o vai te tia ia tutava? Mea pinepine i te faahitihia i te parau ra ‘oe.’ E a tapao na i te parau ra, ‘ia paheru hua oe ia ˈna, mai te taoˈa hunahia ra.’ A feruri na i te feia heru i te ario e te auro ahia senekele i teie nei i Bolivia, i Mexiko, i Afirika Apatoa, e te tahi atu â mau fenua. Ua rave puai ratou i te ohipa, ma te faaohipa i te mau tâpû repo e te mau ope, no te paaro i te ofai no reira mai te mau metara faahiahia. No to ratou haafaufaa-rahi-raa i te auro i ô ai ratou e 591 kilometera eˈa i raro i te fenua i roto i te hoê apoo auro i Kalifonia, i te mau Hau Amui no Marite, tae roa i te hoê hohonuraa fatata 1,5 kilometera—no te imi noa i te auro. Teie râ, e nehenehe anei outou e amu i te auro? E inu i te auro? E turu anei te reira ia outou i roto i te hoê medebara ia pohehia outou i te poia e te poihâ? Eita, mea horoa-noa-hia to ˈna faufaa ma te faito ore, e tauiui noa i te mau mahana atoa mai te itehia ra i roto i te faito hoo na te ao atoa nei. Teie râ, ua pohe te tahi mau taata no te reira. Nafea ïa e tutava ˈi ia noaa te auro i te pae varua a te Atua, “te ite i te Atua”? A feruri na, te ite i te Arii Rahi o te ao taatoa, ta ˈna faanahonahoraa, e ta ˈna mau opuaraa! I te reira paeau, e nehenehe tatou e faaohipa i te mau tâpû repo e te mau ope i te pae varua. O te mau buka aratai Bibilia ïa o te tauturu ia tatou ia heru i te Parau a te Atua e ia ite i to ˈna auraa.—Ioba 28:12-19.
E heru anaˈe no te ite aravihi
10. Eaha ta Daniela i ite i roto i te hoê orama?
10 E heru anaˈe i te pae varua ia noaa mai te ite no nia i te faanahonahoraa a Iehova i nia i te raˈi. Te hoê ravea e noaa ˈi te ite aravihi, e hiˈo anaˈe i te orama a Daniela no To te mau mahana tahito ra i nia i to ˈna terono. Te papai ra o Daniela e: “Te hiˈo ra vau, e haamauhia ihora te mau terono e ua parahi maira To te mau mahana tahito ra, o tei au to ˈna ahu i te hiona i te teatea, e te rouru o tana upoo, mai te huruhuru mamoe maitai ra ïa: e auahi ura to ˈna terono, e to ˈna pereoo e auahi ama ïa. Puroro noa maira te auahi tarapape mai mua mai ia ˈna: e ua tausani hoi te tausaniraa i te taviniraa ia ˈna ra, e ua ahuru hoi te tausaniraa i te manotini i te tiaraa i mua i tana aro: parahi ihora te haavaraa, e ua heheuhia te mau buka.” (Daniela 7:9, 10) O vai teie mau tausani e tavini ra ia Iehova? Te horoa maira te mau faahororaa i ropu i te api o te huriraa Bibilia Traduction du Monde Nouveau, e faaohipahia ei “tâpû repo” e ei “ope,” i te mau irava mai te Salamo 68:17 e te Hebera 1:14. Oia, te feia e tavini ra, o te mau melahi ïa o te raˈi!
11. Nafea te orama a Daniela e tauturu ai ia tatou ia taa i te mau parau a Elisaia?
11 Aita te faatiaraa a Daniela e parau ra e ua ite oia i te mau melahi haapao maitai atoa ta te Atua e faatere. Te vai ra paha mau mirioni atu â. Papu maitai râ e e nehenehe tatou e taa i teie nei no te aha o Elisaia i parau ai e: “E rahi to tatou e iti to ratou.” Ua hemo roa te nuu a te arii no Arama, noa ˈtu â e ua turuhia te reira e te mau melahi haapao ore, te mau demoni, i te mau nuu a Iehova i nia i te raˈi!—Salamo 34:7; 91:11.
12. Nafea outou e nehenehe ai e ite hau atu â no nia i te mau melahi?
12 Peneiaˈe e te hinaaro ra outou e ite hau atu â no nia i teie mau melahi, mai te ohipa ta ratou e rave ra i roto i te taviniraa ia Iehova. Na roto i te parau Heleni no melahi, e nehenehe tatou e ite e e mau vea ratou no te mea te auraa atoa o te reira, e “vea” ïa. Teie râ, te vai hau atu â ra no nia ia ratou. No te ite mai eaha râ, e tia ia outou ia heru. Mai te peu e te vai ra ta outou te Ite aravihi i te mau Papai, e nehenehe outou e tuatapapa i te tumu parau ra “Melahi,” aore ra e nehenehe outou e hiˈo i te mau tumu parau tahito i roto i Te Pare Tiairaa no nia i te mau melahi. E maere roa outou i te rahiraa o te mau mea ta outou e nehenehe e haapii no nia i teie mau tavini a te Atua i nia i te raˈi e e riro outou i te mauruuru i ta ratou tauturu. (Apokalupo 14:6, 7) Teie râ, i roto i te faanahonahoraa a te Atua i nia i te raˈi, e taviniraa taa ê ta te tahi mau mea ora pae varua.
