Te faatere nei o Iehova ma te hamani maitai

I TE roaraa o te aamu, e rave rahi mau taata faatere o tei faaohipa i to ratou mana ma te ore roa ˈtu e tâuˈa i te mauiui o to ratou huiraatira. Teie râ, ua faaite mai o Iehova i te hoê huru raveraa taa ê roa, i to ˈna maitiraa i te hoê nunaa—o Iseraela—e i to ˈna faatereraa ia ˈna ma te hamani maitai.

A vai noa ˈi te mau tamarii Iseraela ei tîtî i Aiphiti tahito ra, ua faaroo aˈera o Iehova i to ratou auêraa ia tauturuhia mai ratou. “To ratou atoa ra mau ati [“ua riro atoa ei ati no ˈna,” MN]; . . . no to ˈna aroha e to ˈna hamani maitai i faaora ˈi oia ia ratou.” (Isaia 63:9) Ua faaora ˈtura o Iehova ia Iseraela, ua horoa semeio mai i te maa na ratou, e ua faatiamâ maira ia ratou no te haere i roto i te hoê fenua e fatuhia e ratou.

Ua itehia ˈtu â te huru hamani maitai o Iehova na roto i te mau ture o ta ˈna i horoa ˈtu i teie nunaa. Ua faaue oia i te mau tamarii Iseraela ia hamani maitai i te mau otare, i te mau vahine ivi, e i te feia ěê. Aita ratou i faatiahia ia hamani ino i te feia huma.

E titau na te Ture e ia hamani-maitai-hia te feia riirii. E nehenehe hoi te taata veve e ohi i te maa i muri aˈe i te ootiraa. E faaorehia na te mau tarahu i te matahiti Sabati (te hituraa). E faahoˈihia na te mau fenua aiˈa atoa i hoohia na, i te matahiti Iubili (te 50raa). Te faatia ra te buka ra Iseraela tahito—To ˈna oraraa e ta ˈna mau faanahoraa (Beretane) e: “I Iseraela, aita roa i itehia te mau taa-ê-raa i rotopu i te mau pǔpǔ totiale mai tei matauhia i teie nei tau.” “I te tau matamua o to ratou parahiraa [i taua fenua ra], ua fanaˈo te mau Iseraela atoa i te hoê â faito oraraa.”—Levitiko 25:10; Deuteronomi 15:12-14; 24:17-22; 27:18.

Te peeraa i te hamani maitai o Iehova

Te putapû nei te mau tavini o te Atua i to ˈna hamani maitai. Ei hiˈoraa, i te roaraa o te aamu, ua haapohe te tahi mau taata i faaarii-apî-hia i te mau melo o te fetii arii na mua ˈtu e ora noa râ. Area te tavini o Iehova ra o Davida, aita ïa oia i na reira. I muri aˈe i te poheraa o te Arii ra o Saula, ua paruru o Davida ia Mephiboseta, te mootua e te tamaiti aiˈa a Saula i ora mai. “Ua putapû te aau o te arii i te hamani maitai ia Mephiboseta te tamaiti a Ionatana te tamaiti a Saula.”—Samuela 2, 21:7, MN.

Aita ˈtu taata i pee i te hamani maitai o Iehova mai ta Iesu i rave. E rave rahi mau semeio o ta ˈna i rave na roto i te hamani maitai tei au i to te Atua. I te hoê taime, ua taparu maira te hoê lepera ia ˈna e: “Ia tia ia oe ra, e mâ vau ia oe.” Ua putapû roa ˈˈera o Iesu i te aroha, e tapea ˈtura ia ˈna ma te parau e: “Ua tia ïa ia ˈu, ia mâ oe.” (Mareko 1:40-42) I te tahi atu taime, e mau tiaa rahi taata o tei pee atu ia Iesu. I rotopu i te arepurepu, ua haapao atura o Iesu i na matapo e piti o tei pii hua mai e: “E te Fatu, e te Tamaiti a Davida, e aroha mai ia mâua. . . . [“Putapû i te aroha,” MN], faatiaia ˈtura [o Iesu] i to raua mata; araara aˈera to raua mata i reira ra.”—Mataio 20:29-34.

Aita te putapû o Iesu i iti mai no te rahi o te tiaa taata. No te mea aita ratou i tamaa no te tahi taime, ua parau aˈera oia i te hoê taime e, “Te [putapû] nei au [i te aroha] i teie nei feia rahi.” Ua faaamu semeio atura oia ia ratou. (Mareko 8:1-8; MN) I roto i te mau tere o Iesu, aita noa oia i haapii i te mau nahoa taata, ua haapao atoa râ oia i to ratou mau hinaaro. (Mataio 9:35, 36) I muri aˈe i te hoê o teie mau tere, aita to Iesu e ta ˈna mau pǐpǐ e taime no te amu i te maa. Te faatia ra te Bibilia e: “Hôe huna ˈtura ratou na nia i te pahi i te tahi vahi moemoe. Ua ite r[â] te taata ia ratou i te fanoraa, e rave rahi hoi tei ite ia ˈna, e ua horo atura na uta . . . o tei tae na ïa . . . E tei te tipaeraa ˈtu Iesu ra, hiˈo atura oia i taua feia rahi ra, [“putapû atura oia i te aroha,” MN] ia ratou; no te mea mai te nǎnǎ mamoe tiai ore ra ratou; haapii atura oia ia ratou i te parau e rave rahi.”—Mareko 6:31-34.

