Teretio—Te papai parau haapao maitai a Paulo

UA FAARURU o Teretio i te hoê ohipa fifi. Ua hinaaro te aposetolo Paulo e faaohipa ia ˈna ei papai parau na ˈna no te papai i te hoê rata roa na te mau hoa kerisetiano i Roma. E ohipa fifi mau â teie.

No te aha hoi e mea fifi roa ia riro ei papai parau i te senekele matamua o to tatou tau? Mea nafea teie huru ohipa ia ravehia? Eaha te mau tauihaa no te papai i vai na i tera ra tau?

Te mau papai parau i mutaa iho

I roto i te totaiete Heleni Roma i tahito ra, e rave rau mau huru papai parau. E mau papai parau na te hau vetahi—te mau taata toroa huiraatira o tei ohipa i roto i te mau piha a te mau faatere hau rahi. Te vai atoa ra te mau papai parau huiraatira e pûpû na i ta ratou mau tauturu na te mau taata i te matete. E tapeahia na te mau papai parau taa ê (e pinepine e feia tîtî ratou) na te feia ona. E te vai atoa ra te mau hoa farii maitai e oaoa ra i te papai i te mau rata no vetahi ê. Ia au i te aivanaa ra o E. Randolph Richards, “e nehenehe e anai [i te mau aravihi o teie mau papai parau haamana-ore-hia] mai te aravihi iti i te pae o te reo e/aore ra o te huru papairaa e tae noa ˈtu i te aravihi rahi roa ˈˈe e papai ma te vitiviti i te hoê rata tano, afaro, e te au ia taio.”

O vai tei faaohipa na i te mau papai parau? Na mua roa, o te feia ïa aita i ite i te taio e i te papai. E faaotihia na te mau parau faaau e te mau rata tapihooraa e rave rahi i tahito ra, na roto i te tahi mau nota i reira te papai parau e haapapu ai e na ˈna i papai i te rata no te ite ore o te taata i faaue ia ˈna ia papai. Te faataahia ra te piti o te tumu i faaohipahia ˈi te papai parau i roto i te hoê rata no tahito ra no Thèbes, i Aiphiti. Ua papaihia taua rata ra no te tahi taata o Asklepiades te iˈoa, te na ôhia ra i te pae hopea e: “Na Eumelus, tamaiti na Herma, i papai no ˈna . . . no te mea mea taere oia ia papai.”

Teie râ, e au ra e e ere te iteraa i te papai e i te taio, te tumu rahi e faaohipahia ˈi te tahi papai parau. Ia au i te taata tatara Bibilia ra o John L. McKenzie, “e ere paha no te papai-maitai-raa o te rata, tera râ, no te haviti o te huru papairaa, aore ra no te mâ o te papairaa” o tei turai hoi i te taata ia ani i te tauturu a te hoê papai parau. No te feia ite atoa, mea rohirohi ia papai, mai te peu iho â râ e tia ia papai i te mau rata roa e te fifi. Te parau ra te aivanaa ra o J. A. Eschlimann e te taata e faaohipa i te hoê papai parau, “ua ape ïa oia ma te oaoa i teie ohipa, ma te ani atu i te mau taata tîtî, te mau papai parau aravihi.” Hau atu â, e mea ohie ia taa e no te aha aita te mau taata i au e na ratou iho e papai i ta ratou mau rata, ia hiˈopoa-anaˈe-hia te mau tauihaa i faaohipahia e te huru raveraa i te ohipa.

E faaohipa-rahi-hia na te gima ei papie i te senekele matamua o to tatou tau. E noaa mai na te mau paehaa rairai na roto i te tâpûraa na ropu i te mau ata gima mai nia mai i raro. E apǎpǎhia na te hoê tuhaa o te mau ata. E faataravahia te tahi atu tuhaa ata na nia iho mai i te tuhaa matamua. I reira ïa e tapirihia ˈi na tuhaa e piti ma te neneiraa, e e noaa mai ai te hoê api “papie.”

E ere i te mea ohie ia papai i nia i teie papie. No to ˈna taratara e to ˈna mau taura iti. Ia au i te aivanaa ra o Angelo Penna, “no te mea e e au te papie gima i te rimu, e tahe noa na te inita, i roto iho â râ i te mau area iti i rotopu i te mau paehaa rairai.” E nehenehe te papai parau e papai ma te parahi i raro a tifene ai oia i to ˈna avae e ma te tapea e te hoê noa rima te papie i nia i te hoê iri. Mai te peu e e ere oia i te mea aravihi aore ra e ere te mau tauihaa i te mea maitai roa, e nehenehe ta ˈna tuira, aore ra ta ˈna penitara aeho, e maumau i nia i te gima, e nehenehe te papie e mahae, aore ra e ore e taahia e eaha tei papaihia.