Te mea ta Isaia i ite
13, 14. Eaha ta Isaia i ite i roto i te hoê orama, e nafea te reira i te ohiparaa i nia ia ˈna?
13 I teie nei, e heru anaˈe i te orama a Isaia. Ia taio outou i te pene 6, mai te irava 1 e tae i te 7, e horuhoru roa outou. Te parau ra Isaia e “hiˈo atura” oia “ia Iehova i te parahiraa i nia i te terono,” e “te tia noa ra na seraphi i nia ˈˈe.” Te pii noa ra ratou no nia i te hanahana o Iehova, a faateniteni ai i to ˈna moˈaraa. E tia ia putapû outou na roto noa i te taioraa i teie faatiaraa. Eaha te huru o Isaia? “Ua na ô aˈera hoi au, Auê hoi au nei e! [“No te mea e au ra e ua haamamûhia vau,” MN] [i roto i te Sheol]; e taata vaha viivii hoi au; e tei rotopu hoi au i te mau taata vaha viivii atoa i te parahiraa: ua hiˈo hoi tau mata nei i te arii, ia Iehova sabaota ra.” Auê oia i te horuhoru i taua orama ra e! E o outou?
14 Nafea ïa to Isaia faarururaa i taua orama hanahana ra? Te faataa ra oia e ua haere mai te hoê seraphi e tauturu ia ˈna e na ô maira e: “Ua faaatea-ê-hia [“ta oe hape,” MN], ua faaorehia ta oe hara.” (Isaia 6:7) Ua nehenehe o Isaia e tiaturi i te aroha o te Atua e e haapao maitai i te mau parau a Iehova. I teie nei, eita anei outou e hinaaro e ite hau atu â no nia i teie mau mea ora pae varua tiaraa teitei? Eaha ïa te tia ia outou ia rave? E heru no te mau haamaramaramaraa hau. Te hoê ravea, te faaohiparaa ïa i te mau Buka faahororaa a te Watch Tower, ma te rave i te mau faahororaa i te mau tumu parau haamaramaramaraa e rave rahi.
Eaha ta Ezekiela i ite?
15. Eaha te faaite maira e e nehenehe te orama a Ezekiela e tiaturihia?
15 E hiˈo anaˈe i muri nei i te tahi atu â huru taoˈa poietehia i te pae varua. Ua haamaitaihia o Ezekiela i te iteraa i te hoê orama i faauruahia a faatîtî-noa-hia ˈi oia i Babulonia. A hohora na i ta outou Bibilia i te Ezekiela pene 1, na irava matamua e toru. Nafea te faatiaraa e haamata ˈi? Te parau ra anei te reira e, ‘I te hoê mahana, i te hoê fenua atea roa . . .’? Aita, e ere teie i te hoê aai vahine tahutahu no te hoê tau e au i te aai. Te parau ra te irava 1 e: “E tae aˈera i te toru ahuru o te matahiti, e te maha o te marama, e te pae hoi o te mahana i taua marama ra, tei roto vau i te tîtî i te pape ra i Kebara, iritihia aˈera te raˈi, e ite atura vau i te orama a te Atua.” Eaha ta outou e ite ra no nia i teie irava? Te horoa maira te reira i te hoê taio mahana tano e te hoê vahi taa maitai. Te haafaura maira teie mau haapapuraa i te paeraa o te matahiti o te hopoi-ê-raahia te Arii ra o Iehoiakina, oia hoi te matahiti 613 H.T.T.
16. Eaha ta Ezekiela i ite?
16 Tei nia maira te rima o Iehova ia Ezekiela, e ua ite aˈera oia i te orama maere mau no Iehova i nia i te hoê terono i nia i te hoê pereoo rahi i nia i te raˈi e to ˈna mau huira rahi e mau mata anaˈe tei nia iho. Te haapapuraa ta tatou e anaanatae ra i ǒ nei, te mea ïa e e maha mea ora, e tia tataitahi ra i te pae huira. “Teie to ratou huru; mai to te taata nei â to ratou huru. Taimaha anaˈe â o ratou mata e ati noa ˈˈe ratou, taimaha hoi o ratou pererau e ati noa ˈˈe. . . . E te huru o to ratou mau mata, e e mata taata to ratou, e te mata liona, i te pae atau: e o ratou atoa toomaha ra, e mata puaatoro ïa i te pae aui; e e mata aeto to ratou atoa toomaha ra.”—Ezekiela 1:5, 6, 10.
