Te haamanaˈo ra anei outou?
Ua oaoa anei outou i te taioraa i te mau numera hopea nei o Te Pare Tiairaa? A hiˈo na e ua ite anei outou i te pahonoraa i te mau uiraa i muri nei:
◻ Eaha te tapao matamua o te haapiiraa no te hoê taurearea kerisetiano? Te tapao matamua o te haapiiraa, o te faaineineraa ïa i te hoê taurearea ia riro ei tavini aravihi no Iehova. E te haapiiraa faufaa roa ˈˈe e naeahia ˈi teie tapao, o te haapiiraa ïa i te pae varua.—15/8, api 21.
◻ Eaha te mau tumu e faaite ai i te hoê hara ino i ravehia e te hoê hoa kerisetiano i te mau matahiapo? Te hoê tumu e faaite ai i te hara ino, no te parururaa ïa i te mâraa o te amuiraa. Te tahi atu tumu oia hoi, ia na reirahia, e ohipa ïa o te here kerisetiano niuhia i nia i te mau faaueraa tumu, tei ravehia no te Atua, no te amuiraa, e no te taata rave hara.—15/8, mau api 28, 30.
◻ Eaha te auraa ia ‘tapea maite i roto i te feruriraa te vairaa mai o te mahana o Iehova’? (Petero 2, 3:12, MN) Te auraa oia ïa, eiaha tatou ia faanuu noa i “te mahana o Iehova” i roto i to tatou feruriraa. Eiaha ia moehia ia tatou e, ua fatata roa mai te mahana e haamou ai o Iehova i teie faanahoraa o te mau mea. E tia ia riro ei tupuraa mau no tatou e mai te mea ra e e ite mata roa ˈtu tatou, mai te mea ra e tei mua noa ia tatou. (Zephania 1:7, 14)—1/9, api 19.
◻ No te aha te mau mahana hopea o teie faanahoraa ino i maoro atu â i tei manaˈohia e te rahiraa? Te hiˈo ra o Iehova e eaha te mea maitai aˈe no te mau taata atoa. Te tapitapi nei oia e ia ora te taata. (Ezekiela 33:11) E nehenehe tatou e tiaturi e e tae mai te hopea i te taime tano mau no te faatupu i te opuaraa a to tatou Poiete paari rahi e te here.—1/9, api 22.
◻ Nafea te feia i roto i te taviniraa ma te taime taatoa ia tapea i to ratou oaoa noa ˈtu te mau fifi o ta ratou paha e faaruru atu? E tia ia ratou ia manaˈo i ta ratou mau haamaitairaa e rave rahi e i te mau tausani taata ê atu e faaruru ra i te mau ati rahi atu â. (Petero 1, 5:6-9)—15/9, api 24.
◻ Eaha te fa ta William Tyndale i tapapa i to ˈna huriraa i te Bibilia? Te fa a Tyndale, o te tufaraa ˈtu ïa i te mau Papai na te taata o te nunaa na roto i te hoê reo papu e te ohie.—15/9, api 27.
◻ Nafea tatou ia faaite e e feia paruru taiva ore tatou i te Parau a te Atua? E faaite tatou i to tatou taiva-ore-raa i te Parau a te Atua na roto i te pororaa i teie Parau ia vetahi ê ma te itoito. Ia haapii atu tatou i te taata, e tia ia tatou ia faaohipa maitai i te Bibilia, ma te ore roa ˈtu e taviri aore ra e faahape i ta ˈna mau parau no te faatano i to tatou iho mau manaˈo. (Timoteo 2, 2:15)—1/10, api 20.
◻ Nafea te varua taero o teie nei ao ia haaparuparu i to tatou tiaraa hapa ore? E nehenehe te varua o teie nei ao e haaparuparu i to tatou tiaraa hapa ore, na roto i te turairaa ia tatou ia mauruuru ore i te mea e vai nei ia tatou, e ia hinaaro e tuu i to tatou iho mau hinaaro e ta tatou mau fa na mua ˈˈe i to te Atua. (A faaau e te Mataio 16:21-23.)—1/10, api 29.
◻ Eaha te auraa ia tavini ia Iehova ma te nephe atoa? Te “nephe,” o te taata taatoa ïa, e to ˈna mau aravihi atoa i te pae tino e i te pae feruriraa. Te auraa ia tavini ia Iehova ma te nephe atoa, o te horoaraa ïa ia tatou taatoa, ma te faaohipa i to tatou mau aravihi atoa e to tatou itoito i roto i te faito rahi roa ˈˈe, no te tavini i te Atua. (Mareko 12:29, 30)—15/10, api 13.
◻ Eaha te taviri no te riro ei taata o te pee i te mau faaueraa tumu a te Atua? Te taviri, o te ite-mau-raa ïa ia Iehova, i te mau mea ta ˈna i au e ta ˈna i ore i au, e i ta ˈna mau opuaraa. Ia faatere anaˈe teie mau parau tumu no nia i te Atua i to tatou nei oraraa, e riro mai ïa te reira, ei mau faaueraa tumu ora. (Ieremia 22:16; Hebera 4:12)—15/10, api 29.
◻ Eaha te haerea aifaito o te mau tavini o Iehova i mua i te faatereraa taata nei? Eita ratou e amui atu i roto i te mau ohipa politita no te mea te tavini nei ratou ei mau tia aore ra ei mau vea no te Basileia o te Atua. (Korinetia 2, 5:20) I te tahi aˈe pae, te auraro maite nei ratou i te feia mana.—1/11, api 17.
◻ Eaha te haapiiraa ta tatou e nehenehe e huti mai na roto i te haerea o Elisaia te peropheta? I to ˈna titau-manihini-raahia ia rave i te hoê taviniraa taa ê e o Elia, ua faarue oioi o Elisaia i ta ˈna faaapu no te tavini ia Elia, noa ˈtu e e rave oia i te tahi mau ohipa haihai. (Te mau arii 2, 3:11) Te faaite nei vetahi mau tavini o te Atua i teie mahana, i te hoê â huru feruriraa e haapae ia ratou iho na roto i te faarueraa i ta ratou mau imiraa no te poro i te parau apî maitai i roto i te mau tuhaa fenua atea.—1/11, mau api 30, 31.
◻ Eaha te aˈoraa faufaa e vai ra i roto i te rata a Iakobo? Te faaite ra oia ia tatou e nafea ia faaruru i te mau tamataraa, te aˈo maira e eiaha e haapao i te huru o te taata, e te faaitoito maira ia rave i te mau ohipa tia. Te faaue ra o Iakobo ia tatou ia haavî i te arero, ia patoi i te mau mana o teie nei ao, e ia faatupu i te hau. E tauturu atoa ta ˈna mau parau ia tatou ia faaoromai e ia pure.—15/11, api 24.
◻ No te aha o Iehova ‘e ineine ai i te faaore i te hara’? (Salamo 86:5, MN) E ineine noa o Iehova i te faaore i te hara no te mea eita e moehia ia ˈna e e feia tatou i hamanihia i te repo, e feia paruparu, no to tatou hoi huru taata tia ore. (Salamo 103:12-14)—1/12, mau api 10, 11.
◻ No te aha e tia ˈi ia tatou ia ineine i te faaore i ta vetahi ê ra hara? Mai te peu e eita tatou e faaore i ta vetahi ê ra hara ia nehenehe anaˈe e faaite i te aroha, e nehenehe te reira e faaino i to tatou iho mau taairaa e te Atua. (Mataio 6:14, 15)—1/12, api 17.