E mau tîtî anei no te taata aore ra e mau tavini no te Atua?

“E HAAPOPOUHIA te mau Ite no Iehova ma te manaˈo rau.” O te reira ïa te faˈiraa a te buka Helemani ra Seher, Grübler, Enthusiasten (Feia ite orama, feia manaˈonaˈo, feia paieti rahi). Noa ˈtu to ˈna huru faahapahapa i te mau Ite, te farii ra oia e: “No te rahiraa, e oraraa hapa ore to ratou, e huru oraraa au noa. E feia rave ohipa itoito e te haapao maitai ratou, e huiraatira hau e e feia aufau i te tute ma te tia. Eita ratou e titau hua i te moni. . . . E tia ia aruehia to ratou haerea auraro i te mau tairururaa. E aifaito to ratou feruriraa faatusiaraa i te tahi noa ˈˈe pǔpǔ haapaoraa; e no nia i te taviniraa, ua hau aˈe ratou i te maitai i te taatoaraa. Te mea râ e faateitei ia ratou i nia ˈˈe i te mau ekalesia e te mau pǔpǔ kerisetiano atoa o to tatou nei tau, o te opua-papu-raa ïa ma te aueue ore o te rahiraa o ratou i te faaiteraa i ta ratou mau haapiiraa i raro aˈe i te mau huru tupuraa atoa e i mua i te mau ati atoa.”a

Noa ˈtu teie haafaufaaraa maitai, te tamata ra vetahi mau reo i te horoa i te hoê huru hiˈoraa taa ê mau no nia i te mau Ite no Iehova. I roto i te rahiraa o te mau fenua na te ara, ua faatupu tahaa noa te mau Ite i ta ratou taviniraa faaroo e mau ahuru matahiti te maoro ma te ore e haapeapeahia. E mau mirioni taata o tei matau ia ratou, o te faatura ra ia ratou, e o te farii ra e e tiaraa to ratou ia rave i ta ratou haapaoraa. No te aha ïa te vai ra te tahi feaaraa no nia i te mau Ite no Iehova?

Peneiaˈe teie te hoê tumu o te feaaraa, aita i maoro aˈenei, ua haamata e rave rahi pǔpǔ haapaoraa ê atu i te faatupu i te hamani-ino-raa i te tamarii, i te haapoheraa rahi ia ratou iho, e i te aroraa a te feia totoa. Parau mau, tei te mau vahi atoa teie mau haerea tano ore roa, eiaha i rotopu noa i te feia faaroo. No nia râ i te haapaoraa, ua feaa e rave rahi taata, e ua tae roa vetahi i te patoi.

Te mau ati i te peeraa i te taata

Ua faataahia te hoê “pǔpǔ faaroo amaha” ei “pǔpǔ o te piri i te hoê haapiiraa taa ê aore ra i te hoê aratai.” Hoê â huru, te feia e pee ra i te hoê “pǔpǔ faaroo” e “e paieti rahi to ratou no te hoê taata, manaˈo, aore ra taoˈa.” I te mea mau, e atihia te mau melo o te tahi noa ˈtu pǔpǔ faaroo o te piri roa i te mau taata aratai e i to ratou mau manaˈo i te riro mai ei tîtî no te taata. E nehenehe te hoê taairaa puai no te hoê aratai e arato i te hoê auraroraa ino i te pae o te mau manaˈo hohonu e i te pae varua. E nehenehe te ati e maraa ia paari anaˈe te hoê taata i roto i te huru oraraa o te mau pǔpǔ faaroo amaha mai te tamarii-rii-raa ra.

E hinaaro te feia o te haapeapea ra mai te reira te huru no nia i te haapaoraa i te haamaramaramaraa e tia ia tiaturihia. Ua parauhia paha vetahi e tei roto te mau Ite no Iehova i te hoê faanahonahoraa faaroo o te faatîtî ra i to ˈna mau melo, o te faatere ra ia ratou ma te haavî, o te taotia hua ra i to ratou tiamâraa, e o te tuu taatoa ra ia ratou i rapae au i te totaiete.

Ua ite te mau Ite no Iehova e aita e mea e vai ra no te faatia i teie mau haapeapearaa. No reira, te titau ra ratou ia hiˈopoa oe no oe iho. I muri aˈe i to oe hiˈopoa-maite-raa, a rave ïa i ta oe iho mau faaotiraa. E mau tavini anei te mau Ite no te Atua, mai ta ratou e parau ra, aore ra e mau tîtî ratou no te taata? Eaha te tumu o to ratou puai? E horoa na tumu parau e piti no te api 12 e tae atu i te api 23 i te mau pahonoraa tano i teie nau uiraa.

[Nota i raro i te api]