“Puai e te putapû”
“ANANAHI anaˈe, e faaohipa vau i te reira i roto i te ohipa pororaa, no te mea e mau haapapuraa puai e te putapû to roto,” o ta te hoê Ite no Iehova no Farani ïa i papai. Teie ta te hoê Ite no te mau Hau Amui no Marite i papai: “Ua taio oioi au i te reira e aita vau i nehenehe e tiai no te faaohipa i te reira i roto i te aua taviniraa, no te mea e te farerei nei tatou e rave rahi roa mau taata tâuˈa ore e aita e tiaturi ra i te Bibilia.” Eaha ta raua e faataa ra? O te vea iti ïa E buka no te mau taata atoa 32 api (Farani), tei horoahia mai e te Taiete Watch Tower i te mau Tairururaa Mataeinaa “Te faaroo i roto i te Parau a te Atua” tei tupu i te mau matahiti 1997/1998.
Ua faaineinehia teie vea iti no te tahi mau taata taa ê—te feia e mea ite paha ratou, no nia râ i te Bibilia, e mea iti roa ïa. E mau manaˈo papu maitai to teie mau taata e rave rahi no nia i te Bibilia, noa ˈtu e aita ratou iho i taio aˈenei i te reira. Te fa o te vea iti, o te haapapuraa ïa i te taata taio e e tia ia hiˈopoa i te Bibilia. Aita te vea iti e faahepo ra i te taata taio ia farii i te manaˈo e mea faauruahia te Bibilia e te Atua. Tera râ, e vaiiho oia e na te mau tupuraa e haapapu mai. E ere te mau parau i roto i te mea faateitei, e mau parau maramarama râ e te tano.
Ia au i te manaˈo tei faahitihia i nia nei, ua hiaai ru te feia i tae i te mau tairururaa i te faaohipa i teie vea iti i roto i ta ratou aua taviniraa. Ei hiˈoraa, ua faanahonahohia te hoê faaiteraa taa ê i Farani no te 23 e te 24 no Atete, i reira to te mau hanere tausani ratere apî na te ao nei haaputuputuraa i Paris no te Mahana a te Ui apî na te Ao nei. Tau 2 500 Ite (fatata mai te 16 e tae atu i te 30 matahiti) tei vaiiho 18 000 vea iti na roto i te mau reo Beretane, Farani, Helemani, Italia, Paniora, e Polonia.
Na roto i te mau ravea atoa, e faaohipa anaˈe ïa i teie vea iti, E buka no te mau taata atoa, i roto i ta tatou taviniraa. Ia riro ïa teie vea iti ei mea faufaa no te haapapu i te feia manaˈo au noa e e tia ia ratou ia hiˈopoa i te Bibilia no ratou iho.