“Te mau taoˈa nehenehe roa ˈˈe o te parau mau”

“Te mau taoˈa nehenehe roa ˈˈe o te parau mau.” Mea na reira to te hoê rata i te amaa a te mau Ite no Iehova i Nigeria faahohoˈaraa e piti vea taa ê. Te faataa ra te taata papai, te hoê ïa taurearea tamaroa e:

“Te papai nei au no te faaite atu i to ˈu mauruuru haavare ore no ta outou mau tutavaraa i roto i te tatararaa i te mau tuhaa taatoa o te oraraa i te mau mahana atoa na roto i te mau vea ra Te Pare Tiairaa e A ara mai na!

“Ahuru ma hitu matahiti to ˈu. I te matahiti i mairi aˈenei, ua faatupu te hoê pu haapurororaa radio o te fenua i te hoê tataˈuraa parau papai i nia i te tumu parau ra ‘Mea hau atu â te here i te taatiraa i te pae tino—E tupuraa mau te SIDA.’ Eiaha te parau papai tataitahi ia iti mai i te maha hanere taˈo. E horoahia te hoê re 1 000 naira [oia hoi 12,50 dala Marite] no te parau papai maitai roa ˈˈe. Oia mau, ua parau ratou [te feia haapuroro radio] e, e tia i te mau taata ia papai eiaha noa ia noaa mai te re, ia haapii mai râ hoi i te tahi mea. . . .

“Ua itea mai ia ˈu te mau haamaramaramaraa no nia i te SIDA i roto i na vea e piti ra. No nia i te here, mea rahi te mau tumu parau. Ua faaohipa vau i te mau manaˈo no roto mai i te A ara mai na! o te 8 no Titema 1978 (Farani).

“E piti avaˈe i muri aˈe i to ˈu haponoraa ˈtu i ta ˈu parau papai, ua neneihia te mau numera tataˈuraa. Ua maere roa vau i te mea e o vau te matamua i roto i te mau hau no Cross River e Akwa Ibom!

“No roto mai te mau haamaramaramaraa atoa o ta ˈu i faaohipa i teie nei mau vea. Mea faahiahia mau â i te mea e te horoa ra o Iehova i te mau haamaramaramaraa na tatou i te taime mau ra i roto i teie nei ao arepurepu e te viivii. Ei mau Kerisetiano mau, ua ite tatou e e mea hau roa ˈtu â ïa te here i te taatiraa i te pae tino. E, oia mau, e paruru te hoê oraraa mâ i te pae morare ia tatou i te mau maˈi mai te SIDA.

“Te haamauruuru nei au ia outou no teie mau taoˈa nehenehe roa ˈˈe o te parau mau o ta outou e nenei nei ma te tuutuu ore. Ia tamau noa ïa o Iehova i te haamaitai i ta outou mau tutavaraa a nenei noa ˈi outou i teie mau vea faufaa roa.”