Te “Bibilia hoê manimani rima”
UA RIRO mai o Joseph Schereschewsky ei huma i muri aˈe i te hoê maˈi i tupu no te veavea rahi, e ua nehenehe oia e papai na roto noa i te patapataraa e te hoê manimani rima. Teie râ, ua naeahia ia ˈna ta ˈna fa—e huri i te Bibilia na roto i te reo Tinito, hoê o te mau reo fifi roa ˈˈe ia haapii no te hoê taata ê.
E ati Iuda o Schereschewsky mai to ˈna fanauraahia mai â, ua maimi haere râ oia e ua farii ihora i te Kerisetianoraa i to ˈna paariraa mai. I muri aˈe, ua riro maira oia ei mitionare i te fenua Taina. I reira, ua amui atu oia i roto e rave rahi opuaraa no te huriraa, mai te matahiti 1866 mai â e tae noa ˈtu i te mau matahiti matamua o te senekele 20. No te mea e ua paari mai oia ei ati Iuda, mea ite aˈe ïa o Schereschewsky i te reo Hebera i to ˈna mau hoa huri. No reira, ua horoahia maira e na ˈna e huri i te taatoaraa o te mau Papai Hebera. I te hopearaa o ta ˈna tau ohiparaa roa, ua faaoti atoa oia i te hoê huriraa Tinito o te Bibilia taatoa ma te mau faahororaa.
Ei taata huri Bibilia, ua riro o Joseph Schereschewsky ei taata turu itoito i te mau iritiraa na roto i te reo o te nunaa. E ere râ ta ˈna ohipa i te mea ohie. E mea taa ê roa ta ˈna tuhaa i rave i roto i te huriraa i te Bibilia Tinito, o ta te hoê buka (The Book of a Thousand Tongues) ïa e parau ra, “no te mea e mea maramarama roa e ua ravehia noa ˈtu te mau fifi e rave rahi.”
I muri aˈe i te paruparuraa nau rima o Schereschewsky, ua haere noâ oia i mua i roto i ta ˈna ohipa. Mea rohirohi roa no ˈna ia patapata, no te mea eita ta ˈna e nehenehe faahou e faaohipa i to ˈna nau rima mai mutaa ihora. No reira oia i pii ai i teie huriraa, ta ˈna Bibilia hoê manimani rima. No te faaoti i teie Bibilia noa ˈtu to ˈna mau hapepa, ua tutava noa o Schereschewsky e 25 matahiti te maoro. Na roto i to ˈna huru tuutuu ore, ua tauturu oia e ia papuhia te Parau a te Atua na roto i te reo Tinito—te reo paraparau-rahi-roa ˈˈe-hia e te taata i te tahi atu.
[Faaiteraa i te fatu o te hohoˈa i te api 11]
Na hohoˈa e piti: Courtesy of American Bible Society Archives