A faatupu i te aau mauruuru
UA FAAORA te hoê taote no te Hau no New York ia Marie i roto i te hoê tupuraa ru. Aita râ o Marie, 50 matahiti, i haamauruuru noa ˈˈe i te taote e aita atoa oia i aufau i ta ˈna tarahu fare maˈi. E huru mauruuru ore matauhia hoi teie!
Te faaite ra te Bibilia e, i te hoê taime, i to ˈna tomoraa ˈtu i roto i te hoê oire iti, ua farerei aˈera o Iesu hoê ahuru taata o tei roohia i taua maˈi riaria ra o te lepera. Ua taparu maira ratou ia ˈna ma te reo puai: “E te orometua, e Iesu e, e aroha mai ia matou.”Luka 17:13 Ua faaue atura o Iesu ia ratou e: “A haere, a faaite i te mau tahuˈa ia outou.” Ua faaroo atura te mau lepera i ta ˈna faaueraa, e i nia i te eˈa, ua haamata ˈtura ratou i te ite e te ora ra ratou.
E iva o na lepera i faaorahia o tei haere noa i to ratou haereraa. Area te tahi atu lepera ra, e ati Samaria, ua hoˈi maira oia e imi ia Iesu. Ua arue teie lepera tahito i te Atua, e i to ˈna iteraa mai ia Iesu, ua tipapa ihora oia i raro i te avae o Iesu, ma te haamauruuru ia ˈna. Ua pahono atura o Iesu e: “E ere anei tino ahuru atoa i tamâhia nei? teihea iho nei râ e tooiva? Aore roa te hoê i hoˈi mai e haamaitai i te Atua maori râ o teie nei taata ê.”—Luka 17:11-19.
E haapiiraa faufaa roa te nehenehe e hutihia mai na roto i te uiraa ra: “Teihea iho nei râ e tooiva?” Mai ia Marie, e hapa rahi to na lepera tooiva—aita ratou i faaite i te mauruuru. Ua parare roa teie nei huru mauruuru ore i teie nei tau. Eaha te tumu?
Te tumu matamua o te mauruuru ore
Na mua roa, no roto mai te mauruuru ore i te miimii. A rave na i to tatou na metua matamua, o Adamu raua o Eva. Ua poiete Iehova ia raua ma te mau ateributi o te Atua e ua horoa mai oia i te mau mea atoa ia oaoa raua, mai te hoê ô nehenehe roa ei nohoraa, te hoê vahi tia roa, e te hoê ohipa anaanatae e te oaoa. (Genese 1:26-29; 2:16, 17) Teie râ, i to Satani hautiraa i nia i to raua iho maitai, ua faaroo ore raua toopiti atoa ra, e ua haavahavaha ˈtura i te maitai rahi o Iehova.—Genese 3:1-5; Apokalupo 12:9.
A hiˈo atoa na i te nunaa o Iseraela no tahito ra, ta te Atua i maiti no te riro ei nunaa taa ê no ˈna. Oia mau, ua mauruuru rahi te mau metua Iseraela atoa i te po o te 14 no Nisana 1513 H.T.T.! I taua po taa ê roa ra, ua haapohe te melahi a te Atua i “te mau matahiapo o te fenua nei o Aiphiti,” tera râ, ua na nia iho noa oia i te mau fare Iseraela i tapao-maitai-hia. (Exodo 12:12, 21-24, 30) E i to ratou faaoraraahia i te nuu a Pharao i te Miti Uteute, ma te mafatu î i te mauruuru, ‘ua himene ihora Mose e te tamarii a Iseraela ia Iehova.’—Exodo 14:19-28; 15:1-21.
Tera râ, tau hebedoma noa i muri iho i to ratou faarueraa ia Aiphiti, “ua amuamu ihora taua amuiraa atoa o te tamarii a Iseraela.” Aita ïa i maoro to ratou faaiteraa i to ratou mauruuru ore! Ua mihi ratou i ‘te parahiraa i pihaiiho i te mau farii puaa, e te amuraa i te maa e ua paia roa,’ mai ta ratou i fanaˈo na i Aiphiti, te fenua i faatîtî na hoi ia ratou. (Exodo 16:1-3) Oia mau, e faataupupu te miimii i te faatupuraa e te faaiteraa i te mauruuru.
Ei huaai na te taata hara ra o Adamu, e fanauhia mai te mau taata atoa ma te tahi faito miimii e te mauruuru ore i roto ia ratou. (Roma 5:12) E tuhaa atoa te mauruuru ore no te huru miimii e faatere nei i te taata o teie nei ao. Mai te mataˈi o ta tatou e huti ra, tei te mau vahi atoa teie nei huru, e te ohipa atoa nei i nia ia tatou. (Ephesia 2:1, 2) E tia ïa ia tatou ia faatupu i te aau mauruuru. Nafea tatou ia na reira?
