Te taviniraa mitionare i to mâua iho fenua

NA ROTO i to ˈu mau tere farerei i te mau amuiraa kerisetiano, e nehenehe e parau e, te ratere nei au mai te fenua Potiti mai e tae roa ˈtu i te fenua Taina. Teie râ, aita vau e ta ˈu vahine ra o Olive e faarue nei i te fenua Beretane.

Te tere nei mâua e farerei i te mau amuiraa reo ěê a te mau Ite no Iehova, e rahi noa ˈtura e tei purara ê na roto i te fenua Beretane taatoa. Mai te motu no Jersey mai, tau 20 kilometera te atea i te pae miti no Normandie i Farani, e pǔpǔ reo Potiti to reira, e tae atu i te oire no Sunderland i te pae apatoerau no Beretane, i reira mâua e farerei ai i te feia reo Tinito tei anaanatae, te tavini nei mâua i roto i te hoê tuhaa fenua e haere noa ra i mua, tei ruperupe i te pae varua, e ua rau to ˈna mau reo. Mea nafea to mâua fanaˈoraa i teie hopoia taviniraa taa ê roa? E eaha te ohipa e tupu ra i roto i ta mâua taviniraa mitionare i to mâua iho fenua? E faatia ˈtu ïa vau.

Ua tavini mâua o Olive tau 20 matahiti i roto i te ohipa ratere, ma te tere e farerei i te hoê amuiraa ê i te mau hebedoma atoa. Ua afai to mâua mau tere ia mâua, mai te pae apatoerau mai e tae atu i te pae apatoa, e mai te pae hitia o te râ mai e tae atu i te pae tooa o te râ, na te fenua Beretane taatoa, e aita i maoro iho nei, ua tae roa mâua i ǒ to tatou mau taeae kerisetiano no te motu Mediteranea ra no Melita, i reira to mâua ite-roa-raa i te farii maitai kerisetiano aita e faaauraa. (A faaau e te Ohipa 28:1, 2.) I muri aˈe e toru matahiti i Melita, ua manaˈonaˈo atura mâua e ihea râ mâua e tonohia ˈi i muri iho. Ua manaˈo mâua e peneiaˈe, e tonohia mâua i te hoê mataeinaa no Beretane, e ua haamata ˈtura mâua i te faaineine i to mâua feruriraa no teie huru taviniraa. No reira, ua hitimahuta roa mâua i to mâua tonoraahia e tavini i teie tuhaa haaati apî e amui ra i te mau pǔpǔ e te mau amuiraa e paraparau ra e 23 reo ěê!

Ua aniani mâua e e maraa anei ia mâua ia amo i teie nei hopoia. Taa ê atu i ta mâua taviniraa i Melita, aitâ mâua i ohipa aˈenei e te mau taata no te mau nunaa e te mau hiroa tumu ěê. E nehenehe mau râ anei ta mâua e faaitoito atu i te feia o tei ore i ite maitai i te reo Beretane? Nafea hoi mâua ia paraparau atu ia ratou mai te peu e aita mâua i ite i taua mau reo ra? E te maa ïa e te mau peu ěê? E nehenehe anei ta mâua e faatano ia mâua? Ua hiti noa mai te mau uiraa mai teie te huru i roto i to mâua feruriraa, a hiˈopoa ˈi mâua na roto i te pure e nafea mâua ia pahono i teie aniraa e haere i Makedonia ra.—Ohipa 16:9, 10; Korinetia 1, 9:19-22.

Te faatitiaifaroraa i te fifi o te reo

“I te haamataraa, ua manaˈo vau e eita e maraa ia ˈu no te mea aita vau i ite i te tahi atu mau reo,” o ta Olive ïa e faataa ra. “Aita hoi au i papu e nafea vau ia tauturu atu i te mau tuahine. I muri iho, ua haamanaˈo atura vau i te faaitoitoraa ta te feia i haapii i te Bibilia na muri iho ia mâua, i horoa mai, oia hoi eiaha roa ˈtu e patoi i te hoê hopoia. Ua haapii mai raua ia mâua e eita roa ˈtu o Iehova e ani mai i te tahi mea o te ore e maraa ia tatou ia rave.” No reira, ua farii atura mâua i teie hopoia ma te aau tae.