E hamanihia na te inita na roto i te anoiraa i te rehu e te tapau. E hoohia na te mau tâpû inita paari, e tia ia faatahehia i roto i te pape i roto i te hoê farii inita hou a faaohipahia ˈi no te papai. I roto i te tahi atu mau tauihaa ta te hoê papai parau mai ia Teretio i faaohipa na paha, o te hoê ïa tipi no te faaoeoe i te penitara aeho, e te hoê rimu rarirari no te tumâ i ta ˈna mau hape. E tia ia papai-maitai-hia te mau reta atoa. No reira, e tia ia papai mǎrû e ma te tahi mau fifi.

‘O vau nei hoi o Teretio, te aroha ˈtu nei au ia outou’

I rotopu i te mau tapao aroha i te pae hopea o te rata na to Roma, te vai atoa ra ta te papai parau a Paulo, e na ô ra e: “O vau nei hoi o Teretio o tei papai atu i teie nei episetole, te aroha ˈtu nei au ia outou i te Fatu nei.” (Roma 16:22) Teie anaˈe te taime i roto i te mau papai a Paulo i faataa-maitai-hia ˈi e na te hoê o ta ˈna mau papai parau i papai i te rata.

Aita tatou i ite roa e o vai râ o Teretio. Na roto i ta ˈna tapao aroha “i te Fatu nei,” e nehenehe tatou e faaoti e e Kerisetiano haapao maitai oia. E melo paha oia no te amuiraa i Korinetia e ua matau paha o ˈna e rave rahi Kerisetiano i Roma. Te parau ra te taata ite i te Bibilia ra o Giuseppe Barbaglio e e taata tîtî aore ra e taata tîtî faatiamâhia o Teretio. No te aha? Na mua, no te mea “no roto te mau papai parau, i te pae rahi, i teie pǔpǔ taata; e, no te mea e mea matau-rahi-hia to ˈna iˈoa Latino . . . i rotopu i te mau tîtî e te mau tîtî faatiamâhia.” “No reira,” o ta Barbaglio ïa e parau ra, “e ere o ˈna i te hoê taata papai aravihi ‘ohipa ore,’ e hoa rave ohipa râ o ˈna o tei tauturu ia Paulo na roto i teie ravea ia papai i ta ˈna rata roa roa ˈˈe e te papai-maitai-hia: te hoê tauturu faufaa roa ia ore ia mâuˈa te taime o Paulo e ia ore oia ia rohirohi.”

E mea faufaa roa mau â teie ohipa a Teretio. Ua rave atoa o Baruka i te hoê â ohipa na Ieremia, o Siluano atoa na Petero. (Ieremia 36:4; Petero 1, 5:12) Auê ïa haamaitairaa no taua mau hoa rave ohipa ra e!

Rata na to Roma

Ua papaihia te rata na to Roma i to Paulo nohoraa ei manihini i ǒ Gaio, peneiaˈe i Korinetia. Tei te area matahiti 56 T.T., i roto i te toru o te tere mitionare o te aposetolo. (Roma 16:23) Noa ˈtu e ua ite papu tatou e ua faaohipa o Paulo ia Teretio ei papai parau na ˈna no te papai i teie rata, tera râ, aita tatou i ite papu e mea nafea to ˈna faaohiparaa ia Teretio. Noa ˈtu eaha te ravea i faaohipahia, papu maitai, e ere i te mea ohie te ohipa i ravehia. Teie râ, e nehenehe tatou e tiaturi e: Mai te toea o te Bibilia, e ‘mea faauruahia mai’ te rata a Paulo na to Roma “e te Atua.”—Timoteo 2, 3:16, 17.

I te otiraa teie rata, ua papai o Teretio raua o Paulo tau tausani parau, ma te faaohipa e rave rau papie gima. I muri aˈe i te tapiriraa i te mau papie atoa na te hiti o te mau api, ua riro mai teie mau papie ei otaro, peneiaˈe te tahi 3-4 metera te roa. Ua virihia e ua titiro-maitai-hia te rata. E au ra i muri iho e, ua horoa o Paulo i taua rata ra ia Phebe ra, te hoê tuahine no Keneherea, o te tere atu hoi i Roma.—Roma 16:1, 2.

Mai te senekele matamua mai â, ua taui rahi te mau ravea i faaohipahia na no te papai. I te roaraa râ o te mau senekele, ua faahereherehia te rata na te mau Kerisetiano no Roma e te Atua. Auê tatou i te mauruuru e no teie tuhaa o te Parau a te Atua, tei papaihia ma te tauturu a te papai parau haapao maitai e te itoito a Paulo, o Teretio!