Mea faufaa roa ia feruri hohonu
Te faataa ra te hoê titionare (Webster’s Third New International Dictionary) i te mauruuru mai “te riroraa ei taata aau mauruuru: te huru hohonu mahanahana e te auhoa i nia i te hoê taata hamani maitai, o te turai ia faahoˈi atu i te hoê haamaitairaa.” Eita te hoê huru hohonu e tuamahia e e tupohehia, mai te mea ra e e matini; e tupu uˈana noa mai râ mai roto mai i te hoê taata. Te mauruuru, e ere noa ïa te faaiteraa i te peu maitai; no roto roa mai râ i te mafatu.
Nafea tatou ia haapii i te faatupu i te mauruuru mai roto mai i te mafatu? Te faatuea nei te Bibilia i to tatou mau huru hohonu i te mau manaˈo o ta tatou e maiti. (Ephesia 4:22-24) E haamata te haapiiraa i te faatupu i te mauruuru, na roto i te feruri-hohonu-raa i nia i te mau haamaitairaa ta tatou e fanaˈo nei. Ia au i teie manaˈo, te parau ra te Taote Wayne W. Dyer, o te haapao ra i te rapaauraa i te feruriraa, e: “Eita te hoê huru hohonu (huru putapû) e fa mai mai te peu e aita te hoê manaˈo i ferurihia na mua.”
A rave na i te hiˈoraa o te mauruururaa no te poieteraa e haaati ra ia tatou. Ia hiˈo outou i te raˈi tei î i te fetia i te hoê po mea maramarama maitai te raˈi, e nafea outou? Ua faaite te Arii ra o Davida i to ˈna putapû rahi i te na ôraa e: “Ia hiˈo vau i te mau raˈi i te ohipa a to rima ra; te marama e te mau fetia ta oe i faaau ra, Eaha te taata nei i manaˈo mai ai oe ia ˈna? e ta te taata nei tamaiti i haapao mai ai oe ia ˈna?” E i roto i te maniania ore o te po, mai te mea ra e ua paraparau mai te mau fetia ia Davida, a papai atu ai oia e: “Te parau hua nei te mau raˈi i te hanahana o te Atua! e te faaite nei te reva i te ohipa a tana rima!” No te aha o Davida i putapû roa ˈi i mua i te mau raˈi tei î i te fetia? Na ˈna iho e pahono ra: “Te imi nei au i te mau ravea hanahana na oe ra; te feruri noa nei au i te mau ohipa a to rima ra.”—Salamo 8:3, 4; 19:1; 143:5.
Ua papu atoa i te tamaiti a Davida ra o Solomona i te faufaa o te feruriraa i te mau taoˈa faahiahia o te poieteraa. Ei hiˈoraa, no nia i te ohipa a te mau ata pape ûa no te faahaumǎrûraa i to tatou fenua, ua papai oia e: “Te tahe nei te mau pape atoa nei i raro i te tai, aita râ te tai i manii ê noa ˈtu: te vahi no reira mai te pape ra, te hoˈi faahou nei ratou i taua vahi mau ra.” (Koheleta 1:7) No reira, i muri aˈe te mau pape ûa e te mau anavai e faahaumǎrû ai i te fenua, e hoˈi atu ïa i roto i te mau moana e e riro faahou mai ei ata. Eaha ïa te huru o teie nei fenua ahiri e aita teie tamâraa e teie faaapîraa i te pape? Auê râ o Solomona i te putapû e, i to ˈna feruri-maite-raa i nia i teie mau manaˈo!
E haafaufaa atoa te hoê taata mauruuru i to ˈna mau taairaa e to ˈna mau fetii, to ˈna mau hoa, e te feia ta ˈna i matau. E huti ta ratou mau ohipa hamani maitai i to ˈna ara-maite-raa. E ia feruri oia ma te putapû i to ratou maitai, e tupu mai te mauruuru i roto i to ˈna mafatu.
Te faaiteraa i te mauruuru
E taˈo ohie roa teie, e “mauruuru”! E mea ohie roa hoi ia faahiti. E rave rahi mau taime e nehenehe ai e faaohipa i teie parau. Auê te mahanahana e te putapû e, ia parau atu e Mauruuru i te hoê taata e iriti ra i te opani no tatou aore ra o tei ohi i te hoê mea ta tatou i haamarua! E nehenehe te faarooraa i teie parau e haamama i te ohipa e e faaoaoa i te hoê taata hoo i te fare toa, te hoê tuati i te fare tamaaraa aore ra i te taata afai rata.
Ua riro te haponoraa i te mau rata haamauruururaa ei ravea ohie roa no te faaite i to tatou mauruuru no te mau ohipa hamani maitai. E rave rahi mau rata e hoohia ra i te mau fare toa, e ua papaihia te mau parau nehenehe roa i nia iho. Tera râ, e ere anei i te mea faahiahia aˈe ia papai roa ˈtu outou iho i te tahi parau haamauruururaa? Mea au aˈe na te tahi feia ia papai roa ˈtu i ta ratou iho rata, eiaha râ ia hoo mai i te fare toa.—A faaau e te Maseli 25:11.