Ia feruri anaˈe mâua i teie nei, te ite ra mâua e, no te mea e aita mâua i ite i te tahi atu reo, na te reira mau i tauturu ia mâua ia ore e hiˈo i te huru o te taata. Ei hiˈoraa, i to mâua haereraa i te mau putuputuraa i vauvauhia na roto i te reo ê i te mau hebedoma atoa, mea na reira to mâua papuraa i te huru o to tatou mau taeae ia parahi anaˈe mai ratou i roto i te mau putuputuraa na roto i te reo Beretane, e aita hoi ratou e taa ra i te parau e parauhia ra. Ua tia ia mâua ia faaineine maitai i ta mâua mau putuputuraa ia nehenehe mâua e apo mai i te tahi tuhaa o te parau i vauvauhia. E horoa noa iho â o Olive i te hoê pahonoraa i te putuputuraa. E faaineine oia i te pahonoraa na roto i te reo Beretane, e na te hoê tuahine e huri mai i te reira na ˈna, ma te papai roa mai e nafea ia faahiti. Te faˈi ra oia e, e taiâ rii oia ia afai anaˈe oia i to ˈna rima i nia no te pahono. I te tahi mau taime, e ata te taata ia pahono anaˈe oia. Tera râ, aita te reira e haaparuparu ra ia ˈna. “Ua ite au e mea oaoa roa na te mau taeae no te mea ua tamata vau i te pahono,” o ta ˈna ïa e parau ra. “I te parau mau, te faaitoito nei ta ˈu pahonoraa i te tahi atu feia mea ite aˈe ratou i taua reo ra, ia pahono atoa i te putuputuraa.”

No ˈu nei, e mea taa ê atoa ia horoa anaˈe i te mau oreroraa parau, no te mea e tia ia ˈu ia vaiiho i te taime no te taata auvaha i muri aˈe i te pereota tataitahi. E mea ohie roa hoi ia huenane noa to ˈu mau manaˈo. E tia ïa ia ˈu ia haamau atu â i to ˈu feruriraa e ia faaiti rahi mai i ta ˈu oreroraa parau. Tera râ, mea au roa na ˈu.

E taviniraa huru rau

I roto e rave rahi oire no Beretane, ua purara ê te feia reo ê, e piti i nia i te hoê aroâ, e i muri iho e haere atea ˈtu oe no te farerei i te tahi atu feia. Teie râ, ia aroha ˈtu oe ia ratou na roto i to ratou iho reo e ia ite atu oe i to ratou mata, eita oe e tatarahapa i ta oe mau tutavaraa. Mai te peu e e vauvau atu te taeae o ta ˈu e apee ra i te poroi o te Basileia na roto i te reo o te fatu fare, mea pinepine, e farii popou mai oia.

Oia mau, te taviniraa i roto i te tuhaa fenua reo ê, o te hoê ïa o te mau hopoia oaoa roa ˈˈe o ta mâua i fanaˈo aˈenei i roto i na matahiti e 40 o to mâua taviniraa i te Basileia. Mea faahiahia mau te haereraa i mua e tupu atu a muri aˈe. Aita e feaaraa e e rave rahi taata o te haapii oioi aˈe e ma te aau mehara rahi, ia haapii-anaˈe-hia ratou na roto i to ratou reo tumu. (Ohipa 2:8, 14, 41) E mea putapû roa ia ite i te mau taeae e te mau tuahine ma te roimata oaoa i te hopea o te putuputuraa, i te tahi mau taime, a tahi ra ratou e faaroo ai e e maramarama ˈi i te porotarama taatoa.