17. Eaha ta te mata e maha o te mau kerubi e faataipe ra?
17 Eaha mau na teie na mea ora e maha? Te faaite maira o Ezekiela iho e e mau kerubi ratou. (Ezekiela 10:1-3, 14) No te aha e maha mata to ratou? No te faahohoˈa i na ateributi faahiahia e maha o te Arii Rahi ra o Iehova. E taipe te mata aeto no te paari aravihi. (Ioba 39:27-29) Eaha ta te mata puaatoro e faataipe ra? Maoti te puai rahi o to ˈna aˈî e to ˈna mau tapono, e nehenehe te hoê puaatoro e taputô ra e amo i te hoê puaahorofenua e te taata e parahi ra i nia iho, i nia i te aore. Papu maitai, e taipe te puaatoro no te puai otia ore o Iehova. Te faaohipahia ra te liona mai te taipe no te parau-tia mǎtaˈu ore. I te pae hopea, e faataipe te mata taata ma te tano maitai i te aroha o te Atua, i te mea e o te taata anaˈe te mea ora o te fenua nei te nehenehe e faaite i teie hotu ma te maramarama.—Mataio 22:37, 39; Ioane 1, 4:8.
18. Nafea te aposetolo Ioane e tauturu ai ia taa tatou i te faanahonahoraa i nia i te raˈi?
18 Te vai ra te tahi atu â mau orama o te nehenehe e tauturu ia tatou ia faanavai i teie hohoˈa. Mai te mau orama a Ioane i faataahia i roto i te buka Bibilia o te Apokalupo. Ua ite oia, mai ia Ezekiela atoa ra, ia Iehova i nia i te hoê terono hanahana e apeehia ra e te mau kerubi. Te aha ra te mau kerubi? Te pahono ra ratou i te piiraa a te mau seraphi i roto i te Isaia pene 6, i te na ôraa e: “E moˈa, e moˈa, e moˈa, to te [“Atua ra o Iehova, te” MN] Mana hope ra, o tei vai na, e te vai nei, e o te tae mai.” (Apokalupo 4:6-8) Ua ite atoa o Ioane i te hoê arenio i pihai iho i te terono. O vai ra ïa ta te reira e faataipe ra? Te Arenio iho a te Atua, o Iesu Mesia.—Apokalupo 5:13, 14.
19. Na roto i teie haapiiraa, eaha ta outou i taa no nia i te faanahonahoraa a Iehova?
19 Na roto i te arai o teie mau orama, eaha ta tatou i taa? E i te vahi hanahana roa ˈˈe o te faanahonahoraa i nia i te raˈi, te vai ra ïa te Atua ra o Iehova i nia i to ˈna terono ma te apeehia e te Arenio, o Iesu Mesia, oia te Parau, aore ra Logo. Ua ite atoa tatou i te hoê nuu melahi o te raˈi, tei roto atoa te mau seraphi e te mau kerubi. E mau melo ratou no te hoê faanahonahoraa rahi e te tahoê e turu ra i te mau opuaraa a Iehova. E hoê o taua mau opuaraa ra, te pororaa ïa i te parau apî maitai na te ao atoa nei i teie anotau hopea nei.—Mareko 13:10; Ioane 1:1-3; Apokalupo 14:6, 7.
20. Eaha te uiraa e pahonohia i roto i te tumu parau i muri nei?
20 I te pae hopea, te vai ra te mau Ite no Iehova i nia i te fenua e putuputu nei i roto i ta ratou mau Piha no te Basileia no te haapii i te rave i te hinaaro o te Arii Rahi. Papu maitai, i teie nei, e nehenehe tatou e taa e e rahi aˈe to tatou i to te paeau o Satani e o te mau enemi o te parau mau. Te vai noa nei ïa teie uiraa, Eaha te taairaa e vai ra i rotopu i te faanahonahoraa i nia i te raˈi e te pororaa i te parau apî maitai o te Basileia? E tuatapapa te tumu parau i muri nei i te reira e te tahi atu â mau manaˈo.
Mau uiraa no te faahaamanaˈoraa
◻ No te farii i te faanahonahoraa a Iehova, eaha te tia ia tatou ia taa?
◻ Eaha ta te tavini o Elisaia i ite, e nafea to te peropheta faaitoitoraa ia ˈna?
◻ Eaha to tatou manaˈo no nia i te haapiiraa taitahi, e tia ˈi?
◻ Nafea to Daniela, Isaia, e o Ezekiela horoaraa i te mau haapapuraa no nia i te faanahonahoraa i nia i te raˈi?
[Hohoˈa i te api 13]
E hau ê roa te mau haamaitairaa o te haapiiraa taitahi i to te hoê amuraa maa i faaineine-maitai-hia
[Hohoˈa i te api 15]
Mea na roto i te hoê orama no te mau nuu o te raˈi to Iehova pahonoraa i te pure a Elisaia