Mau uiraa a te feia taio

Eaha ta te Bibilia e parau ra no nia i te utua pohe no te feia taparahi taata?

Ua papu ïa e, e nehenehe ta tatou tataitahi e horoa i ta ˈna iho huru hiˈoraa i te utua pohe, ia au i ta ˈna iho tupuraa i farerei. Teie râ, e mau Ite no Iehova tatou, e tamata ïa tatou i te faaau atu i te mau manaˈo o te Atua no nia i te utua pohe, a tapea noa ˈi tatou i to tatou tiaraa amui ore i roto i te mau tiaraa politita ta e rave rahi e turu nei i roto i teie nei ohipa.

No te haapoto-noa-raa, i roto i ta ˈna Parau papaihia, aita te Atua e haapapu ra e e mea ino te utua pohe.

I te omuaraa o te aamu o te taata nei, ua faaite o Iehova i to ˈna mau manaˈo i nia i te tupuraa, mai ta tatou e taio i roto i te Genese pene 9. Tei roto atoa o Noa e to ˈna ra utuafare, o tei riro mai ei tupuna no te fetii taata atoa. I muri mai i to ratou haereraa mai i rapaeau i te araka, ua parau atura te Atua e e nehenehe ratou e amu i te mau animala—oia hoi, ia taparahi i te animala, ia faatahe i to ratou toto, e amu atu ai. E, i te Genese 9:5, 6, ua parau atura te Atua e: “Eita roa hoi au e ore i te titau i te hoo i to outou na toto i ora ˈi outou; e titau hoi au i te reira i te mau mea ora atoa, e i te rima hoi o te taata nei; e titau hoi au i te hoo no to te taata nei ora, i te rima o to te taata ihora taeae. O te haamanii i to te taata nei toto, na te taata atoa to ˈna toto e haamanii: i hamani hoi te Atua i te taata ma to ˈna ihora huru.” No reira, ua faatia Iehova i te utua pohe no te feia taparahi taata.

I te taime te Atua a faatupu ai i te taairaa e Iseraela to ˈna ra nunaa, e rave rahi atu â hapa iino roa i te ture a te Atua tei faautuahia na i te pohe. I roto i te Numera 15:30, te taio ra tatou i teie faaararaa no te taatoa: “Tei rave i te hara ma te [“opuahia,” MN] ra, i te taata tupu e te taata ê atoa, ua faaino oia ia Iehova; e tâpû-ê-hia ïa taata i to ˈna ra nunaa.”

Eaha râ ïa to muri mai i te haamauraahia te amuiraa kerisetiano? Oia, ua ite tatou e ua faatia o Iehova i te mau faatereraa taata ia vai mai, e ua pii oia ia ratou te feia mana toroa ra. I muri aˈe i to te mau Kerisetiano faaueraahia ia auraro i te mau mana faatere, te parau ra te Bibilia e, te ohipa ra teie mau mana ei “tavini . . . no te Atua ia maitai oe. I rave râ oe i te parau iino ra, a mǎtaˈu; aore hoi oia i mau faufaa ore noa i te ˈoˈe: e tavini hoi oia no te Atua, ei tahoo e ei tuu i te pohe i te taata i rave i te ino ra.”—Roma 13:1-4.

Tera anei te auraa e ua faatiahia te mau faatereraa ia rave atoa ratou i te ora o te feia tei rave i te hara ino mau? Ia au i te Petero 1, 4:15, e nehenehe ïa tatou e faaoti e, e. I roto i teie irava, ua faaitoito te aposetolo i to ˈna mau taeae e: “Eiaha roa râ to outou pohe i te pohe taparahi taata, e te eiâ, e te rave parau ino, e te haapeapea ia vetahi ê ra.” Ua tapao anei outou, “eiaha râ to outou pohe i te pohe taparahi taata”? Aita o Petero e parau ra e eita e tia i te mau faatereraa ia faautua i te taparahi taata no ta ˈna hara. Aita roa ˈtu, te faaite ra oia e e noaa i te taparahi taata te faautuaraa e au. Tei roto atoa anei râ te faautuaraa i te pohe?