Ia poro anaˈe mâua na te mau fare, e tamata mâua i te horoa i te omuaraa parau na roto i te reo o te fatu fare, noa ˈtu e i te tahi mau taime, e hape rii ta mâua parau. Ei hiˈoraa, ia aroha oe i te hoê fatu fare Gujarati, e parau atu oe Kemcho, oia hoi “Iaorana.” Tera râ, ua hape ta ˈu parau i te hoê taime e ua parau atu vau i te iˈoa o te tahi taofe. Noa ˈtu râ, i te hoê fare, ua ata te tane e te vahine i to ˈu aroharaa ˈtu ia raua na roto i te reo Gujarati. I reira iho, ua farii ihora raua ia mâua i roto i to raua fare e ua pûpû maira i te tahi aˈua taofe—e ere râ hoi no tera parau ta ˈu i faahiti hape. E fetii Ite no Iehova to raua i roto i te pǔpǔ o ta mâua e farerei ra, e ua faaite mai raua i te anaanatae mau i te parau mau.

E rave rau matahiti to te hoê tuahine reo Beretane afai-noa-raa i te mau vea na te hoê vahine reo Tinito. I te tahi mau taime, ua ani atu oia i teie vahine ia haapii i te Bibilia ma te tamoni ore, tera râ, aita oia i farii. I te hoê mahana, ua haere atura te hoê tuahine e haapii ra i te reo Tinito na muri iho ia ˈna, e ua pûpû atura oia i te buka ra E nehenehe oe e ora e a muri noa ˈtu i roto i te paradaiso i nia i te fenua nei na roto i te reo Tinito na te vahine anaanatae, e ua farii oioi noa oia.a I te mea e e buka ta ˈna i teie nei na roto i to ˈna iho reo, ua farii aˈera oia i te hoê haapiiraa Bibilia. Ua navai noa te tahi mau parau na roto i te reo o teie vahine no te taui i te mau mea atoa.

Te mau peu nunaa ěê

Aita mâua i papu maitai na mua ˈˈe e, i roto i te tahi mau nunaa, aita te mau tane i au e ia haere noa ta ratou mau vahine i te po o ratou anaˈe. No reira, e mea fifi roa ˈtura no e rave rahi tuahine ia haere mai i te mau putuputuraa i te po. Te tiaturi nei vetahi mau huiraatira no Asia e, te mau vahine apî e maiti nei eiaha e faaipoipo e e ora noa i te fare, e haamaraa ïa ratou no te utuafare. Ua hinaaro te metua tane o te hoê tuahine apî e faataero ia ˈna, no te mea aita ta ˈna tamahine i farii i te faaipoipo i te tane o ta to ˈna fetii i maiti na ˈna. Oia mau, e mea puai mau â te mau haafifiraa te tia i teie mau tuahine ia faaoromai! Noa ˈtu râ, ia ite oe i te tauiraa ta te parau mau e faatupu nei i nia i te oraraa utuafare, e mea nafea te taiva ore o te mau tuahine Ite no Iehova ia haaputapû i to ratou mau metua, e mea faahiahia mau ïa.

I to mâua fariiraa i teie nei hopoia, ua titauhia mâua ia rave i te tahi mau tauiraa. Hou mâua a haamata ˈi i te ohipa ratere, ua matau noa vau i te amu i te maa Beretane, i teie nei râ, rahi atu te maa i te tehutehu, rahi atu ïa i te monamona. Te tatarahapa nei mâua i te mea e ua tiai mâua e rave rahi matahiti hou mâua a tamata ˈi i te maa huru rau—te iˈa ota anei aore ra te cari.

Te mau haereraa i mua no a muri aˈe

E au ra e teie te taime e hotu mai ai te mau tuhaa fenua reo ěê na te mau vahi e rave rahi. Te rahi noa ˈtura te mau papai e matara maira na roto i te mau reo ěê. Te ite mau ra tatou i te haamaitairaa a Iehova a faanahonahohia ˈi te mau amuiraa apî. Te haere roa mai nei te mau taeae o tei ite i te mau reo ěê na te mau amuiraa atea no te tauturu.