Te mea i haaputapû ia Iesu, e ere noa ïa te maˈi e te veve o te taata, o to ratou râ huru i te pae varua. Ua rave ino hoi to ratou mau raatira ia ratou, no reira o Iesu ‘i putapû ai i te aroha.’ Te auraa o te taˈo Heleni ra ‘e putapû i te aroha’ oia ïa, “e hiaai i te hohonuraa o te aau.” Ua riro mau â o Iesu ei taata hamani maitai!

Te hamani maitai i roto i te hoê ao ino

I teie nei, o Iesu Mesia te Arii o te Basileia o Iehova i nia i te raˈi. Mai ta ˈna i rave na i nia ia Iseraela tahito, i teie mahana, te faatere nei te Atua i to ˈna nunaa ma te hamani maitai. “Ua na ô maira Iehova sabaota ra, E riro ratou na ˈu, ia tae i te mahana ta ˈu e faataa ra, ei taoˈa maitai roa ra; e na ˈu e [“hamani maitai,” MN] ia ratou.”—Malaki 3:17.

Te feia e hinaaro ra e fanaˈo i te hamani maitai o Iehova, e tia ïa ia ratou ia pee i to ˈna mau eˈa. Parau mau, te ora nei tatou i roto i te hoê ao i reira mea au aˈe na te taata ia haapao i to ratou iho huru oraraa, i te tauturu atu i te feia e fifihia ra. E pinepine te feia mana i te imi e ia monihia ratou noa ˈtu e e haafifi te reira i te maitairaa o te feia rave ohipa e o te feia hoo taoˈa. I roto i te Timoteo 2, 3:1-4, te faataa papu maitai ra te Bibilia i te huru tupuraa morare o to tatou nei tau, o tei tupohe i te hamani maitai i roto i te mafatu o te taata e rave rahi.

Noa ˈtu râ, e nehenehe e itehia mai te mau ravea no te faaite i te hamani maitai. E nehenehe anei tatou e tauturu i to tatou feia tapiri e fifihia ra? Te vai ra anei te hoê taata maˈi o ta tatou e nehenehe e haere atu e hiˈo? E nehenehe anei tatou e faaitoito i te feia e hepohepo ra, ia au maite i te aˈoraa ra: “E haamahanahana ˈtu i te aau taiâ, e tauturu atu i tei paruparu”?—Tesalonia 1, 5:14.

E tauturu atoa te hamani maitai ia tatou ia ore e iria ˈtu ia hape anaˈe vetahi ê. Te faauehia maira tatou e: “Ia haapae-roa-hia te mamahu ore, e te iria, e te riri, e te avau e te faaino, e te tairoiro, eiaha roa atoa ïa. Ia hamani maitai outou ia outou iho, ma te aau mǎrû aroha noa, ma te faaore hoi i te hara te tahi e te tahi, mai ta te Atua i faaore mai i ta outou i te Mesia ra.”—Ephesia 4:31, 32.

E tauturu te hamani maitai ia tatou ia ape i te peu ra e faaohipa i te mana ma te haavî. Te na ô ra te Bibilia e: ‘E [ahu ia outou iho i te] aroha, e te hamani maitai, e te haehaa [o te feruriraa], e te mǎrû, e te faaoromai rahi.’ (Kolosa 3:12; MN) Na roto i te haehaa o te feruriraa, e nehenehe tatou e rave mai te mea ra e, o tatou te feia o ta tatou e tiaau ra. Te hamani-maitai-raa, o te riroraa ïa ei taata haehaa e te faaau ohie, eiaha râ ei taata mauruuru ore. Eiaha hoi te titauraa i te aravihi ia riro ei tumu no te faariro i te taata mai te tahi mau tuhaa o te hoê matini. Oia atoa, i roto i te utuafare, e haamanaˈo te mau tane hamani maitai e, e mau farii paruparu aˈe ta ratou mau vahine. (Petero 1, 3:7) E nehenehe te feruriraa i nia i te hiˈoraa hamani maitai o Iesu e tauturu ia tatou i roto i teie mau tuhaa atoa.

I te mea e ua putapû hohonu roa o Iesu no te mau taata i te tau o ta ˈna taviniraa i nia i te fenua nei, e nehenehe tatou e tiaturi e, ua riro oia i teie nei, e e riro â oia a muri atu, ei Arii hamani maitai. Ua tohu te Salamo 72 no nia ia ˈna e: “Na ˈna e faaau i te parau i te haehaa i ǒ te mau taata ra; e te tamarii a tei ati i te veve ra na ˈna e faaora; e e haav[î] ofatifati roa oia i tei hamani ino ra. E riro oia ei arii mai te tahi miti e tae noa ˈtu i te tahi miti, e mai te pape ra e tae noa ˈtu i te hopea o te fenua. E faaherehere oia i tei paruparu ra e tei veve, e faaora hoi oia i te feia taoˈa ore ra.”—Salamo 72:4, 8, 13.

Ua faaite atea te Parau a te Atua e: “E haava râ oia i te taata rii ma te parau-tia ra; e tuu hoi oia i te parau au i te feia mamahu o te fenua nei: . . . e pohe te paieti ore ia ˈna.” I muri aˈe i te faataaraa e e taui vetahi mau taata iino e au i te animala ra i to ratou mau eˈa, te na ô râ te parau tohu e: “E ore ratou e hauti, e ore e rave ino, i to ˈu atoa nei mouˈa moˈa, . . . e î hoi te fenua i te ite ia Iehova, mai te vairaa miti e î i te miti ra.” (Isaia 11:4-9) Ta teie parau tohu e tǎpǔ maira, o te hoê ïa totaiete taata na te fenua atoa nei o tei ite ia Iehova e o te pee i to ˈna mau eˈa hamani maitai!