E nehenehe e parau e tei roto atoa. Ua papu maitai te reira i te mau parau a Paulo i roto i te Ohipa i te pene 25. Ua faahapa te mau ati Iuda ia Paulo i te ofati i ta ratou Ture. I to ˈna tonoraa ˈtu i te taata o ta ˈna i tapea, o Paulo, i mua i te tavana no Roma ra, ua parau te raatira faehau, mai tei papaihia i roto i te Ohipa 23:29, e: “Ite aˈera vau e, i parihia oia i te parau-mârô-hia i roto i ta ratou iho ture, aore oia i parihia i te hara e au ai ia ˈna te pohe, e te tapea atoa hoi.” E piti matahiti i muri aˈe o Paulo i tia ˈtu ai i mua i te Tavana ra ia Phesito. Te taio ra tatou i te Ohipa 25:8 e: “Ua parau atura [o Paulo] i te faatiaraa ia ˈna iho, Aita roa a ˈu hara i te ture a te ati Iuda nei, e i te hiero, e ia Kaisara hoi.” I teie nei râ, e hiˈopoa anaˈe na i ta ˈna mau parau no nia i te utua, oia atoa i te utua pohe. Te taio ra tatou i te Ohipa 25:10, 11 e:

“Ua parau atura Paulo, Te tia nei au i mua i te haavaraa a Kaisara, o te tia ïa ia haavahia vau i reira; aita roa a ˈu hapa i te ati Iuda, ua ite hua hoi oe. E e hapa mau ta ˈu i rave, e ua rave au i te mea e au ai ia ˈu te pohe, ua tia ia ˈu te pohe; e aore roa e faufaa i te mau mea ta ratou i pari mai ia ˈu nei, aore roa e taata e tia ˈi ia tuu atu ia ˈu ia ratou: ei ia Kaisara vau.”

Ua farii o Paulo, i to ˈna tiaraa ˈtu i mua i te mana i haamauhia ma te tia maitai e, e mana to Kaisara i te faautua i te ofati ture, tae roa ˈtu i te haapohe ia ratou. Aore roa oia i patoi atu i te faautuaraa ia ˈna ahiri e ua hara oia. Hau atu, aita oia i parau e e nehenehe ta Kaisara e faaohipa i te utua pohe i te feia taparahi taata anaˈe ra.

E mea itehia e, e ere te faanahoraa haavaraa a Roma i te mea tia; oia atoa te faanahoraa tiribuna a te taata i teie mahana. E rave rahi feia aita e hara i mutaa ihora e i teie nei mahana, tei parihia e tei faautuahia. O Pilato atoa, ua parau oia no Iesu e: “Aita a ˈna hara i itea e au e au ai ia ˈna te pohe: e papai noa ˈtu vau ia ˈna, a tuu atu ai.” Oia mau, noa ˈtu e ua faˈi te mana faatere e aita ta Iesu e hapa, ua haapohe-hape-hia oia.—Luka 23:22-25.

Aita râ teie mau ohipa tia ore i turai ia Paulo aore ra ia Petero ia faaite e, e peu tiaa te utua pohe. I te mea mau râ, te manaˈo o te Atua i nia i te tupuraa teie ïa, maoro noa ˈtu â te vairaa mai o te mau mana toroa a Kaisara, tei ia ratou ‘te ˈoˈe, ei tahoo e ei tuu i te pohe i te taata i rave i te ino ra.’ E tei roto atoa te faaohiparaa i te ˈoˈe oia hoi no te horoaraa i te utua pohe. Ia mârô-anaˈe-hia râ te parau e e tia anei i te hoê faatereraa a teie nei ao ia faaohipa i to ˈna mana no te haapohe i te feia taparahi taata, e haapao maitai ïa te mau Kerisetiano eiaha e amui atu i roto i teie aimârôraa. E mea taa ê ratou i te mau raatira haapaoraa a te Amuiraa faaroo kerisetiano, e e faaatea ê mai ratou ia ratou i te mau aimârôraa atoa no nia i teie tumu parau.