Te hoê hiˈoraa faahiahia mau, o te huru fariiraa ïa i te pororaa i te parau apî maitai o te Basileia na roto i te reo Farani. E rave rahi feia reo Farani i horo ê i te mau fenua no Zaire e vetahi atu mau fenua Afirika, o tei haere mai i Beretane i roto i te mau matahiti i mairi aˈenei. I te haamauraahia te amuiraa reo Farani matamua i Lonedona, tau 65 feia poro i te Basileia tei amui mai. Hoê matahiti i muri iho, ua maraa taue teie numera i nia i te faito 117 taata, e i rotopu ia ratou, e 48 o te tavini ra ma te taime taatoa ei mau pionie tamau. Aita i maoro, ua haamauhia ˈtura te piti o te amuiraa no te haapao i te anaanatae e rahi noa ra. I teie nei, e nehenehe ïa e haapao rahi atu â i te feia anaanatae, e 345 i tae mai i te oroa Haamanaˈoraa i te matahiti 1995 ra. Te faaohipa nei te feia tuite no Gileada i tavini na i Benin, i Côte d’Ivoire, i Maroka, e i Zaire, i te ite i noaa mai ia ratou i to ratou taviniraa ei mitionare na mua ˈˈe, no te haapao i taua tuhaa fenua ra e haere noa ra i mua, e mea maere mau te mau hotu e noaa maira.

I te hoê tere i roto i te amuiraa Farani, ua haere atu vau na muri iho i te hoê taata poro i roto i te haapiiraa Bibilia a te hoê vahine Afirika apî. I te taime a ineine ai mâua i te haere, ua taparu maira taua vahine apî ra e: “Ee, eiaha na orua e haere. A faaea mai â.” Ua hinaaro hoi oia e haapii hau atu â. Ua faahaamanaˈo oia ia ˈu ia Ludia i te senekele matamua ra.—Ohipa 16:14, 15.

Ta matou ohipa matamua, o te tautururaa ïa i te mau pǔpǔ iti reo ěê, ia riro mai ei mau amuiraa. I roto i te mau pǔpǔ i reira te mau taeae e faatupu ai i te hoê Haapiiraa Buka a te Amuiraa i te hebedoma, ua haamata matou i te hoê Haapiiraa no te Taviniraa Teotaratia haapotohia hoê taime i te avaˈe. Te tauturu nei te reira ia ratou ia paraparau maitai i roto i te taviniraa. I muri iho, e tutava ratou no te faatupu i na putuputuraa e pae atoa ra a te amuiraa. Ua haamau-aˈena-hia te mau amuiraa apî reo Farani, Gallois, Gujarati, Potiti, Punjabi, Tamil, Tapone, e Tinito (no Canton).

Ua fanaˈo atoa mâua i te haamaitairaa taa ê e haere i te mau putuputuraa a te mau taeae tariˈa turi. E mea putapû mau â ia mataitai i te mau taeae ia himene e to ratou rima. I te mea e ua taa ia ˈu e te paraparau nei ratou e te mau aparaa rima i roto i te taviniraa, te haafaahiahia nei au i ta ratou mau tutavaraa maitatai roa no te apiti i roto i te pororaa i te Basileia. Te vai atoa ra te feia huri no te feia tariˈa turi e matapo atoa. E au ra e te ara maitai ra o Iehova e ia ore te tahi taata ia moehia.

Ahiri e e tia ia mâua ia faahiti i te hoê aniraa taa ê, hoê â ïa e ta Iesu iho: “E pure outou i te Fatu o te ohipa ia tono â oia i te rave ohipa ei ooti.” (Mataio 9:38) E rave rahi o to tatou mau taeae o te farii nei i te ohipa fifi mau e haapii i te reo o te mau pǔpǔ ěê i roto i te tuhaa fenua o ta ratou amuiraa. Noa ˈtu e eita e noaa semeio mai te aravihi no te paraparau i te reo ê, te iriti mau nei o Iehova i te taviniraa i roto i teie tuhaa taviniraa mitionare i to mâua iho fenua—e tuhaa fenua o tei para no te auhune. (Ioane 4:35, 36)—Faatiahia e Colin Seymour.

[Nota i raro i te api]