Oia mau, te feia te tia mau â ia tatou ia faaite i to tatou mauruuru, o to tatou iho ïa utuafare. Te na ô ra te Bibilia no nia i te vahine maitai e: ‘E tia tana tane atoa, ma te haamaitai ia ˈna.’ (Maseli 31:28) Eita anei te mau parau haamauruuru putapû mau a te hoê tane i ta ˈna vahine, e faatupu i te hau e te oaoa i roto i te utuafare? E eita anei te tane e oaoa atoa i te hoˈi mai i te fare e ia faaroo i te aroharaa mahanahana e te putapû a ta ˈna vahine? I teie nei tau, mea rahi te mau haafifiraa i nia i te faaipoiporaa, e ia rahi roa anaˈe, e tupu ohie ïa te iria. Te taata e aau mauruuru to ˈna, e ineine ïa oia i te tamǎrû e e oioi noa oia i te faaore i te hapa.
E tia atoa i te mau taurearea ia tutava i te faaite atu i te mau parau haapopou putapû i to ratou mau metua. Parau mau, aita e metua tia roa, tera râ, aita e tumu no te ore e haamauruuru atu no te ohipa o ta raua i rave no outou. To raua hereraa mai e to raua aupururaa ia outou mai to outou fanauraa mai â, eita te reira e hoohia mai e te moni. Mai te peu e ua haapii mai raua ia outou i te ite o te Atua, e tumu hau atu â ïa ta outou no te mauruuru.
“Te tamarii ra, e tufaa ïa no ǒ ia Iehova ra,” o ta te Salamo 127:3 ïa e parau ra. No reira, e tia i te mau metua ia imi i te mau taime no te haapopou i ta ratou mau tamarii, maoti hoi i te tamaˈi noa ia ratou no te tahi mau ohipa faufaa ore roa. (Ephesia 6:4) Auê ïa haamaitairaa e, i te tautururaa ˈtu i te mau tamarii i raro aˈe i ta ratou hopoia, ia faatupu i te aau mauruuru!—A faaau e te Maseli 29:21.
A mauruuru i te Atua
O Iehova te Atua e horoa mai i “te mau mea maitatai . . . e te mau mea tia roa.” (Iakobo 1:17) O te ora te hoê ô faufaa roa, no te mea te mau ohipa atoa ta tatou e fatu nei aore ra e opua nei e rave, aita ïa e faufaa mai te peu e e pohe tatou. Te faaue nei te mau Papai ia tatou ia haamanaˈo e “tei [te Atua ra o Iehova] te tumu o te ora.” (Salamo 36:5, 7, 9; Ohipa 17:28) No te faatupu i te mafatu mauruuru i te Atua, e tia ia tatou ia feruri hohonu i nia i te mau ravea atoa o ta ˈna i horoa mai no te maitairaa o to tatou oraraa i te pae tino e i te pae varua. (Salamo 1:1-3; 77:11, 12) E turai teie huru mafatu ia tatou ia faaite i to tatou mauruuru na roto i te parau e te ohipa.
O te pure te hoê o te mau ravea papu roa ˈˈe no te faaite i to tatou mauruuru i te Atua. Ua parau te papai salamo ra o Davida e: “E rave rahi, e tau Atua, e Iehova, te mau ohipa taa ê i ravehia e oe ra, e to oe ra manaˈo ia matou nei e ore e tia ia taio noa ˈtu i mua ia oe na: e faaite hoi au, e parau vau i te reira, eita râ e tia ia taio atu i te rahi.” (Salamo 40:5) Ia hinaaro atoa tatou e na reira, e tia ˈi.
Ua hinaaro papu atoa o Davida e faaite i to ˈna mauruuru i te Atua na roto i te mau parau ta ˈna i faaite atu ia vetahi ê. Ua parau oia e: “E haamaitai â vau ia oe, e Iehova, i tau aau atoa nei, e faaite au i te mau ohipa taa ê atoa na oe ra.” (Salamo 9:1) Te paraparauraa ia vetahi ê no nia i te Atua, te faaiteraa ˈtu i te parau mau no roto i ta ˈna Parau, eita e ore e te reira te ravea maitai roa ˈˈe no te faaite i to tatou mauruuru ia ˈna. E e tauturu te reira ia tatou ia mauruuru atu â i roto i te tahi atu mau tuhaa o te oraraa.
“O tei arue mai ia ˈu ra, ua haamaitai mai ïa ia ˈu, e o tei haere na te eˈa mau ra, e faaite au ia ˈna i te ora a te Atua,” o ta Iehova ïa e parau ra. Ia fanaˈo outou i te oaoa e noaa mai na roto i te faaiteraa i to outou mauruuru hohonu ia ˈna, e tia ˈi.—Salamo 50:23; 100:2.
[Hohoˈa i te api 7]
E ô te ora no ǒ mai i te Atua ra. A papai roa ˈtu i to outou iho manaˈo